10. க²த்தியஸுத்தவண்ணனா

52. த³ஸமே போ⁴கா³தி⁴ப்பாயாதி போ⁴க³ஸம்ஹரணத்த²ம் ட²பிதாதி⁴ப்பாயா பவத்தஅஜ்ஜா²ஸயா. பஞ்ஞூபவிசாராதி பஞ்ஞவந்தோ ப⁴வேய்யாமாதி ஏவம் பஞ்ஞத்தா²ய பவத்தூபவிசாரா. அயமேவ நேஸம் விசாரோ சித்தே உபவிசரதி. ப³லாதி⁴ட்டா²னாதி ப³லகாயாதி⁴ட்டா²னா. ப³லகாயஞ்ஹி லத்³தா⁴ தே லத்³த⁴பதிட்டா² நாம ஹோந்தி. பத²விபி⁴னிவேஸாதி பத²விஸாமினோ ப⁴விஸ்ஸாமாதி ஏவம் பத²விஅத்தா²ய கதசித்தாபி⁴னிவேஸா. இஸ்ஸரியபரியோஸானாதி ரஜ்ஜாபி⁴ஸேகபரியோஸானா. அபி⁴ஸேகஞ்ஹி பத்வா தே பரியோஸானப்பத்தா நாம ஹோந்தி. இமினா நயேன ஸப்³ப³த்த² அத்தோ² வேதி³தப்³போ³.

ஸேஸபதே³ஸு பனேத்த² அயமதி⁴ப்பாயோ – ப்³ராஹ்மணா தாவ மந்தே லபி⁴த்வா லத்³த⁴பதிட்டா² நாம ஹோந்தி, க³ஹபதிகா யம்கிஞ்சி ஸிப்பம், இத்தீ² குலதா³யஜ்ஜஸாமிகம் புத்தம், சோரா யம்கிஞ்சி ஆவுத⁴ஸத்த²ம், ஸமணா ஸீலபரிபுண்ணா லத்³த⁴பதிட்டா² நாம ஹோந்தி. தஸ்மா மந்தாதி⁴ட்டா²னாதிஆதீ³னி வுத்தானி.

ப்³ராஹ்மணானஞ்ச ‘‘யஞ்ஞம் யஜிஸ்ஸாமா’’தி சித்தம் அபி⁴னிவிஸதி, ப்³ரஹ்மலோகே பத்தே பரியோஸானப்பத்தா நாம ஹோந்தி. தஸ்மா தே யஞ்ஞாபி⁴னிவேஸா ப்³ரஹ்மலோகபரியோஸானாதி வுத்தா. கம்மந்தகரணத்தா²ய மனோ ஏதேஸம் அபி⁴னிவிஸதீதி கம்மந்தாபி⁴னிவேஸா. கம்மே நிட்டி²தே பரியோஸானப்பத்தா நாம ஹோந்தீதி நிட்டி²தகம்மந்தபரியோஸானா.

புரிஸாதி⁴ப்பாயாதி புரிஸேஸு பவத்தஅஜ்ஜா²ஸயா. அலங்காரத்தா²ய மனோ உபவிசரதி ஏதிஸ்ஸாதி அலங்காரூபவிசாரா. அஸபத்தீ ஹுத்வா ஏகிகாவ க⁴ரே வஸேய்யந்தி ஏவமஸ்ஸா சித்தம் அபி⁴னிவிஸதீதி அஸபத்தீபி⁴னிவேஸா. க⁴ராவாஸிஸ்ஸரியே லத்³தே⁴ பரியோஸானப்பத்தா நாம ஹோந்தீதி இஸ்ஸரியபரியோஸானா.

பரப⁴ண்ட³ஸ்ஸ ஆதா³னே அதி⁴ப்பாயோ ஏதேஸந்தி ஆதா³னாதி⁴ப்பாயா. க³ஹனே நிலீயனட்டா²னே ஏதேஸம் மனோ உபவிசரதீதி க³ஹனூபவிசாரா. அந்த⁴காரத்தா²ய ஏதேஸம் சித்தம் அபி⁴னிவிஸதீதி அந்த⁴காராபி⁴னிவேஸா. அத³ஸ்ஸனப்பத்தா பரியோஸானப்பத்தா ஹோந்தீதி அத³ஸ்ஸனபரியோஸானா.

அதி⁴வாஸனக்க²ந்தியஞ்ச ஸுசிபா⁴வஸீலே ச அதி⁴ப்பாயோ ஏதேஸந்தி க²ந்திஸோரச்சாதி⁴ப்பாயா. அகிஞ்சனபா⁴வே நிக்³க³ஹணபா⁴வே சித்தம் ஏதேஸம் அபி⁴னிவிஸதீதி ஆகிஞ்சஞ்ஞாபி⁴னிவேஸா. நிப்³பா³னப்பத்தா பரியோஸானப்பத்தா ஹோந்தீதி நிப்³பா³னபரியோஸானா.