(14) 4. புக்³க³லவக்³கோ³

1. ஸம்யோஜனஸுத்தவண்ணனா

131. சதுத்த²ஸ்ஸ பட²மே உபபத்திபடிலாபி⁴யானீதி யேஹி அனந்தரா உபபத்திம் படிலப⁴தி. ப⁴வபடிலாபி⁴யானீதி உபபத்திப⁴வஸ்ஸ படிலாபா⁴ய பச்சயானி. ஸகதா³கா³மிஸ்ஸாதி இத³ம் அப்பஹீனஸம்யோஜனேஸு அரியேஸு உத்தமகோடியா க³ஹிதம். யஸ்மா பன அந்தராபரினிப்³பா³யிஸ்ஸ அந்தரா உபபத்தி நத்தி², யம் பன ஸோ தத்த² ஜா²னம் ஸமாபஜ்ஜதி, தம் குஸலத்தா ‘‘உபபத்திப⁴வஸ்ஸ பச்சயோ’’ தேவ ஸங்க்²யம் க³ச்ச²தி. தஸ்மாஸ்ஸ ‘‘உபபத்திபடிலாபி⁴யானி ஸம்யோஜனானி பஹீனானி, ப⁴வபடிலாபி⁴யானி ஸம்யோஜனானி அப்பஹீனானீ’’தி வுத்தம். ஓரம்பா⁴கி³யேஸு ச அப்பஹீனம் உபாதா³ய ஸகதா³கா³மிஸ்ஸ அவிஸேஸேன ‘‘ஓரம்பா⁴கி³யானி ஸம்யோஜனானி அப்பஹீனானீ’’தி வுத்தம். ஸேஸமேத்த² உத்தானமேவ.

2. படிபா⁴னஸுத்தவண்ணனா

132. து³தியே யுத்தப்படிபா⁴னோ நோ முத்தப்படிபா⁴னோதி பஞ்ஹம் கதே²ந்தோ யுத்தமேவ கதே²தி, ஸீக⁴ம் பன ந கதே²தி, ஸணிகமேவ கதே²தீதி அத்தோ². இமினா நயேன ஸப்³ப³பதா³னி வேதி³தப்³பா³னி.

3. உக்³க⁴டிதஞ்ஞூஸுத்தவண்ணனா

133. ததியே சதுன்னம்பி புக்³க³லானம் இமினா ஸுத்தேன விஸேஸோ வேதி³தப்³போ³ –

‘‘கதமோ ச புக்³க³லோ உக்³க⁴டிதஞ்ஞூ, யஸ்ஸ புக்³க³லஸ்ஸ ஸஹ உதா³ஹடவேலாய த⁴ம்மாபி⁴ஸமயோ ஹோதி, அயம் வுச்சதி புக்³க³லோ உக்³க⁴டிதஞ்ஞூ. கதமோ ச புக்³க³லோ விபஞ்சிதஞ்ஞூ, யஸ்ஸ புக்³க³லஸ்ஸ வித்தா²ரேன அத்தே² விப⁴ஜியமானே த⁴ம்மாபி⁴ஸமயோ ஹோதி, அயம் வுச்சதி புக்³க³லோ விபஞ்சிதஞ்ஞூ. கதமோ ச புக்³க³லோ நேய்யோ, யஸ்ஸ புக்³க³லஸ்ஸ உத்³தே³ஸதோ பரிபுச்ச²தோ யோனிஸோமனஸிகரோதோ கல்யாணமித்தே ஸேவதோ ப⁴ஜதோ பயிருபாஸதோ அனுபுப்³பே³ன த⁴ம்மாபி⁴ஸமயோ ஹோதி, அயம் வுச்சதி புக்³க³லோ நேய்யோ. கதமோ ச புக்³க³லோ பத³பரமோ, யஸ்ஸ புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, அயம் வுச்சதி புக்³க³லோ பத³பரமோ’’தி (பு. ப. 148-151).

4. உட்டா²னப²லஸுத்தவண்ணனா

134. சதுத்தே² உட்டா²னவீரியேனேவ தி³வஸம் வீதினாமேத்வா தஸ்ஸ நிஸ்ஸந்த³ப²லமத்தம் கிஞ்சிதே³வ லபி⁴த்வா ஜீவிகம் கப்பேதி, தம் பன உட்டா²னம் ஆக³ம்ம கிஞ்சி புஞ்ஞப²லம் நப்படிலப⁴தி, அயம் உட்டா²னப²லூபஜீவீ ந கம்மப²லூபஜீவீ நாம. சாதுமஹாராஜிகே பன தே³வே ஆதி³ம் கத்வா ஸப்³பே³பி தே³வா உட்டா²னவீரியேன வினா புஞ்ஞப²லஸ்ஸேவ உபஜீவனதோ கம்மப²லூபஜீவினோ ந உட்டா²னப²லூபஜீவினோ நாம. ராஜராஜமஹாமத்தாத³யோ உட்டா²னப²லூபஜீவினோ ச கம்மப²லூபஜீவினோ ச. நேரயிகஸத்தா நேவ உட்டா²னப²லூபஜீவினோ ந கம்மப²லூபஜீவினோ. இமஸ்மிம் ஸுத்தே புஞ்ஞப²லமேவ கம்மப²லந்தி அதி⁴ப்பேதம், தஞ்ச தேஸம் நத்தி².

5. ஸாவஜ்ஜஸுத்தவண்ணனா

135. பஞ்சமே பட²மோ அந்த⁴பா³லபுது²ஜ்ஜனோ, து³தியோ அந்தரந்தரா குஸலகாரகோ லோகியபுது²ஜ்ஜனோ, ததியோ ஸோதாபன்னோ, ஸகதா³கா³மிஅனாகா³மினோபி ஏதேனேவ ஸங்க³ஹிதா. சதுத்தோ² கீ²ணாஸவோ. ஸோ ஹி ஏகந்தேனேவ அனவஜ்ஜோ.

6-7. ஸீலஸுத்தாதி³வண்ணனா

136-137. ச²ட்டே² பட²மோ லோகியமஹாஜனோ, து³தியோ ஸுக்க²விபஸ்ஸகோ ஸோதாபன்னோ ச ஸகதா³கா³மீ ச, ததியோ அனாகா³மீ. ஸோ ஹி யஸ்மா தங்க²ணிகம்பி உபபத்தினிமித்தகம் ஜா²னம் படிலப⁴தியேவ, தஸ்மா ஸுக்க²விபஸ்ஸகோபி ஸமாதி⁴ஸ்மிம் பரிபூரகாரீயேவ. சதுத்தோ² கீ²ணாஸவோயேவ. ஸோ ஹி ஸப்³பே³ஸம் ஸீலாதி³பச்சனீகானம் பஹீனத்தா ஸப்³ப³த்த² பரிபூரகாரீ நாம. ஸத்தமேபி ச²ட்டே² வுத்தனயேனேவ புக்³க³லபரிச்சே²தோ³ வேதி³தப்³போ³.

8. நிகட்ட²ஸுத்தவண்ணனா

138. அட்ட²மே நிகட்ட²காயோதி நிக்³க³தகாயோ. அனிகட்ட²சித்தோதி அனுபவிட்ட²சித்தோ. காயேனேவ கா³மதோ நிக்க²ந்தோ, சித்தேன அரஞ்ஞே வஸந்தோபி கா³மமேவ பவிட்டோ²தி வுத்தம் ஹோதி. இமினா நயேன ஸப்³ப³த்த² அத்தோ² வேதி³தப்³போ³.

9. த⁴ம்மகதி²கஸுத்தவண்ணனா

139. நவமே அஸஹிதந்தி அத்தே²ன அஸம்யுத்தம். ந குஸலா ஹோதீதி ந சே²கா ஹோதி. ஸஹிதாஸஹிதஸ்ஸாதி அத்த²னிஸ்ஸிதஸ்ஸ வா அனிஸ்ஸிதஸ்ஸ வா. ஏவம் ஸப்³ப³த்த² அத்தோ² வேதி³தப்³போ³.

10. வாதீ³ஸுத்தவண்ணனா

140. த³ஸமே அத்த²தோ பரியாதா³னம் க³ச்ச²தீதி அட்ட²கத²ம் புச்சி²தோ பரியாதா³னம் பரிக்க²யம் க³ச்ச²தி, கதே²தும் ந ஸக்கோதி. நோ ப்³யஞ்ஜனதோதி ப்³யஞ்ஜனம் பனஸ்ஸ பவத்ததி ந பரியாதி³யதி. ஏஸேவ நயோ ஸப்³ப³த்தா²தி.

புக்³க³லவக்³கோ³ சதுத்தோ².