6. புஞ்ஞகிரியவத்து²ஸுத்தவண்ணனா

36. ச²ட்டே² புஞ்ஞகிரியானி ச தானி தேஸம் தேஸம் ஆனிஸம்ஸானம் வத்தூ²னி சாதி புஞ்ஞகிரியவத்தூ²னி. தா³னாதீ³னஞ்ஹி லக்க²ணே சித்தம் ட²பேத்வா ‘‘ஏவரூபம் நாம அம்ஹேஹி தா³னம் தா³தப்³ப³ம், ஸீலம் ரக்கி²தப்³ப³ம், பா⁴வனா பா⁴வேதப்³பா³’’தி ஸத்தா புஞ்ஞானி கரோந்தி. தா³னமேவ தா³னமயம், தா³னசேதனாஸு வா புரிமசேதனாதோ நிப்ப²ன்னா ஸன்னிட்டா²பகசேதனா தா³னமயம் ஸீலாதீ³ஹி ஸீலமயாதீ³னி விய. ஸேஸத்³வயேஸுபி ஏஸேவ நயோ. பரித்தம் கதம் ஹோதீதி தோ²கம் மந்த³ம் கதம் ஹோதி. நாபி⁴ஸம்போ⁴தீதி ந நிப்ப²ஜ்ஜதி. அகதம் ஹோதீதி பா⁴வனாயயோகோ³யேவ அனாரத்³தோ⁴ ஹோதீதி அத்தோ². மனுஸ்ஸதோ³ப⁴க்³யந்தி மனுஸ்ஸேஸு ஸம்பத்திரஹிதம் பஞ்சவித⁴ம் நீசகுலம். உபபஜ்ஜதீதி படிஸந்தி⁴வஸேன உபக³ச்ச²தி, தத்த² நிப்³ப³த்ததீதி அத்தோ². மத்தஸோ கதந்தி பமாணேன கதம், தோ²கம் ந ப³ஹு. மனுஸ்ஸஸோப⁴க்³யந்தி மனுஸ்ஸேஸு ஸுப⁴க³பா⁴வம் திவித⁴குலஸம்பத்திம். அதி⁴மத்தந்தி அதி⁴கப்பமாணம் ப³லவம் வா. அதி⁴க³ண்ஹந்தீதி அபி⁴ப⁴வித்வா க³ண்ஹந்தி, விஸிட்ட²தரா ஜேட்ட²கா ஹோந்தீதி அத்தோ².