2. ஆனண்யஸுத்தவண்ணனா

62. து³தியே அதி⁴க³மனீயானீதி பத்தப்³பா³னி. காமபோ⁴கி³னாதி வத்து²காமே ச கிலேஸகாமே ச பரிபு⁴ஞ்ஜந்தேன. அத்தி²ஸுகா²தீ³ஸு அத்தீ²தி உப்பஜ்ஜனகஸுக²ம் அத்தி²ஸுக²ம் நாம. போ⁴கே³ பரிபு⁴ஞ்ஜந்தஸ்ஸ உப்பஜ்ஜனகஸுக²ம் போ⁴க³ஸுக²ம் நாம. அனணோஸ்மீதி உப்பஜ்ஜனகஸுக²ம் ஆனண்யஸுக²ம் நாம. நித்³தோ³ஸோ அனவஜ்ஜோஸ்மீதி உப்பஜ்ஜனகஸுக²ம் அனவஜ்ஜஸுக²ம் நாம.

பு⁴ஞ்ஜந்தி பு⁴ஞ்ஜமானோ. பஞ்ஞா விபஸ்ஸதீதி பஞ்ஞாய விபஸ்ஸதி. உபோ⁴ பா⁴கே³தி த்³வே கோட்டா²ஸே, ஹேட்டி²மானி தீணி ஏகம் கோட்டா²ஸம், அனவஜ்ஜஸுக²ம் ஏகம் கோட்டா²ஸந்தி ஏவம் பஞ்ஞாய பஸ்ஸமானோ த்³வே கோட்டா²ஸே ஜானாதீதி அத்தோ². அனவஜ்ஜஸுக²ஸ்ஸேதந்தி ஏதம் திவித⁴ம்பி ஸுக²ம் அனவஜ்ஜஸுக²ஸ்ஸ ஸோளஸிம் கலம் நாக்³க⁴தீதி.