6. அப்³யாகதவக்³கோ³

1. அப்³யாகதஸுத்தவண்ணனா

54. ச²ட்ட²வக்³க³ஸ்ஸ பட²மே அப்³யாகதவத்தூ²ஸூதி ஏகம்ஸாதி³வஸேன அகதி²தவத்தூ²ஸு. ததா²க³தோதி ஸத்தோ. தி³ட்டி²க³தமேதந்தி மிச்சா²தி³ட்டி²மத்தகமேதம், ந தாய தி³ட்டி²யா க³ஹிதஸத்தோ நாம அத்தி². படிபத³ந்தி அரியமக்³க³ம். ந ச²ம்ப⁴தீதி தி³ட்டி²வஸேன ந கம்பதி. ஸேஸபதே³ஸுபி ஏஸேவ நயோ. தண்ஹாக³தந்தி தி³ட்டி²தண்ஹா. ஸஞ்ஞாக³தாதீ³ஸுபி ஏஸேவ நயோ. தி³ட்டி²ஸஞ்ஞா ஏவ ஹேத்த² ஸஞ்ஞாக³தம், தி³ட்டி²னிஸ்ஸிதமானோயேவ தி³ட்டி²மஞ்ஞிதமேவ வா மஞ்ஞிதம், தி³ட்டி²பபஞ்சோவ பபஞ்சிதம், தி³ட்டு²பாதா³னமேவ உபாதா³னம், தி³ட்டி²யா விரூபம் படிஸரணபா⁴வோயேவ விப்படிஸாரோ நாமாதி வேதி³தப்³போ³. ஏத்த² ச தி³ட்டி²க்³க³ஹணேன த்³வாஸட்டி² தி³ட்டி²யோ, தி³ட்டி²னிரோத⁴கா³மினிபடிபதா³க³ஹணேன ஸோதாபத்திமக்³கோ³ க³ஹிதோதி.

2. புரிஸக³திஸுத்தவண்ணனா

55. து³தியே புரிஸக³தியோதி புரிஸஸ்ஸ ஞாணக³தியோ. அனுபாதா³பரினிப்³பா³னந்தி அபச்சயனிப்³பா³னம். நோ சஸ்ஸாதி அதீதே அத்தபா⁴வனிப்³ப³த்தகம் கம்மம் நோ சே அப⁴விஸ்ஸ. நோ ச மே ஸியாதி ஏதரஹி மே அயம் அத்தபா⁴வோ ந ஸியா. ந ப⁴விஸ்ஸதீதி ஏதரஹி மே அனாக³தத்தபா⁴வனிப்³ப³த்தகம் கம்மம் ந ப⁴விஸ்ஸதி. ந ச மே ப⁴விஸ்ஸதீதி அனாக³தே மே அத்தபா⁴வோ ந ப⁴விஸ்ஸதி. யத³த்தி² யம் பூ⁴தந்தி யம் அத்தி² யம் பூ⁴தம் பச்சுப்பன்னக்க²ந்த⁴பஞ்சகம். தம் பஜஹாமீதி உபேக்க²ம் படிலப⁴தீதி தம் தத்த² ச²ந்த³ராக³ப்பஹானேன பஜஹாமீதி விபஸ்ஸனுபேக்க²ம் படிலப⁴தி. ப⁴வே ந ரஜ்ஜதீதி அதீதே க²ந்த⁴பஞ்சகே தண்ஹாதி³ட்டீ²ஹி ந ரஜ்ஜதி. ஸம்ப⁴வே ந ரஜ்ஜதீதி அனாக³தேபி ததே²வ ந ரஜ்ஜதி. அத்து²த்தரி பத³ம் ஸந்தந்தி உத்தரி ஸந்தம் நிப்³பா³னபத³ம் நாம அத்தி². ஸம்மப்பஞ்ஞாய பஸ்ஸதீதி தம் ஸஹவிபஸ்ஸனாய மக்³க³பஞ்ஞாய ஸம்மா பஸ்ஸதி. ந ஸப்³பே³ன ஸப்³ப³ந்தி ஏகச்சானம் கிலேஸானம் அப்பஹீனத்தா ஸச்சபடிச்சா²த³கஸ்ஸ தமஸ்ஸ ஸப்³ப³ஸோ அவித்³த⁴ம்ஸிதத்தா ந ஸப்³பா³காரேன ஸப்³ப³ம். ஹஞ்ஞமானேதி ஸண்டா³ஸேன க³ஹேத்வா முட்டி²காய கோட்டியமானே. அந்தராபரினிப்³பா³யீதி உபபத்திஸமனந்தரதோ பட்டா²ய ஆயுனோ வேமஜ்ஜ²ம் அனதிக்கமித்வா ஏத்த²ந்தரே கிலேஸபரினிப்³பா³னேன பரினிப்³பு³தோ ஹோதி. அனுபஹச்ச தலந்தி ஆகாஸதலம் அனுபஹச்ச அனதிக்கமித்வா, பூ⁴மிம் அப்பத்வா ஆகாஸேயேவ நிப்³பா³யேய்யாதி இமாஹி தீஹி உபமாஹி தயோ அந்தராபரினிப்³பா³யீ த³ஸ்ஸிதா.

உபஹச்சபரினிப்³பா³யீதி ஆயுவேமஜ்ஜ²ம் அதிக்கமித்வா பச்சி²மகோடிம் அப்பத்வா பரினிப்³பு³தோ ஹோதி. உபஹச்ச தலந்தி ஜலமானா க³ந்த்வா ஆகாஸதலம் அதிக்கமித்வா பத²வீதலம் வா உபஹனித்வா பத²வியம் பதிதமத்தாவ நிப்³பா³யேய்ய. அஸங்கா²ரேன அப்பயோகே³ன கிலேஸே கே²பேத்வா பரினிப்³பா³யீதி அஸங்கா²ரபரினிப்³பா³யீ. ஸஸங்கா²ரேன ஸப்பயோகே³ன கிலேஸே கே²பேத்வா பரினிப்³பா³யீதி ஸஸங்கா²ரபரினிப்³பா³யீ. க³ச்ச²ந்தி நிராரக்க²ம் அரஞ்ஞம். தா³யந்தி ஸாரக்க²ம் அப⁴யத்தா²ய தி³ன்னம் அரஞ்ஞம். ஸேஸமேத்த² உத்தானத்த²மேவ. இமஸ்மிம் ஸுத்தே அரியபுக்³க³லாவ கதி²தாதி.

3. திஸ்ஸப்³ரஹ்மாஸுத்தவண்ணனா

56. ததியே பி⁴க்கு²னியோதி மஹாபஜாபதியா பரிவாரா பஞ்சஸதா பி⁴க்கு²னியோ. விமுத்தாதி பஞ்சஹி விமுத்தீஹி விமுத்தா. அனுபாதி³ஸேஸாதி உபாதா³னஸேஸம் அட்ட²பேத்வா பஞ்சஹி விமுத்தீஹி அனவஸேஸாஹிபி விமுத்தா. ஸஉபாதி³ஸேஸே வா ஸஉபாதி³ஸேஸோதி ஸஉபாதா³னஸேஸே புக்³க³லே ‘‘ஸஉபாதா³னஸேஸோ அய’’ந்தி. இதரஸ்மிம்பி ஏஸேவ நயோ. திஸ்ஸோதி தே²ரஸ்ஸ ஸத்³தி⁴விஹாரிகப்³ரஹ்மா. அனுலோமிகானீதி படிபத்தியா அனுலோமானி விவித்தானி அந்திமபரியந்திமானி. இந்த்³ரியானீதி ஸத்³தா⁴தீ³னி விபஸ்ஸனிந்த்³ரியானி. ஸமன்னானயமானோதி ஸமன்னாஹாரே ட²பயமானோ. ந ஹி பன தேதி இத³ம் கஸ்மா ஆரபி⁴? ஸத்தமஸ்ஸ புக்³க³லஸ்ஸ த³ஸ்ஸனத்த²ம். ஸத்தமோ ஹி ஸத்³தா⁴னுஸாரிபுக்³க³லோ ந த³ஸ்ஸிதோ. அத² ப⁴க³வா ப³லவவிபஸ்ஸகவஸேன தம் த³ஸ்ஸேந்தோ ஏவமாஹ. தத்த² ஸப்³ப³னிமித்தானந்தி ஸப்³பே³ஸம் நிச்சனிமித்தாதீ³னம். அனிமித்தந்தி ப³லவவிபஸ்ஸனாஸமாதி⁴ம்.

4. ஸீஹஸேனாபதிஸுத்தவண்ணனா

57. சதுத்தே² மச்ச²ரீதி பஞ்சமச்சே²ரயுத்தோ. கத³ரியோதி த²த்³த⁴மச்ச²ரியோ, பரேஸம் தி³ய்யமானம்பி வாரேதி. அனுப்பதா³னரதோதி புனப்புனம் தா³னம் த³த³மானோவ ரமதி. அனுகம்பந்தாதி ‘‘கோ அஜ்ஜ அம்ஹேஹி அனுக்³க³ஹேதப்³போ³, கஸ்ஸ தே³ய்யத⁴ம்மம் வா படிக்³க³ண்ஹேய்யாம, த⁴ம்மம் வா தே³ஸேய்யாமா’’தி ஏவம் சித்தேன அனுகம்பமானா.

5. அரக்கே²ய்யஸுத்தவண்ணனா

58. பஞ்சமே நிமித்தந்தி த⁴ம்மனிமித்தம்பி புக்³க³லனிமித்தம்பி. அயஞ்ஹி அத்தனா தே³ஸிதத⁴ம்மே ஏகபத³ம்பி து³ரக்கா²தம் அனிய்யானிகம் அபஸ்ஸந்தோ த⁴ம்மனிமித்தம் ந ஸமனுபஸ்ஸதி, ‘‘து³ரக்கா²தோ தயா த⁴ம்மோ ந ஸ்வாக்கா²தோ’’தி உட்ட²ஹித்வா படிப்ப²ரந்தம் ஏகம் புக்³க³லம்பி அபஸ்ஸந்தோ புக்³க³லனிமித்தம் ந ஸமனுபஸ்ஸதி நாம. ஸேஸத்³வயேபி ஏஸேவ நயோ. ச²ட்ட²ஸத்தமானி உத்தானானேவ.

8. பசலாயமானஸுத்தவண்ணனா

61. அட்ட²மே பசலாயமானோதி தம் கா³மம் உபனிஸ்ஸாய ஏகஸ்மிம் வனஸண்டே³ ஸமணத⁴ம்மம் கரோந்தோ ஸத்தாஹம் சங்கமனவீரியேன நிம்மதி²தத்தா கிலந்தக³த்தோ சங்கமனகோடியம் பசலாயமானோ நிஸின்னோ ஹோதி. பசலாயஸி நோதி நித்³தா³யஸி நு. அனுமஜ்ஜித்வாதி பரிமஜ்ஜித்வா. ஆலோகஸஞ்ஞந்தி மித்³த⁴வினோத³னஆலோகஸஞ்ஞம். தி³வாஸஞ்ஞந்தி தி³வாதிஸஞ்ஞம். யதா² தி³வா ததா² ரத்திந்தி யதா² தி³வா ஆலோகஸஞ்ஞா அதி⁴ட்டி²தா, ததா² நம் ரத்திம்பி அதி⁴ட்ட²ஹேய்யாஸி. யதா² ரத்திம் ததா² தி³வாதி யதா² ச தே ரத்திம் ஆலோகஸஞ்ஞா அதி⁴ட்டி²தா, ததா² நம் தி³வாபி அதி⁴ட்ட²ஹேய்யாஸி. ஸப்பபா⁴ஸந்தி தி³ப்³ப³சக்கு²ஞாணத்தா²ய ஸஹோபா⁴ஸம். பச்சா²புரேஸஞ்ஞீதி புரதோ ச பச்ச²தோ ச அபி⁴ஹரணஸஞ்ஞாய ஸஞ்ஞாவா. அந்தோக³தேஹி இந்த்³ரியேஹீதி ப³ஹி அவிக்கி²த்தேஹி அந்தோ அனுபவிட்டே²ஹேவ பஞ்சஹி இந்த்³ரியேஹி. மித்³த⁴ஸுக²ந்தி நித்³தா³ஸுக²ம். ஏத்தகேன டா²னேன ப⁴க³வா தே²ரஸ்ஸ மித்³த⁴வினோத³னகம்மட்டா²னம் கதே²ஸி. ஸோண்ட³ந்தி மானஸோண்ட³ம். கிச்சகரணீயானீதி ஏத்த² அவஸ்ஸம் கத்தப்³பா³னி கிச்சானி, இதரானி கரணீயானி. மங்குபா⁴வோதி நித்தேஜதா தோ³மனஸ்ஸதா. ஏத்தகேன டா²னேன ஸத்தா²ரா தே²ரஸ்ஸ பி⁴க்கா²சாரவத்தம் கதி²தம்.

இதா³னி ப⁴ஸ்ஸே பரியந்தகாரிதாய ஸமாத³பேதும் தஸ்மாதிஹாதிஆதி³மாஹ. தத்த² விக்³கா³ஹிககத²ந்தி ‘‘ந த்வம் இமம் த⁴ம்மவினயம் ஆஜானாஸீ’’திஆதி³னயப்பவத்தா விக்³கா³ஹிககதா². நாஹம் மோக்³க³ல்லானாதிஆதி³ பாபமித்தஸம்ஸக்³க³விவஜ்ஜனத்த²ம் வுத்தம். கித்தாவதா நு கோ²தி கித்தகேன நு கோ². தண்ஹாஸங்க²யவிமுத்தோ ஹோதீதி தண்ஹாஸங்க²யே நிப்³பா³னே தம் ஆரம்மணம் கத்வா விமுத்தசித்ததாய தண்ஹாஸங்க²யவிமுத்தோ நாம ஸம்கி²த்தேன கித்தாவதா ஹோதி. யாய படிபத்தியா தண்ஹாஸங்க²யவிமுத்தோ ஹோதி, தமேவ கீ²ணாஸவஸ்ஸ பி⁴க்கு²னோ புப்³ப³பா⁴க³படிபத³ம் ஸம்கி²த்தேன தே³ஸேதா²தி புச்ச²தி. அச்சந்தனிட்டோ²தி க²யவயஸங்கா²தம் அந்தம் அதீதாதி அச்சந்தா, அச்சந்தா நிட்டா² அஸ்ஸாதி அச்சந்தனிட்டோ², ஏகந்தனிட்டோ² ஸததனிட்டோ²தி அத்தோ². அச்சந்தயோக³க்கே²மீதி அச்சந்தம் யோக³க்கே²மீ, நிச்சயோக³க்கே²மீதி அத்தோ². அச்சந்தப்³ரஹ்மசாரீதி அச்சந்தம் ப்³ரஹ்மசாரீ, நிச்சப்³ரஹ்மசாரீதி அத்தோ². அச்சந்தம் பரியோஸானமஸ்ஸாதி புரிமனயேனேவ அச்சந்தபரியோஸானோ. ஸேட்டோ² தே³வமனுஸ்ஸானந்தி தே³வானஞ்ச மனுஸ்ஸானஞ்ச ஸேட்டோ² உத்தமோ. ஏவரூபோ பி⁴க்கு² கித்தாவதா ஹோதி, ஸங்கே²பேனேவ தஸ்ஸ படிபத்திம் கதே²தா²தி யாசதி.

ஸப்³பே³ த⁴ம்மா நாலம் அபி⁴னிவேஸாயாதி ஏத்த² ஸப்³பே³ த⁴ம்மா நாம பஞ்சக்க²ந்தா⁴ த்³வாத³ஸாயதனானி அட்டா²ரஸ தா⁴துயோ, தே ஸப்³பே³பி தண்ஹாதி³ட்டி²வஸேன அபி⁴னிவேஸாய நாலம் ந பரியத்தா ந ஸமத்தா ந யுத்தா. கஸ்மா? க³ஹிதாகாரேன அதிட்ட²னதோ. தே ஹி நிச்சா ஸுகா² அத்தாதி க³ஹிதாபி அனிச்சா து³க்கா² அனத்தாவ ஸம்பஜ்ஜந்தி. தஸ்மா நாலம் அபி⁴னிவேஸாய. அபி⁴ஜானாதீதி அனிச்சம் து³க்க²ம் அனத்தாதி ஞாதபரிஞ்ஞாய அபி⁴ஜானாதி. பரிஜானாதீதி ததே²வ தீரணபரிஞ்ஞாய பரிஜானாதி. யம்கிஞ்சி வேத³னந்தி அந்தமஸோ பஞ்சவிஞ்ஞாணஸம்பயுத்தம் யம்கிஞ்சி அப்பமத்தகம்பி வேத³னம் அனுப⁴வதி. இமினா ப⁴க³வா தே²ரஸ்ஸ வேத³னாவஸேன ச வினிவட்டேத்வா அரூபபரிக்³க³ஹம் த³ஸ்ஸேஸி.

அனிச்சானுபஸ்ஸீதி அனிச்சதோ அனுபஸ்ஸந்தோ. விராகா³னுபஸ்ஸீதி ஏத்த² த்³வே விராகா³ க²யவிராகோ³ ச அச்சந்தவிராகோ³ ச. தத்த² ஸங்கா²ரானம் க²யம் க²யதோ பஸ்ஸனா விபஸ்ஸனாபி, அச்சந்தவிராக³ம் நிப்³பா³னம் விராக³தோ த³ஸ்ஸனமக்³க³ஞாணம்பி விராகா³னுபஸ்ஸனா. தது³ப⁴யஸமங்கி³புக்³க³லோ விராகா³னுபஸ்ஸீ நாம. தம் ஸந்தா⁴ய வுத்தம் – ‘‘விராகா³னுபஸ்ஸீ’’தி, விராக³தோ அனுபஸ்ஸந்தோதி அத்தோ². நிரோதா⁴னுபஸ்ஸிம்ஹிபி ஏஸேவ நயோ. நிரோதோ⁴பி ஹி க²யனிரோதோ⁴ அச்சந்தனிரோதோ⁴தி து³விதோ⁴யேவ. படினிஸ்ஸக்³கா³னுபஸ்ஸீதி ஏத்த² படினிஸ்ஸக்³கோ³ வுச்சதி வோஸ்ஸக்³கோ³. ஸோ ச பரிச்சாக³வோஸ்ஸக்³கோ³ பக்க²ந்த³னவோஸ்ஸக்³கோ³தி து³விதோ⁴ ஹோதி. தத்த² பரிச்சாக³வோஸ்ஸக்³கோ³தி விபஸ்ஸனா. ஸா ஹி தத³ங்க³வஸேன கிலேஸே ச க²ந்தே⁴ ச வோஸ்ஸஜதி. பக்க²ந்த³னவோஸ்ஸக்³கோ³தி மக்³கோ³. ஸோ ஹி நிப்³பா³னம் ஆரம்மணதோ பக்க²ந்த³தி. த்³வீஹிபி வா காரணேஹி ஸோ வோஸ்ஸக்³கோ³யேவ, ஸமுச்சே²த³வஸேன க²ந்தா⁴னம் கிலேஸானஞ்ச வோஸ்ஸஜனதோ நிப்³பா³னே ச பக்க²ந்த³னதோ. தஸ்மா கிலேஸே ச க²ந்தே⁴ ச பரிச்சஜதீதி பரிச்சாக³வோஸ்ஸக்³கோ³. நிரோதா⁴ய நிப்³பா³னதா⁴துயா சித்தம் பக்க²ந்த³தீதி பக்க²ந்த³னவோஸ்ஸக்³கோ³தி உப⁴யம்பேதம் மக்³கே³ ஸமேதி. தது³ப⁴யஸமங்கீ³ புக்³க³லோ இமாய படினிஸ்ஸக்³கா³னுபஸ்ஸனாய ஸமன்னாக³தத்தா படினிஸ்ஸக்³கா³னுபஸ்ஸீ நாம ஹோதி. தம் ஸந்தா⁴யேதம் வுத்தம். ந கிஞ்சி லோகே உபாதி³யதீதி கிஞ்சி ஏகம்பி ஸங்கா²ரக³தம் தண்ஹாவஸேன ந உபாதி³யதி ந க³ண்ஹாதி ந பராமஸதி. அனுபாதி³யம் ந பரிதஸ்ஸதீதி அக்³க³ண்ஹந்தோ தண்ஹாபரிதஸ்ஸனாய ந பரிதஸ்ஸதி. பச்சத்தம்யேவ பரினிப்³பா³யதீதி ஸயமேவ கிலேஸபரினிப்³பா³னேன பரினிப்³பா³யதி. கீ²ணா ஜாதீதிஆதி³னா பனஸ்ஸ பச்சவேக்க²ணா த³ஸ்ஸிதா. இதி ப⁴க³வா ஸம்கி²த்தேன கீ²ணாஸவஸ்ஸ புப்³ப³பா⁴க³ப்படிபத³ம் புச்சி²தோ ஸம்கி²த்தேனேவ கதே²ஸி. இத³ம் பன ஸுத்தம் தே²ரஸ்ஸ ஓவாதோ³பி அஹோஸி விபஸ்ஸனாபி. ஸோ இமஸ்மிம்யேவ ஸுத்தே விபஸ்ஸனம் வட்³டே⁴த்வா அரஹத்தம் பத்தோதி.

9. மேத்தஸுத்தவண்ணனா

62. நவமே மா, பி⁴க்க²வே, புஞ்ஞானம் பா⁴யித்தா²தி புஞ்ஞானி கரோந்தா தேஸம் மா பா⁴யித்த². மேத்தசித்தம் பா⁴வேஸிந்தி திகசதுக்கஜ்ஜா²னிகாய மேத்தாய ஸம்பயுத்தம் பணீதம் கத்வா சித்தம் பா⁴வேஸிந்தி த³ஸ்ஸேதி. ஸம்வட்டமானே ஸுதா³ஹந்தி ஸம்வட்டமானே ஸுத³ம் அஹம். ஸம்வட்டமானேதி ஜா²யமானே விபஜ்ஜமானே. த⁴ம்மிகோதி த³ஸகுஸலத⁴ம்மஸமன்னாக³தோ. த⁴ம்மராஜாதி தஸ்ஸேவ வேவசனம். த⁴ம்மேன வா லத்³த⁴ரஜ்ஜத்தா த⁴ம்மராஜா. சாதுரந்தோதி புரத்தி²மஸமுத்³தா³தீ³னம் சதுன்னம் ஸமுத்³தா³னம் வஸேன சாதுரந்தாய பத²வியா இஸ்ஸரோ. விஜிதாவீதி விஜிதஸங்கா³மோ. ஜனபதோ³ தஸ்மிம் தா²வரியம் தி²ரபா⁴வம் பத்தோதி ஜனபத³த்தா²வரியப்பத்தோ. பரோஸஹஸ்ஸந்தி அதிரேகஸஹஸ்ஸம். ஸூராதி அபீ⁴ருனோ. வீரங்க³ரூபாதி வீரானம் அங்க³ம் வீரங்க³ம், வீரியஸ்ஸேதம் நாமம். வீரங்க³ரூபமேதேஸந்தி வீரங்க³ரூபா. வீரியஜாதிகா வீரியஸபா⁴வா வீரியமயா விய அகிலாஸுனோ தி³வஸம்பி யுஜ்ஜ²ந்தா ந கிலமந்தீதி வுத்தம் ஹோதி. ஸாக³ரபரியந்தந்தி சக்கவாளபப்³ப³தம் ஸீமம் கத்வா டி²தஸமுத்³த³பரியந்தம். அத³ண்டே³னாதி த⁴னத³ண்டே³னபி சே²ஜ்ஜபே⁴ஜ்ஜானுஸாஸனேன ஸத்த²த³ண்டே³னபி வினாயேவ. அஸத்தே²னாதி ஏகதோதா⁴ராதி³னா பரவிஹேட²னஸத்தே²னபி வினாயேவ. த⁴ம்மேன அபி⁴விஜியாதி ஏஹி கோ², மஹாராஜாதி ஏவம் படிராஜூஹி ஸம்படிச்சி²தாக³மனோ ‘‘பாணோ ந ஹந்தப்³போ³’’திஆதி³னா த⁴ம்மேனேவ வுத்தப்பகாரம் பத²விம் அபி⁴விஜினித்வா.

ஸுகே²ஸினோதி ஸுக²பரியேஸகே ஸத்தே ஆமந்தேதி. ஸுஞ்ஞப்³ரஹ்மூபகோ³தி ஸுஞ்ஞப்³ரஹ்மவிமானூபகோ³. பத²விம் இமந்தி இமம் ஸாக³ரபரியந்தம் மஹாபத²விம். அஸாஹஸேனாதி ந ஸாஹஸிககம்மேன. ஸமேன மனுஸாஸிதந்தி ஸமேன கம்மேன அனுஸாஸிம். தேஹி ஏதம் ஸுதே³ஸிதந்தி தேஹி ஸங்கா³ஹகேஹி மஹாகாருணிகேஹி பு³த்³தே⁴ஹி ஏதம் ஏத்தகம் டா²னம் ஸுதே³ஸிதம் ஸுகதி²தம். பத²ப்³யோதி புத²விஸாமிகோ.

10. ப⁴ரியாஸுத்தவண்ணனா

63. த³ஸமே கேவட்டா மஞ்ஞே மச்ச²விலோபேதி கேவட்டானம் மச்ச²பச்சி²ம் ஓதாரேத்வா டி²தட்டா²னே ஜாலே வா உத³கதோ உக்கி²த்தமத்தே மச்ச²க்³கா³ஹகானம் மஹாஸத்³தோ³ ஹோதி, தம் ஸந்தா⁴யேதம் வுத்தம். ஸுஜாதாதி விஸாகா²ய கனிட்டா². ஸா நேவ ஸஸ்ஸும் ஆதி³யதீதி ஸஸ்ஸுயா கத்தப்³ப³வத்தம் நாம அத்தி², தம் ந கரோதி, ஸஸ்ஸூதிபி நம் ந க³ணேதி. ந ஸஸுரம் ஆதி³யதீதி வசனம் ந க³ண்ஹாதி. ஏவம் அனாத³ரதாயபி அக்³க³ஹணேனபி ந ஆதி³யதி நாம. ஸேஸேஸுபி ஏஸேவ நயோ. ஏவம் அனாத²பிண்டி³கோ ஸுணிஸாய ஆசாரம் க³ஹேத்வா ஸத்து² புரதோ நிஸீதி³. ஸாபி ஸுஜாதா ‘‘கிம் நு கோ² அயம் ஸேட்டி² த³ஸப³லஸ்ஸ ஸந்திகே மய்ஹம் கு³ணம் கதே²ஸ்ஸதி உதா³ஹு அகு³ண’’ந்தி க³ந்த்வா அவிதூ³ரே ஸத்³த³ம் ஸுணந்தீ அட்டா²ஸி. அத² நம் ஸத்தா² ஏஹி ஸுஜாதேதி ஆமந்தேஸி.

அஹிதானுகம்பினீதி ந ஹிதானுகம்பினீ. அஞ்ஞேஸூதி பரபுரிஸேஸு. அதிமஞ்ஞதேதி ஓமானாதி மானவஸேன அதிமஞ்ஞதி. த⁴னேன கீதஸ்ஸாதி த⁴னேன கீதா அஸ்ஸ. வதா⁴ய உஸ்ஸுகா வதி⁴தும் உஸ்ஸுக்கமாபன்னா. யம் இத்தி²யா விந்த³தி ஸாமிகோ த⁴னந்தி இத்தி²யா ஸாமிகோ யம் த⁴னம் லப⁴தி. அப்பம்பி தஸ்ஸ அபஹாதுமிச்ச²தீதி தோ²கதோபி அஸ்ஸ ஹரிதும் இச்ச²தி, உத்³த⁴னே ஆரோபிதஉக்க²லியம் பக்கி²பிதப்³ப³தண்டு³லதோபி தோ²கம் ஹரிதுமேவ வாயமதி. அலஸாதி நிஸின்னட்டா²னே நிஸின்னாவ டி²தட்டா²னே டி²தாவ ஹோதி. ப²ருஸாதி க²ரா. து³ருத்தவாதி³னீதி து³ப்³பா⁴ஸிதபா⁴ஸினீ, கக்க²ளம் வாளகத²மேவ கதே²தி. உட்டா²யகானம் அபி⁴பு⁴ய்ய வத்ததீதி ஏத்த² உட்டா²யகானந்தி ப³ஹுவசனவஸேன விரியுட்டா²னஸம்பன்னோ ஸாமிகோ வுத்தோ, தஸ்ஸ தம் உட்டா²னஸம்பத்திம் அபி⁴ப⁴வித்வா ஹேட்டா² கத்வா வத்ததி. பமோத³தீதி ஆமோதி³தபமோதி³தா ஹோதி. கோலேய்யகாதி குலஸம்பன்னா. பதிப்³ப³தாதி பதிதே³வதா. வத⁴த³ண்ட³தஜ்ஜிதாதி த³ண்ட³கம் க³ஹேத்வா வதே⁴ன தஜ்ஜிதா, ‘‘கா⁴தேஸ்ஸாமி ந’’ந்தி வுத்தா. தா³ஸீஸமந்தி ஸாமிகஸ்ஸ வத்தபூரிகா தா³ஸீதி மம் ப⁴க³வா தா⁴ரேதூதி வத்வா ஸரணேஸு பதிட்டா²ஸி.

11. கோத⁴னஸுத்தவண்ணனா

64. ஏகாத³ஸமே ஸபத்தகந்தாதி ஸபத்தானம் வேரீனம் கந்தா பியா தேஹி இச்சி²தபத்தி²தா. ஸபத்தகரணாதி ஸபத்தானம் வேரீனம் அத்த²கரணா. கோத⁴பரேதோதி கோதா⁴னுக³தோ. பசுரத்த²தாயாதி ப³ஹுஅத்த²தாய ப³ஹுஹிததாய. அனத்த²ம்பீதி அவுத்³தி⁴ம்பி. அத்தோ² மே க³ஹிதோதி வுட்³டி⁴ மே க³ஹிதா.

அதோ² அத்த²ம் க³ஹேத்வானாதி அதோ² வுத்³தி⁴ம் க³ஹேத்வா. அனத்த²ம் அதி⁴பஜ்ஜதீதி அனத்தோ² மே க³ஹிதோதி ஸல்லக்கே²தி. வத⁴ம் கத்வானாதி பாணாதிபாதகம்மம் கத்வா. கோத⁴ஸம்மத³ஸம்மத்தோதி கோத⁴மதே³ன மத்தோ, ஆதி³ன்னக³ஹிதபராமட்டோ²தி அத்தோ². ஆயஸக்யந்தி அயஸபா⁴வம், அயஸோ நியஸோ ஹோதீதி அத்தோ². அந்தரதோ ஜாதந்தி அப்³ப⁴ந்தரே உப்பன்னம். அத்த²ம் ந ஜானாதீதி வுத்³தி⁴அத்த²ம் ந ஜானாதி. த⁴ம்மம் ந பஸ்ஸதீதி ஸமத²விபஸ்ஸனாத⁴ம்மம் ந பஸ்ஸதி. அந்த⁴தமந்தி அந்த⁴பா⁴வகரம் தமம் ப³ஹலதமம். ஸஹதேதி அபி⁴ப⁴வதி.

து³ம்மங்குயந்தி து³ம்மங்குபா⁴வம் நித்தேஜதம் து³ப்³ப³ண்ணமுக²தம். யதோ பதாயதீதி யதா³ நிப்³ப³த்ததி. ந வாசோ ஹோதி கா³ரவோதி வசனஸ்ஸபி க³ருபா⁴வோ ந ஹோதி. ந தீ³பம் ஹோதி கிஞ்சனந்தி காசி பதிட்டா² நாம ந ஹோதி. தபனீயானீதி தாபஜனகானி. த⁴ம்மேஹீதி ஸமத²விபஸ்ஸனாத⁴ம்மேஹி. ஆரகாதி தூ³ரே. ப்³ராஹ்மணந்தி கீ²ணாஸவப்³ராஹ்மணம். யாய மாது ப⁴தோதி யாய மாதரா ப⁴தோ போஸிதோ. பாணத³தி³ம் ஸந்திந்தி ஜீவிததா³யிகம் ஸமானம். ஹந்தி குத்³தோ⁴ புது²த்தானந்தி குத்³தோ⁴ புக்³க³லோ புது² நானாகாரணேஹி அத்தானம் ஹந்தி. நானாரூபேஸு முச்சி²தோதி நானாரம்மணேஸு அதி⁴முச்சி²தோ ஹுத்வா. ரஜ்ஜுயா ப³ஜ்ஜ² மீயந்தீதி ரஜ்ஜுயா ப³ந்தி⁴த்வா மரந்தி. பப்³ப³தாமபி கந்த³ரேதி பப்³ப³தகந்த³ரேபி பதித்வா மரந்தி.

பூ⁴னஹச்சானீதி ஹதவுத்³தீ⁴னி. இதாயந்தி இதி அயம். தம் த³மேன ஸமுச்சி²ந்தே³தி தம் கோத⁴ம் த³மேன சி²ந்தே³ய்ய. கதரேன த³மேனாதி? பஞ்ஞாவீரியேன தி³ட்டி²யாதி விபஸ்ஸனாபஞ்ஞாய சேவ விபஸ்ஸனாஸம்பயுத்தேன காயிகசேதஸிகவீரியேன ச மக்³க³ஸம்மாதி³ட்டி²யா ச. ததே²வ த⁴ம்மே ஸிக்கே²தா²தி யதா² அகுஸலம் ஸமுச்சி²ந்தே³ய்ய, ஸமத²விபஸ்ஸனாத⁴ம்மேபி ததே²வ ஸிக்கே²ய்ய. மா நோ து³ம்மங்குயம் அஹூதி மா அம்ஹாகம் து³ம்மங்குபா⁴வோ அஹோஸீதி இமமத்த²ம் பத்த²யமானா. அனாயாஸாதி அனுபாயாஸா. அனுஸ்ஸுகாதி கத்த²சி உஸ்ஸுக்கம் அனாபன்னா. ஸேஸம் ஸப்³ப³த்த² உத்தானமேவாதி.

அப்³யாகதவக்³கோ³ ச²ட்டோ².