5. அனுஸோதஸுத்தவண்ணனா

5. பஞ்சமே அனுஸோதம் க³ச்ச²தீதி அனுஸோதகா³மீ. கிலேஸஸோதஸ்ஸ பச்சனீகபடிபத்தியா படிஸோதம் க³ச்ச²தீதி படிஸோதகா³மீ. டி²தத்தோதி டி²தஸபா⁴வோ. திண்ணோதி ஓக⁴ம் தரித்வா டி²தோ. பாரங்க³தோதி பரதீரம் க³தோ. த²லே திட்ட²தீதி நிப்³பா³னத²லே திட்ட²தி. ப்³ராஹ்மணோதி ஸேட்டோ² நித்³தோ³ஸோ. இதா⁴தி இமஸ்மிம் லோகே. காமே ச படிஸேவதீதி கிலேஸகாமேஹி வத்து²காமே படிஸேவதி. பாபஞ்ச கம்மம் கரோதீதி பாபஞ்ச பாணாதிபாதாதி³கம்மம் கரோதி. பாபஞ்ச கம்மம் ந கரோதீதி பஞ்சவேரகம்மம் ந கரோதி. அயம் வுச்சதி, பி⁴க்க²வே, டி²தத்தோதி அயம் அனாகா³மீ புக்³க³லோ தஸ்மா லோகா புன படிஸந்தி⁴வஸேன அனாக³மனதோ டி²தத்தோ நாம.

தண்ஹாதி⁴பன்னாதி தண்ஹாய அதி⁴பன்னா அஜ்ஜோ²த்த²டா, தண்ஹம் வா அதி⁴பன்னா அஜ்ஜோ²கா³ள்ஹா. பரிபுண்ணஸேகோ²தி ஸிக்கா²பாரிபூரியா டி²தோ. அபரிஹானத⁴ம்மோதி அபரிஹீனஸபா⁴வோ. சேதோவஸிப்பத்தோதி சித்தவஸீபா⁴வம் பத்தோ. ஏவரூபோ கீ²ணாஸவோ ஹோதி, இத⁴ பன அனாகா³மீ கதி²தோ. ஸமாஹிதிந்த்³ரியோதி ஸமாஹிதச²ளிந்த்³ரியோ. பரோபராதி பரோவரா உத்தமலாமகா, குஸலாகுஸலாதி அத்தோ². ஸமேச்சாதி ஞாணேன ஸமாக³ந்த்வா. விதூ⁴பிதாதி வித்³த⁴ம்ஸிதா ஜா²பிதா வா. வுஸிதப்³ரஹ்மசரியோதி மக்³க³ப்³ரஹ்மசரியம் வஸித்வா டி²தோ. லோகந்தகூ³தி திவித⁴ஸ்ஸாபி லோகஸ்ஸ அந்தம் க³தோ. பாரக³தோதி ச²ஹாகாரேஹி பாரக³தோ. இத⁴ கீ²ணாஸவோவ கதி²தோ. இதி ஸுத்தேபி கா³தா²ஸுபி வட்டவிவட்டமேவ கதி²தம்.