10. அவகுஜ்ஜஸுத்தவண்ணனா

30. த³ஸமே அவகுஜ்ஜபஞ்ஞோதி அதோ⁴முக²பஞ்ஞோ. உச்ச²ங்க³பஞ்ஞோதி உச்ச²ங்க³ஸதி³ஸபஞ்ஞோ. புது²பஞ்ஞோதி வித்தா²ரிகபஞ்ஞோ. ஆதி³கல்யாணந்திஆதீ³ஸு ஆதீ³தி புப்³ப³பட்ட²பனா. மஜ்ஜ²ந்தி கதா²வேமஜ்ஜ²ம். பரியோஸானந்தி ஸன்னிட்டா²னம். இதிஸ்ஸ தே த⁴ம்மம் கதே²ந்தா புப்³ப³பட்ட²பனேபி கல்யாணம் ப⁴த்³த³கம் அனவஜ்ஜமேவ கத்வா கதே²ந்தி, வேமஜ்ஜே²பி பரியோஸானேபி. ஏத்த² ச அத்தி² தே³ஸனாய ஆதி³மஜ்ஜ²பரியோஸானானி, அத்தி² ஸாஸனஸ்ஸ. தத்த² தே³ஸனாய தாவ சதுப்பதி³ககா³தா²ய பட²மபத³ம் ஆதி³, த்³வே பதா³னி மஜ்ஜ²ம், அவஸானபத³ம் பரியோஸானம். ஏகானுஸந்தி⁴கஸ்ஸ ஸுத்தஸ்ஸ நிதா³னம் ஆதி³, அனுஸந்தி⁴ மஜ்ஜ²ம், இத³மவோசாதி அப்பனா பரியோஸானம். அனேகானுஸந்தி⁴கஸ்ஸ பட²மோ அனுஸந்தி⁴ ஆதி³, ததோ பரம் ஏகோ வா அனேகே வா மஜ்ஜ²ம், பச்சி²மோ பரியோஸானம். அயம் தாவ தே³ஸனாய நயோ. ஸாஸனஸ்ஸ பன ஸீலம் ஆதி³, ஸமாதி⁴ மஜ்ஜ²ம், விபஸ்ஸனா பரியோஸானம். ஸமாதி⁴ வா ஆதி³, விபஸ்ஸனா மஜ்ஜ²ம், மக்³கோ³ பரியோஸானம். விபஸ்ஸனா வா ஆதி³, மக்³கோ³ மஜ்ஜ²ம், ப²லம் பரியோஸானம். மக்³கோ³ வா ஆதி³, ப²லம் மஜ்ஜ²ம், நிப்³பா³னம் பரியோஸானம். த்³வே த்³வே வா கயிரமானே ஸீலஸமாத⁴யோ ஆதி³, விபஸ்ஸனாமக்³கா³ மஜ்ஜ²ம், ப²லனிப்³பா³னானி பரியோஸானம்.

ஸாத்த²ந்தி ஸாத்த²கம் கத்வா தே³ஸேந்தி. ஸப்³யஞ்ஜனந்தி அக்க²ரபாரிபூரிம் கத்வா தே³ஸேந்தி. கேவலபரிபுண்ணந்தி ஸகலபரிபுண்ணம் அனூனம் கத்வா தே³ஸேந்தி. பரிஸுத்³த⁴ந்தி பரிஸுத்³த⁴ம் நிஜ்ஜடம் நிக்³க³ண்டி²ம் கத்வா தே³ஸேந்தி. ப்³ரஹ்மசரியம் பகாஸேந்தீதி ஏவம் தே³ஸேந்தா ச ஸேட்ட²சரியபூ⁴தம் ஸிக்க²த்தயஸங்க³ஹிதம் அரியம் அட்ட²ங்கி³கம் மக்³க³ம் பகாஸேந்தி. நேவ ஆதி³ம் மனஸி கரோதீதி நேவ புப்³ப³பட்ட²பனம் மனஸி கரோதி.

கும்போ⁴தி க⁴டோ. நிகுஜ்ஜோதி அதோ⁴முகோ² ட²பிதோ. ஏவமேவ கோ²தி ஏத்த² கும்போ⁴ நிகுஜ்ஜோ விய அவகுஜ்ஜபஞ்ஞோ புக்³க³லோ த³ட்ட²ப்³போ³, உத³காஸிஞ்சனகாலோ விய த⁴ம்மதே³ஸனாய லத்³த⁴காலோ, உத³கஸ்ஸ விவட்டனகாலோ விய தஸ்மிம் ஆஸனே நிஸின்னஸ்ஸ உக்³க³ஹேதும் அஸமத்த²காலோ, உத³கஸ்ஸ அஸண்டா²னகாலோ விய வுட்ட²ஹித்வா அஸல்லக்க²ணகாலோ வேதி³தப்³போ³.

ஆகிண்ணானீதி பக்கி²த்தானி. ஸதிஸம்மோஸாய பகிரேய்யாதி முட்ட²ஸ்ஸதிதாய விகிரேய்ய. ஏவமேவ கோ²தி ஏத்த² உச்ச²ங்கோ³ விய உச்ச²ங்க³பஞ்ஞோ புக்³க³லோ த³ட்ட²ப்³போ³, நானாக²ஜ்ஜகானி விய நானப்பகாரம் பு³த்³த⁴வசனம், உச்ச²ங்கே³ நானாக²ஜ்ஜகானி கா²த³ந்தஸ்ஸ நிஸின்னகாலோ விய தஸ்மிம் ஆஸனே நிஸின்னஸ்ஸ உக்³க³ண்ஹனகாலோ, வுட்ட²ஹந்தஸ்ஸ ஸதிஸம்மோஸா பகிரணகாலோ விய தஸ்மா ஆஸனா வுட்டா²ய க³ச்ச²ந்தஸ்ஸ அஸல்லக்க²ணகாலோ வேதி³தப்³போ³.

உக்குஜ்ஜோதி உபரிமுகோ² ட²பிதோ. ஸண்டா²தீதி பதிட்ட²ஹதி. ஏவமேவ கோ²தி ஏத்த² உபரிமுகோ² ட²பிதோ கும்போ⁴ விய புது²பஞ்ஞோ புக்³க³லோ த³ட்ட²ப்³போ³, உத³கஸ்ஸ ஆஸித்தகாலோ விய தே³ஸனாய லத்³த⁴காலோ, உத³கஸ்ஸ ஸண்டா²னகாலோ விய தத்த² நிஸின்னஸ்ஸ உக்³க³ண்ஹனகாலோ, நோ விவட்டனகாலோ விய வுட்டா²ய க³ச்ச²ந்தஸ்ஸ ஸல்லக்க²ணகாலோ வேதி³தப்³போ³.

து³ம்மேதோ⁴தி நிப்பஞ்ஞோ. அவிசக்க²ணோதி ஸம்வித³ஹனபஞ்ஞாய ரஹிதோ. க³ந்தாதி க³மனஸீலோ. ஸேய்யோ ஏதேன வுச்சதீதி ஏதஸ்மா புக்³க³லா உத்தரிதரோதி வுச்சதி. த⁴ம்மானுத⁴ம்மப்படிபன்னோதி நவலோகுத்தரத⁴ம்மஸ்ஸ அனுத⁴ம்மம் ஸஹ ஸீலேன புப்³ப³பா⁴க³படிபத³ம் படிபன்னோ. து³க்க²ஸ்ஸாதி வட்டது³க்க²ஸ்ஸ. அந்தகரோ ஸியாதி கோடிகரோ பரிச்சே²த³கரோ பரிவடுமகரோ ப⁴வேய்யாதி.

புக்³க³லவக்³கோ³ ததியோ.