8. ஜம்பா³லீஸுத்தவண்ணனா

178. அட்ட²மே ஸந்தம் சேதோவிமுத்திந்தி அட்ட²ன்னம் ஸமாபத்தீனம் அஞ்ஞதரம் ஸமாபத்திம். ஸக்காயனிரோத⁴ந்தி தேபூ⁴மகவட்டஸங்கா²தஸ்ஸ ஸக்காயஸ்ஸ நிரோத⁴ம், நிப்³பா³னந்தி அத்தோ². ந பக்க²ந்த³தீதி ஆரம்மணவஸேன ந பக்க²ந்த³தி. ஸேஸபதே³ஸுபி ஏஸேவ நயோ. ந பாடிகங்கோ²தி ந பாடிகங்கி²தப்³போ³. லேபக³தேனாதி லேபமக்கி²தேன.

இமஸ்மிஞ்ச பனத்தே² நதீ³பாரம் க³ந்துகாமபுரிஸோபம்மம் ஆஹரிதப்³ப³ம் – ஏகோ கிர புரிஸோ சண்ட³ஸோதாய வாளமச்சா²குலாய நதி³யா பாரம் க³ந்துகாமோ ‘‘ஓரிமம் தீரம் ஸாஸங்கம் ஸப்படிப⁴யம், பாரிமம் தீரம் கே²மம் அப்படிப⁴யம், கிம் நு கோ² கத்வா பாரம் க³மிஸ்ஸாமீ’’தி படிபாடியா டி²தே அட்ட² ககுத⁴ருக்கே² தி³ஸ்வா ‘‘ஸக்கா இமாய ருக்க²படிபாடியா க³ந்து’’ந்தி மனஸிகத்வா ‘‘ககுத⁴ருக்கா² நாம மட்ட²ஸாகா² ஹோந்தி, ஸாகா²ய ஹத்தா² ந ஸண்ட²ஹேய்யு’’ந்தி நிக்³ரோத⁴பிலக்க²ருக்கா²தீ³னம் அஞ்ஞதரஸ்ஸ லாகா²ய ஹத்த²பாதே³ மக்கே²த்வா த³க்கி²ணஹத்தே²ன ஏகம் ஸாக²ம் க³ண்ஹி. ஹத்தோ² தத்தே²வ லகி³. புன வாமஹத்தே²ன த³க்கி²ணபாதே³ன வாமபாதே³னாதி சத்தாரோபி ஹத்த²பாதா³ தத்தே²வ லகி³ம்ஸு. ஸோ அதோ⁴ஸிரோ லம்ப³மானோ உபரினதி³யம் தே³வே வுட்டே² புண்ணாய நதி³யா ஸோதே நிமுக்³கோ³ கும்பீ⁴லாதீ³னம் ப⁴க்கோ² அஹோஸி.

தத்த² நதீ³ஸோதம் விய ஸம்ஸாரஸோதம் த³ட்ட²ப்³ப³ம், ஸோதஸ்ஸ பாரம் க³ந்துகாமபுரிஸோ விய யோகா³வசரோ, ஓரிமதீரம் விய ஸக்காயோ, பாரிமதீரம் விய நிப்³பா³னம், படிபாடியா டி²தா அட்ட² ககுத⁴ருக்கா² விய அட்ட² ஸமாபத்தியோ, லேபமக்கி²தேன ஹத்தே²ன ஸாகா²க³ஹணம் விய ஜா²னவிபஸ்ஸனானம் பாரிபந்தி²கே அஸோதே⁴த்வா ஸமாபத்திஸமாபஜ்ஜனம், சதூஹி ஹத்த²பாதே³ஹி ஸாகா²ய ப³த்³த⁴ஸ்ஸ ஓலம்ப³னம் விய பட²மஜ்ஜா²னே நிகந்தியா லக்³க³காலோ, உபரிஸோதே வுட்டி² விய ச²ஸு த்³வாரேஸு கிலேஸானம் உப்பன்னகாலோ, நதி³யா புண்ணாய ஸோதே நிமுக்³க³ஸ்ஸ கும்பீ⁴லாதீ³னம் ப⁴க்க²பூ⁴தகாலோ விய ஸம்ஸாரஸோதே நிமுக்³க³ஸ்ஸ சதூஸு அபாயேஸு து³க்கா²னுப⁴வனகாலோ வேதி³தப்³போ³.

ஸுத்³தே⁴ன ஹத்தே²னாதி ஸுதோ⁴தேன பரிஸுத்³த⁴ஹத்தே²ன. இமஸ்மிம்பி அத்தே² தாதி³ஸமேவ ஓபம்மம் காதப்³ப³ம் – ததே²வ ஹி பாரம் க³ந்துகாமோ புரிஸோ ‘‘ககுத⁴ருக்கா² நாம மட்ட²ஸாகா², கிலிட்ட²ஹத்தே²ன க³ண்ஹந்தஸ்ஸ ஹத்தோ² பரிக³லேய்யா’’தி ஹத்த²பாதே³ ஸுதோ⁴தே கத்வா ஏகம் ஸாக²ம் க³ண்ஹித்வா பட²மம் ருக்க²ம் ஆருள்ஹோ. ததோ ஓதரித்வா து³தியம்…பே… ததோ ஓதரித்வா அட்ட²மம், அட்ட²மருக்க²தோ ஓதரித்வா பாரிமதீரே கே²மந்தபூ⁴மிம் க³தோ.

தத்த² ‘‘இமேஹி ருக்கே²ஹி பாரிமதீரம் க³மிஸ்ஸாமீ’’தி தஸ்ஸ புரிஸஸ்ஸ சிந்திதகாலோ விய யோகி³னோ ‘‘அட்ட² ஸமாபத்தியோ ஸமாபஜ்ஜித்வா ஸமாபத்திதோ வுட்டா²ய அரஹத்தம் க³மிஸ்ஸாமீ’’தி சிந்திதகாலோ, ஸுத்³தே⁴ன ஹத்தே²ன ஸாகா²க³ஹணம் விய ஜா²னவிபஸ்ஸனானம் பாரிபந்தி²கத⁴ம்மே ஸோதே⁴த்வா ஸமாபத்திஸமாபஜ்ஜனம். தத்த² பட²மருக்கா²ரோஹணகாலோ விய பட²மஜ்ஜா²னஸமாபத்திகாலோ, பட²மருக்க²தோ ஓருய்ஹ து³தியம் ஆருள்ஹகாலோ விய பட²மஜ்ஜா²னே நிகந்தியா அப³த்³த⁴ஸ்ஸ ததோ வுட்டா²ய து³தியஜ்ஜா²னஸமாபன்னகாலோ…பே… ஸத்தமருக்க²தோ ஓருய்ஹ அட்ட²மம் ஆருள்ஹகாலோ விய ஆகிஞ்சஞ்ஞாயதனஸமாபத்தியம் நிகந்தியா அப³த்³த⁴ஸ்ஸ ததோ வுட்டா²ய நேவஸஞ்ஞானாஸஞ்ஞாயதனஸமாபன்னகாலோ. அட்ட²மருக்க²தோ ஓருய்ஹ பாரிமதீரம் கே²மந்தபூ⁴மிம் க³தகாலோ விய நேவஸஞ்ஞானாஸஞ்ஞாயதனே நிகந்தியா அப³த்³த⁴ஸ்ஸ ஸமாபத்திதோ வுட்டா²ய ஸங்கா²ரே ஸம்மஸித்வா அரஹத்தப்பத்தகாலோ வேதி³தப்³போ³.

அவிஜ்ஜாப்பபே⁴த³ம் மனஸி கரோதீதி அட்ட²ஸு டா²னேஸு அஞ்ஞாணபூ⁴தாய க³ணப³ஹலமஹாஅவிஜ்ஜாய பபே⁴த³ஸங்கா²தம் அரஹத்தம் மனஸி கரோதி. ந பக்க²ந்த³தீதி ஆரம்மணவஸேனேவ ந பக்க²ந்த³தி. ஜம்பா³லீதி கா³மதோ நிக்க²ந்தஸ்ஸ மஹாஉத³கஸ்ஸ பதிட்டா²னபூ⁴தோ மஹாஆவாடோ. அனேகவஸ்ஸக³ணிகாதி கா³மஸ்ஸ வா நக³ரஸ்ஸ வா உப்பன்னகாலேயேவ உப்பன்னத்தா அனேகானி வஸ்ஸக³ணானி உப்பன்னாய ஏதிஸ்ஸாதி அனேகவஸ்ஸக³ணிகா. ஆயமுகா²னீதி சதஸ்ஸோ பவிஸனகந்த³ரா. அபாயமுகா²னீதி அபவாஹனச்சி²த்³தா³னி. ந ஆளிப்பபே⁴தோ³ பாடிகங்கோ²தி ந பாளிப்பபே⁴தோ³ பாடிகங்கி²தப்³போ³. ந ஹி ததோ உத³கம் உட்டா²ய பாளிம் பி⁴ந்தி³த்வா கசவரம் க³ஹேத்வா மஹாஸமுத்³த³ம் பாபுணாதி.

இமஸ்ஸ பனத்த²ஸ்ஸ விபா⁴வனத்த²ம் உய்யானக³வேஸகஓபம்மம் ஆஹரிதப்³ப³ம். ஏகோ கிர நக³ரவாஸிகோ குலபுத்தோ உய்யானம் க³வேஸந்தோ நக³ரதோ நாதிதூ³ரே நச்சாஸன்னே மஹந்தம் ஜம்பா³லிம் அத்³த³ஸ. ஸோ ‘‘இமஸ்மிம் டா²னே ரமணீயம் உய்யானம் ப⁴விஸ்ஸதீ’’தி ஸல்லக்கே²த்வா குத்³தா³லம் ஆதா³ய சத்தாரிபி கந்த³ரானி பிதா⁴ய அபவாஹனச்சி²த்³தா³னி விவரித்வா அட்டா²ஸி. தே³வோ ந ஸம்மா வஸ்ஸி, அவஸேஸஉத³கம் அபவாஹனச்சி²த்³தே³ன பரிஸ்ஸவித்வா க³தம். சம்மக²ண்ட³பிலோதிகாதீ³னி தத்தே²வ பூதிகானி ஜாதானி, பாணகா ஸண்டி²தா, ஸமந்தா அனுபக³மனீயா ஜாதா. உபக³தானம்பி நாஸாபுடே பிதா⁴ய பக்கமிதப்³ப³ம் ஹோதி. ஸோ கதிபாஹேன ஆக³ந்த்வா படிக்கம்ம டி²தோ ஓலோகேத்வா ‘‘ந ஸக்கா உபக³ந்து’’ந்தி பக்காமி.

தத்த² நக³ரவாஸீ குலபுத்தோ விய யோகா³வசரோ த³ட்ட²ப்³போ³, உய்யானம் க³வேஸந்தேன கா³மத்³வாரே ஜம்பா³லியா தி³ட்ட²காலோ விய சாதுமஹாபூ⁴திககாயோ, ஆயமுகா²னம் பிஹிதகாலோ விய த⁴ம்மஸ்ஸவனோத³கஸ்ஸ அலத்³த⁴காலோ, அபாயமுகா²னம் விவடகாலோ விய ச²த்³வாரிகஸம்வரஸ்ஸ விஸ்ஸட்ட²காலோ, தே³வஸ்ஸ ஸம்மா அவுட்ட²காலோ விய ஸப்பாயகம்மட்டா²னஸ்ஸ அலத்³த⁴காலோ, அவஸேஸஉத³கஸ்ஸ அபாயமுகே²ஹி பரிஸ்ஸவித்வா க³தகாலோ விய அப்³ப⁴ந்தரே கு³ணானம் பரிஹீனகாலோ, உத³கஸ்ஸ உட்டா²ய பாளிம் பி⁴ந்தி³த்வா கசவரம் ஆதா³ய மஹாஸமுத்³த³ம் பாபுணிதும் அஸமத்த²காலோ விய அரஹத்தமக்³கே³ன அவிஜ்ஜாபாளிம் பி⁴ந்தி³த்வா கிலேஸராஸிம் வித⁴மித்வா நிப்³பா³னம் ஸச்சி²காதும் அஸமத்த²காலோ, சம்மக²ண்ட³பிலோதிகாதீ³னம் தத்தே²வ பூதிபா⁴வோ விய அப்³ப⁴ந்தரே ராகா³தி³கிலேஸேஹி பரிபூரிதகாலோ, தஸ்ஸ ஆக³ந்த்வா தி³ஸ்வா விப்படிஸாரினோ க³தகாலோ விய வட்டஸமங்கி³புக்³க³லஸ்ஸ வட்டே அபி⁴ரதகாலோ வேதி³தப்³போ³.

ஆளிப்பபே⁴தோ³ பாடிகங்கோ²தி பாளிப்பபே⁴தோ³ பாடிகங்கி²தப்³போ³. ததோ ஹி உத³கம் உட்டா²ய பாளிம் பி⁴ந்தி³த்வா கசவரம் ஆதா³ய மஹாஸமுத்³த³ம் பாபுணிதும் ஸக்கி²ஸ்ஸதீதி அத்தோ².

இதா⁴பி ததே³வ ஓபம்மம் ஆஹரிதப்³ப³ம். தத்த² ஆயமுகா²னம் விவடகாலோ விய ஸப்பாயத⁴ம்மஸ்ஸவனஸ்ஸ லத்³த⁴காலோ, அபாயமுகா²னம் பிஹிதகாலோ விய ச²ஸு த்³வாரேஸு ஸம்வரஸ்ஸ பச்சுபட்டி²தகாலோ, தே³வஸ்ஸ ஸம்மா வுட்ட²காலோ விய ஸப்பாயகம்மட்டா²னஸ்ஸ லத்³த⁴காலோ, உத³கஸ்ஸ உட்டா²ய பாளிம் பி⁴ந்தி³த்வா கசவரம் ஆதா³ய மஹாஸமுத்³த³ம் பத்தகாலோ விய அரஹத்தமக்³கே³ன அவிஜ்ஜம் பி⁴ந்தி³த்வா அகுஸலராஸிம் வித⁴மித்வா அரஹத்தம் ஸச்சி²கதகாலோ, ஆயமுகே²ஹி பவிட்டே²ன உத³கேன ஸரஸ்ஸ பரிபுண்ணகாலோ விய அப்³ப⁴ந்தரே லோகுத்தரத⁴ம்மேஹி பரிபுண்ணகாலோ, ஸமந்ததோ வதிம் கத்வா ருக்கே² ரோபேத்வா உய்யானமஜ்ஜே² பாஸாத³ம் மாபேத்வா நாடகானி பச்சுபட்ட²பேத்வா ஸுபோ⁴ஜனம் பு⁴ஞ்ஜந்தஸ்ஸ நிஸின்னகாலோ விய த⁴ம்மபாஸாத³ம் ஆருய்ஹ நிப்³பா³னாரம்மணம் ப²லஸமாபத்திம் அப்பேத்வா நிஸின்னகாலோ வேதி³தப்³போ³. ஸேஸமேத்த² உத்தானத்த²மேவ. தே³ஸனா பன லோகியலோகுத்தரமிஸ்ஸிகா கதி²தாதி.