7. அஹிராஜஸுத்தவண்ணனா

67. ஸத்தமே இமானி சத்தாரி அஹிராஜகுலானீதி இத³ம் த³ட்ட²விஸானேவ ஸந்தா⁴ய வுத்தம். யே ஹி கேசி த³ட்ட²விஸா, ஸப்³பே³தே இமேஸம் சதுன்னம் அஹிராஜகுலானம் அப்³ப⁴ந்தரக³தாவ ஹோந்தி. அத்தகு³த்தியாதி அத்தனோ கு³த்தத்தா²ய. அத்தரக்கா²யாதி அத்தனோ ரக்க²ணத்தா²ய. அத்தபரித்தாயாதி அத்தனோ பரித்தாணத்தா²ய. பரித்தம் நாம அனுஜானாமீதி அத்தோ².

இதா³னி யதா² தம் பரித்தம் காதப்³ப³ம், தம் த³ஸ்ஸேந்தோ விரூபக்கே²ஹி மேதிஆதி³மாஹ. தத்த² விரூபக்கே²ஹீதி விரூபக்க²னாக³குலேஹி. ஸேஸேஸுபி ஏஸேவ நயோ. அபாத³கேஹீதி அபாத³கஸத்தேஹி. ஸேஸேஸுபி ஏஸேவ நயோ. ஸப்³பே³ ஸத்தாதி இதோ புப்³பே³ ஏத்தகேன டா²னேன ஓதி³ஸ்ஸகமேத்தம் கதே²த்வா இதா³னி அனோதி³ஸ்ஸகமேத்தம் கதே²தும் இத³மாரத்³த⁴ம். தத்த² ஸத்தா பாணா பூ⁴தாதி ஸப்³பா³னேதானி புக்³க³லவேவசனானேவ. ப⁴த்³ரானி பஸ்ஸந்தூதி ப⁴த்³ரானி ஆரம்மணானி பஸ்ஸந்து. மா கஞ்சி பாபமாக³மாதி கஞ்சி ஸத்தம் பாபகம் லாமகம் மா ஆக³ச்ச²து. அப்பமாணோ பு³த்³தோ⁴தி ஏத்த² பு³த்³தோ⁴தி பு³த்³த⁴கு³ணா வேதி³தப்³பா³. தே ஹி அப்பமாணா நாம. ஸேஸபத³த்³வயேபி ஏஸேவ நயோ. பமாணவந்தானீதி கு³ணப்பமாணேன யுத்தானி. உண்ணனாபீ⁴தி லோமஸனாபி⁴கோ மக்கடகோ. ஸரபூ³தி க⁴ரகோ³லிகா. கதா மே ரக்கா², கதா மே பரித்தாதி மயா ஏத்தகஸ்ஸ ஜனஸ்ஸ ரக்கா² ச பரித்தாணஞ்ச கதம். படிக்கமந்து பூ⁴தானீதி ஸப்³பே³பி மே கதபரித்தாணா ஸத்தா அபக³ச்ச²ந்து, மா மம் விஹேட²யிம்ஸூதி அத்தோ².