9. ஆனந்த³ஸுத்தவண்ணனா

51. நவமே கித்தாவதாதி கித்தகேன. அஸ்ஸுதஞ்சேவாதி அஞ்ஞஸ்மிம் காலே அஸ்ஸுதபுப்³ப³ம். ந ஸம்மோஸம் க³ச்ச²ந்தீதி வினாஸம் ந க³ச்ச²ந்தி. சேதஸோ ஸம்பு²ட்ட²புப்³பா³தி சித்தேன பு²ஸிதபுப்³பா³. ஸமுதா³சரந்தீதி மனோத்³வாரே சரந்தி. அவிஞ்ஞாதஞ்ச விஜானாதீதி அஞ்ஞஸ்மிம் காலே அவிஞ்ஞாதகாரணம் ஜானாதி. பரியாபுணாதீதி வளஞ்ஜேதி கதே²தி. தே³ஸேதீதி பகாஸேதி. பரம் வாசேதீதி பரம் உக்³க³ண்ஹாபேதி.

ஆக³தாக³மாதி தீ³கா⁴தீ³ஸு யோ கோசி ஆக³மோ ஆக³தோ ஏதேஸந்தி ஆக³தாக³மா. த⁴ம்மத⁴ராதி ஸுத்தந்தபிடகத⁴ரா. வினயத⁴ராதி வினயபிடகத⁴ரா. மாதிகாத⁴ராதி த்³வேபாதிமோக்க²த⁴ரா. பரிபுச்ச²தீதி அனுஸந்தி⁴புப்³பா³பரம் புச்ச²தி. பரிபஞ்ஹதீதி இத³ஞ்சித³ஞ்ச புச்சி²ஸ்ஸாமீதி பரிதுலதி பரிச்சி²ந்த³தி. இத³ம், ப⁴ந்தே, கத²ந்தி, ப⁴ந்தே, இத³ம் அனுஸந்தி⁴புப்³பா³பரம் கத²ம் ஹோதீதி புச்ச²தி. இமஸ்ஸ க்வத்தோ²தி இமஸ்ஸ பா⁴ஸிதஸ்ஸ கோ அத்தோ²தி புச்ச²தி. அவிவடந்தி அவிவரிதம். விவரந்தீதி பாகடம் கரோந்தி. கங்கா²டா²னியேஸூதி கங்கா²ய காரணபூ⁴தேஸு. தத்த² யஸ்மிம் த⁴ம்மே கங்கா² உப்பஜ்ஜதி, ஸ்வேவ கங்கா²டா²னியோ நாமாதி வேதி³தப்³போ³.