நித்³தே³ஸவாரகதா²

375. நித்³தே³ஸவாரே சித்தஸ்ஸேகக்³க³தானித்³தே³ஸே தாவ ஸண்டி²தி அவட்டி²தீதி. இத³ம் த்³வயம் டி²திவேவசனமேவ. யம் பன குஸலனித்³தே³ஸே ‘ஆரம்மணம் ஓகா³ஹேத்வா அனுபவிஸித்வா திட்ட²தீதி அவட்டி²தீ’தி வுத்தம், தம் இத⁴ ந லப்³ப⁴தி. அகுஸலஸ்மிஞ்ஹி து³ப்³ப³லா சித்தஸ்ஸேகக்³க³தாதி ஹேட்டா² தீ³பிதமேவ.

384. உத்³த⁴ச்சவிசிகிச்சா²வஸேன பவத்தஸ்ஸ விஸாஹாரஸ்ஸ படிபக்க²தோ அவிஸாஹாரோதி ஏவரூபோபி அத்தோ² இத⁴ ந லப்³ப⁴தி. ஸஹஜாதத⁴ம்மே பன ந விஸாஹரதீதி அவிஸாஹாரோ. ந விக்கி²பதீதி அவிக்கே²போ. அகுஸலசித்தேகக்³க³தாவஸேன அவிஸாஹடஸ்ஸ மானஸஸ்ஸ பா⁴வோ அவிஸாஹடமானஸதா. ஸஹஜாதத⁴ம்மேஸு ந கம்பதீதி ஸமாதி⁴ப³லம். அயாதா²வஸமாதா⁴னதோ மிச்சா²ஸமாதீ⁴தி ஏவமித⁴ அத்தோ² த³ட்ட²ப்³போ³.

385. வீரியிந்த்³ரியனித்³தே³ஸே யோ ஹேட்டா² ‘நிக்கமோ சேஸோ காமானம் பனுத³னாயா’திஆதி³ நயோ வுத்தோ, ஸோ இத⁴ ந லப்³ப⁴தி. ஸஹஜாதத⁴ம்மேஸு அகம்பனட்டே²னேவ வீரியப³லம் வேதி³தப்³ப³ம்.

386. மிச்சா²தி³ட்டி²னித்³தே³ஸே அயாதா²வத³ஸ்ஸனட்டே²ன மிச்சா²தி³ட்டி². தி³ட்டீ²ஸு க³தம் இத³ம் த³ஸ்ஸனம், த்³வாஸட்டி²தி³ட்டி²அந்தோக³தத்தாதி தி³ட்டி²க³தம். ஹேட்டா²பிஸ்ஸ அத்தோ² வுத்தோயேவ. தி³ட்டி²யேவ து³ரதிக்கமனட்டே²ன தி³ட்டி²க³ஹனம், திணக³ஹனவனக³ஹனபப்³ப³தக³ஹனானி விய. தி³ட்டி²யேவ ஸாஸங்கஸப்படிப⁴யட்டே²ன தி³ட்டி²கந்தாரோ, சோரகந்தாரவாளகந்தாரமருகந்தாரனிருத³ககந்தாரது³ப்³பி⁴க்க²கந்தாரா விய. ஸம்மாதி³ட்டி²யா வினிவிஜ்ஜ²னட்டே²ன விலோமனட்டே²ன ச தி³ட்டி²விஸூகாயிகம். மிச்சா²த³ஸ்ஸனஞ்ஹி உப்பஜ்ஜமானம் ஸம்மாத³ஸ்ஸனம் வினிவிஜ்ஜ²தி சேவ விலோமேதி ச. கதா³சி ஸஸ்ஸதஸ்ஸ கதா³சி உச்சே²த³ஸ்ஸ க³ஹணதோ தி³ட்டி²யா விரூபம் ப²ந்தி³தந்தி தி³ட்டி²விப்ப²ந்தி³தம். தி³ட்டி²க³திகோ ஹி ஏகஸ்மிம் பதிட்டா²தும் ந ஸக்கோதி, கதா³சி ஸஸ்ஸதம் அனுபததி கதா³சி உச்சே²த³ம். தி³ட்டி²யேவ ப³ந்த⁴னட்டே²ன ஸம்யோஜனந்தி தி³ட்டி²ஸம்யோஜனம்.

ஸுஸுமாராத³யோ விய புரிஸம், ஆரம்மணம் த³ள்ஹம் க³ண்ஹாதீதி கா³ஹோ. பதிட்ட²ஹனதோ பதிட்டா²ஹோ. அயஞ்ஹி ப³லவப்பவத்திபா⁴வேன பதிட்ட²ஹித்வா க³ண்ஹாதி. நிச்சாதி³வஸேன அபி⁴னிவிஸதீதி அபி⁴னிவேஸோ. த⁴ம்மஸபா⁴வம் அதிக்கமித்வா நிச்சாதி³வஸேன பரதோ ஆமஸதீதி பராமாஸோ. அனத்தா²வஹத்தா குச்சி²தோ மக்³கோ³, குச்சி²தானம் வா அபாயானம் மக்³கோ³தி கும்மக்³கோ³. அயாதா²வபத²தோ மிச்சா²பதோ². யதா² ஹி தி³ஸாமூள்ஹேன அயம் அஸுககா³மஸ்ஸ நாம பதோ²தி க³ஹிதோபி தம் கா³மம் ந ஸம்பாபேதி, ஏவம் தி³ட்டி²க³திகேன ஸுக³திபதோ²தி க³ஹிதாபி தி³ட்டி² ஸுக³திம் ந பாபேதீதி அயாதா²வபத²தோ, மிச்சா²பதோ². மிச்சா²ஸபா⁴வதோ மிச்ச²த்தம். தத்தே²வ பரிப்³ப⁴மனதோ தரந்தி ஏத்த² பா³லாதி தித்த²ம். தித்த²ஞ்ச தம் அனத்தா²னஞ்ச ஆயதனந்தி தித்தா²யதனம். தித்தி²யானம் வா ஸஞ்ஜாதிதே³ஸட்டே²ன நிவாஸடா²னட்டே²ன ச ஆயதனந்திபி தித்தா²யதனம். விபரியேஸபூ⁴தோ கா³ஹோ, விபரியேஸதோ வா கா³ஹோதி விபரியேஸக்³கா³ஹோ; விபல்லத்த² கா³ஹோதி அத்தோ².

387-388. அஹிரிகானோத்தப்பனித்³தே³ஸேஸு ஹிரோத்தப்பனித்³தே³ஸவிபரியாயேன அத்தோ² வேதி³தப்³போ³. ஸஹஜாதத⁴ம்மேஸு பன அகம்பனட்டே²னேவ அஹிரிகப³லம் அனோத்தப்பப³லஞ்ச வேதி³தப்³ப³ம்.

389. லோப⁴மோஹனித்³தே³ஸேஸு லுப்³ப⁴தீதி லோபோ⁴. லுப்³ப⁴னாதி லுப்³ப⁴னாகாரோ. லோப⁴ஸம்பயுத்தசித்தம், புக்³க³லோ வா லுப்³பி⁴தோ; லுப்³பி⁴தஸ்ஸ பா⁴வோ லுப்³பி⁴தத்தம். ஸாரஜ்ஜதீதி ஸாராகோ³. ஸாரஜ்ஜனாகாரோ ஸாரஜ்ஜனா. ஸாரஜ்ஜிதஸ்ஸ பா⁴வோ ஸாரஜ்ஜிதத்தம். அபி⁴ஜ்ஜா²யனட்டே²ன அபி⁴ஜ்ஜா². புன ‘லோப⁴’-வசனே காரணம் வுத்தமேவ. அகுஸலஞ்ச தம் மூலஞ்ச அகுஸலானம் வா மூலந்தி அகுஸலமூலம்.

390. ஞாணத³ஸ்ஸனபடிபக்க²தோ அஞ்ஞாணம் அத³ஸ்ஸனம். அபி⁴முகோ² ஹுத்வா த⁴ம்மேன ந ஸமேதி, ந ஸமாக³ச்ச²தீதி அனபி⁴ஸமயோ. அனுரூபதோ த⁴ம்மே பு³ஜ்ஜ²தீதி அனுபோ³தோ⁴. தப்படிபக்க²தாய அனனுபோ³தோ⁴. அனிச்சாதீ³ஹி ஸத்³தி⁴ம் யோஜேத்வா ந பு³ஜ்ஜ²தீதி அஸம்போ³தோ⁴. அஸந்தம் அஸமஞ்ச பு³ஜ்ஜ²தீதிபி அஸம்போ³தோ⁴. சதுஸச்சத⁴ம்மம் நப்படிவிஜ்ஜ²தீதி அப்படிவேதோ⁴. ரூபாதீ³ஸு ஏகத⁴ம்மம்பி அனிச்சாதி³ஸாமஞ்ஞதோ ந ஸங்க³ண்ஹாதீதி அஸம்கா³ஹனா. தமேவ த⁴ம்மம் ந பரியோகா³ஹதீதி அபரியோகா³ஹனா. ந ஸமம் பேக்க²தீதி அஸமபேக்க²ணா. த⁴ம்மானம் ஸபா⁴வம் பதி ந அபேக்க²தீதி அபச்சவேக்க²ணா.

குஸலாகுஸலகம்மேஸு விபரீதவுத்தியா ஸபா⁴வக்³க³ஹணாபா⁴வேன வா ஏகம்பி கம்மம் ஏதஸ்ஸ பச்சக்க²ம் நத்தி², ஸயம் வா கஸ்ஸசி கம்மஸ்ஸ பச்சக்க²கரணம் நாம ந ஹோதீதி அப்பச்சக்க²கம்மம். யம் ஏதஸ்மிம் அனுப்பஜ்ஜமானே சித்தஸந்தானம் மேஜ்ஜ²ம் ப⁴வேய்ய, ஸுசி, வோதா³னம், தம் து³ட்ட²ம் மேஜ்ஜ²ம் இமினாதி து³ம்மேஜ்ஜ²ம். பா³லானம் பா⁴வோதி பா³ல்யம். முய்ஹதீதி மோஹோ. ப³லவதரோ மோஹோ பமோஹோ. ஸமந்ததோ முய்ஹதீதி ஸம்மோஹோ. விஜ்ஜாய படிபக்க²பா⁴வதோ ந விஜ்ஜாதி அவிஜ்ஜா. ஓக⁴யோக³த்தோ² வுத்தோயேவ. தா²மக³தட்டே²ன அனுஸேதீதி அனுஸயோ. சித்தம் பரியுட்டா²தி, அபி⁴ப⁴வதீதி பரியுட்டா²னம். ஹிதக்³க³ஹணாபா⁴வேன ஹிதாபி⁴முக²ம் க³ந்தும் ந ஸக்கோதி, அஞ்ஞத³த்து² லங்க³தியேவாதி லங்கீ³; க²ஞ்ஜதீதி அத்தோ². து³ருக்³கா⁴டனட்டே²ன வா லங்கீ³. யதா² ஹி மஹாபலிக⁴ஸங்கா²தா லங்கீ³ து³ருக்³கா⁴டா ஹோதி, ஏவமயம்பி லங்கீ³ வியாதி லங்கீ³. ஸேஸம் உத்தானத்த²மேவ. ஸங்க³ஹவாரஸுஞ்ஞதவாராபி ஹேட்டா² வுத்தனயேனேவ அத்த²தோ வேதி³தப்³பா³தி.

து³தியசித்தம்

399. து³தியசித்தே ஸஸங்கா²ரேனாதி பத³ம் விஸேஸம். தம்பி ஹேட்டா² வுத்தத்த²மேவ. இத³ம் பன சித்தம் கிஞ்சாபி ச²ஸு ஆரம்மணேஸு ஸோமனஸ்ஸிதஸ்ஸ லோப⁴ம் உப்பாதே³த்வா ‘ஸத்தோ ஸத்தோ’திஆதி³னா நயேன பராமஸந்தஸ்ஸ உப்பஜ்ஜதி, ததா²பி ஸஸங்கா²ரிகத்தா ஸப்பயோகே³ன ஸஉபாயேன உப்பஜ்ஜனதோ – யதா³ குலபுத்தோ மிச்சா²தி³ட்டி²கஸ்ஸ குலஸ்ஸ குமாரிகம் பத்தே²தி. தே ச ‘அஞ்ஞதி³ட்டி²கா தும்ஹே’தி குமாரிகம் ந தே³ந்தி. அத²ஞ்ஞே ஞாதகா ‘யம் தும்ஹே கரோத² தமேவாயம் கரிஸ்ஸதீ’தி தா³பேந்தி. ஸோ தேஹி ஸத்³தி⁴ம் தித்தி²யே உபஸங்கமதி. ஆதி³தோவ வேமதிகோ ஹோதி. க³ச்ச²ந்தே க³ச்ச²ந்தே காலே ஏதேஸம் கிரியா மனாபாதி லத்³தி⁴ம் ரோசேதி, தி³ட்டி²ம் க³ண்ஹாதி – ஏவரூபே காலே இத³ம் லப்³ப⁴தீதி வேதி³தப்³ப³ம்.

யேவாபனகேஸு பனேத்த² தி²னமித்³த⁴ம் அதி⁴கம். தத்த² தி²னனதா ‘தி²னம்’. மித்³த⁴னதா ‘மித்³த⁴ம்’; அனுஸ்ஸாஹஸம்ஹனனதா அஸத்திவிகா⁴தோ சாதி அத்தோ². தி²னஞ்ச மித்³த⁴ஞ்ச தி²னமித்³த⁴ம். தத்த² தி²னம் அனுஸ்ஸாஹலக்க²ணம், வீரியவினோத³னரஸம், ஸம்ஸீத³னபச்சுபட்டா²னம். மித்³த⁴ம் அகம்மஞ்ஞதாலக்க²ணம், ஓனஹனரஸம், லீனபா⁴வபச்சுபட்டா²னம் பசலாயிகானித்³தா³பச்சுபட்டா²னம் வா. உப⁴யம்பி அரதிதந்தீ³விஜம்பி⁴தாதீ³ஸு அயோனிஸோமனஸிகாரபத³ட்டா²னந்தி.

ததியசித்தம்

400. ததியம் ச²ஸு ஆரம்மணேஸு ஸோமனஸ்ஸிதஸ்ஸ லோப⁴ம் உப்பாதே³த்வா ‘ஸத்தோ ஸத்தோ’திஆதி³னா நயேன அபராமஸந்தஸ்ஸ நாராயணவிராஜனமல்லயுத்³த⁴னடஸமஜ்ஜாதீ³னி பஸ்ஸதோ மனாபியஸத்³த³ஸவனாதி³பஸுதஸ்ஸ வா உப்பஜ்ஜதி. இத⁴ மானேன ஸத்³தி⁴ம் பஞ்ச அபண்ணகங்கா³னி ஹோந்தி. தத்த² மஞ்ஞதீதி ‘மானோ’. ஸோ உன்னதிலக்க²ணோ, ஸம்பக்³க³ஹரஸோ, கேதுகம்யதாபச்சுபட்டா²னோ, தி³ட்டி²விப்பயுத்தலோப⁴பத³ட்டா²னோ, உம்மாதோ³ விய த³ட்ட²ப்³போ³தி.

சதுத்த²சித்தம்

402. சதுத்த²ம் வுத்தப்பகாரேஸு ஏவ டா²னேஸு யதா³ ஸீஸே கே²ளம் கி²பந்தி, பாத³பம்ஸும் ஓகிரந்தி, ததா³ தஸ்ஸ பரிஹரணத்த²ம் ஸஉஸ்ஸாஹேன அந்தரந்தரா ஓலோகேந்தானம் ராஜனாடகேஸு நிக்க²ந்தேஸு உஸ்ஸாரணாய வத்தமானாய தேன தேன சி²த்³தே³ன ஓலோகேந்தானஞ்சாதி ஏவமாதீ³ஸு டா²னேஸு உப்பஜ்ஜதி. இத⁴ பன தி²னமித்³தே⁴ஹி ஸத்³தி⁴ம் ஸத்த யேவாபனகா ஹோந்தி. உப⁴யத்தா²பி மிச்சா²தி³ட்டி² பரிஹாயதி. தம் ட²பேத்வா ஸேஸானம் வஸேன த⁴ம்மக³ணனா வேதி³தப்³பா³தி.

பஞ்சமசித்தம்

403. பஞ்சமம் ச²ஸு ஆரம்மணேஸு வேத³னாவஸேன மஜ்ஜ²த்தஸ்ஸ லோப⁴ம் உப்பாதே³த்வா ‘ஸத்தோ ஸத்தோ’திஆதி³னா நயேன பராமஸந்தஸ்ஸ உப்பஜ்ஜதி. ஸோமனஸ்ஸட்டா²னே பனேத்த² உபேக்கா²வேத³னா ஹோதி, பீதிபத³ம் பரிஹாயதி. ஸேஸம் ஸப்³ப³ம் பட²மசித்தஸதி³ஸமேவ.

ச²ட்ட²சித்தாதி³

409-412. ச²ட்ட²ஸத்தமட்ட²மானிபி வேத³னம் பரிவத்தேத்வா பீதிபத³ஞ்ச ஹாபேத்வா து³தியததியசதுத்தே²ஸு வுத்தனயேனேவ வேதி³தப்³பா³னி. இமேஸு அட்ட²ஸு லோப⁴ஸஹக³தசித்தேஸு ஸஹஜாதாதி⁴பதி ஆரம்மணாதி⁴பதீதி த்³வேபி அதி⁴பதயோ லப்³ப⁴ந்தி.

நவமசித்தம்

413. நவமம் ச²ஸு ஆரம்மணேஸு தோ³மனஸ்ஸிதஸ்ஸ படிக⁴ம் உப்பாத³யதோ உப்பஜ்ஜதி. தஸ்ஸ ஸமயவவத்தா²னவாரே தாவ து³ட்டு² மனோ, ஹீனவேத³னத்தா வா குச்சி²தம் மனோதி து³ம்மனோ; து³ம்மனஸ்ஸ பா⁴வோ தோ³மனஸ்ஸம். தேன ஸஹக³தந்தி தோ³மனஸ்ஸஸஹக³தம். அஸம்பியாயனபா⁴வேன ஆரம்மணஸ்மிம் படிஹஞ்ஞதீதி படிக⁴ம். தேன ஸம்பயுத்தந்தி படிக⁴ஸம்பயுத்தம்.

த⁴ம்முத்³தே³ஸே தீஸுபி டா²னேஸு தோ³மனஸ்ஸவேத³னாவ ஆக³தா. தத்த² வேத³னாபத³ம் வுத்தமேவ. ததா² து³க்க²தோ³மனஸ்ஸபதா³னி லக்க²ணாதி³தோ பன அனிட்டா²ரம்மணானுப⁴வனலக்க²ணம் தோ³மனஸ்ஸம், யதா²ததா² வா அனிட்டா²காரஸம்போ⁴க³ரஸம், சேதஸிகாபா³த⁴பச்சுபட்டா²னம், ஏகந்தேனேவ ஹத³யவத்து²பத³ட்டா²னம்.

மூலகம்மபதே²ஸு யதா² புரிமசித்தேஸு லோபோ⁴ ஹோதி, அபி⁴ஜ்ஜா² ஹோதீதி ஆக³தம், ஏவம் தோ³ஸோ ஹோதி, ப்³யாபாதோ³ ஹோதீதி வுத்தம். தத்த² து³ஸ்ஸந்தி தேன, ஸயம் வா து³ஸ்ஸதி, து³ஸ்ஸனமத்தமேவ வா தந்தி தோ³ஸோ ஸோ சண்டி³க்கலக்க²ணோ பஹடாஸிவிஸோ விய, விஸப்பனரஸோ விஸனிபாதோ விய, அத்தனோ நிஸ்ஸயத³ஹனரஸோ வா தா³வக்³கி³ விய, து³ஸ்ஸனபச்சுபட்டா²னோ லத்³தோ⁴காஸோ விய ஸபத்தோ, ஆகா⁴தவத்து²பத³ட்டா²னோ விஸஸம்ஸட்ட²பூதிமுத்தம் விய த³ட்ட²ப்³போ³.

ப்³யாபஜ்ஜதி தேன சித்தம், பூதிபா⁴வம் உபக³ச்ச²தி, ப்³யாபாத³யதி வா வினயாசாரரூபஸம்பத்திஹிதஸுகா²தீ³னீதி ப்³யாபாதோ³. அத்த²தோ பனேஸ தோ³ஸோயேவ. இத⁴ பத³படிபாடியா ஏகூனதிம்ஸ பதா³னி ஹோந்தி. அக்³க³ஹிதக்³க³ஹணேன சுத்³த³ஸ. தேஸம் வஸேன ஸவிப⁴த்திகாவிப⁴த்திகராஸிபே⁴தோ³ வேதி³தப்³போ³.

யேவாபனகேஸு ச²ந்தா³தி⁴மோக்க²மனஸிகாரஉத்³த⁴ச்சானி நியதானி. இஸ்ஸாமச்ச²ரியகுக்குச்சேஸு பன அஞ்ஞதரேன ஸத்³தி⁴ம் பஞ்ச பஞ்ச ஹுத்வாபி உப்பஜ்ஜந்தி. ஏவமேபி தயோ த⁴ம்மா அனியதயேவாபனகா நாம. தேஸு இஸ்ஸதீதி ‘இஸ்ஸா’. ஸா பரஸம்பத்தீனம் உஸூயனலக்க²ணா, தத்தே²வ அனபி⁴ரதிரஸா, ததோ விமுக²பா⁴வபச்சுபட்டா²னா, பரஸம்பத்திபத³ட்டா²னா. ஸம்யோஜனந்தி த³ட்ட²ப்³பா³. மச்சே²ரபா⁴வோ ‘மச்ச²ரியம்’. தம் லத்³தா⁴னம் வா லபி⁴தப்³பா³னம் வா அத்தனோ ஸம்பத்தீனம் நிகூ³ஹனலக்க²ணம், தாஸம்யேவ பரேஹி ஸாதா⁴ரணபா⁴வஅக்க²மனரஸம், ஸங்கோசனபச்சுபட்டா²னம் கடுகஞ்சுகதாபச்சுபட்டா²னம் வா, அத்தஸம்பத்திபத³ட்டா²னம். சேதஸோ விரூபபா⁴வோதி த³ட்ட²ப்³ப³ம். குச்சி²தம் கதம் குகதம். தஸ்ஸ பா⁴வோ ‘குக்குச்சம்’. தம் பச்சா²னுதாபலக்க²ணம், கதாகதானுஸோசனரஸம், விப்படிஸாரபச்சுபட்டா²னம், கதாகதபத³ட்டா²னம். தா³ஸப்³யம் விய த³ட்ட²ப்³ப³ம். அயம் தாவ உத்³தே³ஸவாரே விஸேஸோ.

415. நித்³தே³ஸவாரே வேத³னானித்³தே³ஸே அஸாதம் ஸாதபடிபக்க²வஸேன வேதி³தப்³ப³ம்.

418. தோ³ஸனித்³தே³ஸே து³ஸ்ஸதீதி தோ³ஸோ. து³ஸ்ஸனாதி து³ஸ்ஸனாகாரோ. து³ஸ்ஸிதத்தந்தி து³ஸ்ஸிதபா⁴வோ. பகதிபா⁴வவிஜஹனட்டே²ன ப்³யாபஜ்ஜனம் ப்³யாபத்தி. ப்³யாபஜ்ஜனாதி ப்³யாபஜ்ஜனாகாரோ. விருஜ்ஜ²தீதி விரோதோ⁴. புனப்புனம் விருஜ்ஜ²தீதி படிவிரோதோ⁴. விருத்³தா⁴காரபடிவிருத்³தா⁴காரவஸேன வா இத³ம் வுத்தம். சண்டி³கோ வுச்சதி சண்டோ³, த²த்³த⁴புக்³க³லோ; தஸ்ஸ பா⁴வோ சண்டி³க்கம். ந ஏதேன ஸுரோபிதம் வசனம் ஹோதி, து³ருத்தம் அபரிபுண்ணமேவ ஹோதீதி அஸுரோபோ. குத்³த⁴காலே ஹி பரிபுண்ணவசனம் நாம நத்தி². ஸசேபி கஸ்ஸசி ஹோதி தம் அப்பமாணம். அபரே பன அஸ்ஸுஜனனட்டே²ன அஸ்ஸுரோபனதோ அஸ்ஸுரோபோதி வத³ந்தி. தம் அகாரணம், ஸோமனஸ்ஸஸ்ஸாபி அஸ்ஸுஜனனதோ. ஹேட்டா² வுத்தஅத்தமனதாபடிபக்க²தோ ந அத்தமனதாதி அனத்தமனதா. ஸா பன யஸ்மா சித்தஸ்ஸேவ, ந ஸத்தஸ்ஸ, தஸ்மா சித்தஸ்ஸாதி வுத்தம். ஸேஸமேத்த² ஸங்க³ஹஸுஞ்ஞதவாரேஸு ச ஹேட்டா² வுத்தனயேனேவ வேதி³தப்³ப³ந்தி.

த³ஸமசித்தம்

421. த³ஸமம் ஸஸங்கா²ரத்தா பரேஹி உஸ்ஸாஹிதஸ்ஸ வா, பரேஸம் வா அபராத⁴ம் ஸாரிதஸ்ஸ, ஸயமேவ வா பரேஸம் அபராத⁴ம் அனுஸ்ஸரித்வா குஜ்ஜ²மானஸ்ஸ உப்பஜ்ஜதி.

இதா⁴பி பத³படிபாடியா ஏகூனதிம்ஸ, அக்³க³ஹிதக்³க³ஹணேன ச சுத்³த³ஸேவ பதா³னி ஹோந்தி. யேவாபனகேஸு பன தி²னமித்³த⁴ம்பி லப்³ப⁴தி. தஸ்மா ஏத்த² வினா இஸ்ஸாமச்ச²ரியகுக்குச்சேஹி சத்தாரி அபண்ணகங்கா³னி தி²னமித்³த⁴ந்தி இமே ச² இஸ்ஸாதீ³னம் உப்பத்திகாலே தேஸு அஞ்ஞதரேன ஸத்³தி⁴ம் ஸத்த யேவாபனகா ஏகக்க²ணே உப்பஜ்ஜந்தி. ஸேஸம் ஸப்³ப³ம் ஸப்³ப³வாரேஸு நவமஸதி³ஸமேவ. இமேஸு பன த்³வீஸு தோ³மனஸ்ஸசித்தேஸு ஸஹஜாதாதி⁴பதியேவ லப்³ப⁴தி, ந ஆரம்மணாதி⁴பதி. ந ஹி குத்³தோ⁴ கிஞ்சி க³ரும் கரோதீதி.

ஏகாத³ஸமசித்தம்

422. ஏகாத³ஸமம் ச²ஸு ஆரம்மணேஸு வேத³னாவஸேன மஜ்ஜ²த்தஸ்ஸ கங்கா²பவத்திகாலே உப்பஜ்ஜதி. தஸ்ஸ ஸமயவவத்தா²னே விசிகிச்சா²ஸம்பயுத்தந்தி பத³ம் அபுப்³ப³ம். தஸ்ஸத்தோ² – விசிகிச்சா²ய ஸம்பயுத்தந்தி விசிகிச்சா²ஸம்பயுத்தம். த⁴ம்முத்³தே³ஸே ‘விசிகிச்சா² ஹோதீ’தி பத³மேவ விஸேஸோ. தத்த² விக³தா சிகிச்சா²தி விசிகிச்சா². ஸபா⁴வம் வா விசினந்தோ ஏதாய கிச்ச²தி கிலமதீதி விசிகிச்சா². ஸா ஸம்ஸயலக்க²ணா, கம்பனரஸா, அனிச்ச²யபச்சுபட்டா²னா அனேகம்ஸகா³ஹபச்சுபட்டா²னா வா, அயோனிஸோமனஸிகாரபத³ட்டா²னா. படிபத்திஅந்தராயகராதி த³ட்ட²ப்³பா³.

இத⁴ பத³படிபாடியா தேவீஸதி பதா³னி ஹோந்தி. அக்³க³ஹிதக்³க³ஹணேன சுத்³த³ஸ. தேஸம் வஸேன ஸவிப⁴த்திகாவிப⁴த்திகராஸிவினிச்ச²யோ வேதி³தப்³போ³. மனஸிகாரோ உத்³த⁴ச்சந்தி த்³வேயேவ யேவாபனகா.

424. நித்³தே³ஸவாரஸ்ஸ சித்தஸ்ஸேகக்³க³தானித்³தே³ஸே யஸ்மா இத³ம் து³ப்³ப³லம் சித்தம் பவத்திட்டி²திமத்தகமேவேத்த² ஹோதி, தஸ்மா ‘ஸண்டி²தீ’திஆதீ³னி அவத்வா சித்தஸ்ஸ ‘டி²தீ’தி ஏகமேவ பத³ம் வுத்தம். தேனேவ ச காரணேன உத்³தே³ஸவாரேபி ‘ஸமாதி⁴ந்த்³ரிய’ந்திஆதி³ ந வுத்தம்.

425. விசிகிச்சா²னித்³தே³ஸே கங்க²னவஸேன கங்கா². கங்கா²ய ஆயனாதி கங்கா²யனா. புரிமகங்கா² ஹி உத்தரகங்க²ம் ஆனேதி நாம. ஆகாரவஸேன வா ஏதம் வுத்தம். கங்கா²ஸமங்கி³சித்தம் கங்கா²ய ஆயிதத்தா கங்கா²யிதம் நாம. தஸ்ஸ பா⁴வோ கங்கா²யிதத்தம். விமதீதி நமதி. விசிகிச்சா² வுத்தத்தா² ஏவ. கம்பனட்டே²ன த்³விதா⁴ ஏளயதீதி த்³வேள்ஹகம். படிபத்தினிவாரணேன த்³விதா⁴பதோ² வியாதி த்³வேதா⁴பதோ². ‘நிச்சம் நு கோ² இத³ம், அனிச்சம் நு கோ²’திஆதி³பவத்தியா ஏகஸ்மிம் ஆகாரே ஸண்டா²தும் அஸமத்த²தாய ஸமந்ததோ ஸேதீதி ஸம்ஸயோ. ஏகம்ஸம் க³ஹேதும் அஸமத்த²தாய ந ஏகம்ஸக்³கா³ஹோதி அனேகம்ஸக்³கா³ஹோ. நிச்சே²தும் அஸக்கோந்தீ ஆரம்மணதோ ஓஸக்கதீதி ஆஸப்பனா. ஓகா³ஹிதும் அஸக்கோந்தீ பரிஸமந்ததோ ஸப்பதீதி பரிஸப்பனா. பரியோகா³ஹிதும் அஸமத்த²தாய அபரியோகா³ஹனா. நிச்ச²யவஸேன ஆரம்மணே பவத்திதும் அஸமத்த²தாய த²ம்பி⁴தத்தம்; சித்தஸ்ஸ த²த்³த⁴பா⁴வோதி அத்தோ². விசிகிச்சா² ஹி உப்பஜ்ஜித்வா சித்தம் த²த்³த⁴ம் கரோதி. யஸ்மா பனேஸா உப்பஜ்ஜமானா ஆரம்மணம் க³ஹேத்வா மனம் விலிக²ந்தீ விய, தஸ்மா மனோவிலேகோ²தி வுத்தா. ஸேஸம் ஸப்³ப³த்த² உத்தானத்த²மேவ.

த்³வாத³ஸமசித்தம்

427. த்³வாத³ஸமஸ்ஸ ஸமயவவத்தா²னே உத்³த⁴ச்சேன ஸம்பயுத்தந்தி உத்³த⁴ச்சஸம்பயுத்தம். இத³ஞ்ஹி சித்தம் ச²ஸு ஆரம்மணேஸு வேத³னாவஸேன மஜ்ஜ²த்தம் ஹுத்வா உத்³த⁴தம் ஹோதி. இத⁴ த⁴ம்முத்³தே³ஸே ‘விசிகிச்சா²’-டா²னே ‘உத்³த⁴ச்சம் ஹோதீ’தி ஆக³தம். பத³படிபாடியா அட்ட²வீஸதி பதா³னி ஹோந்தி. அக்³க³ஹிதக்³க³ஹணேன சுத்³த³ஸ. தேஸம் வஸேன ஸவிப⁴த்திகாவிப⁴த்திகராஸிவிதா⁴னம் வேதி³தப்³ப³ம். அதி⁴மோக்கோ² மனஸிகாரோதி த்³வேயேவ யேவாபனகா.

429. நித்³தே³ஸவாரஸ்ஸ உத்³த⁴ச்சனித்³தே³ஸே சித்தஸ்ஸாதி ந ஸத்தஸ்ஸ, ந போஸஸ்ஸ. உத்³த⁴ச்சந்தி உத்³த⁴தாகாரோ. ந வூபஸமோதி அவூபஸமோ. சேதோ விக்கி²பதீதி சேதஸோவிக்கே²போ. ப⁴ந்தத்தம் சித்தஸ்ஸாதி சித்தஸ்ஸ ப⁴ந்தபா⁴வோ, ப⁴ந்தயானப⁴ந்தகோ³ணாதீ³னி விய. இமினா ஏகாரம்மணஸ்மிம்யேவ விப்ப²ந்த³னம் கதி²தம். உத்³த⁴ச்சஞ்ஹி ஏகாரம்மணே விப்ப²ந்த³தி, விசிகிச்சா² நானாரம்மணே. ஸேஸம் ஸப்³ப³வாரேஸு ஹேட்டா² வுத்தனயேனேவ வேதி³தப்³ப³ம்.

இதா³னி இமஸ்மிம் சித்தத்³வயே பகிண்ணகவினிச்ச²யோ ஹோதி. ‘ஆரம்மணே பவட்டனகசித்தானி நாம கதீ’தி? ஹி வுத்தே ‘இமானேவ த்³வே’தி வத்தப்³ப³ம். தத்த² விசிகிச்சா²ஸஹக³தம் ஏகந்தேன பவட்டதி, உத்³த⁴ச்சஸஹக³தம் பன லத்³தா⁴தி⁴மோக்க²த்தா லத்³த⁴பதிட்ட²ம் பவட்டதி. யதா² ஹி வட்டசதுரஸ்ஸேஸு த்³வீஸு மணீஸு பப்³பா⁴ரட்டா²னே பவட்டேத்வா விஸ்ஸட்டே²ஸு வட்டமணி ஏகந்தேனேவ பவட்டதி, சதுரஸ்ஸோ பதிட்டா²ய பதிட்டா²ய பவட்டதி, ஏவம்ஸம்பத³மித³ம் வேதி³தப்³ப³ம். ஸப்³பே³ஸுபி ஹீனாதி³பே⁴தோ³ ந உத்³த⁴டோ, ஸப்³பே³ஸம் ஏகந்தஹீனத்தா. ஸஹஜாதாதி⁴பதி லப்³ப⁴மானோபி ந உத்³த⁴டோ, ஹேட்டா² த³ஸ்ஸிதனயத்தா. ஞாணாபா⁴வதோ பனேத்த² வீமம்ஸாதி⁴பதி நாம நத்தி². பச்சி²மத்³வயே ஸேஸோபி நத்தி² ஏவ. கஸ்மா? கஞ்சி த⁴ம்மம் து⁴ரம் கத்வா அனுப்பஜ்ஜனதோ, பட்டா²னே ச படிஸித்³த⁴தோ.

இமேஹி பன த்³வாத³ஸஹிபி அகுஸலசித்தேஹி கம்மே ஆயூஹிதே, ட²பேத்வா உத்³த⁴ச்சஸஹக³தம், ஸேஸானி ஏகாத³ஸேவ படிஸந்தி⁴ம் ஆகட்³ட⁴ந்தி. விசிகிச்சா²ஸஹக³தே அலத்³தா⁴தி⁴மோக்கே² து³ப்³ப³லேபி படிஸந்தி⁴ம் ஆகட்³ட⁴மானே உத்³த⁴ச்சஸஹக³தம் லத்³தா⁴தி⁴மோக்க²ம் ப³லவம் கஸ்மா நாகட்³ட⁴தீதி? த³ஸ்ஸனேன பஹாதப்³பா³பா⁴வதோ. யதி³ ஹி ஆகட்³டே⁴ய்ய ‘த³ஸ்ஸனேனபஹாதப்³ப³’-பத³விப⁴ங்கே³ ஆக³ச்சே²ய்ய, தஸ்மா, ட²பேத்வா தம், ஸேஸானி ஏகாத³ஸ ஆகட்³ட⁴ந்தி. தேஸு ஹி யேன கேனசி கம்மே ஆயூஹிதே தாய சேதனாய சதூஸு அபாயேஸு படிஸந்தி⁴ ஹோதி. அகுஸலவிபாகேஸு அஹேதுகமனோவிஞ்ஞாணதா⁴துஉபேக்கா²ஸஹக³தாய படிஸந்தி⁴ம் க³ண்ஹாதி. இதரஸ்ஸாபி ஏத்தே²வ படிஸந்தி⁴தா³னம் ப⁴வேய்ய. யஸ்மா பனேதம் நத்தி², தஸ்மா ‘த³ஸ்ஸனேனபஹாதப்³ப³’-பத³விப⁴ங்கே³ நாக³தந்தி.

அகுஸலா த⁴ம்மாதிபத³ஸ்ஸ வண்ணனா நிட்டி²தா.