6. ஹேதுசதுக்கம்

256. தஸ்மிம் ஸமயே அவிஜ்ஜாபச்சயா ஸங்கா²ரோ அவிஜ்ஜாஹேதுகோ, ஸங்கா²ரபச்சயா விஞ்ஞாணம் ஸங்கா²ரஹேதுகம், விஞ்ஞாணபச்சயா நாமம் விஞ்ஞாணஹேதுகம், நாமபச்சயா ச²ட்டா²யதனம் நாமஹேதுகம், ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ, ப²ஸ்ஸபச்சயா வேத³னா ப²ஸ்ஸஹேதுகா, வேத³னாபச்சயா தண்ஹா வேத³னாஹேதுகா, தண்ஹாபச்சயா உபாதா³னம் தண்ஹாஹேதுகம்; உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

257. தத்த² கதமா அவிஜ்ஜா? யம் அஞ்ஞாணம் அத³ஸ்ஸனம்…பே… அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜா’’.

தத்த² கதமோ அவிஜ்ஜாபச்சயா ஸங்கா²ரோ அவிஜ்ஜாஹேதுகோ? யா சேதனா ஸஞ்சேதனா ஸஞ்சேதயிதத்தம் – அயம் வுச்சதி ‘‘அவிஜ்ஜாபச்சயா ஸங்கா²ரோ அவிஜ்ஜாஹேதுகோ’’.

தத்த² கதமம் ஸங்கா²ரபச்சயா விஞ்ஞாணம் ஸங்கா²ரஹேதுகம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘ஸங்கா²ரபச்சயா விஞ்ஞாணம் ஸங்கா²ரஹேதுகம்’’.

தத்த² கதமம் விஞ்ஞாணபச்சயா நாமம் விஞ்ஞாணஹேதுகம்? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴ – இத³ம் வுச்சதி ‘‘விஞ்ஞாணபச்சயா நாமம் விஞ்ஞாணஹேதுகம்’’.

தத்த² கதமம் நாமபச்சயா ச²ட்டா²யதனம் நாமஹேதுகம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘நாமபச்சயா ச²ட்டா²யதனம் நாமஹேதுகம்’’.

தத்த² கதமோ ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ? யோ ப²ஸ்ஸோ பு²ஸனா ஸம்பு²ஸனா ஸம்பு²ஸிதத்தம் – அயம் வுச்சதி ‘‘ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ’’.

தத்த² கதமா ப²ஸ்ஸபச்சயா வேத³னா ப²ஸ்ஸஹேதுகா? யம் சேதஸிகம் ஸாதம் சேதஸிகம் ஸுக²ம் சேதோஸம்ப²ஸ்ஸஜம் ஸாதம் ஸுக²ம் வேத³யிதம் சேதோஸம்ப²ஸ்ஸஜா ஸாதா ஸுகா² வேத³னா – அயம் வுச்சதி ‘‘ப²ஸ்ஸபச்சயா வேத³னா ப²ஸ்ஸஹேதுகா’’.

தத்த² கதமா வேத³னாபச்சயா தண்ஹா வேத³னாஹேதுகா? யோ ராகோ³ ஸாராகோ³…பே… சித்தஸ்ஸ ஸாராகோ³ – அயம் வுச்சதி ‘‘வேத³னாபச்சயா தண்ஹா வேத³னாஹேதுகா’’.

தத்த² கதமம் தண்ஹாபச்சயா உபாதா³னம் தண்ஹாஹேதுகம்? யா தி³ட்டி² தி³ட்டி²க³தம்…பே… தித்தா²யதனம் விபரியாஸக்³கா³ஹோ – இத³ம் வுச்சதி ‘‘தண்ஹாபச்சயா உபாதா³னம் தண்ஹாஹேதுகம்’’…பே… தேன வுச்சதி ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’தி.

258. தஸ்மிம் ஸமயே அவிஜ்ஜாபச்சயா ஸங்கா²ரோ அவிஜ்ஜாஹேதுகோ, ஸங்கா²ரபச்சயா விஞ்ஞாணம் ஸங்கா²ரஹேதுகம், விஞ்ஞாணபச்சயா நாமம் விஞ்ஞாணஹேதுகம், நாமபச்சயா ப²ஸ்ஸோ நாமஹேதுகோ, ப²ஸ்ஸபச்சயா வேத³னா ப²ஸ்ஸஹேதுகா, வேத³னாபச்சயா தண்ஹா வேத³னாஹேதுகா, தண்ஹாபச்சயா உபாதா³னம் தண்ஹாஹேதுகம்; உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

259. தத்த² கதமா அவிஜ்ஜா? யம் அஞ்ஞாணம் அத³ஸ்ஸனம்…பே… அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜா’’.

தத்த² கதமம் ஸங்கா²ரபச்சயா விஞ்ஞாணம் ஸங்கா²ரஹேதுகம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ஸங்கா²ரபச்சயா விஞ்ஞாணம் ஸங்கா²ரஹேதுகம்.

நாமபச்சயா ப²ஸ்ஸோ நாமஹேதுகோதி. தத்த² கதமம் நாமம்? ட²பேத்வா ப²ஸ்ஸம், வேத³னாக்க²ந்தோ⁴ ஸஞ்ஞாக்க²ந்தோ⁴ ஸங்கா²ரக்க²ந்தோ⁴ விஞ்ஞாணக்க²ந்தோ⁴ – இத³ம் வுச்சதி ‘‘நாமம்’’.

தத்த² கதமோ நாமபச்சயா ப²ஸ்ஸோ நாமஹேதுகோ? யோ ப²ஸ்ஸோ பு²ஸனா ஸம்பு²ஸனா ஸம்பு²ஸிதத்தம் – அயம் வுச்சதி ‘‘நாமபச்சயா ப²ஸ்ஸோ நாமஹேதுகோ’’…பே… தேன வுச்சதி ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி.

260. தஸ்மிம் ஸமயே அவிஜ்ஜாபச்சயா ஸங்கா²ரோ அவிஜ்ஜாஹேதுகோ, ஸங்கா²ரபச்சயா விஞ்ஞாணம் ஸங்கா²ரஹேதுகம், விஞ்ஞாணபச்சயா நாமரூபம் விஞ்ஞாணஹேதுகம், நாமரூபபச்சயா ச²ட்டா²யதனம் நாமரூபஹேதுகம், ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ, ப²ஸ்ஸபச்சயா வேத³னா ப²ஸ்ஸஹேதுகா, வேத³னாபச்சயா தண்ஹா வேத³னாஹேதுகா, தண்ஹாபச்சயா உபாதா³னம் தண்ஹாஹேதுகம்; உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

261. தத்த² கதமா அவிஜ்ஜா? யம் அஞ்ஞாணம் அத³ஸ்ஸனம்…பே… அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜா’’.

தத்த² கதமம் விஞ்ஞாணபச்சயா நாமரூபம் விஞ்ஞாணஹேதுகம்? அத்தி² நாமம், அத்தி² ரூபம். தத்த² கதமம் நாமம்? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴ – இத³ம் வுச்சதி ‘‘நாமம்’’. தத்த² கதமம் ரூபம்? சக்கா²யதனஸ்ஸ உபசயோ, ஸோதாயதனஸ்ஸ உபசயோ, கா⁴னாயதனஸ்ஸ உபசயோ, ஜிவ்ஹாயதனஸ்ஸ உபசயோ, காயாயதனஸ்ஸ உபசயோ, யம் வா பனஞ்ஞம்பி அத்தி² ரூபம் சித்தஜம் சித்தஹேதுகம் சித்தஸமுட்டா²னம் – இத³ம் வுச்சதி ‘‘ரூபம்’’. இதி இத³ஞ்ச நாமம், இத³ஞ்ச ரூபம். இத³ம் வுச்சதி ‘‘விஞ்ஞாணபச்சயா நாமரூபம் விஞ்ஞாணஹேதுகம்’’.

நாமரூபபச்சயா ச²ட்டா²யதனம் நாமரூபஹேதுகந்தி. அத்தி² நாமம், அத்தி² ரூபம். தத்த² கதமம் நாமம்? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴ – இத³ம் வுச்சதி ‘‘நாமம்’’. தத்த² கதமம் ரூபம்? யம் ரூபம் நிஸ்ஸாய மனோவிஞ்ஞாணதா⁴து வத்ததி – இத³ம் வுச்சதி ‘‘ரூபம்’’. இதி இத³ஞ்ச நாமம், இத³ஞ்ச ரூபம். இத³ம் வுச்சதி ‘‘நாமரூபம்’’.

தத்த² கதமம் நாமரூபபச்சயா ச²ட்டா²யதனம் நாமரூபஹேதுகம்? யம் சித்தம் மனோ மானஸம்…பே… தஜ்ஜாமனோவிஞ்ஞாணதா⁴து – இத³ம் வுச்சதி ‘‘நாமரூபபச்சயா ச²ட்டா²யதனம் நாமரூபஹேதுகம்’’.

தத்த² கதமோ ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ? யோ ப²ஸ்ஸோ பு²ஸனா ஸம்பு²ஸனா ஸம்பு²ஸிதத்தம் – அயம் வுச்சதி ‘‘ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ’’…பே… தேன வுச்சதி ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி.

262. தஸ்மிம் ஸமயே அவிஜ்ஜாபச்சயா ஸங்கா²ரோ அவிஜ்ஜாஹேதுகோ, ஸங்கா²ரபச்சயா விஞ்ஞாணம் ஸங்கா²ரஹேதுகம் விஞ்ஞாணபச்சயா நாமரூபம் விஞ்ஞாணஹேதுகம், நாமரூபபச்சயா ஸளாயதனம் நாமரூபஹேதுகம், ச²ட்டா²யதனபச்சயா ப²ஸ்ஸோ ச²ட்டா²யதனஹேதுகோ, ப²ஸ்ஸபச்சயா வேத³னா ப²ஸ்ஸஹேதுகா, வேத³னாபச்சயா தண்ஹா வேத³னாஹேதுகா, தண்ஹாபச்சயா உபாதா³னம் தண்ஹாஹேதுகம்; உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம். ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.

263. தத்த² கதமா அவிஜ்ஜா? யம் அஞ்ஞாணம் அத³ஸ்ஸனம்…பே… அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜா’’.

நாமரூபபச்சயா ஸளாயதனம் நாமரூபஹேதுகந்தி. அத்தி² நாமம், அத்தி² ரூபம். தத்த² கதமம் நாமம்? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴ – இத³ம் வுச்சதி ‘‘நாமம்’’. தத்த² கதமம் ரூபம்? சத்தாரோ ச மஹாபூ⁴தா, யஞ்ச ரூபம் நிஸ்ஸாய மனோவிஞ்ஞாணதா⁴து வத்ததி – இத³ம் வுச்சதி ‘‘ரூபம்’’. இதி இத³ஞ்ச நாமம், இத³ஞ்ச ரூபம். இத³ம் வுச்சதி ‘‘நாமரூபம்’’.

தத்த² கதமம் நாமரூபபச்சயா ஸளாயதனம் நாமரூபஹேதுகம்? சக்கா²யதனம், ஸோதாயதனம், கா⁴னாயதனம், ஜிவ்ஹாயதனம், காயாயதனம், மனாயதனம் – இத³ம் வுச்சதி ‘‘நாமரூபபச்சயா ஸளாயதனம் நாமரூபஹேதுகம்’’.

ஹேதுசதுக்கம்.