3. இணஸுத்தவண்ணனா

45. ததியே தா³லித்³தி³யந்தி த³லித்³த³பா⁴வோ. காமபோ⁴கி³னோதி காமே பு⁴ஞ்ஜனகஸத்தஸ்ஸ. அஸ்ஸகோதி அத்தனோ ஸந்தகேன ரஹிதோ. அனாள்ஹிகோதி ந அட்³டோ⁴. இணம் ஆதி³யதீதி ஜீவிதும் அஸக்கோந்தோ இணம் ஆதி³யதி. வட்³டி⁴ம் படிஸ்ஸுணாதீதி தா³தும் அஸக்கோந்தோ வட்³டி⁴ம் த³ஸ்ஸாமீதி படிஜானாதி. அனுசரந்திபி நந்தி பரிஸமஜ்ஜ²க³ணமஜ்ஜா²தீ³ஸு ஆதபட²பனபம்ஸுஓகிரணாதீ³ஹி விப்பகாரம் பாபேந்தோ பச்ச²தோ பச்ச²தோ அனுப³ந்த⁴ந்தி. ஸத்³தா⁴ நத்தீ²தி ஓகப்பனகஸத்³தா⁴மத்தகம்பி நத்தி². ஹிரீ நத்தீ²தி ஹிரீயனாகாரமத்தகம்பி நத்தி². ஓத்தப்பம் நத்தீ²தி பா⁴யனாகாரமத்தகம்பி நத்தி². வீரியம் நத்தீ²தி காயிகவீரியமத்தகம்பி நத்தி². பஞ்ஞா நத்தீ²தி கம்மஸ்ஸகதபஞ்ஞாமத்தகம்பி நத்தி². இணாதா³னஸ்மிம் வதா³மீதி இணக்³க³ஹணம் வதா³மி. மா மம் ஜஞ்ஞூதி மா மம் ஜானாது.

தா³லித்³தி³யம் து³க்க²ந்தி த⁴னத³லித்³த³பா⁴வோ து³க்க²ம். காமலாபா⁴பி⁴ஜப்பினந்தி காமலாப⁴ம் பத்தே²ந்தானம். பாபகம்மவினிப்³ப³யோதி பாபகம்மவட்³ட⁴கோ. ஸம்ஸப்பதீதி பரிப்ப²ந்த³தி. ஜானந்தி ஜானந்தோ. யஸ்ஸ விப்படிஸாரஜாதி யே அஸ்ஸ விப்படிஸாரதோ ஜாதா. யோனிமஞ்ஞதரந்தி ஏகம் திரச்சா²னயோனிம். த³த³ம் சித்தம் பஸாத³யந்தி சித்தம் பஸாதே³ந்தோ த³த³மானோ.

கடக்³கா³ஹோதி ஜயக்³கா³ஹோ, அனபராத⁴க்³கா³ஹோ ஹோதி. க⁴ரமேஸினோதி க⁴ராவாஸம் பரியேஸந்தஸ்ஸ வஸமானஸ்ஸ வா. சாகோ³ புஞ்ஞம் பவட்³ட⁴தீதி சாகோ³தி ஸங்க²ம் க³தம் புஞ்ஞம் வட்³ட⁴தி. சாகா³ புஞ்ஞந்தி வா பாடோ². பதிட்டி²தாதி பதிட்டி²தஸத்³தா⁴ நாம ஸோதாபன்னஸ்ஸ ஸத்³தா⁴. ஹிரிமனோதி ஹிரிஸம்பயுத்தசித்தோ. நிராமிஸம் ஸுக²ந்தி தீணி ஜா²னானி நிஸ்ஸாய உப்பஜ்ஜனகஸுக²ம். உபேக்க²ந்தி சதுத்த²ஜ்ஜா²னுபேக்க²ம். ஆரத்³த⁴வீரியோதி பரிபுண்ணபக்³க³ஹிதவீரியோ. ஜா²னானி உபஸம்பஜ்ஜாதி சத்தாரி ஜா²னானி பத்வா. ஏகோதி³ நிபகோ ஸதோதி ஏகக்³க³சித்தோ கம்மஸ்ஸகதஞாணஸதீஹி ச ஸமன்னாக³தோ.

ஏவம் ஞத்வா யதா²பூ⁴தந்தி ஏவம் ஏத்தகம் காரணம் யதா²ஸபா⁴வம் ஜானித்வா. ஸப்³ப³ஸம்யோஜனக்க²யேதி நிப்³பா³னே. ஸப்³ப³ஸோதி ஸப்³பா³காரேன. அனுபாதா³யாதி அக்³க³ஹேத்வா. ஸம்மா சித்தம் விமுச்சதீதி இத³ம் வுத்தம் ஹோதி – ஸப்³ப³ஸம்யோஜனக்க²யஸங்கா²தே நிப்³பா³னே ஸப்³ப³ஸோ அனுபாதி³யித்வா ஸம்மா ஹேதுனா நயேன மக்³க³சித்தம் விமுச்சதி. ‘‘ஏதம் ஞத்வா யதா²பூ⁴தம், ஸப்³ப³ஸம்யோஜனக்க²ய’’ந்திபி பாளியம் லிகி²தம், தஸ்ஸ ஏதம் ஸப்³ப³ஸம்யோஜனக்க²யஸங்கா²தம் நிப்³பா³னம் யதா²பூ⁴தம் ஞத்வாதி அத்தோ². புரிமபச்சி²மேஹி பன ஸத்³தி⁴ம் ந க⁴டீயதி.

தஸ்ஸ ஸம்மா விமுத்தஸ்ஸாதி தஸ்ஸ ஸம்மா விமுத்தஸ்ஸ கீ²ணாஸவஸ்ஸ. ஞாணம் ஹோதீதி பச்சவேக்க²ணஞாணம் ஹோதி. தாதி³னோதி தம்ஸண்டி²தஸ்ஸ. அகுப்பாதி அகுப்பாரம்மணத்தா குப்பகாரணானம் கிலேஸானஞ்ச அபா⁴வேன அகுப்பா. விமுத்தீதி மக்³க³விமுத்திபி ப²லவிமுத்திபி. ப⁴வஸம்யோஜனக்க²யேதி ப⁴வஸம்யோஜனக்க²யஸங்கா²தே நிப்³பா³னே ப⁴வஸம்யோஜனானஞ்ச க²யந்தே உப்பன்னா. ஏதம் கோ² பரமம் ஞாணந்தி ஏதம் மக்³க³ப²லஞாணம் பரமஞாணம் நாம. ஸுக²மனுத்தரந்தி ஏததே³வ மக்³க³ப²லஸுக²ம் அனுத்தரம் ஸுக²ம் நாம. ஆணண்யமுத்தமந்தி ஸப்³பே³ஸம் அணணானம் கீ²ணாஸவோ உத்தமஅணணோ, தஸ்மா அரஹத்தப²லம் ஆணண்யமுத்தமந்தி அரஹத்தப²லேன தே³ஸனாய கூடம் க³ண்ஹி. இமஸ்மிஞ்ச ஸுத்தே வட்டமேவ கதே²த்வா கா³தா²ஸு வட்டவிவட்டம் கதி²தந்தி.