5. ஸசேதனஸுத்தவண்ணனா

15. பஞ்சமே இஸிபதனேதி பு³த்³த⁴பச்சேகபு³த்³த⁴ஸங்கா²தானம் இஸீனம் த⁴ம்மசக்கப்பவத்தனத்தா²ய சேவ உபோஸத²கரணத்தா²ய ச ஆக³ந்த்வா பதனே, ஸன்னிபாதட்டா²னேதி அத்தோ². பத³னேதிபி பாடோ², அயமேவ அத்தோ². மிக³தா³யேதி மிகா³னம் அப⁴யத்தா²ய தி³ன்னே. ச²ஹி மாஸேஹி சா²ரத்தூனேஹீதி ஸோ கிர ரஞ்ஞா ஆணத்ததி³வஸேயேவ ஸப்³பூ³பகரணானி ஸஜ்ஜேத்வா அந்தேவாஸிகேஹி ஸத்³தி⁴ம் அரஞ்ஞம் பவிஸித்வா கா³மத்³வாரகா³மமஜ்ஜ²தே³வகுலஸுஸானாதீ³ஸு டி²தருக்கே² சேவ ஜா²மபதிதஸுக்க²ருக்கே² ச விவஜ்ஜேத்வா ஸம்பன்னபதே³ஸே டி²தே ஸப்³ப³தோ³ஸவிவஜ்ஜிதே நாபி⁴அரனேமீனம் அனுரூபே ருக்கே² க³ஹேத்வா தம் சக்கம் அகாஸி. தஸ்ஸ ருக்கே² விசினித்வா க³ண்ஹந்தஸ்ஸ சேவ கரோந்தஸ்ஸ ச ஏத்தகோ காலோ வீதிவத்தோ. தேன வுத்தம் – ‘‘ச²ஹி மாஸேஹி சா²ரத்தூனேஹீ’’தி. நானாகரணந்தி நானத்தம். நேஸந்தி ந ஏஸம். அத்தே²ஸந்தி அத்தி² ஏஸம். அபி⁴ஸங்கா²ரஸ்ஸ க³தீதி பயோக³ஸ்ஸ க³மனம். சிங்கு³லாயித்வாதி பரிப்³ப⁴மித்வா. அக்கா²ஹதம் மஞ்ஞேதி அக்கே² பவேஸேத்வா ட²பிதமிவ.

ஸதோ³ஸாதி ஸக³ண்டா³ உண்ணதோணதட்டா²னயுத்தா. ஸகஸாவாதி பூதிஸாரேன சேவ பே²க்³கு³னா ச யுத்தா. காயவங்காதிஆதீ³னி காயது³ச்சரிதாதீ³னம் நாமானி. ஏவம் பபதிதாதி ஏவம் கு³ணபதனேன பதிதா. ஏவம் பதிட்டி²தாதி ஏவம் கு³ணேஹி பதிட்டி²தா. தத்த² லோகியமஹாஜனா பபதிதா நாம, ஸோதாபன்னாத³யோ பதிட்டி²தா நாம. தேஸுபி புரிமா தயோ கிலேஸானம் ஸமுதா³சாரக்க²ணே பபதிதா நாம, கீ²ணாஸவா பன ஏகந்தேனேவ பதிட்டி²தா நாம. தஸ்மாதி யஸ்மா அப்பஹீனகாயவங்காத³யோ பபதந்தி, பஹீனகாயவங்காத³யோ பதிட்ட²ஹந்தி, தஸ்மா. காயவங்காதீ³னம் பன ஏவம் பஹானம் வேதி³தப்³ப³ம் – பாணாதிபாதோ அதி³ன்னாதா³னம் மிச்சா²சாரோ முஸாவாதோ³ பிஸுணாவாசா மிச்சா²தி³ட்டீ²தி இமே தாவ ச² ஸோதாபத்திமக்³கே³ன பஹீயந்தி, ப²ருஸாவாசா ப்³யாபாதோ³தி த்³வே அனாகா³மிமக்³கே³ன, அபி⁴ஜ்ஜா² ஸம்ப²ப்பலாபோதி த்³வே அரஹத்தமக்³கே³னாதி.