2. வஸ்ஸகாரஸுத்தவண்ணனா

22. து³தியே அபி⁴யாதுகாமோதி அபி⁴ப⁴வனத்தா²ய யாதுகாமோ. வஜ்ஜீதி வஜ்ஜிராஜானோ. ஏவம்மஹித்³தி⁴கேதி ஏவம் மஹதியா ராஜித்³தி⁴யா ஸமன்னாக³தே. ஏதேன நேஸம் ஸமக்³க³பா⁴வம் கதே²தி. ஏவம்மஹானுபா⁴வேதி ஏவம் மஹந்தேன ராஜானுபா⁴வேன ஸமன்னாக³தே. ஏதேன நேஸம் ஹத்தி²ஸிப்பாதீ³ஸு கதஸிக்க²தம் கதே²தி, யம் ஸந்தா⁴ய வுத்தம் – ‘‘ஸிக்கி²தா வதிமே லிச்ச²விகுமாரகா, ஸுஸிக்கி²தா வதிமே லிச்ச²விகுமாரகா, யத்ர ஹி நாம ஸுகு²மேன தாளச்சி²க்³க³ளேன அஸனம் அதிபாதயிஸ்ஸந்தி போங்கா²னுபோங்க²ம் அவிராதி⁴த’’ந்தி (ஸம். நி. 5.1115). உச்சே²ச்சா²மீதி உச்சி²ந்தி³ஸ்ஸாமி. வினாஸேஸ்ஸாமீதி அத³ஸ்ஸனம் நயிஸ்ஸாமி. அனயப்³யஸனந்தி அவட்³டி⁴ஞ்சேவ, ஞாதிப்³யஸனஞ்ச. ஆபாதே³ஸ்ஸாமீதி பாபயிஸ்ஸாமி.

இதி கிர ஸோ டா²னனிஸஜ்ஜாதீ³ஸு இமம் யுத்³த⁴கத²மேவ கதே²தி, ‘‘க³மனஸஜ்ஜா ஹோதா²’’தி ச ப³லகாயம் ஆணாபேதி. கஸ்மா? க³ங்கா³ய கிர ஏகம் பட்டனகா³மம் நிஸ்ஸாய அத்³த⁴யோஜனம் அஜாதஸத்துனோ விஜிதம், அத்³த⁴யோஜனம் லிச்ச²வீனம். தத்ர பப்³ப³தபாத³தோ மஹக்³க⁴ப⁴ண்ட³ம் ஓதரதி. தம் ஸுத்வா ‘‘அஜ்ஜ யாமி, ஸ்வே யாமீ’’தி அஜாதஸத்துனோ ஸம்வித³ஹந்தஸ்ஸேவ லிச்ச²வினோ ஸமக்³கா³ ஸம்மோத³மானா புரேதரம் ஆக³ந்த்வா ஸப்³ப³ம் க³ண்ஹந்தி. அஜாதஸத்து பச்சா² ஆக³ந்த்வா தம் பவத்திம் ஞத்வா குஜ்ஜி²த்வா க³ச்ச²தி. தே புனஸம்வச்ச²ரேபி ததே²வ கரோந்தி. அத² ஸோ ப³லவாகா⁴தஜாதோ, ததா³ ஏவமகாஸி.

ததோ சிந்தேஸி – ‘‘க³ணேன ஸத்³தி⁴ம் யுத்³த⁴ம் நாம பா⁴ரியம், ஏகோபி மோக⁴ப்பஹாரோ நாம நத்தி². ஏகேன கோ² பன பண்டி³தேன ஸத்³தி⁴ம் மந்தேத்வா கரோந்தோ நிரபராதோ⁴ ஹோதி, பண்டி³தோ ச ஸத்தா²ரா ஸதி³ஸோ நத்தி², ஸத்தா² ச அவிதூ³ரே து⁴ரவிஹாரே வஸதி, ஹந்தா³ஹம் பேஸேத்வா புச்சா²மி. ஸசே மே க³தேன கோசி அத்தோ² ப⁴விஸ்ஸதி, ஸத்தா² துண்ஹீ ப⁴விஸ்ஸதி. அனத்தே² பன ஸதி ‘கிம் ரஞ்ஞோ தத்த² க³தேனா’தி வக்க²தீ’’தி. ஸோ வஸ்ஸகாரம் ப்³ராஹ்மணம் பேஸேஸி. ப்³ராஹ்மணோ க³ந்த்வா ப⁴க³வதோ தமத்த²ம் ஆரோசேஸி. தேன வுத்தம் – அத² கோ² ராஜா…பே… ஆபாதே³ஸ்ஸாமி வஜ்ஜீதி.

ப⁴க³வந்தம் பீ³ஜயமானோதி தே²ரோ வத்தஸீஸே ட²த்வா ப⁴க³வந்தம் பீ³ஜதி, ப⁴க³வதோ பன ஸீதம் வா உண்ஹம் வா நத்தி². ப⁴க³வா ப்³ராஹ்மணஸ்ஸ வசனம் ஸுத்வா தேன ஸத்³தி⁴ம் அமந்தேத்வா தே²ரேன ஸத்³தி⁴ம் மந்தேதுகாமோ கிந்தி தே, ஆனந்த³, ஸுதந்திஆதி³மாஹ. தம் வுத்தத்த²மேவ.

ஏகமிதா³ஹந்தி இத³ம் ப⁴க³வா புப்³பே³ வஜ்ஜீனம் இமஸ்ஸ வஜ்ஜிஸத்தகஸ்ஸ தே³ஸிதபா⁴வப்பகாஸனத்த²ம் ஆஹ. அகரணீயாதி அகத்தப்³பா³, அக்³க³ஹேதப்³பா³தி அத்தோ². யதி³த³ந்தி நிபாதமத்தம். யுத்³த⁴ஸ்ஸாதி கரணத்தே² ஸாமிவசனம், அபி⁴முக²ம் யுத்³தே⁴ன க³ஹேதும் ந ஸக்காதி அத்தோ². அஞ்ஞத்ர உபலாபனாயாதி ட²பேத்வா உபலாபனம். உபலாபனா நாம ‘‘அலம் விவாதே³ன, இதா³னி ஸமக்³கா³ ஹோமா’’தி ஹத்தி²அஸ்ஸரத²ஹிரஞ்ஞஸுவண்ணாதீ³னி பேஸேத்வா ஸங்க³ஹகரணம், ஏவஞ்ஹி ஸங்க³ஹம் கத்வா கேவலம் விஸ்ஸாஸேன ஸக்கா க³ண்ஹிதுந்தி அத்தோ². அஞ்ஞத்ர மிது²பே⁴தா³தி ட²பேத்வா மிது²பே⁴த³ம். இமினா ‘‘அஞ்ஞமஞ்ஞபே⁴த³ம் கத்வாபி ஸக்கா ஏதே க³ஹேது’’ந்தி த³ஸ்ஸேதி. இத³ம் ப்³ராஹ்மணோ ப⁴க³வதோ கதா²ய நயம் லபி⁴த்வா ஆஹ. கிம் பன ப⁴க³வா ப்³ராஹ்மணஸ்ஸ இமாய கதா²ய நயலாப⁴ம் ஜானாதீதி? ஆம ஜானாதி. ஜானந்தோ கஸ்மா கதே²ஸி? அனுகம்பாய. ஏவம் கிரஸ்ஸ அஹோஸி – ‘‘மயா அகதி²தேபி கதிபாஹேன க³ந்த்வா ஸப்³பே³ க³ண்ஹிஸ்ஸதி, கதி²தே பன ஸமக்³கே³ பி⁴ந்த³ந்தோ தீஹி ஸம்வச்ச²ரேஹி க³ண்ஹிஸ்ஸதி. ஏத்தகம்பி ஜீவிதமேவ வரம். ஏத்தகஞ்ஹி ஜீவந்தா அத்தனோ பதிட்டா²பூ⁴தம் புஞ்ஞம் கரிஸ்ஸந்தீ’’தி. அபி⁴னந்தி³த்வாதி சித்தேன நந்தி³த்வா. அனுமோதி³த்வாதி ‘‘யாவ ஸுபா⁴ஸிதமித³ம் போ⁴தா கோ³தமேனா’’தி வாசாய அனுமோதி³த்வா. பக்காமீதி ரஞ்ஞோ ஸந்திகம் க³தோ. ராஜாபி தமேவ பேஸேத்வா ஸப்³பே³ பி⁴ந்தி³த்வா க³ந்த்வா அனயப்³யஸனம் பாபேஸி.