5. தா³னூபபத்திஸுத்தவண்ணனா

35. பஞ்சமே தா³னூபபத்தியோதி தா³னபச்சயா உபபத்தியோ. த³ஹதீதி ட²பேதி. அதி⁴ட்டா²தீதி தஸ்ஸேவ வேவசனம். பா⁴வேதீதி வட்³டே⁴தி. ஹீனே விமுத்தந்தி ஹீனேஸு பஞ்சஸு காமகு³ணேஸு விமுத்தம். உத்தரி அபா⁴விதந்தி ததோ உத்தரிமக்³க³ப²லத்தா²ய அபா⁴விதம். தத்ரூபபத்தியா ஸம்வத்ததீதி யம் டா²னம் பத்தே²த்வா குஸலம் கதம், தத்த² நிப்³ப³த்தனத்தா²ய ஸம்வத்ததி. வீதராக³ஸ்ஸாதி மக்³கே³ன வா ஸமுச்சி²ன்னராக³ஸ்ஸ ஸமாபத்தியா வா விக்க²ம்பி⁴தராக³ஸ்ஸ. தா³னமத்தேனேவ ஹி ப்³ரஹ்மலோகே நிப்³ப³த்திதும் ந ஸக்கா, தா³னம் பன ஸமாதி⁴விபஸ்ஸனாசித்தஸ்ஸ அலங்காரபரிவாரம் ஹோதி. ததோ தா³னேன முது³சித்தோ ப்³ரஹ்மவிஹாரே பா⁴வேத்வா ப்³ரஹ்மலோகே நிப்³ப³த்ததி. தேன வுத்தம் – ‘‘வீதராக³ஸ்ஸ நோ ஸராக³ஸ்ஸா’’தி.