2. து³தியபண்ணாஸகம்

(6) 1. புக்³க³லவக்³க³வண்ணனா

53. து³தியபண்ணாஸகஸ்ஸ பட²மே சக்கவத்தினா ஸத்³தி⁴ம் க³ஹிதத்தா ‘‘லோகானுகம்பாயா’’தி ந வுத்தம். ஏத்த² ச சக்கவத்தினோ உப்பத்தியா த்³வே ஸம்பத்தியோ லப⁴ந்தி, பு³த்³தா⁴னம் உப்பத்தியா திஸ்ஸோபி.

54. து³தியே அச்ச²ரியமனுஸ்ஸாதி ஆசிண்ணமனுஸ்ஸா அப்³பு⁴தமனுஸ்ஸா.

55. ததியே ப³ஹுனோ ஜனஸ்ஸ அனுதப்பா ஹோதீதி மஹாஜனஸ்ஸ அனுதாபகாரீ ஹோதி. தத்த² சக்கவத்தினோ காலகிரியா ஏகசக்கவாளே தே³வமனுஸ்ஸானம் அனுதாபம் கரோதி, ததா²க³தஸ்ஸ காலகிரியா த³ஸஸு சக்கவாளஸஹஸ்ஸேஸு.

56. சதுத்தே² தூ²பாரஹாதி தூ²பஸ்ஸ யுத்தா அனுச்ச²விகா. சக்கவத்தினோ ஹி சேதியம் படிஜக்³கி³த்வா த்³வே ஸம்பத்தியோ லப⁴ந்தி, பு³த்³தா⁴னம் சேதியம் படிஜக்³கி³த்வா திஸ்ஸோபி.

57. பஞ்சமே பு³த்³தா⁴தி அத்தனோ ஆனுபா⁴வேன சத்தாரி ஸச்சானி பு³த்³தா⁴.

58. ச²ட்டே² ப²லந்தியாதி ஸத்³த³ம் கரோந்தியா. ந ஸந்தஸந்தீதி ந பா⁴யந்தி. தத்த² கீ²ணாஸவோ அத்தனோ ஸக்காயதி³ட்டி²யா பஹீனத்தா ந பா⁴யதி, ஹத்தா²ஜானீயோ ஸக்காயதி³ட்டி²யா ப³லவத்தாதி. ஸத்தமட்ட²மேஸுபி ஏஸேவ நயோ.

61. நவமே கிம்புரிஸாதி கின்னரா. மானுஸிம் வாசம் ந பா⁴ஸந்தீதி மனுஸ்ஸகத²ம் ந கதே²ந்தி. த⁴ம்மாஸோகஸ்ஸ கிர ஏகம் கின்னரம் ஆனேத்வா த³ஸ்ஸேஸும். ஸோ ‘‘கதா²பேத² ந’’ந்தி ஆஹ. கின்னரோ கதே²தும் ந இச்ச²தி. ஏகோ புரிஸோ ‘‘அஹமேதம் கதா²பேஸ்ஸாமீ’’தி ஹேட்டா²பாஸாத³ம் ஓதாரேத்வா த்³வே கா²ணுகே கோட்டேத்வா உக்க²லிம் ஆரோபேஸி. ஸா உப⁴தோபஸ்ஸேஹி பததி. தம் தி³ஸ்வா கின்னரோ ‘‘கிம் அஞ்ஞம் ஏகம் கா²ணுகம் கோட்டேதும் ந வட்டதீ’’தி ஏத்தகமேவ ஆஹ. புன அபரபா⁴கே³ த்³வே கின்னரே ஆனேத்வா த³ஸ்ஸேஸும். ராஜா ‘‘கதா²பேத² நே’’தி ஆஹ. தே கதே²தும் ந இச்சி²ம்ஸு. ஏகோ புரிஸோ ‘‘அஹமேதே கதா²பேஸ்ஸாமீ’’தி தே க³ஹேத்வா அந்தராபணம் அக³மாஸி. தத்தே²கோ அம்ப³பக்கஞ்ச மச்சே² ச அத்³த³ஸ, ஏகோ கபி³ட்ட²ப²லஞ்ச அம்பி³லிகாப²லஞ்ச. தத்த² புரிமோ ‘‘மஹாவிஸம் மனுஸ்ஸா கா²த³ந்தி, கத²ம் தே கிலாஸினோ ந ஹோந்தீ’’தி ஆஹ. இதரோ ‘‘கத²ம் இமே ஏதம் நிஸ்ஸாய குட்டி²னோ ந ஹோந்தீ’’தி ஆஹ. ஏவம் மானுஸிம் வாசம் கதே²தும் ஸக்கோந்தாபி த்³வே அத்தே² ஸம்பஸ்ஸமானா ந கதே²ந்தீதி.

62. த³ஸமே அப்படிவானோதி அனுகண்டி²தோ அபச்சோஸக்கிதோ.

63. ஏகாத³ஸமே அஸந்தஸன்னிவாஸந்தி அஸப்புரிஸானம் ஸன்னிவாஸம். ந வதே³ய்யாதி ஓவாதே³ன வா அனுஸாஸனியா வா ந வதே³ய்ய, மா வத³தூதி அத்தோ². தே²ரம்பாஹம் ந வதே³ய்யந்தி அஹம்பி தே²ரம் பி⁴க்கு²ம் ஓவாதா³னுஸாஸனிவஸேன ந வதே³ய்யம். அஹிதானுகம்பீதி அஹிதம் இச்ச²மானோ. நோ ஹிதானுகம்பீதி ஹிதம் அனிச்ச²மானோ. நோதி நம் வதே³ய்யந்தி ‘‘அஹம் தவ வசனம் ந கரிஸ்ஸ’’ந்தி நம் வதே³ய்யம். விஹேடே²ய்யந்தி வசனஸ்ஸ அகரணேன விஹேடே²ய்யம். பஸ்ஸம்பிஸ்ஸ நப்படிகரேய்யந்தி பஸ்ஸந்தோபி ஜானந்தோபி அஹம் தஸ்ஸ வசனம் ந கரேய்யம். இமினா உபாயேன ஸப்³ப³த்த² அத்தோ² வேதி³தப்³போ³. ஸுக்கபக்கே² பன ஸாதூ⁴தி நம் வதே³ய்யந்தி ‘‘ஸாது⁴ ப⁴த்³த³கம் ஸுகதி²தம் தயா’’தி தஸ்ஸ கத²ம் அபி⁴னந்த³ந்தோ நம் வதே³ய்யந்தி அத்தோ².

64. த்³வாத³ஸமே உப⁴தோ வசீஸம்ஸாரோதி த்³வீஸுபி பக்கே²ஸு அஞ்ஞமஞ்ஞம் அக்கோஸனபச்சக்கோஸனவஸேன ஸம்ஸரமானா வாசா வசீஸம்ஸாரோ. தி³ட்டி²பளாஸோதி தி³ட்டி²ம் நிஸ்ஸாய உப்பஜ்ஜனகோ யுக³க்³கா³ஹலக்க²ணோ பளாஸோ தி³ட்டி²பளாஸோ நாம. சேதஸோ ஆகா⁴தோதி கோபோ. ஸோ ஹி சித்தம் ஆகா⁴தேந்தோ உப்பஜ்ஜதி. அப்பச்சயோதி அதுட்டா²காரோ, தோ³மனஸ்ஸந்தி அத்தோ². அனபி⁴ரத்³தீ⁴தி கோபோயேவ. ஸோ ஹி அனபி⁴ராத⁴னவஸேன அனபி⁴ரத்³தீ⁴தி வுச்சதி. அஜ்ஜ²த்தம் அவூபஸந்தம் ஹோதீதி ஸப்³ப³ம்பேதம் நியகஜ்ஜ²த்தஸங்கா²தே அத்தனோ சித்தே ச ஸத்³தி⁴விஹாரிகஅந்தேவாஸிகஸங்கா²தாய அத்தனோ பரிஸாய ச அவூபஸந்தம் ஹோதி. தஸ்மேதந்தி தஸ்மிம் ஏதம். ஸேஸம் வுத்தனயேனேவ வேதி³தப்³ப³ந்தி.

புக்³க³லவக்³கோ³ பட²மோ.

(7) 2. ஸுக²வக்³க³வண்ணனா

65. து³தியஸ்ஸ பட²மே கி³ஹிஸுக²ந்தி கி³ஹீனம் ஸப்³ப³காமனிப்ப²த்திமூலகம் ஸுக²ம். பப்³ப³ஜிதஸுக²ந்தி பப்³ப³ஜிதானம் பப்³ப³ஜ்ஜாமூலகம் ஸுக²ம்.

66. து³தியே காமஸுக²ந்தி காமே ஆரப்³ப⁴ உப்பஜ்ஜனகஸுக²ம். நேக்க²ம்மஸுக²ந்தி நேக்க²ம்மம் வுச்சதி பப்³ப³ஜ்ஜா, தம் ஆரப்³ப⁴ உப்பஜ்ஜனகஸுக²ம்.

67. ததியே உபதி⁴ஸுக²ந்தி தேபூ⁴மகஸுக²ம். நிருபதி⁴ஸுக²ந்தி லோகுத்தரஸுக²ம்.

68. சதுத்தே² ஸாஸவஸுக²ந்தி ஆஸவானம் பச்சயபூ⁴தம் வட்டஸுக²ம். அனாஸவஸுக²ந்தி தேஸம் அபச்சயபூ⁴தம் விவட்டஸுக²ம்.

69. பஞ்சமே ஸாமிஸந்தி ஸம்கிலேஸம் வட்டகா³மிஸுக²ம். நிராமிஸந்தி நிக்கிலேஸம் விவட்டகா³மிஸுக²ம்.

70. ச²ட்டே² அரியஸுக²ந்தி அபுது²ஜ்ஜனஸுக²ம். அனரியஸுக²ந்தி புது²ஜ்ஜனஸுக²ம்.

71. ஸத்தமே காயிகந்தி காயவிஞ்ஞாணஸஹஜாதம். சேதஸிகந்தி மனோத்³வாரிகஸுக²ம். தம் லோகியலோகுத்தரமிஸ்ஸகம் கதி²தம்.

72. அட்ட²மே ஸப்பீதிகந்தி பட²மது³தியஜ்ஜா²னஸுக²ம். நிப்பீதிகந்தி ததியசதுத்த²ஜ்ஜா²னஸுக²ம். தத்த² லோகியஸப்பீதிகதோ லோகியனிப்பீதிகம், லோகுத்தரஸப்பீதிகதோ ச லோகுத்தரனிப்பீதிகம் அக்³க³ந்தி ஏவம் பு⁴ம்மந்தரம் அபி⁴ந்தி³த்வா அக்³க³பா⁴வோ வேதி³தப்³போ³.

73. நவமே ஸாதஸுக²ந்தி தீஸு ஜா²னேஸு ஸுக²ம். உபேக்கா²ஸுக²ந்தி சதுத்த²ஜ்ஜா²னஸுக²ம்.

74. த³ஸமே ஸமாதி⁴ஸுக²ந்தி அப்பனம் வா உபசாரம் வா பத்தஸுக²ம். அஸமாதி⁴ஸுக²ந்தி தது³ப⁴யம் அப்பத்தஸுக²ம்.

75. ஏகாத³ஸமே ஸப்பீதிகாரம்மணந்தி ஸப்பீதிகம் ஜா²னத்³வயம் பச்சவேக்க²ந்தஸ்ஸ உப்பன்னஸுக²ம். நிப்பீதிகாரம்மணேபி ஏஸேவ நயோ. த்³வாத³ஸமேபி இமினாவ உபாயேன அத்தோ² வேதி³தப்³போ³.

77. தேரஸமே ரூபாரம்மணந்தி ரூபாவசரசதுத்த²ஜ்ஜா²னாரம்மணம், யம்கிஞ்சி ரூபம் ஆரப்³ப⁴ உப்பஜ்ஜனகம் வா. அரூபாரம்மணந்தி அரூபாவசரஜ்ஜா²னாரம்மணம், யம்கிஞ்சி அரூபம் ஆரப்³ப⁴ உப்பஜ்ஜனகம் வாதி.

ஸுக²வக்³கோ³ து³தியோ.

(8) 3. ஸனிமித்தவக்³க³வண்ணனா

78-79. ததியஸ்ஸ பட²மே ஸனிமித்தாதி ஸகாரணா. து³தியாதீ³ஸுபி ஏஸேவ நயோ. நிதா³னம் ஹேது ஸங்கா²ரோ பச்சயோ ரூபந்தி ஸப்³பா³னிபி ஹி ஏதானி காரணவேவசனானேவ.

84. ஸத்தமே ஸவேத³னாதி பச்சயபூ⁴தாய ஸம்பயுத்தவேத³னாய ஸதியேவ உப்பஜ்ஜந்தி, நாஸதீதி அத்தோ². அட்ட²மனவமேஸுபி ஏஸேவ நயோ.

87. த³ஸமே ஸங்க²தாரம்மணாதி பச்சயனிப்³ப³த்தம் ஸங்க²தத⁴ம்மம் ஆரம்மணம் கத்வாவ உப்பஜ்ஜந்தி. நோ அஸங்க²தாரம்மணாதி அஸங்க²தம் பன நிப்³பா³னம் ஆரப்³ப⁴ ந உப்பஜ்ஜந்தி. ந ஹோந்தீதி மக்³க³க்க²ணே ந ஹோந்தி நாம, ப²லே பத்தே நாஹேஸுந்தி. ஏவமேதேஸு த³ஸஸுபி டா²னேஸு யாவ அரஹத்தா தே³ஸனா தே³ஸிதாதி.

ஸனிமித்தவக்³கோ³ ததியோ.

(9) 4. த⁴ம்மவக்³க³வண்ணனா

88. சதுத்த²ஸ்ஸ பட²மே சேதோவிமுத்தீதி ப²லஸமாதி⁴. பஞ்ஞாவிமுத்தீதி ப²லபஞ்ஞா.

89. து³தியே பக்³கா³ஹோதி வீரியம். அவிக்கே²போதி சித்தேகக்³க³தா.

90. ததியே நாமந்தி சத்தாரோ அரூபக்க²ந்தா⁴. ரூபந்தி ரூபக்க²ந்தோ⁴. இதி இமஸ்மிம் ஸுத்தே த⁴ம்மகோட்டா²ஸபரிச்சே²த³ஞாணம் நாம கதி²தம்.

91. சதுத்தே² விஜ்ஜாதி ப²லஞாணம். விமுத்தீதி தம்ஸம்பயுத்தா ஸேஸத⁴ம்மா.

92. பஞ்சமே ப⁴வதி³ட்டீ²தி ஸஸ்ஸததி³ட்டி². விப⁴வதி³ட்டீ²தி உச்சே²த³தி³ட்டி². ச²ட்ட²ஸத்தமானி உத்தானத்தா²னேவ.

95. அட்ட²மே தோ³வசஸ்ஸதாதி து³ப்³ப³சபா⁴வோ. பாபமித்ததாதி பாபமித்தஸேவனபா⁴வோ. நவமம் வுத்தவிபரியாயேன வேதி³தப்³ப³ம்.

97. த³ஸமே தா⁴துகுஸலதாதி அட்டா²ரஸ தா⁴துயோ தா⁴தூதி ஜானனம். மனஸிகாரகுஸலதாதி தாஸம்யேவ தா⁴தூனம் அனிச்சாதி³வஸேன லக்க²ணத்தயம் ஆரோபேத்வா ஜானனம்.

98. ஏகாத³ஸமே ஆபத்திகுஸலதாதி பஞ்சன்னஞ்ச ஸத்தன்னஞ்ச ஆபத்திக்க²ந்தா⁴னம் ஜானனம். ஆபத்திவுட்டா²னகுஸலதாதி தே³ஸனாய வா கம்மவாசாய வா ஆபத்தீஹி வுட்டா²னஜானனந்தி.

த⁴ம்மவக்³கோ³ சதுத்தோ².

(10) 5. பா³லவக்³க³வண்ணனா

99. பஞ்சமஸ்ஸ பட²மே அனாக³தம் பா⁴ரம் வஹதீதி ‘‘ஸம்மஜ்ஜனீ பதீ³போ ச, உத³கம் ஆஸனேன ச, ச²ந்த³பாரிஸுத்³தி⁴உதுக்கா²னம், பி⁴க்கு²க³ணனா ச ஓவாதோ³, பாதிமோக்க²ம் தே²ரபா⁴ரோதி வுச்சதீ’’தி இமம் த³ஸவித⁴ம் தே²ரபா⁴ரம் நவகோ ஹுத்வா தே²ரேன அனஜ்ஜி²ட்டோ² கரோந்தோ அனாக³தம் பா⁴ரம் வஹதி நாம. ஆக³தம் பா⁴ரம் ந வஹதீதி தே²ரோ ஸமானோ தமேவ த³ஸவித⁴ம் பா⁴ரம் அத்தனா வா அகரோந்தோ பரம் வா அஸமாத³பேந்தோ ஆக³தம் பா⁴ரம் ந வஹதி நாம. து³தியஸுத்தேபி இமினாவ நயேன அத்தோ² வேதி³தப்³போ³.

101. ததியே அகப்பியே கப்பியஸஞ்ஞீதி அகப்பியே ஸீஹமம்ஸாதி³ம்ஹி ‘‘கப்பியம் இத³’’ந்தி ஏவம்ஸஞ்ஞீ. கப்பியே அகப்பியஸஞ்ஞீதி கும்பீ⁴லமம்ஸபி³ளாரமம்ஸாதி³ம்ஹி கப்பியே ‘‘அகப்பியம் இத³’’ந்தி ஏவம்ஸஞ்ஞீ. சதுத்த²ம் வுத்தனயேனேவ வேதி³தப்³ப³ம்.

103. பஞ்சமே அனாபத்தியா ஆபத்திஸஞ்ஞீதி ஆபுச்சி²த்வா ப⁴ண்ட³கம் தோ⁴வந்தஸ்ஸ, பத்தம் பசந்தஸ்ஸ, கேஸே சி²ந்த³ந்தஸ்ஸ, கா³மம் பவிஸந்தஸ்ஸாதிஆதீ³ஸு அனாபத்தி, தத்த² ‘‘ஆபத்தி அய’’ந்தி ஏவம்ஸஞ்ஞீ. ஆபத்தியா அனாபத்திஸஞ்ஞீதி தேஸஞ்ஞேவ வத்தூ²னம் அனாபுச்சா²கரணே ஆபத்தி, தத்த² ‘‘அனாபத்தீ’’தி ஏவம்ஸஞ்ஞீ. ச²ட்டே²பி வுத்தனயேனேவ அத்தோ² வேதி³தப்³போ³. ஸத்தமாதீ³னி உத்தானத்தா²னேவ.

109. ஏகாத³ஸமே ஆஸவாதி கிலேஸா. ந குக்குச்சாயிதப்³ப³ந்தி ஸங்க⁴போ⁴க³ஸ்ஸ அபட்ட²பனம் அவிசாரணம் ந குக்குச்சாயிதப்³ப³ம் நாம, தம் குக்குச்சாயதி. குக்குச்சாயிதப்³ப³ந்தி தஸ்ஸேவ பட்ட²பனம் விசாரணம், தம் ந குக்குச்சாயதி. த்³வாத³ஸமாதீ³னி ஹேட்டா² வுத்தனயேனேவ வேதி³தப்³பா³னீதி.

பா³லவக்³கோ³ பஞ்சமோ.

து³தியபண்ணாஸகம் நிட்டி²தம்.