9. கரஜகாயஸுத்தவண்ணனா

219. நவமே து³க்க²ஸ்ஸாதி விபாகது³க்க²ஸ்ஸ, வட்டது³க்க²ஸ்ஸேவ வா. இமஸ்மிம் ஸுத்தே மணிஓபம்மம் நத்தி². ஏவம் விக³தாபி⁴ஜ்ஜோ²தி ஏவந்தி நிபாதமத்தம். யதா² வா மேத்தம் பா⁴வேந்தா விக³தாபி⁴ஜ்ஜா² ப⁴வந்தி, ஏவம் விக³தாபி⁴ஜ்ஜோ². ஏவமஸ்ஸ விக³தாபி⁴ஜ்ஜ²தாதீ³ஹி நீவரணவிக்க²ம்ப⁴னம் த³ஸ்ஸேத்வா இதா³னி அகுஸலனிஸ்ஸரணானி கதே²ந்தோ மேத்தாஸஹக³தேனாதிஆதி³மாஹ. அப்பமாணந்தி அப்பமாணஸத்தாரம்மணதாய சிண்ணவஸிதாய வா அப்பமாணம். பமாணகதம் கம்மம் நாம காமாவசரகம்மம். ந தம் தத்ராவதிட்ட²தீதி தம் மஹோகோ⁴ பரித்தம் உத³கம் விய அத்தனோ ஓகாஸம் க³ஹேத்வா டா²தும் ந ஸக்கோதி, அத² கோ² நம் ஓகே⁴ பரித்தம் உத³கம் விய இத³மேவ அப்பமாணம் கம்மம் அஜ்ஜோ²த்த²ரித்வா அத்தனோ விபாகம் நிப்³ப³த்தேதி. த³ஹரதக்³கே³தி த³ஹரகாலதோ பட்டா²ய.

நாயம் காயோ ஆதா³யக³மனியோதி இமம் காயம் க³ஹேத்வா பரலோகம் க³ந்தும் நாம ந ஸக்காதி அத்தோ². சித்தந்தரோதி சித்தகாரணோ, அத² வா சித்தேனேவ அந்தரிகோ. ஏகஸ்ஸேவ ஹி சுதிசித்தஸ்ஸ அனந்தரா து³தியே படிஸந்தி⁴சித்தே தே³வோ நாம ஹோதி, நேரயிகோ நாம ஹோதி, திரச்சா²னக³தோ நாம ஹோதி. புரிமனயேபி சித்தேன காரணபூ⁴தேன தே³வோ நேரயிகோ வா ஹோதீதி அத்தோ². ஸப்³ப³ம் தம் இத⁴ வேத³னீயந்தி தி³ட்ட²த⁴ம்மவேத³னீயகோட்டா²ஸவனேதம் வுத்தம். ந தம் அனுக³ம் ப⁴விஸ்ஸதீதி மேத்தாய உபபஜ்ஜவேத³னீயபா⁴வஸ்ஸ உபச்சி²ன்னத்தா உபபஜ்ஜவேத³னீயவஸேன ந அனுக³தம் ப⁴விஸ்ஸதி. இத³ம் ஸோதாபன்னஸகதா³கா³மிஅரியபுக்³க³லானம் பச்சவேக்க²ணம் வேதி³தப்³ப³ம். அனாகா³மிதாயாதி ஜா²னானாகா³மிதாய. இத⁴பஞ்ஞஸ்ஸாதி இமஸ்மிம் ஸாஸனே பஞ்ஞா இத⁴பஞ்ஞா நாம, ஸாஸனசரிதாய அரியபஞ்ஞாய டி²தஸ்ஸ அரியஸாவகஸ்ஸாதி அத்தோ². உத்தரிவிமுத்திந்தி அரஹத்தம். த³ஸமம் உத்தானத்த²மேவாதி.

கரஜகாயவக்³கோ³ பட²மோ.

(22) 2. ஸாமஞ்ஞவக்³க³வண்ணனா

221. து³தியஸ்ஸ பட²மம் ஆதி³ம் கத்வா ஸப்³பா³ பேய்யாலதந்தி உத்தானத்தா²யேவாதி.

மனோரத²பூரணியா அங்கு³த்தரனிகாய-அட்ட²கதா²ய

த³ஸகனிபாதஸ்ஸ ஸம்வண்ணனா நிட்டி²தா.