4. மஹாசுந்த³ஸுத்தவண்ணனா

46. சதுத்தே² சேதீஸூதி சேதிரட்டே². ஸயம்ஜாதியந்தி ஏவம்னாமகே நிக³மே. மஹாசுந்தோ³தி த⁴ம்மஸேனாபதிஸ்ஸ கனிட்ட²பா⁴திகோ. த⁴ம்மே யோகோ³ அனுயோகோ³ ஏதேஸந்தி த⁴ம்மயோகா³. த⁴ம்மகதி²கானம் ஏதம் நாமம். ஜா²யந்தீதி ஜா²யீ. அபஸாதே³ந்தீதி க⁴ட்டேந்தி ஹிம்ஸந்தி. ஜா²யந்தீதி சிந்தேந்தி. பஜ்ஜா²யந்தீதிஆதீ³னி உபஸக்³க³வஸேன வட்³டி⁴தானி. கிமிமே ஜா²யந்தீதி கிம் நாம இமே ஜா²யந்தி. கிந்திமே ஜா²யந்தீதி கிமத்த²ம் இமே ஜா²யந்தி. கத²ம் இமே ஜா²யந்தீதி கேன காரணேன இமே ஜா²யந்தி. அமதம் தா⁴தும் காயேன பு²ஸித்வா விஹரந்தீதி மரணவிரஹிதம் நிப்³பா³னதா⁴தும் ஸந்தா⁴ய கம்மட்டா²னம் க³ஹேத்வா விஹரந்தா அனுக்கமேன தம் நாமகாயேன பு²ஸித்வா விஹரந்தி. க³ம்பீ⁴ரம் அத்த²பத³ந்தி கு³ள்ஹம் படிச்ச²ன்னம் க²ந்த⁴தா⁴துஆயதனாதி³அத்த²ம். பஞ்ஞாய அதிவிஜ்ஜ² பஸ்ஸந்தீதி ஸஹவிபஸ்ஸனாய மக்³க³பஞ்ஞாய படிவிஜ்ஜி²த்வா பஸ்ஸந்தி. இமஸ்மிம் பனத்தே² ஸம்மஸனபடிவேத⁴பஞ்ஞாபி உக்³க³ஹபரிபுச்சா²பஞ்ஞாபி வட்டதியேவாதி.