3. பட²மஸத்தகஸுத்தவண்ணனா

23. ததியே அபி⁴ண்ஹம் ஸன்னிபாதாதி இத³ம் வஜ்ஜிஸத்தகே வுத்தஸதி³ஸமேவ. இதா⁴பி ச அபி⁴ண்ஹம் அஸன்னிபதந்தா தி³ஸாஸு ஆக³தஸாஸனம் ந ஸுணந்தி, ததோ ‘‘அஸுகவிஹாரஸீமா ஆகுலா, உபோஸத²ப்பவாரணா டி²தா, அஸுகஸ்மிம் டா²னே பி⁴க்கூ² வேஜ்ஜகம்மதூ³தகம்மாதீ³னி கரோந்தி, விஞ்ஞத்திப³ஹுலா ப²லபுப்ப²தா³னாதீ³ஹி ஜீவிகம் கப்பேந்தீ’’திஆதீ³னி ந ஜானந்தி. பாபபி⁴க்கூ²பி ‘‘பமத்தோ ஸங்கோ⁴’’தி ஞத்வா ராஸிபூ⁴தா ஸாஸனம் ஓஸக்காபேந்தி. அபி⁴ண்ஹம் ஸன்னிபதந்தா பன தம் பவத்திம் ஸுணந்தி, ததோ பி⁴க்கு²ஸங்க⁴ம் பேஸேத்வா ஸீமம் உஜும் காரேந்தி, உபோஸத²ப்பவாரணாயோ பவத்தாபேந்தி, மிச்சா²ஜீவானம் உஸ்ஸன்னட்டா²னே அரியவம்ஸிகே பேஸேத்வா அரியவம்ஸம் கதா²பேந்தி, பாபபி⁴க்கூ²னம் வினயத⁴ரேஹி நிக்³க³ஹம் காராபேந்தி. பாபபி⁴க்கூ²பி ‘‘அப்பமத்தோ ஸங்கோ⁴, ந ஸக்கா அம்ஹேஹி வக்³க³ப³ந்த⁴னேன விசரிது’’ந்தி பி⁴ஜ்ஜித்வா பலாயந்தி. ஏவமேத்த² வுத்³தி⁴ஹானியோ வேதி³தப்³பா³.

ஸமக்³கா³திஆதீ³ஸு சேதியபடிஜக்³க³னத்த²ம் வா போ³தி⁴க⁴ரஉபோஸதா²கா³ரச்சா²த³னத்த²ம் வா கதிகவத்தம் வா ட²பேதுகாமதாய ‘‘ஸங்கோ⁴ ஸன்னிபததூ’’தி பே⁴ரியா வா க⁴ண்டியா வா ஆகோடிதமத்தாய ‘‘மய்ஹம் சீவரகம்மம் அத்தி², மய்ஹம் பத்தோ பசிதப்³போ³, மய்ஹம் நவகம்மம் அத்தீ²’’தி விக்கே²பம் கரோந்தா ந ஸமக்³கா³ ஸன்னிபதந்தி நாம. ஸப்³ப³ம் பன தம் கம்மம் ட²பேத்வா ‘‘அஹம் புரிமதரம், அஹம் புரிமதர’’ந்தி ஏகப்பஹாரேனேவ ஸன்னிபதந்தா ஸமக்³கா³ ஸன்னிபதந்தி நாம. ஸன்னிபதிதா பன சிந்தேத்வா மந்தேத்வா கத்தப்³ப³ம் கத்வா ஏகதோவ அவுட்ட²ஹந்தா ந ஸமக்³கா³ வுட்ட²ஹந்தி நாம. ஏவம் வுட்டி²தேஸு ஹி யே பட²மம் க³ச்ச²ந்தி, தேஸம் ஏவம் ஹோதி ‘‘அம்ஹேஹி பா³ஹிரகதா²வ ஸுதா, இதா³னி வினிச்ச²யகதா² ப⁴விஸ்ஸதீ’’தி. ஏகப்பஹாரேனேவ வுட்ட²ஹந்தா ஸமக்³கா³ வுட்ட²ஹந்தி நாம. அபிச ‘‘அஸுகட்டா²னே விஹாரஸீமா ஆகுலா, உபோஸத²ப்பவாரணா டி²தா, அஸுகட்டா²னே வேஜ்ஜகம்மாதி³காரகா பாபபி⁴க்கூ² உஸ்ஸன்னா’’தி ஸுத்வா ‘‘கோ க³ந்த்வா தேஸம் நிக்³க³ஹம் கரிஸ்ஸதீ’’தி வுத்தே ‘‘அஹம் பட²மம், அஹம் பட²ம’’ந்தி வத்வா க³ச்ச²ந்தாபி ஸமக்³கா³ வுட்ட²ஹந்தி நாம.

ஆக³ந்துகம் பன தி³ஸ்வா ‘‘இமம் பரிவேணம் யாஹி, ஏதம் பரிவேணம் யாஹி, அயம் கோ’’தி அவத்வா ஸப்³பே³ வத்தம் கரோந்தாபி, ஜிண்ணபத்தசீவரகம் தி³ஸ்வா தஸ்ஸ பி⁴க்கா²சாரவத்தேன பத்தசீவரம் பரியேஸந்தாபி, கி³லானஸ்ஸ கி³லானபே⁴ஸஜ்ஜம் பரியேஸமானாபி, கி³லானமேவ அனாத²ம் ‘‘அஸுகபரிவேணம் யாஹீ’’தி அவத்வா அத்தனோ அத்தனோ பரிவேணே படிஜக்³க³ந்தாபி, ஏகோ ஓலீயமானகோ க³ந்தோ² ஹோதி, பஞ்ஞவந்தம் பி⁴க்கு²ம் ஸங்க³ண்ஹித்வா தேன தம் க³ந்த²ம் உக்கி²பாபேந்தாபி ஸமக்³கா³ ஸங்க⁴கரணீயானி கரோந்தி நாம.

அப்பஞ்ஞத்தந்திஆதீ³ஸு நவம் அத⁴ம்மிகம் கதிகவத்தம் வா ஸிக்கா²பத³ம் வா க³ண்ஹந்தா அப்பஞ்ஞத்தம் பஞ்ஞாபேந்தி நாம புராணஸந்த²தவத்து²ஸ்மிம் ஸாவத்தி²யம் பி⁴க்கூ² விய. உத்³த⁴ம்மம் உப்³பி³னயம் ஸாஸனம் தீ³பேந்தா பஞ்ஞத்தம் ஸமுச்சி²ந்த³ந்தி நாம, வஸ்ஸஸதபரினிப்³பு³தே ப⁴க³வதி வேஸாலிகா வஜ்ஜிபுத்தகா விய. கு²த்³தா³னுகு²த்³த³கா பன ஆபத்தியோ ஸஞ்சிச்ச வீதிக்கமந்தா யதா²பஞ்ஞத்தேஸு ஸிக்கா²பதே³ஸு ஸமாதா³ய ந வத்தந்தி நாம அஸ்ஸஜிபுனப்³ப³ஸுகா விய. ததா² அகரோந்தா பன அபஞ்ஞத்தம் ந பஞ்ஞாபேந்தி, பஞ்ஞத்தம் ந ஸமுச்சி²ந்த³ந்தி, யதா²பஞ்ஞத்தேஸு ஸிக்கா²பதே³ஸு ஸமாதா³ய வத்தந்தி நாம ஆயஸ்மா உபஸேனோ விய, ஆயஸ்மா யஸோ காகண்ட³கபுத்தோ விய, ஆயஸ்மா மஹாகஸ்ஸபோ விய ச. வுத்³தி⁴யேவாதி ஸீலாதி³கு³ணேஹி வுத்³தி⁴யேவ, நோ பரிஹானி.

தே²ராதி தி²ரபா⁴வப்பத்தா தே²ரகாரகேஹி கு³ணேஹி ஸமன்னாக³தா. ப³ஹூ ரத்தியோ ஜானந்தீதி ரத்தஞ்ஞூ. சிரம் பப்³ப³ஜிதானம் ஏதேஸந்தி சிரபப்³ப³ஜிதா. ஸங்க⁴ஸ்ஸ பிதிட்டா²னே டி²தாதி ஸங்க⁴பிதரோ. பிதிட்டா²னே டி²தத்தா ஸங்க⁴ம் பரிணேந்தி, புப்³ப³ங்க³மா ஹுத்வா தீஸு ஸிக்கா²ஸு பவத்தேந்தீதி ஸங்க⁴பரிணாயகா.

யே தேஸம் ஸக்காராதீ³னி ந கரோந்தி, ஓவாத³த்தா²ய த்³வே தயோ வாரே உபட்டா²னம் ந க³ச்ச²ந்தி, தேபி தேஸம் ஓவாத³ம் ந தே³ந்தி, பவேணிகத²ம் ந கதே²ந்தி, ஸாரபூ⁴தம் த⁴ம்மபரியாயம் ந ஸிக்கா²பேந்தி. தே தேஹி விஸ்ஸட்டா² ஸீலாதீ³ஹி த⁴ம்மக்க²ந்தே⁴ஹி ஸத்தஹி ச அரியத⁴னேஹீதி ஏவமாதீ³ஹி கு³ணேஹி பரிஹாயந்தி. யே பன தேஸம் ஸக்காராதீ³னி கரோந்தி, உபட்டா²னம் க³ச்ச²ந்தி, தேஸம் தே ‘‘ஏவம் தே அபி⁴க்கமிதப்³ப³’’ந்திஆதி³கம் ஓவாத³ம் தே³ந்தி, பவேணிகத²ம் கதே²ந்தி, ஸாரபூ⁴தம் த⁴ம்மபரியாயம் ஸிக்கா²பேந்தி, தேரஸஹி து⁴தங்கே³ஹி த³ஸஹி கதா²வத்தூ²ஹி அனுஸாஸந்தி. தே தேஸம் ஓவாதே³ ட²த்வா ஸீலாதீ³ஹி கு³ணேஹி வட்³ட⁴மானா ஸாமஞ்ஞத்த²ம் அனுபாபுணந்தி. ஏவமேத்த² ஹானிவுத்³தி⁴யோ த³ட்ட²ப்³பா³.

புனப்³ப⁴வோ ஸீலமஸ்ஸாதி போனோப்³ப⁴விகா, புனப்³ப⁴வதா³யிகாதி அத்தோ², தஸ்ஸா போனோப்³ப⁴விகாய. ந வஸம் க³ச்சி²ஸ்ஸந்தீதி ஏத்த² யே சதுன்னம் பச்சயானம் காரணா உபட்டா²கானம் பதா³னுபதி³கா ஹுத்வா கா³மதோ கா³மம் விசரந்தி, தே தஸ்ஸா வஸம் க³ச்ச²ந்தி நாம. இதரே ந க³ச்ச²ந்தி. தத்த² ஹானிவுத்³தி⁴யோ பாகடாயேவ.

ஆரஞ்ஞகேஸூதி பஞ்சத⁴னுஸதிகபச்சி²மேஸு. ஸாபேக்கா²தி ஸாலயா. கா³மந்தஸேனாஸனேஸு ஹி ஜா²னம் அப்பேத்வாபி ததோ வுட்டி²தமத்தோவ இத்தி²புரிஸதா³ரகதா³ரிகாதி³ஸத்³த³ம் ஸுணாதி, யேனஸ்ஸ அதி⁴க³தவிஸேஸோபி ஹாயதியேவ. அரஞ்ஞஸேனாஸனே நித்³தா³யித்வாபி பபு³த்³த⁴மத்தோ ஸீஹப்³யக்³க⁴மோராதீ³னம் ஸத்³த³ம் ஸுணாதி, யேன அரஞ்ஞே பீதிம் படிலபி⁴த்வா தமேவ ஸம்மஸந்தோ அக்³க³ப²லே பதிட்டா²தி. இதி ப⁴க³வா கா³மந்தஸேனாஸனே ஜா²னம் அப்பேத்வா நிஸின்னபி⁴க்கு²தோ அரஞ்ஞே நித்³தா³யமானமேவ பஸம்ஸதி. தஸ்மா தமேவ அத்த²வஸம் படிச்ச ‘‘ஆரஞ்ஞகேஸு ஸேனாஸனேஸு ஸாபேக்கா² ப⁴விஸ்ஸந்தீ’’தி ஆஹ.

பச்சத்தஞ்ஞேவ ஸதிம் உபட்டா²பேஸ்ஸந்தீதி அத்தனாவ அத்தனோ அப்³ப⁴ந்தரே ஸதிம் உபட்ட²பேஸ்ஸந்தி. பேஸலாதி பியஸீலா. இதா⁴பி ஸப்³ரஹ்மசாரீனம் ஆக³மனம் அனிச்ச²ந்தா நேவாஸிகா அஸ்ஸத்³தா⁴ ஹோந்தி அப்பஸன்னா, விஹாரம் ஸம்பத்தபி⁴க்கூ²னம் பச்சுக்³க³மன-பத்தசீவரபடிக்³க³ஹண-ஆஸனபஞ்ஞாபனதாலவண்டக்³க³ஹணாதீ³னி ந கரோந்தி. அத² நேஸம் அவண்ணோ உக்³க³ச்ச²தி ‘‘அஸுகவிஹாரவாஸினோ பி⁴க்கூ² அஸ்ஸத்³தா⁴ அப்பஸன்னா விஹாரம் பவிட்டா²னம் வத்தப்படிவத்தம்பி ந கரோந்தீ’’தி. தம் ஸுத்வா பப்³ப³ஜிதா விஹாரத்³வாரேன க³ச்ச²ந்தாபி விஹாரம் ந பவிஸந்தி. ஏவம் அனாக³தானம் அனாக³மனமேவ ஹோதி. ஆக³தானம் பன பா²ஸுவிஹாரே அஸதி யேபி அஜானித்வா ஆக³தா, தே ‘‘வஸிஸ்ஸாமாதி தாவசிந்தேத்வா ஆக³தம்ஹா, இமேஸம் பன நேவாஸிகானம் இமினா நீஹாரேன கோ வஸிஸ்ஸதீ’’தி நிக்க²மித்வா க³ச்ச²ந்தி. ஏவம் ஸோ விஹாரோ அஞ்ஞேஸம் பி⁴க்கூ²னம் அனாவாஸோவ ஹோதி. ததோ நேவாஸிகா ஸீலவந்தானம் த³ஸ்ஸனம் அலப⁴ந்தா கங்கா²வினோத³கம் வா ஆசாரஸிக்கா²பகம் வா மது⁴ரத⁴ம்மஸவனம் வா ந லப⁴ந்தி. தேஸம் நேவ அக்³க³ஹிதத⁴ம்மக்³க³ஹணம் ந க³ஹிதஸஜ்ஜா²யகரணம் ஹோதி. இதி நேஸம் ஹானியேவ ஹோதி, ந வுத்³தி⁴.

யே பன ஸப்³ரஹ்மசாரீனம் ஆக³மனம் இச்ச²ந்தி, தே ஸத்³தா⁴ ஹோந்தி பஸன்னா, ஆக³தானம் ஸப்³ரஹ்மசாரீனம் பச்சுக்³க³மனாதீ³னி கத்வா ஸேனாஸனம் பஞ்ஞபேத்வா தே³ந்தி, தே க³ஹேத்வா பி⁴க்கா²சாரம் பவிஸந்தி, கங்க²ம் வினோதே³ந்தி, மது⁴ரத⁴ம்மஸ்ஸவனம் லப⁴ந்தி. அத² நேஸம் கித்திஸத்³தோ³ உக்³க³ச்ச²தி ‘‘அஸுகவிஹாரே பி⁴க்கூ² ஏவம் ஸத்³தா⁴ பஸன்னா வத்தஸம்பன்னா ஸங்கா³ஹகா’’தி. தம் ஸுத்வா பி⁴க்கூ² தூ³ரதோபி ஆக³ச்ச²ந்தி. தேஸம் நேவாஸிகா வத்தம் கரோந்தி, ஸமீபம் க³ந்த்வா வுட்³ட⁴தரம் ஆக³ந்துகம் வந்தி³த்வா நிஸீத³ந்தி, நவகதரஸ்ஸ ஸந்திகே ஆஸனம் க³ஹேத்வா நிஸீதி³த்வா ‘‘இமஸ்மிம் விஹாரே வஸிஸ்ஸத², க³மிஸ்ஸதா²’’தி புச்ச²ந்தி. ‘‘க³மிஸ்ஸாமா’’தி வுத்தே ‘‘ஸப்பாயம் ஸேனாஸனம், ஸுலபா⁴ பி⁴க்கா²’’திஆதீ³னி வத்வா க³ந்தும் ந தே³ந்தி. வினயத⁴ரோ சே ஹோதி, தஸ்ஸ ஸந்திகே வினயம் ஸஜ்ஜா²யந்தி. ஸுத்தந்தாதி³த⁴ரோ சே, தஸ்ஸ ஸந்திகே தம் தம் த⁴ம்மம் ஸஜ்ஜா²யந்தி. தே ஆக³ந்துகதே²ரானம் ஓவாதே³ ட²த்வா ஸஹ படிஸம்பி⁴தா³ஹி அரஹத்தம் பாபுணந்தி. ஆக³ந்துகா ‘‘ஏகம் த்³வே தி³வஸானி வஸிஸ்ஸாமாதி ஆக³தம்ஹா, இமேஸம் பன ஸுக²ஸம்வாஸதாய த³ஸ த்³வாத³ஸ வஸ்ஸானி வஸிம்ஹா’’தி வத்தாரோ ஹோந்தி. ஏவமேத்த² ஹானிவுத்³தி⁴யோ வேதி³தப்³பா³.