8. அரியவம்ஸஸுத்தவண்ணனா

28. அட்ட²மஸ்ஸ அஜ்ஜா²ஸயிகோ நிக்கே²போ. இமம் கிர மஹாஅரியவம்ஸஸுத்தந்தம் ப⁴க³வா ஜேதவனமஹாவிஹாரே த⁴ம்மஸபா⁴யம் பஞ்ஞத்தவரபு³த்³தா⁴ஸனே நிஸின்னோ அத்தனோபி பரபுக்³க³லானம்பி அஜ்ஜா²ஸயவஸேன பரிவாரேத்வா நிஸின்னானி சத்தாலீஸ பி⁴க்கு²ஸஹஸ்ஸானி, ‘‘பி⁴க்க²வே’’தி ஆமந்தேத்வா சத்தாரோமே, பி⁴க்க²வே, அரியவம்ஸாதி ஆரபி⁴. தத்த² அரியவம்ஸாதி அரியானம் வம்ஸா. யதா² ஹி க²த்தியவம்ஸோ ப்³ராஹ்மணவம்ஸோ வேஸ்ஸவம்ஸோ ஸுத்³த³வம்ஸோ ஸமணவம்ஸோ குலவம்ஸோ ராஜவம்ஸோ, ஏவம் அயம்பி அட்ட²மோ அரியவம்ஸோ அரியதந்தி அரியபவேணீ நாம ஹோதி. ஸோ கோ² பனாயம் அரியவம்ஸோ இமேஸம் வம்ஸானம் மூலக³ந்தா⁴தீ³னம் காளானுஸாரிக³ந்தா⁴த³யோ விய அக்³க³மக்கா²யதி.

கே பன தே அரியா, யேஸம் ஏதே வம்ஸாதி? அரியா வுச்சந்தி பு³த்³தா⁴ ச பச்சேகபு³த்³தா⁴ ச ததா²க³தஸாவகா ச, ஏதேஸம் அரியானம் வம்ஸாதி அரியவம்ஸா. இதோ புப்³பே³ ஹி ஸதஸஹஸ்ஸகப்பாதி⁴கானம் சதுன்னம் அஸங்க்²யேய்யானம் மத்த²கே தண்ஹங்கரோ, மேத⁴ங்கரோ, ஸரணங்கரோ, தீ³பங்கரோதி சத்தாரோ பு³த்³தா⁴ உப்பன்னா, தே அரியா, தேஸம் அரியானம் வம்ஸாதி அரியவம்ஸா. தேஸம் பு³த்³தா⁴னம் பரினிப்³பா³னதோ அபரபா⁴கே³ அஸங்க்²யேய்யம் அதிக்கமித்வா கோண்ட³ஞ்ஞோ நாம பு³த்³தோ⁴ உப்பன்னோ…பே… இமஸ்மிம் கப்பே ககுஸந்தோ⁴, கோணாக³மனோ, கஸ்ஸபோ, அம்ஹாகம் ப⁴க³வா கோ³தமோதி சத்தாரோ பு³த்³தா⁴ உப்பன்னா, தேஸம் அரியானம் வம்ஸாதி அரியவம்ஸா. அபிச அதீதானாக³தபச்சுப்பன்னானம் ஸப்³ப³பு³த்³த⁴-பச்சேகபு³த்³த⁴-பு³த்³த⁴ஸாவகானம் அரியானம் வம்ஸாதி அரியவம்ஸா.

தே கோ² பனேதே அக்³க³ஞ்ஞா அக்³கா³தி ஜானிதப்³பா³, ரத்தஞ்ஞா தீ³க⁴ரத்தம் பவத்தாதி ஜானிதப்³பா³, வம்ஸஞ்ஞா வம்ஸாதி ஜானிதப்³பா³. போராணா ந அது⁴னுப்பத்திகா. அஸம்கிண்ணா அவிகிண்ணா அனபனீதா. அஸம்கிண்ணபுப்³பா³ அதீதபு³த்³தே⁴ஹிபி ந ஸம்கிண்ணபுப்³பா³, ‘‘கி இமேஹீ’’தி ந அபனீதபுப்³பா³. ந ஸம்கீயந்தீதி இதா³னிபி ந அபனீயந்தி. ந ஸம்கீயிஸ்ஸந்தீதி அனாக³தபு³த்³தே⁴ஹிபி ந அபனீயிஸ்ஸந்தி. யே லோகே விஞ்ஞூ ஸமணப்³ராஹ்மணா, தேஹி அப்படிகுட்டா², ஸமணேஹி ப்³ராஹ்மணேஹி விஞ்ஞூஹி அனிந்தி³தா அக³ரஹிதா.

ஸந்துட்டோ² ஹோதீதி பச்சயஸந்தோஸவஸேன ஸந்துட்டோ² ஹோதி. இதரீதரேனாதி ந தூ²லஸுகு²மலூக²பணீததி²ரஜிண்ணானம் யேன கேனசி, அத² கோ² யதா²லத்³தா⁴தீ³னம் இதரீதரேன யேன கேனசி ஸந்துட்டோ² ஹோதீதி அத்தோ². சீவரஸ்மிஞ்ஹி தயோ ஸந்தோஸா யதா²லாப⁴ஸந்தோஸோ யதா²ப³லஸந்தோஸோ யதா²ஸாருப்பஸந்தோஸோதி. பிண்ட³பாதாதீ³ஸுபி ஏஸேவ நயோ. தேஸம் வித்தா²ரகதா² ‘‘ஸந்துட்ட²ஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தீ’’தி இமஸ்மிம் ஸுத்தே வுத்தனயேனேவ வேதி³தப்³பா³. இதி இமே தயோ ஸந்தோஸே ஸந்தா⁴ய ‘‘ஸந்துட்டோ² ஹோதி இதரீதரேன சீவரேன, யதா²லத்³தா⁴தீ³ஸு யேன கேனசி சீவரேன ஸந்துட்டோ² ஹோதீ’’தி வுத்தம்.

ஏத்த² ச சீவரம் ஜானிதப்³ப³ம், சீவரக்கே²த்தம் ஜானிதப்³ப³ம், பம்ஸுகூலம் ஜானிதப்³ப³ம், சீவரஸந்தோஸோ ஜானிதப்³போ³, சீவரப்படிஸம்யுத்தானி து⁴தங்கா³னி ஜானிதப்³பா³னி. தத்த² சீவரம் ஜானிதப்³ப³ந்தி கோ²மாதீ³னி ச² சீவரானி து³கூலாதீ³னி ச² அனுலோமசீவரானி ஜானிதப்³பா³னி. இமானி த்³வாத³ஸ கப்பியசீவரானி. குஸசீரம், வாகசீரம், ப²லகசீரம், கேஸகம்ப³லம், வாளகம்ப³லம், போத்த²கோ, சம்மம், உலூகபக்க²ம், ருக்க²து³ஸ்ஸம், லதாது³ஸ்ஸம், ஏரகது³ஸ்ஸம், கத³லிது³ஸ்ஸம், வேளுது³ஸ்ஸந்தி ஏவமாதீ³னி பன அகப்பியசீவரானி.

சீவரக்கே²த்தந்தி ‘‘ஸங்க⁴தோ வா க³ணதோ வா ஞாதிதோ வா மித்ததோ வா அத்தனோ வா த⁴னேன, பம்ஸுகூலம் வா’’தி ஏவம் உப்பஜ்ஜனதோ ச² கே²த்தானி, அட்ட²ன்னஞ்ச மாதிகானம் வஸேன அட்ட² கே²த்தானி ஜானிதப்³பா³னி.

பம்ஸுகூலந்தி ஸோஸானிகம், பாபணிகம், ரதி²யம், ஸங்காரகூடகம், ஸோத்தி²யம், ஸினானம், தித்த²ம், க³தபச்சாக³தம், அக்³கி³த³ட்³ட⁴ம், கோ³கா²யிதம், உபசிககா²யிதம், உந்தூ³ரகா²யிதம், அந்தச்சி²ன்னம், த³ஸச்சி²ன்னம், த⁴ஜாஹடம், தூ²பம், ஸமணசீவரம், ஸாமுத்³தி³யம், ஆபி⁴ஸேகியம், பந்தி²கம், வாதாஹடம், இத்³தி⁴மயம், தே³வத³த்தியந்தி தேவீஸதி பம்ஸுகூலானி வேதி³தப்³பா³னி. ஏத்த² ச ஸோத்தி²யந்தி க³ப்³ப⁴மலஹரணம். க³தபச்சாக³தந்தி மதகஸரீரம் பாருபித்வா ஸுஸானம் நேத்வா ஆனீதசீவரம். த⁴ஜாஹடந்தி த⁴ஜம் உஸ்ஸாபேத்வா ததோ ஆனீதம். தூ²பந்தி வம்மிகே பூஜிதசீவரம். ஸாமுத்³தி³யந்தி ஸமுத்³த³வீசீஹி த²லம் பாபிதம். பந்தி²கந்தி பந்த²ம் க³ச்ச²ந்தேஹி சோரப⁴யேன பாஸாணேஹி கோட்டேத்வா பாருதசீவரம். இத்³தி⁴மயந்தி ஏஹிபி⁴க்கு²சீவரம். ஸேஸம் பாகடமேவாதி.

சீவரஸந்தோஸோதி வீஸதி சீவரஸந்தோஸா – சீவரே விதக்கஸந்தோஸோ, க³மனஸந்தோஸோ, பரியேஸனஸந்தோஸோ, படிலாப⁴ஸந்தோஸோ, மத்தபடிக்³க³ஹணஸந்தோஸோ, லோலுப்பவிவஜ்ஜனஸந்தோஸோ, யதா²லாப⁴ஸந்தோஸோ, யதா²ப³லஸந்தோஸோ, யதா²ஸாருப்பஸந்தோஸோ, உத³கஸந்தோஸோ, தோ⁴வனஸந்தோஸோ, கரணஸந்தோஸோ, பரிமாணஸந்தோஸோ, ஸுத்தஸந்தோஸோ, ஸிப்³ப³னஸந்தோஸோ, ரஜனஸந்தோஸோ, கப்பஸந்தோஸோ, பரிபோ⁴க³ஸந்தோஸோ, ஸன்னிதி⁴பரிவஜ்ஜனஸந்தோஸோ, விஸ்ஸஜ்ஜனஸந்தோஸோதி.

தத்த² ஸாத³கபி⁴க்கு²னா தேமாஸம் நிப³த்³த⁴வாஸம் வஸித்வா ஏகமாஸமத்தம் விதக்கேதும் வட்டதி. ஸோ ஹி பவாரேத்வா சீவரமாஸே சீவரம் கரோதி, பம்ஸுகூலிகோ அட்³ட⁴மாஸேனேவ கரோதி. இத³ம் மாஸட்³ட⁴மாஸமத்தம் விதக்கனம் விதக்கஸந்தோஸோ நாம. விதக்கஸந்தோஸேன பன ஸந்துட்டே²ன பி⁴க்கு²னா பாசீனக²ண்ட³ராஜிவாஸிகபம்ஸுகூலிகத்தே²ரஸதி³ஸேன ப⁴விதப்³ப³ம்.

தே²ரோ கிர ‘‘சேதியபப்³ப³தவிஹாரே சேதியம் வந்தி³ஸ்ஸாமீ’’தி ஆக³தோ சேதியம் வந்தி³த்வா சிந்தேஸி – ‘‘மய்ஹம் சீவரம் ஜிண்ணம், ப³ஹூனம் வஸனட்டா²னே லபி⁴ஸ்ஸாமீ’’தி. ஸோ மஹாவிஹாரம் க³ந்த்வா ஸங்க⁴த்தே²ரம் தி³ஸ்வா வஸனட்டா²னம் புச்சி²த்வா தத்த² வுத்தோ² புனதி³வஸே சீவரம் ஆதா³ய ஆக³ந்த்வா தே²ரம் வந்தி³. தே²ரோ ‘‘கிம், ஆவுஸோ’’தி ஆஹ. கா³மத்³வாரம், ப⁴ந்தே, க³மிஸ்ஸாமீதி. அஹம்பாவுஸோ, க³மிஸ்ஸாமீதி. ஸாது⁴, ப⁴ந்தேதி க³ச்ச²ந்தோ மஹாபோ³தி⁴த்³வாரகோட்ட²கே ட²த்வா ‘‘புஞ்ஞவந்தானம் வஸனட்டா²னே மனாபம் லபி⁴ஸ்ஸாமீ’’தி சிந்தேத்வா ‘‘அபரிஸுத்³தோ⁴ மே விதக்கோ’’தி ததோவ படினிவத்தி. புனதி³வஸே அம்ப³ங்க³ணஸமீபதோ, புனதி³வஸே மஹாசேதியஸ்ஸ உத்தரத்³வாரதோ தத்தே²வ படினிவத்தித்வா சதுத்த²தி³வஸே தே²ரஸ்ஸ ஸந்திகம் அக³மாஸி. தே²ரோ ‘‘இமஸ்ஸ பி⁴க்கு²னோ விதக்கோ ந பரிஸுத்³தோ⁴ ப⁴விஸ்ஸதீ’’தி சீவரம் க³ஹேத்வா தேன ஸத்³தி⁴ம்யேவ பஞ்ஹம் புச்ச²மானோ கா³மம் பாவிஸி. தஞ்ச ரத்திம் ஏகோ மனுஸ்ஸோ உச்சாரபலிபு³த்³தோ⁴ ஸாடகேயேவ வச்சம் கத்வா தம் ஸங்காரட்டா²னே ச²ட்³டே³ஸி. பம்ஸுகூலிகத்தே²ரோ தம் நீலமக்கி²காஹி ஸம்பரிகிண்ணம் தி³ஸ்வா அஞ்ஜலிம் பக்³க³ஹேஸி. மஹாதே²ரோ ‘‘கிம், ஆவுஸோ, ஸங்காரட்டா²னஸ்ஸ அஞ்ஜலிம் பக்³க³ண்ஹாஸீ’’தி. நாஹம், ப⁴ந்தே, ஸங்காரட்டா²னஸ்ஸ அஞ்ஜலிம் பக்³க³ண்ஹாமி, மய்ஹம் பிது த³ஸப³லஸ்ஸ பக்³க³ண்ஹாமி, புண்ணதா³ஸியா ஸரீரம் பாருபித்வா ச²ட்³டி³தம் பம்ஸுகூலம் தும்ப³மத்தே பாணகே விது⁴னித்வா ஸுஸானதோ க³ண்ஹந்தேன து³க்கரதரம் கதம், ப⁴ந்தேதி. மஹாதே²ரோ ‘‘பரிஸுத்³தோ⁴ விதக்கோ பம்ஸுகூலிகஸ்ஸா’’தி சிந்தேஸி. பம்ஸுகூலிகத்தே²ரோபி தஸ்மிம்யேவ டா²னே டி²தோ விபஸ்ஸனம் வட்³டே⁴த்வா தீணி ப²லானி பத்தோ தம் ஸாடகம் க³ஹேத்வா சீவரம் கத்வா பாருபித்வா பாசீனக²ண்ட³ராஜிம் க³ந்த்வா அக்³க³ப²லம் அரஹத்தம் பாபுணி.

சீவரத்தா²ய க³ச்ச²ந்தஸ்ஸ பன ‘‘கத்த² லபி⁴ஸ்ஸாமீ’’தி அசிந்தேத்வா கம்மட்டா²னஸீஸேனேவ க³மனம் க³மனஸந்தோஸோ நாம. பரியேஸந்தஸ்ஸ பன யேன வா தேன வா ஸத்³தி⁴ம் அபரியேஸித்வா லஜ்ஜிம் பேஸலம் பி⁴க்கு²ம் க³ஹேத்வா பரியேஸனம் பரியேஸனஸந்தோஸோ நாம. ஏவம் பரியேஸந்தஸ்ஸ ஆஹரியமானம் சீவரம் தூ³ரதோ தி³ஸ்வா ‘‘ஏதம் மனாபம் ப⁴விஸ்ஸதி, ஏதம் அமனாப’’ந்தி ஏவம் அவிதக்கேத்வா தூ²லஸுகு²மாதீ³ஸு யதா²லத்³தே⁴னேவ ஸந்துஸ்ஸனம் படிலாப⁴ஸந்தோஸோ நாம. ஏவம் லத்³த⁴ம் க³ண்ஹந்தஸ்ஸாபி ‘‘ஏத்தகம் து³பட்டஸ்ஸ ப⁴விஸ்ஸதி, ஏத்தகம் ஏகபட்டஸ்ஸா’’தி அத்தனோ பஹோனகமத்தேனேவ ஸந்துஸ்ஸனம் மத்தபடிக்³க³ஹணஸந்தோஸோ நாம. சீவரம் பரியேஸந்தஸ்ஸ பன ‘‘அஸுகஸ்ஸ க⁴ரத்³வாரே மனாபம் லபி⁴ஸ்ஸாமீ’’தி அசிந்தேத்வா த்³வாரபடிபாடியா சரணம் லோலுப்பவிவஜ்ஜனஸந்தோஸோ நாம.

லூக²பணீதேஸு யேன கேனசி யாபேதும் ஸக்கோந்தஸ்ஸ யதா²லத்³தே⁴னேவ யாபனம் யதா²லாப⁴ஸந்தோஸோ நாம. அத்தனோ தா²மம் ஜானித்வா யேன யாபேதும் ஸக்கோதி, தேன யாபனம் யதா²ப³லஸந்தோஸோ நாம. மனாபம் அஞ்ஞஸ்ஸ த³த்வா அத்தனா யேன கேனசி யாபனம் யதா²ஸாருப்பஸந்தோஸோ நாம.

‘‘கத்த² உத³கம் மனாபம், கத்த² அமனாப’’ந்தி அவிசாரேத்வா யேன கேனசி தோ⁴வனூபகே³ன உத³கேன தோ⁴வனம் உத³கஸந்தோஸோ நாம. பண்டு³மத்திககே³ருகபூதிபண்ணரஸகிலிட்டா²னி பன உத³கானி வஜ்ஜேதும் வட்டதி. தோ⁴வந்தஸ்ஸ பன முக்³க³ராதீ³ஹி அபஹரித்வா ஹத்தே²ஹி மத்³தி³த்வா தோ⁴வனம் தோ⁴வனஸந்தோஸோ நாம. ததா² அஸுஜ்ஜ²ந்தம் பண்ணானி பக்கி²பித்வா தாபிதஉத³கேனாபி தோ⁴விதும் வட்டதி. ஏவம் தோ⁴வித்வா கரோந்தஸ்ஸ ‘‘இத³ம் தூ²லம், இத³ம் ஸுகு²ம’’ந்தி அகோபேத்வா பஹோனகனீஹாரேனேவ கரணம் கரணஸந்தோஸோ நாம. திமண்ட³லபதிச்சா²த³னமத்தஸ்ஸேவ கரணம் பரிமாணஸந்தோஸோ நாம. சீவரகரணத்தா²ய பன மனாபம் ஸுத்தம் பரியேஸிஸ்ஸாமீதி அவிசாரேத்வா ரதி²காதீ³ஸு வா தே³வட்டா²னே வா ஆஹரித்வா பாத³மூலே வா ட²பிதம் யம்கிஞ்சிதே³வ ஸுத்தம் க³ஹேத்வா கரணம் ஸுத்தஸந்தோஸோ நாம.

குஸிப³ந்த⁴னகாலே பன அங்கு³லமத்தே ஸத்த வாரே ந விஜ்ஜி²தப்³ப³ம். ஏவம் கரோந்தஸ்ஸ ஹி யோ பி⁴க்கு² ஸஹாயோ ந ஹோதி, தஸ்ஸ வத்தபே⁴தோ³பி நத்தி². திவங்கு³லமத்தே பன ஸத்த வாரே விஜ்ஜி²தப்³ப³ம். ஏவம் கரோந்தஸ்ஸ மக்³க³ப்படிபன்னேனாபி ஸஹாயேன ப⁴விதப்³ப³ம். யோ ந ஹோதி, தஸ்ஸ வத்தபே⁴தோ³. அயம் ஸிப்³ப³னஸந்தோஸோ நாம. ரஜந்தேன பன காளகச்ச²காதீ³னி பரியேஸந்தேன ந சரிதப்³ப³ம், ஸோமவக்கலாதீ³ஸு யம் லப⁴தி, தேன ரஜிதப்³ப³ம். அலப⁴ந்தேன பன மனுஸ்ஸேஹி அரஞ்ஞே வாகம் க³ஹேத்வா ச²ட்³டி³தரஜனம் வா பி⁴க்கூ²ஹி பசித்வா ச²ட்³டி³தகஸடம் வா க³ஹேத்வா ரஜிதப்³ப³ம். அயம் ரஜனஸந்தோஸோ நாம. நீலகத்³த³மகாளஸாமேஸு யம்கிஞ்சி க³ஹேத்வா ஹத்தி²பிட்டே² நிஸின்னஸ்ஸ பஞ்ஞாயமானகப்பகரணம் கப்பஸந்தோஸோ நாம.

ஹிரிகோபீனப்படிச்சா²த³னமத்தவஸேன பரிபு⁴ஞ்ஜனம் பரிபோ⁴க³ஸந்தோஸோ நாம. து³ஸ்ஸம் பன லபி⁴த்வா ஸுத்தம் வா ஸூசிம் வா காரகம் வா அலப⁴ந்தேன ட²பேதும் வட்டதி, லப⁴ந்தேன ந வட்டதி. கதம்பி ஸசே அந்தேவாஸிகாதீ³னம் தா³துகாமோ ஹோதி, தே ச அஸன்னிஹிதா, யாவ ஆக³மனா ட²பேதும் வட்டதி. ஆக³தமத்தேஸு தா³தப்³ப³ம். தா³தும் அஸக்கோந்தேன அதி⁴ட்டா²தப்³ப³ம். அஞ்ஞஸ்மிம் சீவரே ஸதி பச்சத்த²ரணம்பி அதி⁴ட்டா²தும் வட்டதி. அனதி⁴ட்டி²தமேவ ஹி ஸன்னிதி⁴ ஹோதி, அதி⁴ட்டி²தம் ந ஹோதீதி மஹாஸீவத்தே²ரோ ஆஹ. அயம் ஸன்னிதி⁴பரிவஜ்ஜனஸந்தோஸோ நாம. விஸ்ஸஜ்ஜேந்தேன பன ந முக²ம் ஓலோகேத்வா தா³தப்³ப³ம், ஸாரணீயத⁴ம்மே ட²த்வா விஸ்ஸஜ்ஜேதப்³ப³ந்தி அயம் விஸ்ஸஜ்ஜனஸந்தோஸோ நாம.

சீவரப்படிஸம்யுத்தானி து⁴தங்கா³னி நாம பம்ஸுகூலிகங்க³ஞ்சேவ தேசீவரிகங்க³ஞ்ச. தேஸம் வித்தா²ரகதா² விஸுத்³தி⁴மக்³கே³ (விஸுத்³தி⁴. 1.24-25) வேதி³தப்³பா³. இதி சீவரஸந்தோஸமஹாஅரியவம்ஸம் பூரயமானோ பி⁴க்கு² இமானி த்³வே து⁴தங்கா³னி கோ³பேதி. இமானி கோ³பேந்தோ சீவரஸந்தோஸமஹாஅரியவம்ஸவஸேன ஸந்துட்டோ² ஹோதீதி.

வண்ணவாதீ³தி ஏகோ ஸந்துட்டோ² ஹோதி, ஸந்தோஸஸ்ஸ வண்ணம் ந கதே²தி. ஏகோ ந ஸந்துட்டோ² ஹோதி, ஸந்தோஸஸ்ஸ வண்ணம் கதே²தி. ஏகோ நேவ ஸந்துட்டோ² ஹோதி, ந ஸந்தோஸஸ்ஸ வண்ணம் கதே²தி. ஏகோ ஸந்துட்டோ² சேவ ஹோதி, ஸந்தோஸஸ்ஸ ச வண்ணம் கதே²தி. தம் த³ஸ்ஸேதும் ‘‘இதரீதரசீவரஸந்துட்டி²யா ச வண்ணவாதீ³’’தி வுத்தம்.

அனேஸனந்தி தூ³தேய்யபஹினக³மனானுயோக³பபே⁴த³ம் நானப்பகாரம் அனேஸனம். அப்பதிரூபந்தி அயுத்தம். அலத்³தா⁴ சாதி அலபி⁴த்வா. யதா² ஏகச்சோ ‘‘கத²ம் நு கோ² சீவரம் லபி⁴ஸ்ஸாமீ’’தி புஞ்ஞவந்தேஹி பி⁴க்கூ²ஹி ஸத்³தி⁴ம் ஏகதோ ஹுத்வா கோஹஞ்ஞம் கரோந்தோ உத்தஸதி பரிதஸ்ஸதி, ஸந்துட்டோ² பி⁴க்கு² ஏவம் அலத்³தா⁴ சீவரம் ந பரிதஸ்ஸதி. லத்³தா⁴ சாதி த⁴ம்மேன ஸமேன லபி⁴த்வா. அக³தி⁴தோதி விக³தலோப⁴கி³த்³தோ⁴. அமுச்சி²தோதி அதி⁴மத்ததண்ஹாய முச்ச²ம் அனாபன்னோ. அனஜ்ஜோ²பன்னோதி தண்ஹாய அனோத்த²தோ அபரியோனத்³தோ⁴. ஆதீ³னவத³ஸ்ஸாவீதி அனேஸனாபத்தியஞ்ச கே³தி⁴தபரிபோ⁴கே³ ச ஆதீ³னவம் பஸ்ஸமானோ. நிஸ்ஸரணபஞ்ஞோதி ‘‘யாவதே³வ ஸீதஸ்ஸ படிகா⁴தாயா’’தி வுத்தம் நிஸ்ஸரணமேவ பஜானந்தோ.

இதரீதரசீவரஸந்துட்டி²யாதி யேன கேனசி சீவரேன ஸந்துட்டி²யா. நேவத்தானுக்கம்ஸேதீதி ‘‘அஹம் பம்ஸுகூலிகோ, மயா உபஸம்பத³மாளேயேவ பம்ஸுகூலிகங்க³ம் க³ஹிதம், கோ மயா ஸதி³ஸோ அத்தீ²’’தி அத்துக்கம்ஸனம் ந கரோதி. நோ பரம் வம்பே⁴தீதி ‘‘இமே பனஞ்ஞே பி⁴க்கூ² ந பம்ஸுகூலிகா’’தி வா, ‘‘பம்ஸுகூலிகங்க³மத்தம்பி ஏதேஸம் நத்தீ²’’தி வா ஏவம் பரம் ந வம்பே⁴தி. யோ ஹி தத்த² த³க்கோ²தி யோ தஸ்மிம் சீவரஸந்தோஸே வண்ணவாதா³தீ³ஸு வா த³க்கோ² சே²கோ ப்³யத்தோ. அனலஸோதி ஸாதச்சகிரியாய ஆலஸியவிரஹிதோ. ஸம்பஜானோ படிஸ்ஸதோதி ஸம்பஜானபஞ்ஞாய சேவ ஸதியா ச யுத்தோ. அரியவம்ஸே டி²தோதி அரியவம்ஸே பதிட்டி²தோ.

இதரீதரேன பிண்ட³பாதேனாதி யேன கேனசி பிண்ட³பாதேன. ஏத்தா²பி பிண்ட³பாதோ ஜானிதப்³போ³, பிண்ட³பாதக்கே²த்தம் ஜானிதப்³ப³ம், பிண்ட³பாதஸந்தோஸோ ஜானிதப்³போ³, பிண்ட³பாதப்படிஸம்யுத்தம் து⁴தங்க³ம் ஜானிதப்³ப³ம். தத்த² பிண்ட³பாதோதி ஓத³னோ கும்மாஸோ ஸத்து மச்சோ² மம்ஸம் கீ²ரம் த³தி⁴ ஸப்பி நவனீதம் தேலம் மது⁴ பா²ணிதம் யாகு³ கா²த³னீயம் ஸாயனீயம் லேஹனீயந்தி ஸோளஸ பிண்ட³பாதா.

பிண்ட³பாதக்கே²த்தந்தி ஸங்க⁴ப⁴த்தம் உத்³தே³ஸப⁴த்தம் நிமந்தனம் ஸலாகப⁴த்தம் பக்கி²கம் உபோஸதி²கம் பாடிபதி³கப⁴த்தம் ஆக³ந்துகப⁴த்தம் க³மிகப⁴த்தம் கி³லானப⁴த்தம் கி³லானுபட்டா²கப⁴த்தம் து⁴ரப⁴த்தம் குடிப⁴த்தம் வாரப⁴த்தம் விஹாரப⁴த்தந்தி பன்னரஸ பிண்ட³பாதக்கே²த்தானி.

பிண்ட³பாதஸந்தோஸோதி பிண்ட³பாதே விதக்கஸந்தோஸோ க³மனஸந்தோஸோ பரியேஸனஸந்தோஸோ படிலாப⁴ஸந்தோஸோ படிக்³க³ஹணஸந்தோஸோ மத்தபடிக்³க³ஹணஸந்தோஸோ லோலுப்பவிவஜ்ஜனஸந்தோஸோ யதா²லாப⁴ஸந்தோஸோ யதா²ப³லஸந்தோஸோ யதா²ஸாருப்பஸந்தோஸோ உபகாரஸந்தோஸோ பரிமாணஸந்தோஸோ பரிபோ⁴க³ஸந்தோஸோ ஸன்னிதி⁴பரிவஜ்ஜனஸந்தோஸோ விஸ்ஸஜ்ஜனஸந்தோஸோதி பன்னரஸ ஸந்தோஸா.

தத்த² ஸாத³கோ பி⁴க்கு² முக²ம் தோ⁴வித்வா விதக்கேதி. பிண்ட³பாதிகேன பன க³ணேன ஸத்³தி⁴ம் சரதா ஸாயம் தே²ரூபட்டா²னகாலே ‘‘ஸ்வே கத்த² பிண்டா³ய சரிஸ்ஸாமாதி? அஸுககா³மே, ப⁴ந்தே’’தி ஏத்தகம் சிந்தேத்வா ததோ பட்டா²ய ந விதக்கேதப்³ப³ம். ஏகசாரிகேன விதக்கமாளகே ட²த்வா விதக்கேதப்³ப³ம். ததோ பட்டா²ய விதக்கேந்தோ அரியவம்ஸா சுதோ ஹோதி பரிபா³ஹிரோ. அயம் விதக்கஸந்தோஸோ நாம.

பிண்டா³ய பவிஸந்தேன ‘‘குஹிம் லபி⁴ஸ்ஸாமீ’’தி அசிந்தேத்வா கம்மட்டா²னஸீஸேன க³ந்தப்³ப³ம். அயம் க³மனஸந்தோஸோ நாம. பரியேஸந்தேன யம் வா தம் வா அக்³க³ஹேத்வா லஜ்ஜிம் பேஸலமேவ க³ஹேத்வா பரியேஸிதப்³ப³ம். அயம் பரியேஸனஸந்தோஸோ நாம. தூ³ரதோவ ஆஹரியமானம் தி³ஸ்வா ‘‘ஏதம் மனாபம், ஏதம் அமனாப’’ந்தி சித்தம் ந உப்பாதே³தப்³ப³ம். அயம் படிலாப⁴ஸந்தோஸோ நாம. ‘‘இமம் மனாபம் க³ண்ஹிஸ்ஸாமி, இமம் அமனாபம் ந க³ண்ஹிஸ்ஸாமீ’’தி அசிந்தேத்வா யம்கிஞ்சி யாபனமத்தம் க³ஹேதப்³ப³மேவ. அயம் படிக்³க³ஹணஸந்தோஸோ நாம.

ஏத்த² பன தே³ய்யத⁴ம்மோ ப³ஹு, தா³யகோ அப்பம் தா³துகாமோ, அப்பம் க³ஹேதப்³ப³ம். தே³ய்யத⁴ம்மோபி ப³ஹு, தா³யகோபி ப³ஹும் தா³துகாமோ, பமாணேனேவ க³ஹேதப்³ப³ம். தே³ய்யத⁴ம்மோ ந ப³ஹு, தா³யகோபி அப்பம் தா³துகாமோ, அப்பம் க³ஹேதப்³ப³ம். தே³ய்யத⁴ம்மோ ந ப³ஹு, தா³யகோ பன ப³ஹும் தா³துகாமோ, பமாணேன க³ஹேதப்³ப³ம். படிக்³க³ஹணஸ்மிஞ்ஹி மத்தம் அஜானந்தோ மனுஸ்ஸானம் பஸாத³ம் மக்கே²தி, ஸத்³தா⁴தே³ய்யம் வினிபாதேதி, ஸாஸனம் ந கரோதி, விஜாதமாதுயாபி சித்தம் க³ஹேதும் ந ஸக்கோதி. இதி மத்தம் ஜானித்வாவ படிக்³க³ஹேதப்³ப³ந்தி அயம் மத்தபடிக்³க³ஹணஸந்தோஸோ நாம. அட்³ட⁴குலானியேவ அக³ந்த்வா த்³வாரபடிபாடியா க³ந்தப்³ப³ம். அயம் லோலுப்பவிவஜ்ஜனஸந்தோஸோ நாம. யதா²லாப⁴ஸந்தோஸாத³யோ சீவரே வுத்தனயா ஏவ.

பிண்ட³பாதம் பரிபு⁴ஞ்ஜித்வா ‘‘ஸமணத⁴ம்மம் அனுபாலேஸ்ஸாமீ’’தி ஏவம் உபகாரம் ஞத்வா பரிபு⁴ஞ்ஜனம் உபகாரஸந்தோஸோ நாம. பத்தம் பூரேத்வா ஆனீதம் ந படிக்³க³ஹேதப்³ப³ம். அனுபஸம்பன்னே ஸதி தேன கா³ஹாபேதப்³ப³ம், அஸதி ஹராபேத்வா படிக்³க³ஹணமத்தம் க³ஹேதப்³ப³ம். அயம் பரிமாணஸந்தோஸோ நாம. ‘‘ஜிக⁴ச்சா²ய படிவினோத³னம் இத³மேத்த² நிஸ்ஸரண’’ந்தி ஏவம் பரிபு⁴ஞ்ஜனம் பரிபோ⁴க³ஸந்தோஸோ நாம. நித³ஹித்வா ந பரிபு⁴ஞ்ஜிதப்³ப³ந்தி அயம் ஸன்னிதி⁴பரிவஜ்ஜனஸந்தோஸோ நாம. முக²ம் அனோலோகேத்வா ஸாரணீயத⁴ம்மே டி²தேன விஸ்ஸஜ்ஜேதப்³ப³ம். அயம் விஸ்ஸஜ்ஜனஸந்தோஸோ நாம.

பிண்ட³பாதப்படிஸம்யுத்தானி பன பஞ்ச து⁴தங்கா³னி பிண்ட³பாதிகங்க³ம் ஸபதா³னசாரிகங்க³ம் ஏகாஸனிகங்க³ம் பத்தபிண்டி³கங்க³ம் க²லுபச்சா²ப⁴த்திகங்க³ந்தி. தேஸம் வித்தா²ரகதா² விஸுத்³தி⁴மக்³கே³ (விஸுத்³தி⁴. 1.26-30) வுத்தா. இதி பிண்ட³பாதஸந்தோஸமஹாஅரியவம்ஸம் பூரயமானோ பி⁴க்கு² இமானி பஞ்ச து⁴தங்கா³னி கோ³பேதி, இமானி கோ³பேந்தோ பிண்ட³பாதஸந்தோஸமஹாஅரியவம்ஸேன ஸந்துட்டோ² ஹோதி. வண்ணவாதீ³திஆதீ³னி வுத்தனயேனேவ வேதி³தப்³பா³னி.

ஸேனாஸனேனாதி இத⁴ ஸேனாஸனம் ஜானிதப்³ப³ம், ஸேனாஸனக்கே²த்தம் ஜானிதப்³ப³ம், ஸேனாஸனஸந்தோஸோ ஜானிதப்³போ³, ஸேனாஸனப்படிஸம்யுத்தம் து⁴தங்க³ம் ஜானிதப்³ப³ம். தத்த² ஸேனாஸனந்தி மஞ்சோ பீட²ம் பி⁴ஸி பி³ம்போ³ஹனம் விஹாரோ அட்³ட⁴யோகோ³ பாஸாதோ³ ஹம்மியம் கு³ஹா லேணம் அட்டோ மாளோ வேளுகு³ம்போ³ ருக்க²மூலம் யத்த² வா பன பி⁴க்கூ² படிக்கமந்தீதி இமானி பன்னரஸ ஸேனாஸனானி.

ஸேனாஸனக்கே²த்தந்தி ஸங்க⁴தோ வா க³ணதோ வா ஞாதிதோ வா மித்ததோ வா அத்தனோ வா த⁴னேன பம்ஸுகூலம் வாதி ச² கே²த்தானி.

ஸேனாஸனஸந்தோஸோதி ஸேனாஸனே விதக்கஸந்தோஸாத³யோ பன்னரஸ ஸந்தோஸா. தே பிண்ட³பாதே வுத்தனயேனேவ வேதி³தப்³பா³. ஸேனாஸனப்படிஸம்யுத்தானி பன பஞ்ச து⁴தங்கா³னி ஆரஞ்ஞிகங்க³ம் ருக்க²மூலிகங்க³ம் அப்³போ⁴காஸிகங்க³ம் ஸோஸானிகங்க³ம் யதா²ஸந்த²திகங்க³ந்தி. தேஸம் வித்தா²ரகதா² விஸுத்³தி⁴மக்³கே³ (விஸுத்³தி⁴. 1.31-35) வுத்தா. இதி ஸேனாஸனஸந்தோஸமஹாஅரியவம்ஸம் பூரயமானோ பி⁴க்கு² இமானி பஞ்ச து⁴தங்கா³னி கோ³பேதி. இமானி கோ³பேந்தோ ஸேனாஸனஸந்தோஸமஹாஅரியவம்ஸேன ஸந்துட்டோ² ஹோதி.

கி³லானபச்சயோ பன பிண்ட³பாதேயேவ பவிட்டோ². தத்த² யதா²லாப⁴யதா²ப³லயதா²ஸாருப்பஸந்தோஸேனேவ ஸந்துஸ்ஸிதப்³ப³ம். நேஸஜ்ஜிகங்க³ம் பா⁴வனாராமஅரியவம்ஸம் ப⁴ஜதி. வுத்தம்பி சேதம் –

‘‘பஞ்ச ஸேனாஸனே வுத்தா, பஞ்ச ஆஹாரனிஸ்ஸிதா;

ஏகோ வீரியஸம்யுத்தோ, த்³வே ச சீவரனிஸ்ஸிதா’’தி.

இதி ப⁴க³வா பத²விம் பத்த²ரமானோ விய ஸாக³ரகுச்சி²ம் பூரயமானோ விய ஆகாஸம் வித்தா²ரயமானோ விய ச பட²மம் சீவரஸந்தோஸம் அரியவம்ஸம் கதே²த்வா சந்த³ம் உட்டா²பேந்தோ விய ஸூரியம் உல்லங்கே⁴ந்தோ விய ச து³தியம் பிண்ட³பாதஸந்தோஸம் கதே²த்வா ஸினேரும் உக்கி²பந்தோ விய ததியம் ஸேனாஸனஸந்தோஸம் அரியவம்ஸம் கதே²த்வா இதா³னி ஸஹஸ்ஸனயபடிமண்டி³தம் சதுத்த²ம் பா⁴வனாராமம் அரியவம்ஸம் கதே²தும் புன சபரம், பி⁴க்க²வே, பி⁴க்கு² பா⁴வனாராமோ ஹோதீதி தே³ஸனம் ஆரபி⁴.

தத்த² ஆரமணம் ஆராமோ, அபி⁴ரதீதி அத்தோ². பா⁴வனாய ஆராமோ அஸ்ஸாதி பா⁴வனாராமோ. பா⁴வனாய ரதோதி பா⁴வனாரதோ. பஞ்சவிதே⁴ பஹானே ஆராமோ அஸ்ஸாதி பஹானாராமோ. அபிச பா⁴வேந்தோ ரமதீதி பா⁴வனாராமோ. பஜஹந்தோ ரமதீதி பஹானாராமோதி ஏவமேத்த² அத்தோ² த³ட்ட²ப்³போ³. அயஞ்ஹி சத்தாரோ ஸதிபட்டா²னே பா⁴வேந்தோ ரமதி, ரதிம் விந்த³தீதி அத்தோ². ததா² சத்தாரோ ஸம்மப்பதா⁴னே. சத்தாரோ இத்³தி⁴பாதே³, பஞ்சிந்த்³ரியானி, பஞ்ச ப³லானி, ஸத்த போ³ஜ்ஜ²ங்கே³, ஸத்த அனுபஸ்ஸனா, அட்டா²ரஸ மஹாவிபஸ்ஸனா, ஸத்ததிம்ஸ போ³தி⁴பக்கி²யத⁴ம்மே, அட்ட²திம்ஸ ஆரம்மணவிப⁴த்தியோ பா⁴வேந்தோ ரமதி, ரதிம் விந்த³தி. காமச்ச²ந்தா³த³யோ பன கிலேஸே பஜஹந்தோ ரமதி, ரதிம் விந்த³தி.

இமேஸு பன சதூஸு அரியவம்ஸேஸு புரிமேஹி தீஹி தேரஸன்னம் து⁴தங்கா³னம் சதுபச்சயஸந்தோஸஸ்ஸ ச வஸேன ஸகலம் வினயபிடகம் கதி²தம் ஹோதி, பா⁴வனாராமேன அவஸேஸம் பிடகத்³வயம். இமம் பன பா⁴வனாராமம் அரியவம்ஸம் கதே²ந்தேன பி⁴க்கு²னா படிஸம்பி⁴தா³மக்³கே³ நேக்க²ம்மபாளியா கதே²தப்³போ³, தீ³க⁴னிகாயே த³ஸுத்தரஸுத்தந்தபரியாயேன கதே²தப்³போ³, மஜ்ஜி²மனிகாயே ஸதிபட்டா²னஸுத்தந்தபரியாயேன கதே²தப்³போ³, அபி⁴த⁴ம்மே நித்³தே³ஸபரியாயேன கதே²தப்³போ³.

தத்த² படிஸம்பி⁴தா³மக்³கே³ நேக்க²ம்மபாளியாதி –

‘‘நேக்க²ம்மம் பா⁴வேந்தோ ரமதி, காமச்ச²ந்த³ம் பஜஹந்தோ ரமதி. அப்³யாபாத³ம், ப்³யாபாத³ம்… ஆலோகஸஞ்ஞம்… தி²னமித்³த⁴ம்… அவிக்கே²பம், உத்³த⁴ச்சம்… த⁴ம்மவவத்தா²னம்… விசிகிச்ச²ம்… ஞாணம்… அவிஜ்ஜம்… பாமோஜ்ஜம்… அரதிம்… பட²மஜ்ஜா²னம், பஞ்ச நீவரணே… து³தியஜ்ஜா²னம்… விதக்கவிசாரே… ததியஜ்ஜா²னம்… பீதிம்… சதுத்த²ஜ்ஜா²னம்… ஸுக²து³க்கே²… ஆகாஸானஞ்சாயதனஸமாபத்திம் பா⁴வேந்தோ ரமதி, ரூபஸஞ்ஞம் படிக⁴ஸஞ்ஞம் நானத்தஸஞ்ஞம் பஜஹந்தோ ரமதி. விஞ்ஞாணஞ்சாயதனஸமாபத்திம்…பே… நேவஸஞ்ஞானாஸஞ்ஞாயதனஸமாபத்திம் பா⁴வேந்தோ ரமதி, ஆகிஞ்சஞ்ஞாயதனஸஞ்ஞம் பஜஹந்தோ ரமதி.

‘‘அனிச்சானுபஸ்ஸனம் பா⁴வேந்தோ ரமதி, நிச்சஸஞ்ஞம் பஜஹந்தோ ரமதி. து³க்கா²னுபஸ்ஸனம்… ஸுக²ஸஞ்ஞம்… அனத்தானுபஸ்ஸனம்… அத்தஸஞ்ஞம்… நிப்³பி³தா³னுபஸ்ஸனம்… நந்தி³ம்… விராகா³னுபஸ்ஸனம்… ராக³ம்… நிரோதா⁴னுபஸ்ஸனம்… ஸமுத³யம்… படினிஸ்ஸக்³கா³னுபஸ்ஸனம்… ஆதா³னம்… க²யானுபஸ்ஸனம் … க⁴னஸஞ்ஞம்… வயானுபஸ்ஸனம்… ஆயூஹனம்… விபரிணாமானுபஸ்ஸனம்… து⁴வஸஞ்ஞம்… அனிமித்தானுபஸ்ஸனம் … நிமித்தம்… அப்பணிஹிதானுபஸ்ஸனம்… பணிதி⁴ம்… ஸுஞ்ஞதானுபஸ்ஸனம்… அபி⁴னிவேஸம்… அதி⁴பஞ்ஞாத⁴ம்மவிபஸ்ஸனம்… ஸாராதா³னாபி⁴னிவேஸம்… யதா²பூ⁴தஞாணத³ஸ்ஸனம்… ஸம்மோஹாபி⁴னிவேஸம்… ஆதீ³னவானுபஸ்ஸனம்… ஆலயாபி⁴னிவேஸம்… படிஸங்கா²னுபஸ்ஸனம்… அப்படிஸங்க²ம்… விவட்டானுபஸ்ஸனம்… ஸம்யோகா³பி⁴னிவேஸம்… ஸோதாபத்திமக்³க³ம்… தி³ட்டே²கட்டே² கிலேஸே… ஸகதா³கா³மிமக்³க³ம்… ஓளாரிகே கிலேஸே… அனாகா³மிமக்³க³ம்… அனுஸஹக³தே கிலேஸே… அரஹத்தமக்³க³ம் பா⁴வேந்தோ ரமதி, ஸப்³ப³கிலேஸே பஜஹந்தோ ரமதீ’’தி (படி. ம. 1.41,95).

ஏவம் படிஸம்பி⁴தா³மக்³கே³ நேக்க²ம்மபாளியா கதே²தப்³போ³.

தீ³க⁴னிகாயே த³ஸுத்தரஸுத்தந்தபரியாயேனாதி –

‘‘ஏகம் த⁴ம்மம் பா⁴வேந்தோ ரமதி, ஏகம் த⁴ம்மம் பஜஹந்தோ ரமதி…பே… த³ஸ த⁴ம்மே பா⁴வேந்தோ ரமதி, த³ஸ த⁴ம்மே பஜஹந்தோ ரமதி. கதமம் ஏகம் த⁴ம்மம் பா⁴வேந்தோ ரமதி? காயக³தாஸதிம் ஸாதஸஹக³தம், இமம் ஏகம் த⁴ம்மம் பா⁴வேந்தோ ரமதி. கதமம் ஏகம் த⁴ம்மம் பஜஹந்தோ ரமதி? அஸ்மிமானம், இமம் ஏகம் த⁴ம்மம் பஜஹந்தோ ரமதி. கதமே த்³வே த⁴ம்மே…பே… கதமே த³ஸ த⁴ம்மே பா⁴வேந்தோ ரமதி? த³ஸ கஸிணாயதனானி, இமே த³ஸ த⁴ம்மே பா⁴வேந்தோ ரமதி. கதமே த³ஸ த⁴ம்மே பஜஹந்தோ ரமதி? த³ஸ மிச்ச²த்தே, இமே த³ஸ த⁴ம்மே பஜஹந்தோ ரமதி. ஏவம் கோ², பி⁴க்க²வே, பி⁴க்கு² பா⁴வனாராமோ ஹோதீ’’தி (தீ³. நி. 3.351-360).

ஏவம் தீ³க⁴னிகாயே த³ஸுத்தரஸுத்தந்தபரியாயேன கதே²தப்³போ³.

மஜ்ஜி²மனிகாயே ஸதிபட்டா²னஸுத்தந்தபரியாயேனாதி –

‘‘ஏகாயனோ அயம், பி⁴க்க²வே, மக்³கோ³…பே… யாவதே³வ ஞாணமத்தாய படிஸ்ஸதிமத்தாய. அனிஸ்ஸிதோ ச விஹரதி, ந ச கிஞ்சி லோகே உபாதி³யதி. ஏவம்பி கோ², பி⁴க்க²வே, பி⁴க்கு² பா⁴வனாராமோ ஹோதி பா⁴வனாரதோ. பஹானாராமோ ஹோதி பஹானரதோ. புன சபரம், பி⁴க்க²வே, பி⁴க்கு² க³ச்ச²ந்தோ வா க³ச்சா²மீதி பஜானாதி…பே… புன சபரம், பி⁴க்க²வே, பி⁴க்கு² ஸேய்யதா²பி பஸ்ஸேய்ய ஸரீரம் ஸிவதி²காய ச²ட்³டி³தம்…பே… பூதீனி சுண்ணகஜாதானி. ஸோ இமமேவ காயம் உபஸம்ஹரதி ‘அயம்பி கோ² காயோ ஏவம்த⁴ம்மோ ஏவம்பா⁴வீ ஏவம்அனதீதோ’தி. இதி அஜ்ஜ²த்தம் வா காயே காயானுபஸ்ஸீ விஹரதி…பே… ஏவம்பி கோ², பி⁴க்க²வே, பி⁴க்கு² பா⁴வனாராமோ ஹோதீ’’தி (ம. நி. 1.106 ஆத³யோ).

ஏவம் மஜ்ஜி²மனிகாயே ஸதிபட்டா²னஸுத்தந்தபரியாயேன கதே²தப்³போ³.

அபி⁴த⁴ம்மே நித்³தே³ஸபரியாயேனாதி ஸப்³பே³பி ஸங்க²தே ‘‘அனிச்சதோ து³க்க²தோ ரோக³தோ க³ண்ட³தோ …பே… ஸம்கிலேஸிகத⁴ம்மதோ பஸ்ஸந்தோ ரமதி, ஏவம் கோ² பி⁴க்கு² பா⁴வனாராமோ ஹோதீ’’தி (மஹானி. 13; சூளனி. உபஸீவமாணவபுச்சா²னித்³தே³ஸோ 39, நந்த³மாணவபுச்சா²னித்³தே³ஸோ 51). ஏவம் நித்³தே³ஸபரியாயேன கதே²தப்³போ³.

நேவத்தானுக்கம்ஸேதீதி ‘‘அஜ்ஜ மே ஸட்டி² வா ஸத்ததி வா வஸ்ஸானி அனிச்சம் து³க்க²ம் அனத்தாதி விபஸ்ஸனாய கம்மம் கரோந்தஸ்ஸ கோ மயா ஸதி³ஸோ அத்தீ²’’தி ஏவம் அத்துக்கம்ஸனம் ந கரோதி. நோ பரம் வம்பே⁴தீதி ‘‘அனிச்சம் து³க்க²ந்தி விபஸ்ஸனாமத்தகம்பி நத்தி², கிம் இமே விஸ்ஸட்ட²கம்மட்டா²னா சரந்தீ’’தி ஏவம் பரவம்ப⁴னம் ந கரோதி. ஸேஸம் வுத்தனயமேவ.

இமே கோ², பி⁴க்க²வே, சத்தாரோ அரியவம்ஸாதி, பி⁴க்க²வே, இமே சத்தாரோ அரியவம்ஸா அரியதந்தியோ அரியபவேணியோ அரியஞ்ஜஸா அரியவடுமானீதி ஸுத்தந்தம் வினிவட்டேத்வா இதா³னி மஹாஅரியவம்ஸபரிபூரகஸ்ஸ பி⁴க்கு²னோ வஸனதி³ஸா த³ஸ்ஸேந்தோ இமேஹி ச பன, பி⁴க்க²வேதிஆதி³மாஹ. தத்த² ஸ்வேவ அரதிம் ஸஹதீதி ஸோயேவ அரதிம் அனபி⁴ரதிம் உக்கண்டி²தம் ஸஹதி அபி⁴ப⁴வதி. ந தம் அரதி ஸஹதீதி தம் பன பி⁴க்கு²ம் யா ஏஸா பந்தேஸு ஸேனாஸனேஸு அதி⁴குஸலானம் த⁴ம்மானம் பா⁴வனாய அரதி நாம ஹோதி, ஸா ஸஹிதும் அதி⁴ப⁴விதும் ந ஸக்கோதி. அரதிரதிஸஹோதி அரதிஞ்ச பஞ்சகாமகு³ணரதிஞ்ச ஸஹதி, அதி⁴ப⁴விதும் ஸக்கோதி.

இதா³னி கா³தா²ஹி கூடம் க³ண்ஹந்தோ நாரதீதிஆதி³மாஹ. தத்த² தீ⁴ரந்தி வீரியவந்தம். நாரதி தீ⁴ரம் ஸஹதீதி இத³ம் புரிமஸ்ஸேவ காரணவசனம். யஸ்மா ஸா தீ⁴ரம் ந ஸஹதி நப்பஹோதி தீ⁴ரம் ஸஹிதும் அதி⁴ப⁴விதும் ந ஸக்கோதி, தஸ்மா நாரதி ஸஹதி தீ⁴ரம். தீ⁴ரோ ஹி அரதிஸ்ஸஹோதி அரதிஸஹத்தா ஹி ஸோ தீ⁴ரோ நாம, தஸ்மா அரதிம் ஸஹதீதி அத்தோ². ஸப்³ப³கம்மவிஹாயீனந்தி ஸப்³ப³ம் தேபூ⁴மககம்மம் சஜித்வா பரிச்சி²ன்னம் பரிவடுமம் கத்வா டி²தம். பனுண்ணம் கோ நிவாரயேதி கிலேஸே பனுதி³த்வா டி²தம் கோ நாம ராகோ³ வா தோ³ஸோ வா நிவாரேய்ய. நேக்க²ம் ஜம்போ³னத³ஸ்ஸேவ, கோ தம் நிந்தி³துமரஹதீதி ஜம்போ³னத³ஸங்கா²தஸ்ஸ ஜாதிரத்தஸுவண்ணஸ்ஸ நிக்க²ஸதி³ஸம் க³ரஹிதப்³ப³தோ³ஸவிமுத்தம் கோ தம் புக்³க³லம் நிந்தி³தும் அரஹதி. ப்³ரஹ்முனாபி பஸம்ஸிதோதி மஹாப்³ரஹ்முனாபி ஏஸ புக்³க³லோ பஸம்ஸிதோயேவாதி. தே³ஸனாபரியோஸானே சத்தாலீஸ பி⁴க்கு²ஸஹஸ்ஸானி அரஹத்தே பதிட்ட²ஹிம்ஸு.