(11) 1. வலாஹகவக்³கோ³

1-2. வலாஹகஸுத்தத்³வயவண்ணனா

101-2. ததியபண்ணாஸகஸ்ஸ பட²மே வலாஹகாதி மேகா⁴. பா⁴ஸிதா ஹோதி நோ கத்தாதி ‘‘இத³ஞ்சித³ஞ்ச கரிஸ்ஸாமீ’’தி கேவலம் பா⁴ஸதியேவ, ந கரோதி. கத்தா ஹோதி நோ பா⁴ஸிதாதி அகதே²த்வாவ ‘‘இத³ஞ்சித³ஞ்ச மயா காதும் வட்டதீ’’தி கத்தா ஹோதி. ஏவம் ஸப்³ப³த்த² அத்தோ² வேதி³தப்³போ³. து³தியம் உத்தானத்த²மேவ.

3. கும்ப⁴ஸுத்தவண்ணனா

103. ததியே கும்பா⁴தி க⁴டா. துச்சோ² பிஹிதோதி ரித்தகோ பிஹிதமுகோ². பூரோ விவடோதி உத³கபுண்ணோ அபாருதமுகோ². ஸேஸத்³வயேபி ஏஸேவ நயோ.

4. உத³கரஹத³ஸுத்தவண்ணனா

104. சதுத்தே² உத்தானோ க³ம்பீ⁴ரோபா⁴ஸோதிஆதீ³ஸு புராணபண்ணரஸஸம்பி⁴ன்னவண்ணோ காளஉத³கோ க³ம்பீ⁴ரோபா⁴ஸோ நாம, அச்ச²விப்பஸன்னமணிவண்ணஉத³கோ உத்தானோபா⁴ஸோ நாம.

5-6. அம்ப³ஸுத்தவண்ணனா

105-6. பஞ்சமே ஆமம் பக்கவண்ணீதி ஆமகம் ஹுத்வா ஓலோகேந்தானம் பக்கஸதி³ஸம் கா²யதி. ஏவம் ஸப்³ப³பதா³னி த³ட்ட²ப்³பா³னி. ச²ட்ட²ம் உத்தானத்த²மேவ.

7. மூஸிகஸுத்தவண்ணனா

107. ஸத்தமே யோ ஆவாடம் க²ணதி, ந ச தத்த² வஸதி, ஸோ கா³த⁴ம் கத்தா நோ வஸிதாதி வுச்சதி. க²ந்தாதிபி பாடோ². இமினா நயேன ஸப்³ப³பதா³னி வேதி³தப்³பா³னி.

8. ப³லீப³த்³த³ஸுத்தவண்ணனா

108. அட்ட²மே யோ அத்தனோ கோ³க³ணம் மத்³த³தி, ந பரகோ³க³ணம், அயம் ஸக³வசண்டோ³ நோ பரக³வசண்டோ³தி ஏவம் ஸப்³ப³பதா³னி வேதி³தப்³பா³னி. உப்³பே³ஜேதா ஹோதீதி க⁴ட்டேத்வா விஜ்ஜி²த்வா உப்³பே³க³பத்தம் கரோதி.

9. ருக்க²ஸுத்தவண்ணனா

109. நவமே பே²க்³கு³ பே²க்³கு³பரிவாரோதி நிஸ்ஸாரோ பே²க்³கு³ருக்கோ² பே²க்³கு³ருக்கே²ஹேவ பரிவுதோ. ஸாரபரிவாரோதி க²தி³ராதீ³ஹி ஸாரருக்கே²ஹேவ பரிவுதோ. ஏஸ நயோ ஸப்³ப³த்த².

10. ஆஸீவிஸஸுத்தவண்ணனா

110. த³ஸமே ஆக³தவிஸோ ந கோ⁴ரவிஸோதி யஸ்ஸ விஸம் ஆக³ச்ச²தி, கோ⁴ரம் பன ந ஹோதி, சிரகாலம் ந பீளேதி. ஸேஸபதே³ஸுபி ஏஸேவ நயோதி.

வலாஹகவக்³கோ³ பட²மோ.