5. பரிஸவக்³க³வண்ணனா

43. பஞ்சமஸ்ஸ பட²மே உத்தானாதி பாகடா அப்படிச்ச²ன்னா. க³ம்பீ⁴ராதி கு³ள்ஹா படிச்ச²ன்னா. உத்³த⁴தாதி உத்³த⁴ச்சேன ஸமன்னாக³தா. உன்னளாதி உக்³க³தனளா, உட்டி²ததுச்ச²மானாதி வுத்தம் ஹோதி. சபலாதி பத்தசீவரமண்ட³னாதி³னா சாபல்லேன யுத்தா. முக²ராதி முக²க²ரா க²ரவசனா. விகிண்ணவாசாதி அஸம்யதவசனா தி³வஸம்பி நிரத்த²கவசனபலாபினோ. முட்ட²ஸ்ஸதீதி விஸ்ஸட்ட²ஸதினோ. அஸம்பஜானாதி நிப்பஞ்ஞா. அஸமாஹிதாதி சித்தேகக்³க³தாமத்தஸ்ஸாபி அலாபி⁴னோ. பாகதிந்த்³ரியாதி பகதியா டி²தேஹி விவடேஹி அரக்கி²தேஹி இந்த்³ரியேஹி ஸமன்னாக³தா. ஸுக்கபக்கோ² வுத்தவிபல்லாஸேன வேதி³தப்³போ³.

44. து³தியே ப⁴ண்ட³னஜாதாதி ப⁴ண்ட³னம் வுச்சதி கலஹஸ்ஸ புப்³ப³பா⁴கோ³, தம் தேஸம் ஜாதந்தி ப⁴ண்ட³னஜாதா. ததா² ‘‘மயம் தும்ஹே த³ண்டா³பேஸ்ஸாம ப³ந்தா⁴பேஸ்ஸாமா’’திஆதி³வசனப்பவத்தியா ஸஞ்ஜாதகலஹா. அயம் தாவ கி³ஹீஸு நயோ. பப்³ப³ஜிதா பன ஆபத்திவீதிக்கமவாசம் வத³ந்தா கலஹஜாதா நாம. விவாதா³பன்னாதி விருத்³த⁴வாத³ம் ஆபன்னா. முக²ஸத்தீஹி விதுத³ந்தாதி கு³ணானம் சி²ந்த³னட்டே²ன து³ப்³பா⁴ஸிதா வாசா முக²ஸத்தியோதி வுச்சந்தி, தாஹி விதுத³ந்தா விஜ்ஜ²ந்தா. ஸமக்³கா³தி ஏககம்மம் ஏகுத்³தே³ஸோ ஸமஸிக்க²தாதி ஏதேஸம் கரணேன ஸமக்³க³தாய ஸஹிதா. பியசக்கூ²ஹீதி மேத்தாசக்கூ²ஹி.

45. ததியே அக்³க³வதீதி உத்தமபுக்³க³லவதீ, அக்³கா³ய வா உத்தமாய படிபத்தியா ஸமன்னாக³தா. ததோ விபரீதா அனக்³க³வதீ. பா³ஹுலிகாதி சீவராதி³பா³ஹுல்லாய படிபன்னா. ஸாஸனம் ஸிதி²லம் க³ண்ஹந்தீதி ஸாத²லிகா. ஓக்கமனே புப்³ப³ங்க³மாதி ஏத்த² ஓக்கமனம் வுச்சதி அவக³மனட்டே²ன பஞ்ச நீவரணானி, தேன பஞ்சனீவரணபூரணே புப்³ப³ங்க³மாதி வுத்தம் ஹோதி. பவிவேகேதி உபதி⁴விவேகே நிப்³பா³னே. நிக்கி²த்தது⁴ராதி திவிதே⁴பி விவேகே ஓரோபிதது⁴ரா. ந வீரியம் ஆரப⁴ந்தீதி து³வித⁴ம்பி வீரியம் ந கரோந்தி. அப்பத்தஸ்ஸ பத்தியாதி புப்³பே³ அப்பத்தஸ்ஸ ஜா²னவிபஸ்ஸனாமக்³க³ப²லவிஸேஸஸ்ஸ பத்திஅத்தா²ய. இதரம் பத³த்³வயம் தஸ்ஸேவ வேவசனம். பச்சி²மா ஜனதாதி ஸத்³தி⁴விஹாரிகஅந்தேவாஸிகஜனோ. தி³ட்டா²னுக³திம் ஆபஜ்ஜதீதி ஆசரியுபஜ்ஜா²யேஹி கதம் அனுகரோந்தோ தி³ட்ட²ஸ்ஸ தேஸம் ஆசாரஸ்ஸ அனுக³திம் ஆபஜ்ஜதி நாம. ஸேஸம் வுத்தபடிபக்க²னயேன வேதி³தப்³ப³ம்.

46. சதுத்தே² அரியாதி அரியஸாவகபரிஸா. அனரியாதி புது²ஜ்ஜனபரிஸா. ‘‘இத³ம் து³க்க²’’ந்தி யதா²பூ⁴தம் நப்பஜானந்தீதி ட²பேத்வா தண்ஹம் தேபூ⁴மகா பஞ்சக்க²ந்தா⁴ து³க்க²ஸச்சம் நாம, ஏத்தகமேவ து³க்க²ம், இதோ உத்³த⁴ம் து³க்க²ம் நத்தீ²தி யதா²ஸபா⁴வதோ நப்பஜானந்தி. ஏஸ நயோ ஸப்³ப³த்த². ஸேஸபதே³ஸு பன தஸ்ஸ து³க்க²ஸ்ஸ ஸமுட்டா²பிகா புரிமதண்ஹா ஸமுத³யோ நாம, தஸ்ஸாயேவ தண்ஹாய, த்³வின்னம்பி வா தேஸம் ஸச்சானம் அச்சந்தக்க²யோ அஸமுப்பத்தி து³க்க²னிரோதோ⁴ நாம, அட்ட²ங்கி³கோ அரியமக்³கோ³ து³க்க²னிரோத⁴கா³மினீ படிபதா³ நாமாதி ஏவம் இமஸ்மிம் ஸுத்தே சதூஹி ஸச்சேஹி சத்தாரோ மக்³கா³ ச சத்தாரி ச ப²லானி கதி²தானி.

47. பஞ்சமே பரிஸாகஸடோதி கஸடபரிஸா கசவரபரிஸா பலாபபரிஸாதி அத்தோ². பரிஸாமண்டோ³தி பஸன்னபரிஸா ஸாரபரிஸாதி அத்தோ². ச²ந்தா³க³திம் க³ச்ச²ந்தீதி ச²ந்தே³ன அக³திம் க³ச்ச²ந்தி, அகத்தப்³ப³ம் கரோந்தீதி அத்தோ². ஸேஸபதே³ஸுபி ஏஸேவ நயோ. இமானி பன சத்தாரி அக³திக³மனானி ப⁴ண்ட³பா⁴ஜனீயே ச வினிச்ச²யட்டா²னே ச லப்³ப⁴ந்தி. தத்த² ப⁴ண்ட³பா⁴ஜனீயே தாவ அத்தனோ பா⁴ரபூ⁴தானம் பி⁴க்கூ²னம் அமனாபே ப⁴ண்ட³கே பத்தே தம் பரிவத்தேத்வா மனாபம் தே³ந்தோ ச²ந்தா³க³திம் க³ச்ச²தி நாம. அத்தனோ பன அபா⁴ரபூ⁴தானம் மனாபே ப⁴ண்ட³கே பத்தே தம் பரிவத்தேத்வா அமனாபம் தே³ந்தோ தோ³ஸாக³திம் க³ச்ச²தி நாம. ப⁴ண்ட³கபா⁴ஜனீயவத்து²ஞ்ச டி²திகஞ்ச அஜானந்தோ மோஹாக³திம் க³ச்ச²தி நாம. முக²ரானம் வா ராஜாதி³னிஸ்ஸிதானம் வா ‘‘இமே மே அமனாபே ப⁴ண்ட³கே தி³ன்னே அனத்த²ம்பி கரேய்யு’’ந்தி ப⁴யேன பரிவத்தேத்வா மனாபம் தே³ந்தோ ப⁴யாக³திம் க³ச்ச²தி நாம. யோ பன ஏவம் ந க³ச்ச²தி, ஸப்³பே³ஸம் துலாபூ⁴தோ பமாணபூ⁴தோ மஜ்ஜ²த்தோ ஹுத்வா யம் யஸ்ஸ பாபுணாதி, தஞ்ஞேவ தஸ்ஸ தே³தி, அயம் சதுப்³பி³த⁴ம்பி அக³திக³மனம் ந க³ச்ச²தி நாம. வினிச்ச²யட்டா²னே பன அத்தனோ பா⁴ரபூ⁴தஸ்ஸ க³ருகாபத்திம் லஹுகாபத்தீதி கத்வா கதே²ந்தோ ச²ந்தா³க³திம் க³ச்ச²தி நாம. இதரஸ்ஸ லஹுகாபத்திம் க³ருகாபத்தீதி கத்வா கதே²ந்தோ தோ³ஸாக³திம் க³ச்ச²தி நாம. ஆபத்திவுட்டா²னம் பன ஸமுச்சயக்க²ந்த⁴கஞ்ச அஜானந்தோ மோஹாக³திம் க³ச்ச²தி நாம. முக²ரஸ்ஸ வா ராஜபூஜிதஸ்ஸ வா ‘‘அயம் மே க³ருகம் கத்வா ஆபத்திம் கதே²ந்தஸ்ஸ அனத்த²ம்பி கரேய்யா’’தி க³ருகமேவ லஹுகாதி கத்வா கதே²ந்தோ ப⁴யாக³திம் க³ச்ச²தி நாம. யோ பன ஸப்³பே³ஸம் யதா²பூ⁴தமேவ கதே²தி, அயம் சதுப்³பி³த⁴ம்பி அக³திக³மனம் ந க³ச்ச²தி நாம.

48. ச²ட்டே² ஓக்காசிதவினீதாதி து³ப்³பி³னீதா. நோ படிபுச்சா²வினீதாதி ந புச்சி²த்வா வினீதா. க³ம்பீ⁴ராதி பாளிவஸேன க³ம்பீ⁴ரா ஸல்லஸுத்தஸதி³ஸா. க³ம்பீ⁴ரத்தா²தி அத்த²வஸேன க³ம்பீ⁴ரா மஹாவேத³ல்லஸுத்தஸதி³ஸா. லோகுத்தராதி லோகுத்தரஅத்த²தீ³பகா. ஸுஞ்ஞதாபடிஸம்யுத்தாதி ஸத்தஸுஞ்ஞம் த⁴ம்மமத்தமேவ பகாஸகா அஸங்க²தஸம்யுத்தஸதி³ஸா. ந அஞ்ஞா சித்தம் உபட்ட²பேந்தீதி விஜானனத்தா²ய சித்தம் ந உபட்ட²பேந்தி, நித்³தா³யந்தி வா அஞ்ஞவிஹிதா வா ஹோந்தி. உக்³க³ஹேதப்³ப³ம் பரியாபுணிதப்³ப³ந்தி உக்³க³ஹேதப்³பே³ ச பரியாபுணிதப்³பே³ ச. கவிதாதி கவீஹி கதா. இதரம் தஸ்ஸேவ வேவசனம். சித்தக்க²ராதி விசித்ரஅக்க²ரா. இதரம் தஸ்ஸேவ வேவசனம். பா³ஹிரகாதி ஸாஸனதோ ப³ஹிபூ⁴தா. ஸாவகபா⁴ஸிதாதி தேஸம் தேஸம் ஸாவகேஹி பா⁴ஸிதா. ஸுஸ்ஸூஸந்தீதி அக்க²ரசித்ததாய சேவ ஸரஸம்பத்தியா ச அத்தமனா ஹுத்வா ஸுணந்தி. ந சேவ அஞ்ஞமஞ்ஞம் படிபுச்ச²ந்தீதி அஞ்ஞமஞ்ஞம் அத்த²ம் வா அனுஸந்தி⁴ம் வா புப்³பா³பரம் வா ந புச்ச²ந்தி. ந ச படிவிசரந்தீதி புச்ச²னத்தா²ய சாரிகம் ந விசரந்தி. இத³ம் கத²ந்தி இத³ம் ப்³யஞ்ஜனம் கத²ம் ரோபேதப்³ப³ம் கிந்தி ரோபேதப்³ப³ம்? இமஸ்ஸ கோ அத்தோ²தி இமஸ்ஸ பா⁴ஸிதஸ்ஸ கோ அத்தோ², கா அனுஸந்தி⁴, கிம் புப்³பா³பரம்? அவிவடந்தி படிச்ச²ன்னம். ந விவரந்தீதி ந உக்³கா⁴டேந்தி. அனுத்தானீகதந்தி அபாகடம் கதம். ந உத்தானிம் கரோந்தீதி பாகடம் ந கரோந்தி. கங்கா²டா²னியேஸூதி கங்கா²ய காரணபூ⁴தேஸு. ஸுக்கபக்கோ² வுத்தவிபல்லாஸேன வேதி³தப்³போ³.

49. ஸத்தமே ஆமிஸக³ரூதி சதுபச்சயக³ருகா லோகுத்தரத⁴ம்மம் லாமகதோ க³ஹேத்வா டி²தபரிஸா. ஸத்³த⁴ம்மக³ரூதி நவ லோகுத்தரத⁴ம்மே க³ருகே கத்வா சத்தாரோ பச்சயே லாமகதோ க³ஹேத்வா டி²தபரிஸா. உப⁴தோபா⁴க³விமுத்தோதி த்³வீஹி பா⁴கே³ஹி விமுத்தோ. பஞ்ஞாவிமுத்தோதி பஞ்ஞாய விமுத்தோ ஸுக்க²விபஸ்ஸககீ²ணாஸவோ. காயஸக்கீ²தி காயேன ஜா²னப²ஸ்ஸம் பு²ஸித்வா பச்சா² நிரோத⁴ம் நிப்³பா³னம் ஸச்சி²கத்வா டி²தோ. தி³ட்டி²ப்பத்தோதி தி³ட்ட²ந்தம் பத்தோ. இமே த்³வேபி ச²ஸு டா²னேஸு லப்³ப⁴ந்தி. ஸத்³தா⁴விமுத்தோதி ஸத்³த³ஹந்தோ விமுத்தோ. அயம்பி ச²ஸு டா²னேஸு லப்³ப⁴தி. த⁴ம்மம் அனுஸ்ஸரதீதி த⁴ம்மானுஸாரீ. ஸத்³த⁴ம் அனுஸ்ஸரதீதி ஸத்³தா⁴னுஸாரீ. இமே த்³வேபி பட²மமக்³க³ஸமங்கி³னோ. கல்யாணத⁴ம்மோதி ஸுந்த³ரத⁴ம்மோ. து³ஸ்ஸீலோ பாபத⁴ம்மோதி நிஸ்ஸீலோ லாமகத⁴ம்மோ. இமம் கஸ்மா க³ண்ஹந்தி? ஸப்³பே³ஸு ஹி ஏகஸதி³ஸேஸு ஜாதேஸு ஸீலவந்தேஸு ப³லவகா³ரவம் ந ஹோதி, ஏகச்சேஸு பன து³ஸ்ஸீலேஸு ஸதி ஸீலவந்தானம் உபரி ப³லவகா³ரவம் ஹோதீதி மஞ்ஞந்தா க³ண்ஹந்தி. தே தேன லாப⁴ம் லப⁴ந்தீதி தே பி⁴க்கூ² ஏகச்சானம் வண்ணம் ஏகச்சானம் அவண்ணம் கதே²த்வா சத்தாரோ பச்சயே லப⁴ந்தி. க³தி²தாதி தண்ஹாய க³ந்தி²தா. முச்சி²தாதி தண்ஹாவஸேனேவ முச்சி²தா. அஜ்ஜோ²பன்னாதி அஜ்ஜோ²ஸாய கி³லித்வா பரினிட்ட²பேத்வா டி²தா. அனாதீ³னவத³ஸ்ஸாவினோதி அபச்சவேக்கி²தபரிபோ⁴கே³ ஆதீ³னவம் அபஸ்ஸந்தா. அனிஸ்ஸரணபஞ்ஞாதி சதூஸு பச்சயேஸு ச²ந்த³ராக³அபகட்³ட⁴னாய நிஸ்ஸரணபஞ்ஞாய விரஹிதா இத³மத்த²ம் ஏதந்தி அஜானந்தா. பரிபு⁴ஞ்ஜந்தீதி ஸச்ச²ந்த³ராகா³ ஹுத்வா பரிபு⁴ஞ்ஜந்தி.

ஸுக்கபக்கே² உப⁴தோபா⁴க³விமுத்தோதிஆதீ³ஸு அயம் ஸத்தன்னம்பி அரியபுக்³க³லானம் ஸங்கே²பபகாஸனா – ஏகோ பி⁴க்கு² பஞ்ஞாது⁴ரேன அபி⁴னிவிட்டோ² அட்ட² ஸமாபத்தியோ நிப்³ப³த்தேத்வா ஸோதாபத்திமக்³க³ம் பாபுணாதி. ஸோ தஸ்மிம் க²ணே த⁴ம்மானுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு காயஸக்கி² நாம, அரஹத்தப²லக்க²ணே உப⁴தோபா⁴க³விமுத்தோ நாம. ஸமாபத்தீஹி விக்க²ம்ப⁴னவிமுத்தியா மக்³கே³ன ஸமுச்சே²த³விமுத்தியாதி த்³விக்க²த்தும் வா த்³வீஹி வா பா⁴கே³ஹி விமுத்தோதி அத்தோ². அபரோ பஞ்ஞாது⁴ரேன அபி⁴னிவிட்டோ² ஸமாபத்தியோ நிப்³ப³த்தேதும் அஸக்கோந்தோ ஸுக்க²விபஸ்ஸகோவ ஹுத்வா ஸோதாபத்திமக்³க³ம் பாபுணாதி. ஸோ தஸ்மிம் க²ணே த⁴ம்மானுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு தி³ட்டி²ப்பத்தோ நாம, அரஹத்தப²லக்க²ணே பஞ்ஞாவிமுத்தோ நாம. அபரோ ஸத்³தா⁴து⁴ரேன அபி⁴னிவிட்டோ² அட்ட² ஸமாபத்தியோ நிப்³ப³த்தேத்வா ஸோதாபத்திமக்³க³ம் பாபுணாதி. ஸோ தஸ்மிம் க²ணே ஸத்³தா⁴னுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு காயஸக்கி² நாம, அரஹத்தப²லக்க²ணே உப⁴தோபா⁴க³விமுத்தோ நாம. அபரோ ஸத்³தா⁴து⁴ரேன அபி⁴னிவிட்டோ² ஸமாபத்தியோ நிப்³ப³த்தேதும் அஸக்கோந்தோ ஸுக்க²விபஸ்ஸகோவ ஹுத்வா ஸோதாபத்திமக்³க³ம் பாபுணாதி. ஸோ தஸ்மிம் க²ணே ஸத்³தா⁴னுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு ஸத்³தா⁴விமுத்தோ நாம, அரஹத்தப²லக்க²ணே பஞ்ஞாவிமுத்தோ நாம.

50. அட்ட²மே விஸமாதி ஸபக்க²லனட்டே²ன விஸமா. ஸமாதி நிபக்க²லனட்டே²ன ஸமா. அத⁴ம்மகம்மானீதி உத்³த⁴ம்மானி கம்மானி. அவினயகம்மானீதி உப்³பி³னயானி கம்மானி.

51. நவமே அத⁴ம்மிகாதி நித்³த⁴ம்மா. த⁴ம்மிகாதி த⁴ம்மயுத்தா.

52. த³ஸமே அதி⁴கரணந்தி விவாதா³தி⁴கரணாதி³சதுப்³பி³த⁴ம் அதி⁴கரணம். ஆதி³யந்தீதி க³ண்ஹந்தி. ஸஞ்ஞாபேந்தீதி ஜானாபேந்தி. ந ச ஸஞ்ஞத்திம் உபக³ச்ச²ந்தீதி ஸஞ்ஞாபனத்த²ம் ந ஸன்னிபதந்தி. ந ச நிஜ்ஜா²பேந்தீதி ந பேக்கா²பேந்தி. ந ச நிஜ்ஜ²த்திம் உபக³ச்ச²ந்தீதி அஞ்ஞமஞ்ஞம் நிஜ்ஜா²பனத்தா²ய ந ஸன்னிபதந்தி. அஸஞ்ஞத்திப³லாதி அஸஞ்ஞத்தியேவ ப³லம் ஏதேஸந்தி அஸஞ்ஞத்திப³லா. அப்படினிஸ்ஸக்³க³மந்தினோதி யேஸம் ஹி ஏவம் ஹோதி – ‘‘ஸசே அம்ஹேஹி க³ஹிதம் அதி⁴கரணம் த⁴ம்மிகம் ப⁴விஸ்ஸதி, க³ண்ஹிஸ்ஸாம. ஸசே அத⁴ம்மிகம், விஸ்ஸஜ்ஜேஸ்ஸாமா’’தி, தே படினிஸ்ஸக்³க³மந்தினோ நாம ஹோந்தி. இமே பன ந ததா² மந்தேந்தீதி அப்படினிஸ்ஸக்³க³மந்தினோ. தா²மஸா பராமாஸா அபி⁴னிவிஸ்ஸாதி தி³ட்டி²தா²மேன ச தி³ட்டி²பராமாஸேன ச அபி⁴னிவிஸித்வா. இத³மேவ ஸச்சந்தி இத³ம் அம்ஹாகம் வசனமேவ ஸச்சம். மோக⁴மஞ்ஞந்தி அவஸேஸானம் வசனம் மோக⁴ம் துச்ச²ம். ஸுக்கபக்கோ² உத்தானத்தோ²யேவாதி.

பரிஸவக்³கோ³ பஞ்சமோ.