10. து³தியபாபணிகஸுத்தவண்ணனா

20. த³ஸமே சக்கு²மாதி பஞ்ஞாசக்கு²னா சக்கு²மா ஹோதி. விது⁴ரோதி விஸிட்ட²து⁴ரோ உத்தமது⁴ரோ ஞாணஸம்பயுத்தேன வீரியேன ஸமன்னாக³தோ. நிஸ்ஸயஸம்பன்னோதி அவஸ்ஸயஸம்பன்னோ பதிட்டா²னஸம்பன்னோ. பணியந்தி விக்காயிகப⁴ண்ட³ம். ஏத்தகம் மூலம் ப⁴விஸ்ஸதி ஏத்தகோ உத³யோதி தஸ்மிம் ‘‘ஏவம் கீதம் ஏவம் விக்காயமான’’ந்தி வுத்தபணியே யேன கயேன தம் கீதம், தம் கயஸங்கா²தம் மூலம் ஏத்தகம் ப⁴விஸ்ஸதி. யோ ச தஸ்மிம் விக்கயமானே விக்கயோ, தஸ்மிம் விக்கயே ஏத்தகோ உத³யோ ப⁴விஸ்ஸதி, ஏத்திகா வட்³டீ⁴தி அத்தோ².

குஸலோ ஹோதி பணியம் கேதுஞ்ச விக்கேதுஞ்சாதி ஸுலப⁴ட்டா²னம் க³ந்த்வா கிணந்தோ து³ல்லப⁴ட்டா²னம் க³ந்த்வா விக்கிணந்தோ ச ஏத்த² குஸலோ நாம ஹோதி, த³ஸகு³ணம்பி வீஸதிகு³ணம்பி லாப⁴ம் லப⁴தி.

அட்³டா⁴தி இஸ்ஸரா ப³ஹுனா நிக்கி²த்தத⁴னேன ஸமன்னாக³தா. மஹத்³த⁴னாதி வளஞ்ஜனகவஸேன மஹத்³த⁴னா. மஹாபோ⁴கா³தி உபபோ⁴க³பரிபோ⁴க³ப⁴ண்டே³ன மஹாபோ⁴கா³. படிப³லோதி காயப³லேன சேவ ஞாணப³லேன ச ஸமன்னாக³தத்தா ஸமத்தோ². அம்ஹாகஞ்ச காலேன காலம் அனுப்பதா³துந்தி அம்ஹாகஞ்ச க³ஹிதத⁴னமூலிகம் வட்³டி⁴ம் காலேன காலம் அனுப்பதா³தும். நிபதந்தீதி நிமந்தேந்தி. நிபாதேந்தீதிபி பாடோ², அயமேவ அத்தோ².

குஸலானம் த⁴ம்மானம் உபஸம்பதா³யாதி குஸலத⁴ம்மானம் ஸம்பாத³னத்தா²ய படிலாப⁴த்தா²ய. தா²மவாதி ஞாணதா²மேன ஸமன்னாக³தோ. த³ள்ஹபரக்கமோதி தி²ரேன ஞாணபரக்கமேன ஸமன்னாக³தோ. அனிக்கி²த்தது⁴ரோதி ‘‘அக்³க³மக்³க³ம் அபாபுணித்வா இமம் வீரியது⁴ரம் ந ட²பேஸ்ஸாமீ’’தி ஏவம் அட்ட²பிதது⁴ரோ.

ப³ஹுஸ்ஸுதாதி ஏகனிகாயாதி³வஸேன ப³ஹு பு³த்³த⁴வசனம் ஸுதம் ஏதேஸந்தி ப³ஹுஸ்ஸுதா. ஆக³தாக³மாதி ஏகோ நிகாயோ ஏகோ ஆக³மோ நாம, த்³வே நிகாயா த்³வே ஆக³மா நாம, பஞ்ச நிகாயா பஞ்ச ஆக³மா நாம, ஏதேஸு ஆக³மேஸு யேஸம் ஏகோபி ஆக³மோ ஆக³தோ பகு³ணோ பவத்திதோ, தே ஆக³தாக³மா நாம. த⁴ம்மத⁴ராதி ஸுத்தந்தபிடகத⁴ரா. வினயத⁴ராதி வினயபிடகத⁴ரா. மாதிகாத⁴ராதி த்³வேமாதிகாத⁴ரா. பரிபுச்ச²தீதி அத்தா²னத்த²ம் காரணாகாரணம் புச்ச²தி. பரிபஞ்ஹதீதி ‘‘இமம் நாம புச்சி²ஸ்ஸாமீ’’தி அஞ்ஞாதி துலேதி பரிக்³க³ண்ஹாதி. ஸேஸமேத்த² உத்தானத்த²மேவ.

இமஸ்மிம் பன ஸுத்தே பட²மம் பஞ்ஞா ஆக³தா, பச்சா² வீரியஞ்ச கல்யாணமித்தஸேவனா ச. தத்த² பட²மம் அரஹத்தம் பத்வா பச்சா² வீரியம் கத்வா கல்யாணமித்தா ஸேவிதப்³பா³தி ந ஏவம் அத்தோ² த³ட்ட²ப்³போ³, தே³ஸனாய நாம ஹேட்டி²மேன வா பரிச்சே²தோ³ ஹோதி உபரிமேன வா த்³வீஹிபி வா கோடீஹி. இத⁴ பன உபரிமேன பரிச்சே²தோ³ வேதி³தப்³போ³. தஸ்மா கதே²ந்தேன பட²மம் கல்யாணமித்தஉபனிஸ்ஸயம் த³ஸ்ஸேத்வா மஜ்ஜே² வீரியம் த³ஸ்ஸேத்வா பச்சா² அரஹத்தம் கதே²தப்³ப³ந்தி.

ரத²காரவக்³கோ³ து³தியோ.