5. ஹத்த²கஸுத்தவண்ணனா

35. பஞ்சமே ஆளவியந்தி ஆளவிரட்டே². கோ³மக்³கே³தி கு³ன்னம் க³மனமக்³கே³. பண்ணஸந்த²ரேதி ஸயம் பதிதபண்ணஸந்த²ரே. அதா²தி ஏவம் கு³ன்னம் க³மனமக்³க³ம் உஜும் மஹாபத²ம் நிஸ்ஸாய ஸிம்ஸபாவனே ஸயம் பதிதபண்ணானி ஸங்கட்³டி⁴த்வா கதஸந்த²ரே ஸுக³தமஹாசீவரம் பத்த²ரித்வா பல்லங்கம் ஆபு⁴ஜித்வா நிஸின்னே ததா²க³தே. ஹத்த²கோ ஆளவகோதி ஹத்த²தோ ஹத்த²ம் க³தத்தா ஏவம்லத்³த⁴னாமோ ஆளவகோ ராஜபுத்தோ. ஏதத³வோசாதி ஏதம் ‘‘கச்சி, ப⁴ந்தே, ப⁴க³வா’’திஆதி³வசனம் அவோச. கஸ்மா பன ஸம்மாஸம்பு³த்³தோ⁴ தம் டா²னம் க³ந்த்வா நிஸின்னோ, கஸ்மா ராஜகுமாரோ தத்த² க³தோதி? ஸம்மாஸம்பு³த்³தோ⁴ தாவ அட்டு²ப்பத்திகாய த⁴ம்மதே³ஸனாய ஸமுட்டா²னம் தி³ஸ்வா தத்த² நிஸின்னோ, ராஜகுமாரோபி பாதோவ உட்டா²ய பஞ்சஹி உபாஸகஸதேஹி பரிவுதோ பு³த்³து⁴பட்டா²னம் க³ச்ச²ந்தோ மஹாமக்³கா³ ஓக்கம்ம கோ³பத²ம் க³ஹேத்வா ‘‘பு³த்³தா⁴னம் பூஜனத்தா²ய மிஸ்ஸகமாலம் ஓசினிஸ்ஸாமீ’’தி க³ச்ச²ந்தோ ஸத்தா²ரம் தி³ஸ்வா உபஸங்கமித்வா வந்தி³த்வா ஏகமந்தம் நிஸீதி³, ஏவம் ஸோ தத்த² க³தோதி. ஸுக²மஸயித்தா²தி ஸுக²ம் ஸயித்த².

அந்தரட்ட²கோதி மாக⁴ப²க்³கு³ணானம் அந்தரே அட்ட²தி³வஸபரிமாணோ காலோ. மாக⁴ஸ்ஸ ஹி அவஸானே சத்தாரோ தி³வஸா, ப²க்³கு³ணஸ்ஸ ஆதி³ம்ஹி சத்தாரோதி அயம் ‘‘அந்தரட்ட²கோ’’தி வுச்சதி. ஹிமபாதஸமயோதி ஹிமஸ்ஸ பதனஸமயோ. க²ராதி ப²ருஸா கக்க²ளா வா. கோ³கண்டகஹதாதி நவவுட்டே² தே³வே கா³வீனம் அக்கந்தக்கந்தட்டா²னே கு²ரந்தரேஹி கத்³த³மோ உக்³க³ந்த்வா திட்ட²தி, ஸோ வாதாதபேன ஸுக்கோ² ககசத³ந்தஸதி³ஸோ ஹோதி து³க்க²ஸம்ப²ஸ்ஸோ. தம் ஸந்தா⁴யாஹ – ‘‘கோ³கண்டகஹதா பூ⁴மீ’’தி. கு³ன்னம் கு²ரந்தரேஹி சி²ன்னாதிபி அத்தோ². வேரம்போ⁴ வாதோ வாயதீதி சதூஹி தி³ஸாஹி வாயந்தோ வாதோ வாயதி. ஏகாய தி³ஸாய வா த்³வீஹி வா தி³ஸாஹி தீஹி வா தி³ஸாஹி வாயந்தோ வாதோ வேரம்போ⁴தி ந வுச்சதி.

தேன ஹி ராஜகுமாராதி இத³ம் ஸத்தா² ‘‘அயம் ராஜகுமாரோ லோகஸ்மிம் நேவ ஸுக²வாஸினோ, ந து³க்க²வாஸினோ ஜானாதி, ஜானாபேஸ்ஸாமி ந’’ந்தி உபரி தே³ஸனம் வட்³டே⁴ந்தோ ஆஹ. தத்த² யதா² தே க²மேய்யாதி யதா² துய்ஹம் ருச்சேய்ய. இத⁴ஸ்ஸாதி இமஸ்மிம் லோகே அஸ்ஸ. கோ³னகத்த²தோதி சதுரங்கு³லாதி⁴கலோமேன காளகோஜவேன அத்த²தோ. படிகத்த²தோதி உண்ணாமயேன ஸேதத்த²ரணேன அத்த²தோ. படலிகத்த²தோதி க⁴னபுப்பே²ன உண்ணாமயஅத்த²ரணேன அத்த²தோ. கத³லிமிக³பவரபச்சத்த²ரணோதி கத³லிமிக³சம்மமயேன உத்தமபச்சத்த²ரணேன அத்த²தோ. தம் கிர பச்சத்த²ரணம் ஸேதவத்த²ஸ்ஸ உபரி கத³லிமிக³சம்மம் அத்த²ரித்வா ஸிப்³பி³த்வா கரோந்தி. ஸஉத்தரச்ச²தோ³தி ஸஹ உத்தரச்ச²தே³ன, உபரி ப³த்³தே⁴ன ரத்தவிதானேன ஸத்³தி⁴ந்தி அத்தோ². உப⁴தோலோஹிதகூபதா⁴னோதி ஸீஸூபதா⁴னஞ்ச பாதூ³பதா⁴னஞ்சாதி பல்லங்கஸ்ஸ உப⁴தோ ட²பிதலோஹிதகூபதா⁴னோ. பஜாபதியோதி ப⁴ரியாயோ. மனாபேன பச்சுபட்டி²தா அஸ்ஸூதி மனாபேன உபட்டா²னவிதா⁴னேன பச்சுபட்டி²தா ப⁴வேய்யும்.

காயிகாதி பஞ்சத்³வாரகாயம் கோ²ப⁴யமானா. சேதஸிகாதி மனோத்³வாரம் கோ²ப⁴யமானா. ஸோ ராகோ³ ததா²க³தஸ்ஸ பஹீனோதி ததா²ரூபோ ராகோ³ ததா²க³தஸ்ஸ பஹீனோதி அத்தோ². யோ பன தஸ்ஸ ராகோ³, ந ஸோ ததா²க³தஸ்ஸ பஹீனோ நாம. தோ³ஸமோஹேஸுபி ஏஸேவ நயோ.

ப்³ராஹ்மணோதி பா³ஹிதபாபோ கீ²ணாஸவப்³ராஹ்மணோ. பரினிப்³பு³தோதி கிலேஸபரினிப்³பா³னேன பரினிப்³பு³தோ. ந லிம்பதி காமேஸூதி வத்து²காமேஸு ச கிலேஸகாமேஸு ச தண்ஹாதி³ட்டி²லேபேஹி ந லிம்பதி. ஸீதிபூ⁴தோதி அப்³ப⁴ந்தரே தாபனகிலேஸானம் அபா⁴வேன ஸீதிபூ⁴தோ. நிரூபதீ⁴தி கிலேஸூபதீ⁴னம் அபா⁴வேன நிரூபதி⁴. ஸப்³பா³ ஆஸத்தியோ சே²த்வாதி ஆஸத்தியோ வுச்சந்தி தண்ஹாயோ, தா ஸப்³பா³பி ரூபாதீ³ஸு ஆரம்மணேஸு ஆஸத்தவிஸத்தா ஆஸத்தியோ சி²ந்தி³த்வா. வினேய்ய ஹத³யே த³ரந்தி ஹத³யனிஸ்ஸிதம் த³ரத²ம் வினயித்வா வூபஸமேத்வா. ஸந்திம் பப்புய்ய சேதஸோதி சித்தஸ்ஸ கிலேஸனிப்³பா³னம் பாபுணித்வா. கரணவசனம் வா ஏதம் ‘‘ஸப்³ப³சேதஸோ ஸமன்னாஹரித்வா’’திஆதீ³ஸு விய, சேதஸா நிப்³பா³னம் பாபுணித்வாதி அத்தோ².