(15) 5. ஸமாபத்திவக்³க³வண்ணனா

164. பஞ்சமஸ்ஸ பட²மே ஸமாபத்திகுஸலதாதி ஆஹாரஸப்பாயம் உதுஸப்பாயம் பரிக்³க³ண்ஹித்வா ஸமாபத்திஸமாபஜ்ஜனே சே²கதா. ஸமாபத்திவுட்டா²னகுஸலதாதி யதா²பரிச்சே²தே³ன க³தே காலே வியத்தோ ஹுத்வா உட்ட²ஹந்தோ வுட்டா²னகுஸலோ நாம ஹோதி, ஏவம் குஸலதா.

165. து³தியே அஜ்ஜவந்தி உஜுபா⁴வோ. மத்³த³வந்தி முது³பா⁴வோ.

166. ததியே க²ந்தீதி அதி⁴வாஸனக²ந்தி. ஸோரச்சந்தி ஸுஸீல்யபா⁴வேன ஸுரதபா⁴வோ.

167. சதுத்தே² ஸாக²ல்யந்தி ஸண்ஹவாசாவஸேன ஸம்மோத³மானபா⁴வோ. படிஸந்தா²ரோதி ஆமிஸேன வா த⁴ம்மேன வா படிஸந்த²ரணம்.

168. பஞ்சமே அவிஹிம்ஸாதி கருணாபுப்³ப³பா⁴கோ³. ஸோசேய்யந்தி ஸீலவஸேன ஸுசிபா⁴வோ. ச²ட்ட²ஸத்தமானி உத்தானத்தா²னேவ.

171. அட்ட²மே படிஸங்கா²னப³லந்தி பச்சவேக்க²ணப³லம்.

172. நவமே முட்ட²ஸ்ஸச்சே அகம்பனேன ஸதியேவ ஸதிப³லம். உத்³த⁴ச்சே அகம்பனேன ஸமாதி⁴யேவ ஸமாதி⁴ப³லம்.

173. த³ஸமே ஸமதோ²தி சித்தேகக்³க³தா. விபஸ்ஸனாதி ஸங்கா²ரபரிக்³கா³ஹகஞ்ஞாணம்.

174. ஏகாத³ஸமே ஸீலவிபத்தீதி து³ஸ்ஸீல்யம். தி³ட்டி²விபத்தீதி மிச்சா²தி³ட்டி².

175. த்³வாத³ஸமே ஸீலஸம்பதா³தி பரிபுண்ணஸீலதா. தி³ட்டி²ஸம்பதா³தி ஸம்மாதி³ட்டி²கபா⁴வோ. தேன கம்மஸ்ஸகதஸம்மாதி³ட்டி², ஜா²னஸம்மாதி³ட்டி², விபஸ்ஸனாஸம்மாதி³ட்டி², மக்³க³ஸம்மாதி³ட்டி², ப²லஸம்மாதி³ட்டீ²தி ஸப்³பா³பி பஞ்சவிதா⁴ ஸம்மாதி³ட்டி² ஸங்க³ஹிதா ஹோதி.

176. தேரஸமே ஸீலவிஸுத்³தீ⁴தி விஸுத்³தி⁴ஸம்பாபகம் ஸீலம். தி³ட்டி²விஸுத்³தீ⁴தி விஸுத்³தி⁴ஸம்பாபிகா சதுமக்³க³ஸம்மாதி³ட்டி², பஞ்சவிதா⁴பி வா ஸம்மாதி³ட்டி².

177. சுத்³த³ஸமே தி³ட்டி²விஸுத்³தீ⁴தி விஸுத்³தி⁴ஸம்பாபிகா ஸம்மாதி³ட்டி²யேவ. யதா²தி³ட்டி²ஸ்ஸ ச பதா⁴னந்தி ஹேட்டி²மமக்³க³ஸம்பயுத்தம் வீரியம். தஞ்ஹி தஸ்ஸா தி³ட்டி²யா அனுரூபத்தா ‘‘யதா²தி³ட்டி²ஸ்ஸ ச பதா⁴ன’’ந்தி வுத்தம்.

178. பன்னரஸமே அஸந்துட்டி²தா ச குஸலேஸு த⁴ம்மேஸூதி அஞ்ஞத்ர அரஹத்தமக்³கா³ குஸலேஸு த⁴ம்மேஸு அஸந்துட்டி²பா⁴வோ.

179. ஸோளஸமே முட்ட²ஸ்ஸச்சந்தி முட்ட²ஸ்ஸதிபா⁴வோ. அஸம்பஜஞ்ஞந்தி அஞ்ஞாணபா⁴வோ.

180. ஸத்தரஸமே அபிலாபனலக்க²ணா ஸதி. ஸம்மா பஜானனலக்க²ணம் ஸம்பஜஞ்ஞந்தி.

ஸமாபத்திவக்³கோ³ பஞ்சமோ. ததியபண்ணாஸகம் நிட்டி²தம்.