4. மக்³க³ஸச்சம்

205. தத்த² கதமம் து³க்க²னிரோத⁴கா³மினீ படிபதா³ அரியஸச்சம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

தத்த² கதமா ஸம்மாதி³ட்டி²? து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோத⁴கா³மினியா படிபதா³ய ஞாணம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? நேக்க²ம்மஸங்கப்போ, அப்³யாபாத³ஸங்கப்போ, அவிஹிம்ஸாஸங்கப்போ – அயம் வுச்சதி ‘‘ஸம்மாஸங்கப்போ’’.

தத்த² கதமா ஸம்மாவாசா? முஸாவாதா³ வேரமணீ, பிஸுணாய வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ – அயம் வுச்சதி ‘‘ஸம்மாவாசா’’.

தத்த² கதமோ ஸம்மாகம்மந்தோ? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ – அயம் வுச்சதி ‘‘ஸம்மாகம்மந்தோ’’.

தத்த² கதமோ ஸம்மாஆஜீவோ? இத⁴ அரியஸாவகோ மிச்சா²ஆஜீவம் பஹாய ஸம்மாஆஜீவேன ஜீவிகம் கப்பேதி – அயம் வுச்சதி ‘‘ஸம்மாஆஜீவோ’’.

தத்த² கதமோ ஸம்மாவாயாமோ? இத⁴ பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? இத⁴ பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? இத⁴ பி⁴க்கு² விவிச்சேவ காமேஹி, விவிச்ச அகுஸலேஹி த⁴ம்மேஹி, ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. விதக்கவிசாரானம் வூபஸமா, அஜ்ஜ²த்தம் ஸம்பஸாத³னம், சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. பீதியா ச விராகா³, உபேக்க²கோ ச விஹரதி, ஸதோ ச ஸம்பஜானோ, ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘‘உபேக்க²கோ ஸதிமா ஸுக²விஹாரீ’’தி, ததியம் ஜா²னம் உபஸம்பஜ்ஜ விஹரதி. ஸுக²ஸ்ஸ ச பஹானா, து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா, அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி ‘‘ஸம்மாஸமாதி⁴’’.

இத³ம் வுச்சதி ‘‘து³க்க²னிரோத⁴கா³மினீ படிபதா³ அரியஸச்சம்’’.

ஸுத்தந்தபா⁴ஜனீயம்.