10. நந்த³மாதாஸுத்தவண்ணனா

53. த³ஸமம் அத்து²ப்பத்திவஸேன தே³ஸிதம். ஸத்தா² கிர வுத்த²வஸ்ஸோ பவாரேத்வா த்³வே அக்³க³ஸாவகே ஓஹாய ‘‘த³க்கி²ணாகி³ரிம் சாரிகம் க³மிஸ்ஸாமீ’’தி நிக்க²மி, ராஜா பஸேனதி³ கோஸலோ, அனாத²பிண்டி³கோ க³ஹபதி, விஸாகா² மஹாஉபாஸிகா, அஞ்ஞே ச ப³ஹுஜனா த³ஸப³லம் நிவத்தேதும் நாஸக்கி²ம்ஸு. அனாத²பிண்டி³கோ க³ஹபதி ‘‘ஸத்தா²ரம் நிவத்தேதும் நாஸக்கி²’’ந்தி ரஹோ சிந்தயமானோ நிஸீதி³. அத² நம் புண்ணா நாம தா³ஸீ தி³ஸ்வா ‘‘கிம் நு கோ² தே, ஸாமி, ந புப்³பே³ விய இந்த்³ரியானி விப்பஸன்னானீ’’தி புச்சி². ஆம, புண்ணே, ஸத்தா² சாரிகம் பக்கந்தோ, தமஹம் நிவத்தேதும் நாஸக்கி²ம். ந கோ² பன ஸக்கா ஜானிதும் புன ஸீக⁴ம் ஆக³ச்சே²ய்ய வா ந வா, தேனாஹம் சிந்தயமானோ நிஸின்னோதி. ஸசாஹம் த³ஸப³லம் நிவத்தேய்யம், கிம் மே கரேய்யாஸீதி? பு⁴ஜிஸ்ஸம் தம் கரிஸ்ஸாமீதி. ஸா க³ந்த்வா ஸத்தா²ரம் வந்தி³த்வா ‘‘நிவத்தத², ப⁴ந்தே’’தி ஆஹ. மம நிவத்தனபச்சயா த்வம் கிம் கரிஸ்ஸஸீதி? தும்ஹே, ப⁴ந்தே, மம பராதீ⁴னபா⁴வம் ஜானாத², அஞ்ஞம் கிஞ்சி காதும் ந ஸக்கோமி, ஸரணேஸு பன பதிட்டா²ய பஞ்ச ஸீலானி ரக்கி²ஸ்ஸாமீதி. ஸாது⁴ ஸாது⁴ புண்ணேதி, ஸத்தா² த⁴ம்மகா³ரவேன ஏகபத³ஸ்மிஞ்ஞேவ நிவத்தி. வுத்தஞ்ஹேதம் – ‘‘த⁴ம்மக³ரு, பி⁴க்க²வே, ததா²க³தோ த⁴ம்மகா³ரவோ’’தி (அ. நி. 5.99).

ஸத்தா² நிவத்தித்வா ஜேதவனமஹாவிஹாரம் பாவிஸி. மஹாஜனோ புண்ணாய ஸாது⁴காரஸஹஸ்ஸானி அதா³ஸி. ஸத்தா² தஸ்மிம் ஸமாக³மே த⁴ம்மம் தே³ஸேஸி, சதுராஸீதிபாணஸஹஸ்ஸானி அமதபானம் பிவிம்ஸு. புண்ணாபி ஸேட்டி²னா அனுஞ்ஞாதா பி⁴க்கு²னிஉபஸ்ஸயம் க³ந்த்வா பப்³ப³ஜி. ஸம்மாஸம்பு³த்³தோ⁴ ஸாரிபுத்தமோக்³க³ல்லானே ஆமந்தேத்வா ‘‘அஹம் யம் தி³ஸம் சாரிகாய நிக்க²ந்தோ, தத்த² ந க³ச்சா²மி. தும்ஹே தும்ஹாகம் பரிஸாய ஸத்³தி⁴ம் தம் தி³ஸம் சாரிகம் க³ச்ச²தா²’’தி வத்வா உய்யோஜேஸி. இமிஸ்ஸம் அத்து²ப்பத்தியம் ஏகம் ஸமயம் ஆயஸ்மா ஸாரிபுத்தோதிஆதி³ வுத்தம்.

தத்த² வேளுகண்ட³கீதி வேளுகண்டகனக³ரவாஸினீ. தஸ்ஸ கிர நக³ரஸ்ஸ பாகாரகு³த்தத்தா²ய பாகாரபரியந்தேன வேளூ ரோபிதா, தேனஸ்ஸ வேளுகண்டகந்தேவ நாமம் ஜாதம். பாராயனந்தி நிப்³பா³னஸங்கா²தபாரம் அயனதோ பாராயனந்தி லத்³த⁴வோஹாரம் த⁴ம்மம். ஸரேன பா⁴ஸதீதி ஸத்தபூ⁴மிகஸ்ஸ பாஸாத³ஸ்ஸ உபரிமதலே ஸுஸம்விஹிதாரக்க²ட்டா²னே நிஸின்னா ஸமாபத்திப³லேன ரத்திபா⁴க³ம் வீதினாமேத்வா ஸமாபத்திதோ வுட்டா²ய ‘‘இமம் ரத்தாவஸேஸம் கதராய ரதியா வீதினாமேஸ்ஸாமீ’’தி சிந்தேத்வா ‘‘த⁴ம்மரதியா’’தி கதஸன்னிட்டா²னா தீணி ப²லானி பத்தா அரியஸாவிகா அட்³ட⁴தேய்யகா³தா²ஸதபரிமாணம் பாராயனஸுத்தம் மது⁴ரேன ஸரப⁴ஞ்ஞேன பா⁴ஸதி. அஸ்ஸோஸி கோ²தி ஆகாஸட்ட²கவிமானானி பரிஹரித்வா தஸ்ஸ பாஸாத³ஸ்ஸ உபரிபா⁴க³ம் க³தேன மக்³கே³ன நரவாஹனயானம் ஆருய்ஹ க³ச்ச²மானோ அஸ்ஸோஸி. கதா²பரியோஸானம் ஆக³மயமானோ அட்டா²ஸீதி ‘‘கிம் ஸத்³தோ³ ஏஸ ப⁴ணே’’தி புச்சி²த்வா ‘‘நந்த³மாதாய உபாஸிகாய ஸரப⁴ஞ்ஞஸத்³தோ³’’தி வுத்தே ஓதரித்வா ‘‘இத³மவோசா’’தி இத³ம் தே³ஸனாபரியோஸானம் ஓலோகேந்தோ அவிதூ³ரட்டா²னே ஆகாஸே அட்டா²ஸி.

ஸாது⁴ ப⁴கி³னி, ஸாது⁴ ப⁴கி³னீதி ‘‘ஸுக்³க³ஹிதா தே ப⁴கி³னி த⁴ம்மதே³ஸனா ஸுகதி²தா, பாஸாணகசேதியே நிஸீதி³த்வா ஸோளஸன்னம் பாராயனிகப்³ராஹ்மணானம் ஸம்மாஸம்பு³த்³தே⁴ன கதி²ததி³வஸே ச அஜ்ஜ ச ந கிஞ்சி அந்தரம் பஸ்ஸாமி, மஜ்ஜே² பி⁴ன்னஸுவண்ணம் விய தே ஸத்து² கதி²தேன ஸத்³தி⁴ம் ஸதி³ஸமேவ கதி²த’’ந்தி வத்வா ஸாது⁴காரம் த³த³ந்தோ ஏவமாஹ. கோ பனேஸோ ப⁴த்³ரமுகா²தி இமஸ்மிம் ஸுஸம்விஹிதாரக்க²ட்டா²னே ஏவம் மஹந்தேன ஸத்³தே³ன கோ நாமேஸ, ப⁴த்³ரமுக², லத்³த⁴முக², கிம் நாகோ³ ஸுபண்ணோ தே³வோ மாரோ ப்³ரஹ்மாதி ஸுவண்ணபட்டவண்ணம் வாதபானம் விவரித்வா விக³தஸாரஜ்ஜா தீணி ப²லானி பத்தா அரியஸாவிகா வேஸ்ஸவணேன ஸத்³தி⁴ம் கத²யமானா ஏவமாஹ. அஹம் தே ப⁴கி³னி பா⁴தாதி ஸயம் ஸோதாபன்னத்தா அனாகா³மிஅரியஸாவிகம் ஜேட்டி²கம் மஞ்ஞமானோ ‘‘ப⁴கி³னீ’’தி வத்வா புன தம் பட²மவயே டி²தத்தா அத்தனோ கனிட்ட²ம், அத்தானம் பன நவுதிவஸ்ஸஸதஸஹஸ்ஸாயுகத்தா மஹல்லகதரம் மஞ்ஞமானோ ‘‘பா⁴தா’’தி ஆஹ. ஸாது⁴ ப⁴த்³ரமுகா²தி, ப⁴த்³ரமுக², ஸாது⁴ ஸுந்த³ரம், ஸ்வாக³மனம் தே ஆக³மனம், ஆக³ந்தும் யுத்தட்டா²னமேவஸி ஆக³தோதி அத்தோ². இத³ம் தே ஹோது ஆதிதே²ய்யந்தி இத³மேவ த⁴ம்மப⁴ணனம் தவ அதிதி²பண்ணாகாரோ ஹோது, ந ஹி தே அஞ்ஞம் இதோ உத்தரிதரம் தா³தப்³ப³ம் பஸ்ஸாமீதி அதி⁴ப்பாயோ. ஏவஞ்சேவ மே ப⁴விஸ்ஸதி ஆதிதே²ய்யந்தி ஏவம் அத்தனோ பத்திதா³னம் யாசித்வா ‘‘அயம் தே த⁴ம்மகதி²கஸக்காரோ’’தி அட்³ட⁴தேளஸானி கோட்ட²ஸதானி ரத்தஸாலீனம் பூரேத்வா ‘‘யாவாயம் உபாஸிகா சரதி, தாவ மா க²யம் க³மிம்ஸூ’’தி அதி⁴ட்ட²ஹித்வா பக்காமி. யாவ உபாஸிகா அட்டா²ஸி, தாவ கோட்டா²னம் ஹேட்டி²மதலம் நாம த³ட்டு²ம் நாஸக்கி²ம்ஸு. ததோ பட்டா²ய ‘‘நந்த³மாதாய கோட்டா²கா³ரம் வியா’’தி வோஹாரோ உத³பாதி³.

அகதபாதராஸோதி அபு⁴த்தபாதராஸோ. புஞ்ஞந்தி புப்³ப³சேதனா ச முஞ்சனசேதனா ச. புஞ்ஞமஹீதி அபரசேதனா. ஸுகா²ய ஹோதூதி ஸுக²த்தா²ய ஹிதத்தா²ய ஹோது. ஏவம் அத்தனோ தா³னே வேஸ்ஸவணஸ்ஸ பத்திம் அதா³ஸி.

பகரணேதி காரணே. ஓக்கஸ்ஸ பஸய்ஹாதி ஆகட்³டி⁴த்வா அபி⁴ப⁴வித்வா. யக்க²யோனிந்தி பு⁴ம்மதே³வதாபா⁴வம். தேனேவ புரிமேன அத்தபா⁴வேன உத்³த³ஸ்ஸேதீதி புரிமஸரீரஸதி³ஸமேவ ஸரீரம் மாபேத்வா அலங்கதபடியத்தோ ஸிரிக³ப்³ப⁴ஸயனதலே அத்தானம் த³ஸ்ஸேதி. உபாஸிகா படிதே³ஸிதாதி உபாஸிகா அஹந்தி ஏவம் உபாஸிகாபா⁴வம் தே³ஸேஸிம். யாவதே³தி யாவதே³வ. ஸேஸம் ஸப்³ப³த்த² உத்தானமேவாதி.

மஹாயஞ்ஞவக்³கோ³ பஞ்சமோ.