9. கோகாலிகஸுத்தவண்ணனா
89. நவமே கோகாலிகோ பி⁴க்கு² யேன ப⁴க³வா தேனுபஸங்கமீதி கோயம் கோகாலிகோ, கஸ்மா ச உபஸங்கமி? அயம் கிர கோகாலிகரட்டே² கோகாலிகனக³ரே கோகாலிகஸேட்டி²ஸ்ஸ புத்தோ பப்³ப³ஜித்வா பிதரா காரிதே விஹாரே வஸதி சூளகோகாலிகோதி நாமேன, ந பன தே³வத³த்தஸ்ஸ ஸிஸ்ஸோ. ஸோ ஹி ப்³ராஹ்மணபுத்தோ மஹாகோகாலிகோ நாம. ப⁴க³வதி பன ஸாவத்தி²யம் விஹரந்தே த்³வே அக்³க³ஸாவகா பஞ்சமத்தேஹி பி⁴க்கு²ஸதேஹி ஸத்³தி⁴ம் ஜனபத³சாரிகம் சரமானா உபகட்டா²ய வஸ்ஸூபனாயிகாய விவேகவாஸம் வஸிதுகாமா தே பி⁴க்கூ² உய்யோஜேத்வா அத்தனோ பத்தசீவரமாதா³ய தஸ்மிம் ஜனபதே³ தம் நக³ரம் பத்வா விஹாரம் அக³மிம்ஸு. தத்த² நேஸம் கோகாலிகோ வத்தம் அகாஸி. தேபி தேன ஸத்³தி⁴ம் ஸம்மோதி³த்வா, ‘‘ஆவுஸோ, மயம் இத⁴ தேமாஸம் வஸிஸ்ஸாம, மா நோ கஸ்ஸசி ஆரோசேஸீ’’தி படிஞ்ஞம் க³ஹேத்வா வஸிம்ஸு. வஸித்வா பவாரணாதி³வஸே பவாரேத்வா ‘‘க³ச்சா²ம மயம், ஆவுஸோ’’தி கோகாலிகம் ஆபுச்சி²ம்ஸு. கோகாலிகோ ‘‘அஜ்ஜ, ஆவுஸோ, ஏகதி³வஸம் வஸித்வா ஸ்வே க³மிஸ்ஸதா²’’தி வத்வா து³தியதி³வஸே நக³ரம் பவிஸித்வா மனுஸ்ஸே ஆமந்தேஸி – ‘‘ஆவுஸோ, தும்ஹே த்³வே அக்³க³ஸாவகே இத⁴ ஆக³ந்த்வா வஸமானேபி ந ஜானாத², ந தே கோசி பச்சயேனபி நிமந்தேதீ’’தி. நக³ரவாஸினோ ‘‘கஹம், ப⁴ந்தே, தே²ரா, கஸ்மா நோ நாரோசயித்தா²’’தி? கிம், ஆவுஸோ, ஆரோசிதேன, கிம் ந பஸ்ஸத² த்³வே பி⁴க்கூ² தே²ராஸனே நிஸீத³ந்தே, ஏதே அக்³க³ஸாவகாதி. தே கி²ப்பம் ஸன்னிபதித்வா ஸப்பிபா²ணிதாதீ³னி சேவ சீவரது³ஸ்ஸானி ச ஸம்ஹரிம்ஸு.
கோகாலிகோ சிந்தேஸி – ‘‘பரமப்பிச்சா² அக்³க³ஸாவகா பயுத்தவாசாய உப்பன்னலாப⁴ம் ந ஸாதி³யிஸ்ஸந்தி, அஸாதி³யந்தா ‘ஆவாஸிகஸ்ஸ தே³தா²’தி வக்க²ந்தீ’’தி தம் லாப⁴ம் கா³ஹாபேத்வா தே²ரானம் ஸந்திகம் அக³மாஸி. தே²ரா தி³ஸ்வாவ ‘‘இமே பச்சயா நேவ அம்ஹாகம், ந கோகாலிகஸ்ஸ கப்பந்தீ’’தி படிக்கி²பித்வா பக்கமிம்ஸு. கோகாலிகோ ‘‘கத²ஞ்ஹி நாம ஸயம் அக்³க³ண்ஹந்தா மய்ஹம்பி அதா³பேத்வா பக்கமிஸ்ஸந்தீ’’தி ஆகா⁴தம் உப்பாதே³ஸி. தேபி ப⁴க³வதோ ஸந்திகம் க³ந்த்வா ப⁴க³வந்தம் வந்தி³த்வா புன அத்தனோ பரிஸம் ஆதா³ய ஜனபத³சாரிகம் சரந்தா அனுபுப்³பே³ன தஸ்மிம் ரட்டே² தமேவ நக³ரம் பச்சாக³மிம்ஸு. நாக³ரா தே²ரே ஸஞ்ஜானித்வா ஸஹ பரிக்கா²ரேஹி தா³னம் ஸஜ்ஜேத்வா நக³ரமஜ்ஜே² மண்ட³பம் கத்வா தா³னம் அத³ம்ஸு, தே²ரானஞ்ச பரிக்கா²ரே உபனாமேஸும். தே²ரா பி⁴க்கு²ஸங்க⁴ஸ்ஸ நிய்யாத³யிம்ஸு. தம் தி³ஸ்வா கோகாலிகோ சிந்தேஸி – ‘‘இமே புப்³பே³ அப்பிச்சா² அஹேஸும், இதா³னி பாபிச்சா² ஜாதா, புப்³பே³பி அப்பிச்ச²ஸந்துட்ட²பவிவித்தஸதி³ஸாவ மஞ்ஞே’’தி தே²ரே உபஸங்கமித்வா, ‘‘ஆவுஸோ, தும்ஹே புப்³பே³ அப்பிச்சா² விய, இதா³னி பன பாபபி⁴க்கூ² ஜாதத்தா²’’தி வத்வா ‘‘மூலட்டா²னேயேவ நேஸம் பதிட்ட²ம் பி⁴ந்தி³ஸ்ஸாமீ’’தி தரமானரூபோ நிக்க²மித்வா யேன ப⁴க³வா தேனுபஸங்கமி. அயமேஸ கோகாலிகோ, இமினா ச காரணேன உபஸங்கமீதி வேதி³தப்³போ³.
ப⁴க³வா தம் துரிததுரிதம் ஆக³ச்ச²ந்தம் தி³ஸ்வாவ ஆவஜ்ஜேந்தோ அஞ்ஞாஸி ‘‘அயம் அக்³க³ஸாவகே அக்கோஸிதுகாமோ ஆக³தோ, ஸக்கா நு கோ² படிஸேதே⁴து’’ந்தி. ததோ ‘‘ந ஸக்கா படிஸேதே⁴தும், தே²ரேஸு அபரஜ்ஜி²த்வா ஆக³தோ, ஏகம்ஸேன பன பது³மனிரயே நிப்³ப³த்திஸ்ஸதீ’’தி தி³ஸ்வா ‘‘ஸாரிபுத்தமோக்³க³ல்லானேபி நாம க³ரஹந்தம் ஸுத்வா ந நிஸேதே⁴தீ’’தி வாத³மோசனத்த²ம் அரியூபவாத³ஸ்ஸ ச மஹாஸாவஜ்ஜபா⁴வத³ஸ்ஸனத்த²ம் மா ஹேவந்தி திக்க²த்தும் படிஸேதே⁴ஸி. தத்த² மா ஹேவந்தி மா ஏவம் அப⁴ணி. ஸத்³தா⁴யிகோதி ஸத்³தா⁴ய ஆக³மகரோ பஸாதா³வஹோ, ஸத்³தா⁴தப்³ப³வசனோ வா. பச்சயிகோதி பத்தியாயிதப்³ப³வசனோ.
பக்காமீதி கம்மானுபா⁴வேன சோதி³யமானோ பக்காமி. ஓகாஸகதஞ்ஹி கம்மம் ந ஸக்கா படிபா³ஹிதும். அசிரபக்கந்தஸ்ஸாதி பக்கந்தஸ்ஸ ஸதோ நசிரேனேவ. ஸப்³போ³ காயோ பு²டோ அஹோஸீதி கேஸக்³க³மத்தம்பி ஓகாஸம் அவஜ்ஜேத்வா ஸகலஸரீரம் அட்டீ²னி பி⁴ந்தி³த்வா உக்³க³தாஹி பீளகாஹி அஜ்ஜோ²த்த²டம் அஹோஸி. யஸ்மா பன பு³த்³தா⁴னுபா⁴வேன ததா²ரூபம் கம்மம் பு³த்³தா⁴னம் ஸம்முகீ²பா⁴வே விபாகம் தா³தும் ந ஸக்கோதி, த³ஸ்ஸனூபசாரே விஜஹிதமத்தே தே³தி, தஸ்மா தஸ்ஸ அசிரபக்கந்தஸ்ஸ பீளகா உட்ட²ஹிம்ஸு. கலாயமத்தியோதி சணகமத்தியோ. பே³லுவஸலாடுகமத்தியோதி தருணபே³லுவமத்தியோ. பபி⁴ஜ்ஜிம்ஸூதி பி⁴ஜ்ஜிம்ஸு. தாஸு பி⁴ன்னாஸு ஸகலஸரீரம் பனஸபக்கம் விய அஹோஸி. ஸோ பக்கேன க³த்தேன ஜேதவனத்³வாரகோட்ட²கே விஸகி³லிதோ மச்சோ² விய கத³லிபத்தேஸு நிபஜ்ஜி. அத² த⁴ம்மஸ்ஸவனத்த²ம் ஆக³தாக³தா மனுஸ்ஸா ‘‘தி⁴ கோகாலிக, தி⁴ கோகாலிக, அயுத்தமகாஸி, அத்தனோயேவ முக²ம் நிஸ்ஸாய அனயப்³யஸனம் பத்தோஸீ’’தி ஆஹம்ஸு. தேஸம் ஸத்³த³ம் ஸுத்வா ஆரக்க²தே³வதா தி⁴க்காரமகம்ஸு, ஆரக்க²தே³வதானம் ஆகாஸதே³வதாதி இமினா உபாயேன யாவ அகனிட்ட²ப⁴வனா ஏகதி⁴க்காரோ உத³பாதி³.
துரூதி கோகாலிகஸ்ஸ உபஜ்ஜா²யோ துருத்தே²ரோ நாம அனாகா³மிப²லம் வத்வா ப்³ரஹ்மலோகே நிப்³ப³த்தோ. ஸோ பு⁴ம்மட்ட²தே³வதா ஆதி³ம் கத்வா ‘‘அயுத்தம் கோகாலிகேன கதம் அக்³க³ஸாவகே அந்திமவத்து²னா அப்³பா⁴சிக்க²ந்தேனா’’தி பரம்பராய ப்³ரஹ்மலோகஸம்பத்தம் தம் ஸத்³த³ம் ஸுத்வா ‘‘மா மய்ஹம் பஸ்ஸந்தஸ்ஸேவ வராகோ நஸ்ஸி, ஓவதி³ஸ்ஸாமி நம் தே²ரேஸு சித்தப்பஸாத³த்தா²யா’’தி ஆக³ந்த்வா தஸ்ஸ புரதோ அட்டா²ஸி. தம் ஸந்தா⁴யேதம் வுத்தம் – ‘‘துரூ பச்சேகப்³ரஹ்மா’’தி. பேஸலாதி பியஸீலா. கோஸி த்வம், ஆவுஸோதி நிஸின்னகோவ கப³ரக்கீ²னி உம்மீலேத்வா ஏவமாஹ. பஸ்ஸ யாவஞ்ச தே இத³ம் அபரத்³த⁴தி யத்தகம் தயா அபரத்³த⁴ம், அத்தனோ நலாடே மஹாக³ண்ட³ம் அபஸ்ஸந்தோ ஸாஸபமத்தாய பீளகாய மம் சோதே³தப்³ப³ம் மஞ்ஞஸீதி ஆஹ.
அத² நம் ‘‘அதி³ட்டி²ப்பத்தோ அயம் கோகாலிகோ, கி³லிதவிஸோ விய ந கஸ்ஸசி வசனம் ந கரிஸ்ஸதீ’’தி ஞத்வா புரிஸஸ்ஸ ஹீதிஆதி³மாஹ. தத்த² குடா²ரீதி குடா²ரிஸதி³ஸா ப²ருஸவாசா. சி²ந்த³தீதி குஸலமூலஸங்கா²தே மூலேயேவ நிகந்ததி. நிந்தி³யந்தி நிந்தி³தப்³ப³ம் து³ஸ்ஸீலபுக்³க³லம். பஸம்ஸதீதி உத்தமத்தே² ஸம்பா⁴வேத்வா கீ²ணாஸவோதி வத³தி. தம் வா நிந்த³தி யோ பஸம்ஸியோதி யோ வா பஸம்ஸிதப்³போ³ கீ²ணாஸவோ, தம் அந்திமவத்து²னா சோதே³ந்தோ ‘‘து³ஸ்ஸீலோ அய’’ந்தி வத³தி. விசினாதி முகே²ன ஸோ கலிந்தி ஸோ தம் அபராத⁴ம் முகே²ன விசினாதி நாம. கலினா தேனாதி தேன அபராதே⁴ன ஸுக²ம் ந விந்த³தி. நிந்தி³யபஸம்ஸாய ஹி பஸம்ஸியனிந்தா³ய ச ஸமகோவ விபாகோ.
ஸப்³ப³ஸ்ஸாபி ஸஹாபி அத்தனாதி ஸப்³பே³ன ஸகேன த⁴னேனபி அத்தனாபி ஸத்³தி⁴ம் யோ அக்கே²ஸு த⁴னபராஜயோ நாம, அயம் அப்பமத்தகோ அபராதோ⁴. யோ ஸுக³தேஸூதி யோ பன ஸம்மக்³க³தேஸு புக்³க³லேஸு சித்தம் தூ³ஸேய்ய, அயம் சித்தபதோ³ஸோவ ததோ கலிதோ மஹந்ததரோ கலி.
இதா³னி தஸ்ஸ மஹந்ததரபா⁴வம் த³ஸ்ஸேந்தோ ஸதம் ஸஹஸ்ஸானந்திஆதி³மாஹ. தத்த² ஸதம் ஸஹஸ்ஸானந்தி நிரப்³பு³த³க³ணனாய ஸதஸஹஸ்ஸஞ்ச. ச²த்திம்ஸதீதி அபரானி ச²த்திம்ஸதி நிரப்³பு³தா³னி. பஞ்ச சாதி அப்³பு³த³க³ணனாய பஞ்ச அப்³பு³தா³னி. யமரியக³ரஹீதி யம் அரியே க³ரஹந்தோ நிரயம் உபபஜ்ஜதி, தத்த² ஏத்தகம் ஆயுப்பமாணந்தி அத்தோ².
காலமகாஸீதி உபஜ்ஜா²யே பக்கந்தே காலம் அகாஸி. பது³மனிரயந்தி பாடியேக்கோ பது³மனிரயோ நாம நத்தி², அவீசிமஹானிரயஸ்மிம்யேவ பன பது³மக³ணனாய பச்சிதப்³பே³ ஏகஸ்மிம் டா²னே நிப்³ப³த்தி.
வீஸதிகா²ரிகோதி மாக³த⁴கேன பத்தே²ன சத்தாரோ பத்தா², கோஸலரட்டே² ஏகோ பத்தோ² ஹோதி. தேன பத்தே²ன சத்தாரோ பத்தா² ஆள்ஹகம், சத்தாரி ஆள்ஹகானி தோ³ணம், சதுதோ³ணா மானிகா, சதுமானிகா கா²ரீ, தாய கா²ரியா வீஸதிகா²ரிகோ. திலவாஹோதி மாக³த⁴கானம் ஸுகு²மதிலானம் திலஸகடம். அப்³பு³தோ³ நிரயோதி அப்³பு³தோ³ நாம பாடியேக்கோ நிரயோ நத்தி², அவீசிம்ஹியேவ பன அப்³பு³த³க³ணனாய பச்சிதப்³ப³ட்டா²னஸ்ஸேதம் நாமம். நிரப்³பு³தா³தீ³ஸுபி ஏஸேவ நயோ.
வஸ்ஸக³ணனாபி பனேத்த² ஏவம் வேதி³தப்³பா³ – யதே²வ ஹி ஸதம் ஸதஸஹஸ்ஸானி கோடி ஹோதி, ஏவம் ஸதம் ஸதஸஹஸ்ஸகோடியோ பகோடி நாம ஹோதி, ஸதம் ஸதஸஹஸ்ஸபகோடியோ கோடிபகோடி நாம, ஸதம் ஸதஸஹஸ்ஸகோடிபகோடியோ நஹுதம், ஸதம் ஸதஸஹஸ்ஸனஹுதானி நின்னஹுதம், ஸதம் ஸதஸஹஸ்ஸனின்னஹுதானி ஏகம் அப்³பு³த³ம், ததோ வீஸதிகு³ணம் நிரப்³பு³த³ம், ஏஸ நயோ ஸப்³ப³த்தா²தி. த³ஸமம் ஹேட்டா² வுத்தனயேனேவ வேதி³தப்³ப³ம். ஸேஸம் ஸப்³ப³த்த² உத்தானத்த²மேவாதி.
தே²ரவக்³கோ³ சதுத்தோ².