6. அபண்ணகஸுத்தவண்ணனா

16. ச²ட்டே² அபண்ணகபடிபத³ந்தி அவிரத்³த⁴படிபத³ம் ஏகம்ஸபடிபத³ம் நிய்யானிகபடிபத³ம் காரணபடிபத³ம் ஸாரபடிபத³ம் மண்ட³படிபத³ம் அபச்சனீகபடிபத³ம் அனுலோமபடிபத³ம் த⁴ம்மானுத⁴ம்மபடிபத³ம் படிபன்னோ ஹோதி, ந தக்கக்³கா³ஹேன வா நயக்³கா³ஹேன வா. ஏவம் க³ஹேத்வா படிபன்னோ ஹி பி⁴க்கு² வா பி⁴க்கு²னீ வா உபாஸகோ வா உபாஸிகா வா மனுஸ்ஸதே³வனிப்³பா³னஸம்பத்தீஹி ஹாயதி பரிஹாயதி, அபண்ணகபடிபத³ம் படிபன்னோ பன தாஹி ஸம்பத்தீஹி ந பரிஹாயதி. அதீதே கந்தாரத்³தா⁴னமக்³க³ம் படிபன்னேஸு த்³வீஸு ஸத்த²வாஹேஸு யக்க²ஸ்ஸ வசனம் க³ஹேத்வா பா³லஸத்த²வாஹோ ஸத்³தி⁴ம் ஸத்தே²ன அனயப்³யஸனம் பத்தோ, யக்க²ஸ்ஸ வசனம் அக்³க³ஹேத்வா ‘‘உத³கதி³ட்ட²ட்டா²னே உத³கம் ச²ட்³டே³ஸ்ஸாமா’’தி ஸத்த²கே ஸஞ்ஞாபேத்வா மக்³க³ம் படிபன்னோ பண்டி³தஸத்த²வாஹோ விய. யம் ஸந்தா⁴ய வுத்தம் –

‘‘அபண்ணகம் டா²னமேகே, து³தியம் ஆஹு தக்கிகா;

ஏதத³ஞ்ஞாய மேதா⁴வீ, தம் க³ண்ஹே யத³பண்ணக’’ந்தி. (ஜா. 1.1.1);

யோனி சஸ்ஸ ஆரத்³தா⁴ ஹோதீதி ஏத்த² யோனீதி க²ந்த⁴கோட்டா²ஸஸ்ஸபி காரணஸ்ஸபி பஸ்ஸாவமக்³க³ஸ்ஸபி நாமம். ‘‘சதஸ்ஸோ கோ² இமா, ஸாரிபுத்த, யோனியோ’’திஆதீ³ஸு (ம. நி. 1.152) ஹி க²ந்த⁴கோட்டா²ஸோ யோனி நாம. ‘‘யோனி ஹேஸா பூ⁴மிஜ ப²லஸ்ஸ அதி⁴க³மாயா’’திஆதீ³ஸு (ம. நி. 3.226) காரணம். ‘‘ந சாஹம் ப்³ராஹ்மணம் ப்³ரூமி, யோனிஜம் மத்திஸம்ப⁴வ’’ந்தி (ம. நி. 2.457; த⁴. ப. 396) ச ‘‘தமேனம் கம்மஜவாதா நிவத்தித்வா உத்³த⁴ம்பாத³ம் அதோ⁴ஸிரம் ஸம்பரிவத்தேத்வா மாது யோனிமுகே² ஸம்படிபாதே³ந்தீ’’தி ச ஆதீ³ஸு பஸ்ஸாவமக்³கோ³. இத⁴ பன காரணம் அதி⁴ப்பேதம். ஆரத்³தா⁴தி பக்³க³ஹிதா பரிபுண்ணா.

ஆஸவானம் க²யாயாதி ஏத்த² ஆஸவந்தீதி ஆஸவா, சக்கு²தோபி…பே… மனதோபி ஸந்த³ந்தி பவத்தந்தீதி வுத்தம் ஹோதி. த⁴ம்மதோ யாவ கோ³த்ரபு⁴, ஓகாஸதோ யாவ ப⁴வக்³கா³ ஸவந்தீதி வா ஆஸவா, ஏதே த⁴ம்மே ஏதஞ்ச ஓகாஸம் அந்தோகரித்வா பவத்தந்தீதி அத்தோ². அந்தோகரணத்தோ² ஹி அயம் ஆகாரோ. சிரபாரிவாஸியட்டே²ன மதி³ராத³யோ ஆஸவா, ஆஸவா வியாதிபி ஆஸவா. லோகஸ்மிம்பி ஹி சிரபாரிவாஸிகா மதி³ராத³யோ ஆஸவாதி வுச்சந்தி, யதி³ ச சிரபாரிவாஸியட்டே²ன ஆஸவா, ஏதேயேவ ப⁴விதுமரஹந்தி. வுத்தஞ்ஹேதம் – ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாய, இதோ புப்³பே³ அவிஜ்ஜா நாஹோஸீ’’திஆதி³ (அ. நி. 10.61). ஆயதம் வா ஸம்ஸாரது³க்க²ம் ஸவந்தி பஸவந்தீதிபி ஆஸவா. புரிமானி சேத்த² நிப்³ப³சனானி யத்த² கிலேஸா ஆஸவாதி ஆக³ச்ச²ந்தி, தத்த² யுஜ்ஜந்தி, பச்சி²மம் கம்மேபி. ந கேவலஞ்ச கம்மகிலேஸாயேவ ஆஸவா, அபிச கோ² நானப்பகாரா உபத்³த³வாபி. ஸுத்தேஸு ஹி ‘‘நாஹம், சுந்த³, தி³ட்ட²த⁴ம்மிகானம்யேவ ஆஸவானம் ஸம்வராய த⁴ம்மம் தே³ஸேமீ’’தி (தீ³. நி. 3.182) ஏத்த² விவாத³மூலபூ⁴தா கிலேஸா ஆஸவாதி ஆக³தா.

‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;

யக்க²த்தம் யேன க³ச்சே²ய்யம், மனுஸ்ஸத்தஞ்ச அப்³ப³ஜே;

தே மய்ஹம் ஆஸவா கீ²ணா, வித்³த⁴ஸ்தா வினளீகதா’’தி. (அ. நி. 4.36) –

ஏத்த² தேபூ⁴மகம் ச கம்மம் அவஸேஸா ச அகுஸலா த⁴ம்மா. ‘‘தி³ட்ட²த⁴ம்மிகானம் ஆஸவானம் ஸம்வராய ஸம்பராயிகானம் ஆஸவானம் படிகா⁴தாயா’’தி (பாரா. 39; அ. நி. 2.202-230) ஏத்த² பரூபவாத³விப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா.

தே பனேதே ஆஸவா யத்த² யதா² ஆக³தா, தத்த² ததா² வேதி³தப்³பா³. ஏதே ஹி வினயே தாவ ‘‘தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாயா’’தி (பாரா. 39; அ. நி. 2.202-230) த்³வேதா⁴ ஆக³தா. ஸளாயதனே ‘‘தயோ மே, ஆவுஸோ, ஆஸவா காமாஸவோ ப⁴வாஸவோ அவிஜ்ஜாஸவோ’’தி (ஸம். நி. 4.321) திதா⁴ ஆக³தா. அஞ்ஞேஸு ச ஸுத்தந்தேஸு (சூளனி. ஜதுகண்ணிமாணவபுச்சா²னித்³தே³ஸோ 69; படி. ம. 1.107) அபி⁴த⁴ம்மே (த⁴. ஸ. 1102-1106; விப⁴. 937) ச தேயேவ தி³ட்டா²ஸவேன ஸஹ சதுதா⁴ ஆக³தா. நிப்³பே³தி⁴கபரியாயேன ‘‘அத்தி², பி⁴க்க²வே, ஆஸவா நிரயகா³மினியா, அத்தி² ஆஸவா திரச்சா²னயோனிகா³மினியா, அத்தி² ஆஸவா பேத்திவிஸயகா³மினியா, அத்தி² ஆஸவா மனுஸ்ஸலோககா³மினியா, அத்தி² ஆஸவா தே³வலோககா³மினியா’’தி (அ. நி. 6.63) பஞ்சதா⁴ ஆக³தா. கம்மமேவ சேத்த² ஆஸவாதி வுத்தம். ச²க்கனிபாதே ‘‘அத்தி², பி⁴க்க²வே, ஆஸவா ஸம்வராபஹாதப்³பா³’’திஆதி³னா (அ. நி. 6.58) நயேன ச²தா⁴ ஆக³தா. ஸப்³பா³ஸவபரியாயே (ம. நி. 1.14 ஆத³யோ) தேயேவ த³ஸ்ஸனேன பஹாதப்³பே³ஹி ஸத்³தி⁴ம் ஸத்ததா⁴ ஆக³தா. இத⁴ பன அபி⁴த⁴ம்மனயேன சத்தாரோ ஆஸவா அதி⁴ப்பேதாதி வேதி³தப்³பா³.

க²யாயாதி ஏத்த² பன ஆஸவானம் ஸரஸபே⁴தோ³பி கீ²ணாகாரோபி மக்³க³ப²லனிப்³பா³னானிபி ‘‘ஆஸவக்க²யோ’’தி வுச்சதி. ‘‘யோ ஆஸவானம் க²யோ வயோ பே⁴தோ³ பரிபே⁴தோ³ அனிச்சதா அந்தரதா⁴ன’’ந்தி ஏத்த² ஹி ஆஸவானம் ஸரஸபே⁴தோ³ ‘‘ஆஸவக்க²யோ’’தி வுத்தோ. ‘‘ஜானதோ அஹம், பி⁴க்க²வே, பஸ்ஸதோ ஆஸவானம் க²யம் வதா³மீ’’தி (ம. நி. 1.15; ஸம். நி. 2.23; இதிவு. 102) ஏத்த² ஆஸவப்பஹானம் ஆஸவானம் அச்சந்தக்க²யோ அஸமுப்பாதோ³ கீ²ணாகாரோ நத்தி²பா⁴வோ ‘‘ஆஸவக்க²யோ’’தி வுத்தோ.

‘‘ஸேக²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;

க²யஸ்மிம் பட²மம் ஞாணம், ததோ அஞ்ஞா அனந்தரா’’தி. (இதிவு. 62) –

ஏத்த² மக்³கோ³ ‘‘ஆஸவக்க²யோ’’தி வுத்தோ. ‘‘ஆஸவானம் க²யா ஸமணோ ஹோதீ’’தி (ம. நி. 1.438) ஏத்த² ப²லம்.

‘‘பரவஜ்ஜானுபஸ்ஸிஸ்ஸ, நிச்சம் உஜ்ஜா²னஸஞ்ஞினோ;

ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. (த⁴. ப. 253) –

ஏத்த² நிப்³பா³னம். இமஸ்மிம் பன ஸுத்தே ப²லம் ஸந்தா⁴ய ‘‘ஆஸவானம் க²யாயா’’தி ஆஹ, அரஹத்தப²லத்தா²யாதி அத்தோ².

இந்த்³ரியேஸு கு³த்தத்³வாரோதி மனச்ச²ட்டே²ஸு இந்த்³ரியேஸு பிஹிதத்³வாரோ. போ⁴ஜனே மத்தஞ்ஞூதி போ⁴ஜனஸ்மிம் பமாணஞ்ஞூ, படிக்³க³ஹணபரிபோ⁴க³பச்சவேக்க²ணமத்தம் ஜானாதி பஜானாதீதி அத்தோ². ஜாக³ரியம் அனுயுத்தோதி ரத்திந்தி³வம் ச² கோட்டா²ஸே கத்வா பஞ்சஸு கோட்டா²ஸேஸு ஜாக³ரணபா⁴வம் அனுயுத்தோ, ஜாக³ரணேயேவ யுத்தப்பயுத்தோதி அத்தோ².

ஏவம் மாதிகம் ட²பேத்வா இதா³னி தமேவ ட²பிதபடிபாடியா விப⁴ஜந்தோ கத²ஞ்ச, பி⁴க்க²வே, பி⁴க்கூ²திஆதி³மாஹ. தத்த² சக்கு²னா ரூபம் தி³ஸ்வாதிஆதீ³னம் அத்தோ² விஸுத்³தி⁴மக்³கே³ (விஸுத்³தி⁴. 1.15) வித்தா²ரிதோ, ததா² படிஸங்கா² யோனிஸோ ஆஹாரம் ஆஹாரேதி நேவ த³வாயாதிஆதீ³னம் (விஸுத்³தி⁴. 1.18). ஆவரணீயேஹி த⁴ம்மேஹீதி பஞ்சஹி நீவரணேஹி த⁴ம்மேஹி. நீவரணானி ஹி சித்தம் ஆவரித்வா திட்ட²ந்தி, தஸ்மா ஆவரணீயா த⁴ம்மாதி வுச்சந்தி. ஸீஹஸேய்யம் கப்பேதீதி ஸீஹோ விய ஸேய்யம் கப்பேதி. பாதே³ பாத³ம் அச்சாதா⁴யாதி வாமபாத³ம் த³க்கி²ணபாதே³ அதிஆதா⁴ய. ஸமம் ட²பிதே ஹி பாதே³ ஜாணுகேன ஜாணுகம் கோ³ப்ப²கேன ச கோ³ப்ப²கம் க⁴டீயதி, ததோ வேத³னா உட்ட²ஹந்தி. தஸ்மா தஸ்ஸ தோ³ஸஸ்ஸ பரிவஜ்ஜனத்த²ம் தோ²கம் அதிக்கமித்வா ஏஸ பாத³ம் ட²பேதி. தேன வுத்தம் – ‘‘பாதே³ பாத³ம் அச்சாதா⁴யா’’தி.

ஸதோ ஸம்பஜானோதி ஸதியா சேவ ஸம்பஜஞ்ஞேன ச ஸமன்னாக³தோ. கத²ம் பனேஸ நித்³தா³யந்தோ ஸதோ ஸம்பஜானோ நாம ஹோதீதி? புரிமப்பவத்திவஸேன. அயம் ஹி சங்கமே சங்கமந்தோ நித்³தா³ய ஓக்கமனபா⁴வம் ஞத்வா பவத்தமானம் கம்மட்டா²னம் ட²பேத்வா மஞ்சே வா ப²லகே வா நிபன்னோ நித்³த³ம் உபக³ந்த்வா புன பபு³ஜ்ஜ²மானோ கம்மட்டா²னம் டி²தட்டா²னே க³ண்ஹந்தோயேவ பபு³ஜ்ஜ²தி. தஸ்மா நித்³தா³யந்தோபி ஸதோ ஸம்பஜானோ நாம ஹோதி. அயம் தாவ மூலகம்மட்டா²னே நயோவ. பரிக்³க³ஹகம்மட்டா²னவஸேனாபி பனேஸ ஸதோ ஸம்பஜானோ நாம ஹோதி. கத²ம்? அயம் ஹி சங்கமந்தோ நித்³தா³ய ஓக்கமனபா⁴வம் ஞத்வா பாஸாணப²லகே வா மஞ்சே வா த³க்கி²ணேன பஸ்ஸேன நிபஜ்ஜித்வா பச்சவேக்க²தி – ‘‘அசேதனோ காயோ அசேதனே மஞ்சே பதிட்டி²தோ, அசேதனோ மஞ்சோ அசேதனாய பத²வியா, அசேதனா பத²வீ அசேதனே உத³கே, அசேதனம் உத³கம் அசேதனே வாதே, அசேதனோ வாதோ அசேதனே ஆகாஸே பதிட்டி²தோ. தத்த² ஆகாஸம்பி ‘அஹம் வாதம் உக்கி²பித்வா டி²த’ந்தி ந ஜானாதி, வாதோபி ‘அஹம் ஆகாஸே பதிட்டி²தோ’தி ந ஜானாதி. ததா² வாதோ ந ஜானாதி. ‘அஹம் உத³கம் உக்கி²பித்வா டி²தோ’தி…பே… மஞ்சோ ந ஜானாதி, ‘அஹம் காயம் உக்கி²பித்வா டி²தோ’தி, காயோ ந ஜானாதி ‘அஹம் மஞ்சே பதிட்டி²தோ’தி. ந ஹி தேஸம் அஞ்ஞமஞ்ஞம் ஆபோ⁴கோ³ வா ஸமன்னாஹாரோ வா மனஸிகாரோ வா சேதனா வா பத்த²னா வா அத்தீ²’’தி. தஸ்ஸ ஏவம் பச்சவேக்க²தோ தம் பச்சவேக்க²ணசித்தம் ப⁴வங்கே³ ஓதரதி. ஏவம் நித்³தா³யந்தோபி ஸதோ ஸம்பஜானோ நாம ஹோதீதி.

உட்டா²னஸஞ்ஞம் மனஸிகரித்வாதி ‘‘ஏத்தகம் டா²னம் க³தே சந்தே³ வா தாரகாய வா உட்ட²ஹிஸ்ஸாமீ’’தி உட்டா²னகாலபரிச்சே²தி³கம் ஸஞ்ஞம் மனஸிகரித்வா, சித்தே ட²பேத்வாதி அத்தோ². ஏவம் கரித்வா ஸயிதோ ஹி யதா²பரிச்சி²ன்னேயேவ காலே உட்ட²ஹதி.