1. ஸப்³ரஹ்மகஸுத்தவண்ணனா

31. சதுத்த²ஸ்ஸ பட²மே அஜ்ஜா²கா³ரேதி ஸகே க⁴ரே. பூஜிதா ஹோந்தீதி யம் க⁴ரே அத்தி², தேன படிஜக்³கி³தா கோ³பிதா ஹோந்தி. இதி மாதாபிதுபூஜகானி குலானி மாதாபிதூஹி ஸப்³ரஹ்மகானீதி பகாஸேத்வா இதா³னி நேஸம் ஸபுப்³பா³சரியகாதி³பா⁴வம் பகாஸேந்தோ ஸபுப்³பா³சரியகானீதிஆதி³மாஹ. தத்த² ப்³ரஹ்மாதிஆதீ³னி தேஸம் ப்³ரஹ்மாதி³பா⁴வஸாத⁴னத்த²ம் வுத்தானி. ப³ஹுகாராதி புத்தானம் ப³ஹூபகாரா. ஆபாத³காதி ஜீவிதஸ்ஸ ஆபாத³கா. புத்தகானம் ஹி மாதாபிதூஹி ஜீவிதம் ஆபாதி³தம் பாலிதம் க⁴டிதம் அனுப்பப³ந்தே⁴ன பவத்திதம். போஸகாதி ஹத்த²பாதே³ வட்³டே⁴த்வா ஹத³யலோஹிதம் பாயேத்வா போஸேதாரோ. இமஸ்ஸ லோகஸ்ஸ த³ஸ்ஸேதாரோதி புத்தானம் ஹி இமஸ்மிம் லோகே இட்டா²னிட்டா²ரம்மணஸ்ஸ த³ஸ்ஸனம் நாம மாதாபிதரோ நிஸ்ஸாய ஜாதந்தி இமஸ்ஸ லோகஸ்ஸ த³ஸ்ஸேதாரோ நாம.

ப்³ரஹ்மாதி மாதாபிதரோதி ஸேட்டா²தி⁴வசனம். யதா² ப்³ரஹ்முனோ சதஸ்ஸோ பா⁴வனா அவிஜஹிதா ஹோந்தி மேத்தா கருணா முதி³தா உபேக்கா²தி, ஏவமேவ மாதாபிதூனம் புத்தகேஸு சதஸ்ஸோ பா⁴வனா அவிஜஹிதா ஹோந்தி. தா தஸ்மிம் தஸ்மிம் காலே வேதி³தப்³பா³ – குச்சி²க³தஸ்மிம் ஹி தா³ரகே ‘‘கதா³ நு கோ² புத்தகம் அரோக³ம் பரிபுண்ணங்க³பச்சங்க³ம் பஸ்ஸிஸ்ஸாமா’’தி மாதாபிதூனம் மேத்தசித்தம் உப்பஜ்ஜதி. யதா³ பனேஸ மந்தோ³ உத்தானஸேய்யகோ ஊகாஹி வா மங்குலாதீ³ஹி பாணகேஹி த³ட்டோ² து³க்க²ஸேய்யாய வா பன பீளிதோ பரோத³தி விரவதி, ததா³ஸ்ஸ ஸத்³த³ம் ஸுத்வா மாதாபிதூனம் காருஞ்ஞம் உப்பஜ்ஜதி, ஆதா⁴வித்வா விதா⁴வித்வா கீளனகாலே பன லோப⁴னீயவயஸ்மிம் வா டி²தகாலே தா³ரகம் ஓலோகேத்வா மாதாபிதூனம் சித்தம் ஸப்பிமண்டே³ பக்கி²த்தஸதவிஹதகப்பாஸபிசுபடலம் விய முது³கம் ஹோதி ஆமோதி³தம் பமோதி³தம், ததா³ தேஸம் முதி³தா லப்³ப⁴தி. யதா³ பனேஸ புத்தோ தா³ராப⁴ரணம் பச்சுபட்டா²பேத்வா பாடியேக்கம் அகா³ரம் அஜ்ஜா²வஸதி, ததா³ மாதாபிதூனம் ‘‘ஸக்கோதி தா³னி நோ புத்தகோ அத்தனோ த⁴ம்மதாய யாபேது’’ந்தி மஜ்ஜ²த்தபா⁴வோ உப்பஜ்ஜதி, தஸ்மிம் காலே உபேக்கா² லப்³ப⁴தீதி இமினா காரணேன ‘‘ப்³ரஹ்மாதி மாதாபிதரோ’’தி வுத்தம்.

புப்³பா³சரியாதி வுச்சரேதி மாதாபிதரோ ஹி ஜாதகாலதோ பட்டா²ய ‘‘ஏவம் நிஸீத³, ஏவம் திட்ட², ஏவம் க³ச்ச², ஏவம் ஸய, ஏவம் கா²த³, ஏவம் பு⁴ஞ்ஜ, அயம் தே, தாதாதி வத்தப்³போ³, அயம் பா⁴திகாதி, அயம் ப⁴கி³னீதி, இத³ம் நாம காதும் வட்டதி, இத³ம் ந வட்டதி, அஸுகம் நாம உபஸங்கமிதும் வட்டதி, அஸுகம் ந வட்டதீ’’தி கா³ஹாபேந்தி ஸிக்கா²பேந்தி. அதா²பரபா⁴கே³ அஞ்ஞே ஆசரியா ஹத்தி²ஸிப்பஅஸ்ஸஸிப்பரத²ஸிப்பத⁴னுஸிப்பத²ருஸிப்பமுத்³தா³க³ணனாதீ³னி ஸிக்கா²பேந்தி. அஞ்ஞோ ஸரணானி தே³தி, அஞ்ஞோ ஸீலேஸு பதிட்டா²பேதி, அஞ்ஞோ பப்³பா³ஜேதி, அஞ்ஞோ பு³த்³த⁴வசனம் உக்³க³ண்ஹாபேதி, அஞ்ஞோ உபஸம்பாதே³தி, அஞ்ஞோ ஸோதாபத்திமக்³கா³தீ³னி பாபேதி. இதி ஸப்³பே³பி தே பச்சா²சரியா நாம ஹோந்தி, மாதாபிதரோ பன ஸப்³ப³பட²மா, தேனாஹ – ‘‘புப்³பா³சரியாதி வுச்சரே’’தி. தத்த² வுச்சரேதி வுச்சந்தி கதி²யந்தி. ஆஹுனேய்யா ச புத்தானந்தி புத்தானம் ஆஹுதம் பாஹுதம் அபி⁴ஸங்க²தம் அன்னபானாதி³ம் அரஹந்தி, அனுச்ச²விகா தம் படிக்³க³ஹேதும். தஸ்மா ‘‘ஆஹுனேய்யா ச புத்தான’’ந்தி வுத்தம். பஜாய அனுகம்பகாதி பரேஸம் பாணே அச்சி²ந்தி³த்வாபி அத்தனோ பஜம் படிஜக்³க³ந்தி கோ³பாயந்தி. தஸ்மா ‘‘பஜாய அனுகம்பகா’’தி வுத்தம்.

நமஸ்ஸேய்யாதி நமோ கரேய்ய. ஸக்கரேய்யாதி ஸக்காரேன படிமானேய்ய. இதா³னி தம் ஸக்காரம் த³ஸ்ஸேந்தோ ‘‘அன்னேனா’’திஆதி³மாஹ. தத்த² அன்னேனாதி யாகு³ப⁴த்தகா²த³னீயேன. பானேனாதி அட்ட²வித⁴பானேன. வத்தே²னாதி நிவாஸனபாருபனகேன வத்தே²ன. ஸயனேனாதி மஞ்சபீடா²னுப்பதா³னேன. உச்சா²த³னேனாதி து³க்³க³ந்த⁴ம் படிவினோதே³த்வா ஸுக³ந்த⁴கரணுச்சா²த³னேன. ந்ஹாபனேனாதி ஸீதே உண்ஹோத³கேன, உண்ஹே ஸீதோத³கேன க³த்தானி பரிஸிஞ்சித்வா ந்ஹாபனேன. பாதா³னம் தோ⁴வனேனாதி உண்ஹோத³கஸீதோத³கேஹி பாத³தோ⁴வனேன சேவ தேலமக்க²னேன ச. பேச்சாதி பரலோகம் க³ந்த்வா. ஸக்³கே³ பமோத³தீதி இத⁴ தாவ மாதாபிதூஸு பாரிசரியம் தி³ஸ்வா பாரிசரியகாரணா தம் பண்டி³தமனுஸ்ஸா இதே⁴வ பஸம்ஸந்தி, பரலோகம் பன க³ந்த்வா ஸக்³கே³ டி²தோ ஸோ மாதாபிதுஉபட்டா²கோ தி³ப்³ப³ஸம்பத்தீஹி ஆமோத³தி பமோத³தீதி.