2. ஆனந்த³ஸுத்தவண்ணனா

32. து³தியே ததா²ரூபோதி ததா²ஜாதிகோ. ஸமாதி⁴படிலாபோ⁴தி சித்தேகக்³க³தாலாபோ⁴. இமஸ்மிம் ச ஸவிஞ்ஞாணகேதி ஏத்த² அத்தனோ ச பரஸ்ஸ சாதி உப⁴யேஸம்பி காயோ ஸவிஞ்ஞாணகட்டே²ன ஏகதோ கத்வா இமஸ்மிந்தி வுத்தோ. அஹங்காரமமங்காரமானானுஸயாதி அஹங்காரதி³ட்டி² ச மமங்காரதண்ஹா ச மானானுஸயோ சாதி அத்தனோ ச பரஸ்ஸ ச கிலேஸா. நாஸ்ஸூதி ந ப⁴வேய்யும். ப³ஹித்³தா⁴ ச ஸப்³ப³னிமித்தேஸூதி ரூபனிமித்தம், ஸத்³த³னிமித்தம், க³ந்த⁴னிமித்தம், ரஸனிமித்தம், போ²ட்ட²ப்³ப³னிமித்தம், ஸஸ்ஸதாதி³னிமித்தம், புக்³க³லனிமித்தம் த⁴ம்மனிமித்தந்தி ஏவரூபேஸு ச ப³ஹித்³தா⁴ ஸப்³ப³னிமித்தேஸு. சேதோவிமுத்திம் பஞ்ஞாவிமுத்திந்தி ப²லஸமாதி⁴ஞ்சேவ ப²லஞாணஞ்ச. ஸியாதி ப⁴வேய்ய.

இதா⁴னந்த³, பி⁴க்கு²னோதி, ஆனந்த³, இமஸ்மிம் ஸாஸனே பி⁴க்கு²னோ. ஏதம் ஸந்தம் ஏதம் பணீதந்தி நிப்³பா³னம் த³ஸ்ஸேந்தோ ஆஹ. நிப்³பா³னம் ஹி கிலேஸானம் ஸந்ததாய ஸந்தம் நாம, நிப்³பா³னம் ஸந்தந்தி ஸமாபத்திம் அப்பேத்வாவ தி³வஸம்பி நிஸின்னஸ்ஸ சித்துப்பாதோ³ ஸந்தந்தேவ பவத்ததீதிபி ஸந்தம். பணீதந்தி ஸமாபத்திம் அப்பேத்வா நிஸின்னஸ்ஸாபி சித்துப்பாதோ³ பணீதந்தேவ பவத்ததீதி நிப்³பா³னம் பணீதம் நாம. ஸப்³ப³ஸங்கா²ரஸமதோ²திஆதீ³னிபி தஸ்ஸேவ வேவசனானி. ‘‘ஸப்³ப³ஸங்கா²ரஸமதோ²’’தி ஸமாபத்திம் அப்பேத்வா நிஸின்னஸ்ஸ ஹி தி³வஸபா⁴க³ம்பி சித்துப்பாதோ³ ஸப்³ப³ஸங்கா²ரஸமதோ²தேவ பவத்ததி…பே… ததா² தீஸு ப⁴வேஸு வானஸங்கா²தாய தண்ஹாய அபா⁴வேன நிப்³பா³னந்தி லத்³த⁴னாமே தஸ்மிம் ஸமாபத்திம் அப்பேத்வா நிஸின்னஸ்ஸ சித்துப்பாதோ³ நிப்³பா³னம் நிப்³பா³னந்தேவ பவத்ததீதி ஸப்³ப³ஸங்கா²ரஸமதோ²திஆதீ³னி நாமானி லப⁴தி. இமஸ்மிம் பன அட்ட²விதே⁴ ஆபோ⁴க³ஸமன்னாஹாரே இமஸ்மிம் டா²னே ஏகோபி லப்³ப⁴தி, த்³வேபி ஸப்³பே³பி லப்³ப⁴ந்தேவ.

ஸங்கா²யாதி ஞாணேன ஜானித்வா. பரோபரானீதி பரானி ச ஓபரானி ச. பரஅத்தபா⁴வஸகஅத்தபா⁴வானி ஹி பரானி ச ஓபரானி சாதி வுத்தம் ஹோதி. யஸ்ஸாதி யஸ்ஸ அரஹதோ. இஞ்ஜிதந்தி ராகி³ஞ்ஜிதம் தோ³ஸமோஹமானதி³ட்டி²கிலேஸது³ச்சரிதிஞ்ஜிதந்தி இமானி ஸத்த இஞ்ஜிதானி சலிதானி ப²ந்தி³தானி. நத்தி² குஹிஞ்சீதி கத்த²சி ஏகாரம்மணேபி நத்தி². ஸந்தோதி பச்சனீககிலேஸானம் ஸந்ததாய ஸந்தோ. விதூ⁴மோதி காயது³ச்சரிதாதி³தூ⁴மவிரஹிதோ. அனீகோ⁴தி ராகா³தி³ஈக⁴விரஹிதோ. நிராஸோதி நித்தண்ஹோ. அதாரீதி திண்ணோ உத்திண்ணோ ஸமதிக்கந்தோ. ஸோதி ஸோ அரஹம் கீ²ணாஸவோ. ஜாதிஜரந்தி ஏத்த² ஜாதிஜராக³ஹணேனேவ ப்³யாதி⁴மரணம்பி க³ஹிதமேவாதி வேதி³தப்³ப³ம். இதி ஸுத்தந்தேபி கா³தா²யபி அரஹத்தப²லஸமாபத்தியேவ கதி²தாதி.