4. ஸச்சவிப⁴ங்கோ³

1. ஸுத்தந்தபா⁴ஜனீயம்

189. சத்தாரி அரியஸச்சானி – து³க்க²ம் அரியஸச்சம், து³க்க²ஸமுத³யம் [து³க்க²ஸமுத³யோ (ஸ்யா.)] அரியஸச்சம், து³க்க²னிரோத⁴ம் [து³க்க²னிரோதோ⁴ (ஸ்யா.)] அரியஸச்சம், து³க்க²னிரோத⁴கா³மினீ படிபதா³ அரியஸச்சம்.

1. து³க்க²ஸச்சம்

190. தத்த² கதமம் து³க்க²ம் அரியஸச்சம்? ஜாதிபி து³க்கா², ஜராபி து³க்கா², மரணம்பி து³க்க²ம், ஸோகபரிதே³வது³க்க²தோ³மனஸ்ஸுபாயாஸாபி து³க்கா², அப்பியேஹி ஸம்பயோகோ³ து³க்கோ², பியேஹி விப்பயோகோ³ து³க்கோ², யம் பிச்ச²ம் ந லப⁴தி தம்பி து³க்க²ம், ஸம்கி²த்தேன பஞ்சுபாதா³னக்க²ந்தா⁴ து³க்கா².

191. தத்த² கதமா ஜாதி? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜாதி ஸஞ்ஜாதி ஓக்கந்தி அபி⁴னிப்³ப³த்தி க²ந்தா⁴னம் பாதுபா⁴வோ ஆயதனானம் படிலாபோ⁴ – அயம் வுச்சதி ‘‘ஜாதி’’.

192. தத்த² கதமா ஜரா? யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜரா ஜீரணதா க²ண்டி³ச்சம் பாலிச்சம் வலித்தசதா ஆயுனோ ஸம்ஹானி இந்த்³ரியானம் பரிபாகோ – அயம் வுச்சதி ‘‘ஜரா’’.

193. தத்த² கதமம் மரணம்? யா தேஸம் தேஸம் ஸத்தானம் தம்ஹா தம்ஹா ஸத்தனிகாயா சுதி சவனதா பே⁴தோ³ அந்தரதா⁴னம் மச்சு மரணம் காலகிரியா க²ந்தா⁴னம் பே⁴தோ³ களேவரஸ்ஸ நிக்கே²போ ஜீவிதிந்த்³ரியஸ்ஸுபச்சே²தோ³ – இத³ம் வுச்சதி ‘‘மரணம்’’.

194. தத்த² கதமோ ஸோகோ? ஞாதிப்³யஸனேன வா பு²ட்ட²ஸ்ஸ போ⁴க³ப்³யஸனேன வா பு²ட்ட²ஸ்ஸ ரோக³ப்³யஸனேன வா பு²ட்ட²ஸ்ஸ ஸீலப்³யஸனேன வா பு²ட்ட²ஸ்ஸ தி³ட்டி²ப்³யஸனேன வா பு²ட்ட²ஸ்ஸ அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஸோகோ ஸோசனா ஸோசிதத்தம் அந்தோஸோகோ அந்தோபரிஸோகோ சேதஸோ பரிஜ்ஜா²யனா தோ³மனஸ்ஸம் ஸோகஸல்லம் – அயம் வுச்சதி ‘‘ஸோகோ’’.

195. தத்த² கதமோ பரிதே³வோ? ஞாதிப்³யஸனேன வா பு²ட்ட²ஸ்ஸ போ⁴க³ப்³யஸனேன வா பு²ட்ட²ஸ்ஸ ரோக³ப்³யஸனேன வா பு²ட்ட²ஸ்ஸ ஸீலப்³யஸனேன வா பு²ட்ட²ஸ்ஸ தி³ட்டி²ப்³யஸனேன வா பு²ட்ட²ஸ்ஸ அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆதே³வோ பரிதே³வோ ஆதே³வனா பரிதே³வனா ஆதே³விதத்தம் பரிதே³விதத்தம் வாசா பலாபோ விப்பலாபோ லாலப்போ லாலப்பனா லாலப்பிதத்தம் [லாலபோ லாலபனா லாலபிதத்தம் (ஸ்யா.)] – அயம் வுச்சதி ‘‘பரிதே³வோ’’.

196. தத்த² கதமம் து³க்க²ம்? யம் காயிகம் அஸாதம் காயிகம் து³க்க²ம் காயஸம்ப²ஸ்ஸஜம் அஸாதம் து³க்க²ம் வேத³யிதம் காயஸம்ப²ஸ்ஸஜா அஸாதா து³க்கா² வேத³னா – இத³ம் வுச்சதி ‘‘து³க்க²ம்’’.

197. தத்த² கதமம் தோ³மனஸ்ஸம்? யம் சேதஸிகம் அஸாதம் சேதஸிகம் து³க்க²ம் சேதோஸம்ப²ஸ்ஸஜம் அஸாதம் து³க்க²ம் வேத³யிதம் சேதோஸம்ப²ஸ்ஸஜா அஸாதா து³க்கா² வேத³னா – இத³ம் வுச்சதி ‘‘தோ³மனஸ்ஸம்’’.

198. தத்த² கதமோ உபாயாஸோ? ஞாதிப்³யஸனேன வா பு²ட்ட²ஸ்ஸ போ⁴க³ப்³யஸனேன வா பு²ட்ட²ஸ்ஸ ரோக³ப்³யஸனேன வா பு²ட்ட²ஸ்ஸ ஸீலப்³யஸனேன வா பு²ட்ட²ஸ்ஸ தி³ட்டி²ப்³யஸனேன வா பு²ட்ட²ஸ்ஸ அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆயாஸோ உபாயாஸோ ஆயாஸிதத்தம் உபாயாஸிதத்தம் – அயம் வுச்சதி ‘‘உபாயாஸோ’’.

199. தத்த² கதமோ அப்பியேஹி ஸம்பயோகோ³ து³க்கோ²? இத⁴ யஸ்ஸ தே ஹோந்தி அனிட்டா² அகந்தா அமனாபா ரூபா ஸத்³தா³ க³ந்தா⁴ ரஸா போ²ட்ட²ப்³பா³, யே வா பனஸ்ஸ தே ஹோந்தி அனத்த²காமா அஹிதகாமா அபா²ஸுககாமா அயோக³க்கே²மகாமா; யா தேஹி ஸங்க³தி ஸமாக³மோ ஸமோதா⁴னம் மிஸ்ஸீபா⁴வோ – அயம் வுச்சதி ‘‘அப்பியேஹி ஸம்பயோகோ³ து³க்கோ²’’.

200. தத்த² கதமோ பியேஹி விப்பயோகோ³ து³க்கோ²? இத⁴ யஸ்ஸ தே ஹோந்தி இட்டா² கந்தா மனாபா ரூபா ஸத்³தா³ க³ந்தா⁴ ரஸா போ²ட்ட²ப்³பா³, யே வா பனஸ்ஸ தே ஹோந்தி அத்த²காமா ஹிதகாமா பா²ஸுககாமா யோக³க்கே²மகாமா மாதா வா பிதா வா பா⁴தா வா ப⁴கி³னீ வா மித்தா வா அமச்சா வா ஞாதீ வா ஸாலோஹிதா வா; யா தேஹி அஸங்க³தி அஸமாக³மோ அஸமோதா⁴னம் அமிஸ்ஸீபா⁴வோ – அயம் வுச்சதி ‘‘பியேஹி விப்பயோகோ³ து³க்கோ²’’.

201. தத்த² கதமம் யம்பிச்ச²ம் ந லப⁴தி தம்பி து³க்க²ம்? ஜாதித⁴ம்மானம் ஸத்தானம் ஏவம் இச்சா² உப்பஜ்ஜதி – ‘‘அஹோ வத, மயம் ந ஜாதித⁴ம்மா அஸ்ஸாம; ந ச, வத, நோ ஜாதி ஆக³ச்சே²ய்யா’’தி! ந கோ² பனேதம் இச்சா²ய பத்தப்³ப³ம். இத³ம்பி ‘‘யம்பிச்ச²ம் ந லப⁴தி தம்பி து³க்க²ம்’’.

ஜராத⁴ம்மானம் ஸத்தானம்…பே… ப்³யாதி⁴த⁴ம்மானம் ஸத்தானம்…பே… மரணத⁴ம்மானம் ஸத்தானம்…பே… ஸோகபரிதே³வது³க்க²தோ³மனஸ்ஸுபாயாஸத⁴ம்மானம் ஸத்தானம் ஏவம் இச்சா² உப்பஜ்ஜதி – ‘‘அஹோ வத, மயம் ந ஸோகபரிதே³வது³க்க²தோ³மனஸ்ஸுபாயாஸத⁴ம்மா அஸ்ஸாம; ந ச, வத, நோ ஸோகபரிதே³வது³க்க²தோ³மனஸ்ஸுபாயாஸா ஆக³ச்சே²ய்யு’’ந்தி! ந கோ² பனேதம் இச்சா²ய பத்தப்³ப³ம். இத³ம்பி ‘‘யம்பிச்ச²ம் ந லப⁴தி தம்பி து³க்க²ம்’’.

202. தத்த² கதமே ஸம்கி²த்தேன பஞ்சுபாதா³னக்க²ந்தா⁴ து³க்கா²? ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே வுச்சந்தி ‘‘ஸம்கி²த்தேன பஞ்சுபாதா³னக்க²ந்தா⁴ து³க்கா²’’.

இத³ம் வுச்சதி ‘‘து³க்க²ம் அரியஸச்சம்’’.

2. ஸமுத³யஸச்சம்

203. தத்த² கதமம் து³க்க²ஸமுத³யம் அரியஸச்சம்? யாயம் தண்ஹா போனோப⁴விகா [போனோப்³ப⁴விகா (ஸ்யா. க.)] நந்தி³ராக³ஸஹக³தா தத்ரதத்ராபி⁴னந்தி³னீ, ஸேய்யதி²த³ம் – காமதண்ஹா, ப⁴வதண்ஹா, விப⁴வதண்ஹா.

ஸா கோ² பனேஸா தண்ஹா கத்த² உப்பஜ்ஜமானா உப்பஜ்ஜதி, கத்த² நிவிஸமானா நிவிஸதி? யம் லோகே பியரூபம் ஸாதரூபம், ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

கிஞ்ச லோகே பியரூபம் ஸாதரூபம்? சக்கு²ம் லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸோதம் லோகே…பே… கா⁴னம் லோகே… ஜிவ்ஹா லோகே… காயோ லோகே… மனோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

ரூபா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸத்³தா³ லோகே…பே… க³ந்தா⁴ லோகே… ரஸா லோகே… போ²ட்ட²ப்³பா³ லோகே… த⁴ம்மா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

சக்கு²விஞ்ஞாணம் லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸோதவிஞ்ஞாணம் லோகே…பே… கா⁴னவிஞ்ஞாணம் லோகே… ஜிவ்ஹாவிஞ்ஞாணம் லோகே… காயவிஞ்ஞாணம் லோகே… மனோவிஞ்ஞாணம் லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

சக்கு²ஸம்ப²ஸ்ஸோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸோதஸம்ப²ஸ்ஸோ லோகே…பே… கா⁴னஸம்ப²ஸ்ஸோ லோகே… ஜிவ்ஹாஸம்ப²ஸ்ஸோ லோகே… காயஸம்ப²ஸ்ஸோ லோகே… மனோஸம்ப²ஸ்ஸோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

சக்கு²ஸம்ப²ஸ்ஸஜா வேத³னா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸோதஸம்ப²ஸ்ஸஜா வேத³னா லோகே…பே… கா⁴னஸம்ப²ஸ்ஸஜா வேத³னா லோகே… ஜிவ்ஹாஸம்ப²ஸ்ஸஜா வேத³னா லோகே… காயஸம்ப²ஸ்ஸஜா வேத³னா லோகே… மனோஸம்ப²ஸ்ஸஜா வேத³னா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

ரூபஸஞ்ஞா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸத்³த³ஸஞ்ஞா லோகே…பே… க³ந்த⁴ஸஞ்ஞா லோகே… ரஸஸஞ்ஞா லோகே… போ²ட்ட²ப்³ப³ஸஞ்ஞா லோகே… த⁴ம்மஸஞ்ஞா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

ரூபஸஞ்சேதனா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸத்³த³ஸஞ்சேதனா லோகே…பே… க³ந்த⁴ஸஞ்சேதனா லோகே… ரஸஸஞ்சேதனா லோகே… போ²ட்ட²ப்³ப³ஸஞ்சேதனா லோகே… த⁴ம்மஸஞ்சேதனா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

ரூபதண்ஹா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸத்³த³தண்ஹா லோகே…பே… க³ந்த⁴தண்ஹா லோகே… ரஸதண்ஹா லோகே… போ²ட்ட²ப்³ப³தண்ஹா லோகே… த⁴ம்மதண்ஹா லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

ரூபவிதக்கோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸத்³த³விதக்கோ லோகே…பே… க³ந்த⁴விதக்கோ லோகே… ரஸவிதக்கோ லோகே… போ²ட்ட²ப்³ப³விதக்கோ லோகே… த⁴ம்மவிதக்கோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

ரூபவிசாரோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ஸத்³த³விசாரோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. க³ந்த⁴விசாரோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. ரஸவிசாரோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. போ²ட்ட²ப்³ப³விசாரோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி. த⁴ம்மவிசாரோ லோகே பியரூபம் ஸாதரூபம். ஏத்தே²ஸா தண்ஹா உப்பஜ்ஜமானா உப்பஜ்ஜதி, ஏத்த² நிவிஸமானா நிவிஸதி.

இத³ம் வுச்சதி ‘‘து³க்க²ஸமுத³யம் அரியஸச்சம்’’.

3. நிரோத⁴ஸச்சம்

204. தத்த² கதமம் து³க்க²னிரோத⁴ம் அரியஸச்சம்? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ.

ஸா கோ² பனேஸா தண்ஹா கத்த² பஹீயமானா பஹீயதி, கத்த² நிருஜ்ஜ²மானா நிருஜ்ஜ²தி? யம் லோகே பியரூபம் ஸாதரூபம், ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

கிஞ்ச லோகே பியரூபம் ஸாதரூபம்? சக்கு²ம் லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி. ஸோதம் லோகே…பே… கா⁴னம் லோகே… ஜிவ்ஹா லோகே… காயோ லோகே… மனோ லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

ரூபா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி. ஸத்³தா³ லோகே…பே… க³ந்தா⁴ லோகே… ரஸா லோகே… போ²ட்ட²ப்³பா³ லோகே… த⁴ம்மா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

சக்கு²விஞ்ஞாணம் லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி. ஸோதவிஞ்ஞாணம் லோகே…பே… கா⁴னவிஞ்ஞாணம் லோகே… ஜிவ்ஹாவிஞ்ஞாணம் லோகே… காயவிஞ்ஞாணம் லோகே… மனோவிஞ்ஞாணம் லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

சக்கு²ஸம்ப²ஸ்ஸோ லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி. ஸோதஸம்ப²ஸ்ஸோ லோகே…பே… கா⁴னஸம்ப²ஸ்ஸோ லோகே… ஜிவ்ஹாஸம்ப²ஸ்ஸோ லோகே… காயஸம்ப²ஸ்ஸோ லோகே… மனோஸம்ப²ஸ்ஸோ லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

சக்கு²ஸம்ப²ஸ்ஸஜா வேத³னா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி. ஸோதஸம்ப²ஸ்ஸஜா வேத³னா லோகே…பே… கா⁴னஸம்ப²ஸ்ஸஜா வேத³னா லோகே… ஜிவ்ஹாஸம்ப²ஸ்ஸஜா வேத³னா லோகே… காயஸம்ப²ஸ்ஸஜா வேத³னா லோகே… மனோஸம்ப²ஸ்ஸஜா வேத³னா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

ரூபஸஞ்ஞா லோகே… ஸத்³த³ஸஞ்ஞா லோகே… க³ந்த⁴ஸஞ்ஞா லோகே… ரஸஸஞ்ஞா லோகே… போ²ட்ட²ப்³ப³ஸஞ்ஞா லோகே… த⁴ம்மஸஞ்ஞா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

ரூபஸஞ்சேதனா லோகே… ஸத்³த³ஸஞ்சேதனா லோகே… க³ந்த⁴ஸஞ்சேதனா லோகே… ரஸஸஞ்சேதனா லோகே… போ²ட்ட²ப்³ப³ஸஞ்சேதனா லோகே… த⁴ம்மஸஞ்சேதனா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

ரூபதண்ஹா லோகே… ஸத்³த³தண்ஹா லோகே… க³ந்த⁴தண்ஹா லோகே… ரஸதண்ஹா லோகே… போ²ட்ட²ப்³ப³தண்ஹா லோகே… த⁴ம்மதண்ஹா லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

ரூபவிதக்கோ லோகே… ஸத்³த³விதக்கோ லோகே… க³ந்த⁴விதக்கோ லோகே… ரஸவிதக்கோ லோகே… போ²ட்ட²ப்³ப³விதக்கோ லோகே… த⁴ம்மவிதக்கோ லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

ரூபவிசாரோ லோகே… ஸத்³த³விசாரோ லோகே… க³ந்த⁴விசாரோ லோகே… ரஸவிசாரோ லோகே… போ²ட்ட²ப்³ப³விசாரோ லோகே… த⁴ம்மவிசாரோ லோகே பியரூபம் ஸாதரூபம். ஏத்தே²ஸா தண்ஹா பஹீயமானா பஹீயதி, ஏத்த² நிருஜ்ஜ²மானா நிருஜ்ஜ²தி.

இத³ம் வுச்சதி ‘‘து³க்க²னிரோத⁴ம் அரியஸச்சம்’’.

4. மக்³க³ஸச்சம்

205. தத்த² கதமம் து³க்க²னிரோத⁴கா³மினீ படிபதா³ அரியஸச்சம்? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴.

தத்த² கதமா ஸம்மாதி³ட்டி²? து³க்கே² ஞாணம், து³க்க²ஸமுத³யே ஞாணம், து³க்க²னிரோதே⁴ ஞாணம், து³க்க²னிரோத⁴கா³மினியா படிபதா³ய ஞாணம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? நேக்க²ம்மஸங்கப்போ, அப்³யாபாத³ஸங்கப்போ, அவிஹிம்ஸாஸங்கப்போ – அயம் வுச்சதி ‘‘ஸம்மாஸங்கப்போ’’.

தத்த² கதமா ஸம்மாவாசா? முஸாவாதா³ வேரமணீ, பிஸுணாய வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ – அயம் வுச்சதி ‘‘ஸம்மாவாசா’’.

தத்த² கதமோ ஸம்மாகம்மந்தோ? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ – அயம் வுச்சதி ‘‘ஸம்மாகம்மந்தோ’’.

தத்த² கதமோ ஸம்மாஆஜீவோ? இத⁴ அரியஸாவகோ மிச்சா²ஆஜீவம் பஹாய ஸம்மாஆஜீவேன ஜீவிகம் கப்பேதி – அயம் வுச்சதி ‘‘ஸம்மாஆஜீவோ’’.

தத்த² கதமோ ஸம்மாவாயாமோ? இத⁴ பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி, வாயமதி, வீரியம் ஆரப⁴தி, சித்தம் பக்³க³ண்ஹாதி, பத³ஹதி. அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? இத⁴ பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? இத⁴ பி⁴க்கு² விவிச்சேவ காமேஹி, விவிச்ச அகுஸலேஹி த⁴ம்மேஹி, ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. விதக்கவிசாரானம் வூபஸமா, அஜ்ஜ²த்தம் ஸம்பஸாத³னம், சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. பீதியா ச விராகா³, உபேக்க²கோ ச விஹரதி, ஸதோ ச ஸம்பஜானோ, ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘‘உபேக்க²கோ ஸதிமா ஸுக²விஹாரீ’’தி, ததியம் ஜா²னம் உபஸம்பஜ்ஜ விஹரதி. ஸுக²ஸ்ஸ ச பஹானா, து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா, அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி ‘‘ஸம்மாஸமாதி⁴’’.

இத³ம் வுச்சதி ‘‘து³க்க²னிரோத⁴கா³மினீ படிபதா³ அரியஸச்சம்’’.

ஸுத்தந்தபா⁴ஜனீயம்.

2. அபி⁴த⁴ம்மபா⁴ஜனீயம்

206. சத்தாரி ஸச்சானி – து³க்க²ம், து³க்க²ஸமுத³யோ, து³க்க²னிரோதோ⁴, து³க்க²னிரோத⁴கா³மினீ படிபதா³.

தத்த² கதமோ து³க்க²ஸமுத³யோ? தண்ஹா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா, ஸாஸவா ச குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா, விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே அட்ட²ங்கி³கோ மக்³கோ³ ஹோதி ஸம்மாதி³ட்டி²…பே… ஸம்மாஸமாதி⁴.

தத்த² கதமா ஸம்மாதி³ட்டி²? யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? யோ தக்கோ விதக்கோ…பே… ஸம்மாஸங்கப்போ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸங்கப்போ’’.

தத்த² கதமா ஸம்மாவாசா? யா சதூஹி வசீது³ச்சரிதேஹி ஆரதி விரதி படிவிரதி வேரமணீ [வேரமணி (க.) ஏவமுபரிபி] அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ ஸம்மாவாசா மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாவாசா’’.

தத்த² கதமோ ஸம்மாகம்மந்தோ? யா தீஹி காயது³ச்சரிதேஹி ஆரதி விரதி படிவிரதி வேரமணீ அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ ஸம்மாகம்மந்தோ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாகம்மந்தோ’’.

தத்த² கதமோ ஸம்மாஆஜீவோ? யா மிச்சா² ஆஜீவா ஆரதி விரதி படிவிரதி வேரமணீ அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ ஸம்மாஆஜீவோ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஆஜீவோ’’.

தத்த² கதமோ ஸம்மாவாயாமோ? யோ சேதஸிகோ வீரியாரம்போ⁴ [விரியாரம்போ⁴ (ஸீ. ஸ்யா.)] …பே… ஸம்மாவாயாமோ வீரியஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? யா ஸதி அனுஸ்ஸதி…பே… ஸம்மாஸதி ஸதிஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? யா சித்தஸ்ஸ டி²தி ஸண்டி²தி…பே… ஸம்மாஸமாதி⁴ ஸமாதி⁴ஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸமாதி⁴’’. அயம் வுச்சதி ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

207. தத்த² கதமோ து³க்க²ஸமுத³யோ? தண்ஹா ச அவஸேஸா ச கிலேஸா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா, ஸாஸவா ச குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய ச, அவஸேஸானஞ்ச கிலேஸானம் பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா, விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே அட்ட²ங்கி³கோ மக்³கோ³ ஹோதி – ஸம்மாதி³ட்டி²…பே… ஸம்மாஸமாதி⁴. அயம் வுச்சதி – ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

208. தத்த² கதமோ து³க்க²ஸமுத³யோ? தண்ஹா ச அவஸேஸா ச கிலேஸா, அவஸேஸா ச அகுஸலா த⁴ம்மா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா, ஸாஸவா ச குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய ச, அவஸேஸானஞ்ச கிலேஸானம், அவஸேஸானஞ்ச அகுஸலானம் த⁴ம்மானம் பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே அட்ட²ங்கி³கோ மக்³கோ³ ஹோதி – ஸம்மாதி³ட்டி²…பே… ஸம்மாஸமாதி⁴. அயம் வுச்சதி ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

209. தத்த² கதமோ து³க்க²ஸமுத³யோ? தண்ஹா ச அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? அவஸேஸா ச ஸாஸவா குஸலா த⁴ம்மா, ஸாஸவா ச குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய ச, அவஸேஸானஞ்ச கிலேஸானம், அவஸேஸானஞ்ச அகுஸலானம் த⁴ம்மானம், திண்ணஞ்ச குஸலமூலானம் ஸாஸவானம் பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே அட்ட²ங்கி³கோ மக்³கோ³ ஹோதி – ஸம்மாதி³ட்டி²…பே… ஸம்மாஸமாதி⁴. அயம் வுச்சதி ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

210. தத்த² கதமோ து³க்க²ஸமுத³யோ? தண்ஹா ச, அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? ஸாஸவா குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய ச, அவஸேஸானஞ்ச கிலேஸானம், அவஸேஸானஞ்ச அகுஸலானம் த⁴ம்மானம், திண்ணஞ்ச குஸலமூலானம் ஸாஸவானம், அவஸேஸானஞ்ச ஸாஸவானம் குஸலானம் த⁴ம்மானம் பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா, விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே அட்ட²ங்கி³கோ மக்³கோ³ ஹோதி – ஸம்மாதி³ட்டி²…பே… ஸம்மாஸமாதி⁴. அயம் வுச்சதி ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

211. சத்தாரி ஸச்சானி – து³க்க²ம், து³க்க²ஸமுத³யோ, து³க்க²னிரோதோ⁴, து³க்க²னிரோத⁴கா³மினீ படிபதா³.

தத்த² கதமோ து³க்க²ஸமுத³யோ? தண்ஹா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா, ஸாஸவா ச குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா, விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே பஞ்சங்கி³கோ மக்³கோ³ ஹோதி – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴.

தத்த² கதமா ஸம்மாதி³ட்டி²? யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி² த⁴ம்மவிசயஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாதி³ட்டி²’’.

தத்த² கதமோ ஸம்மாஸங்கப்போ? யோ தக்கோ விதக்கோ…பே… ஸம்மாஸங்கப்போ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸங்கப்போ’’.

தத்த² கதமோ ஸம்மாவாயாமோ? யோ சேதஸிகோ வீரியாரம்போ⁴…பே… ஸம்மாவாயாமோ வீரியஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாவாயாமோ’’.

தத்த² கதமா ஸம்மாஸதி? யா ஸதி அனுஸ்ஸதி…பே… ஸம்மாஸதி ஸதிஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸதி’’.

தத்த² கதமோ ஸம்மாஸமாதி⁴? யா சித்தஸ்ஸ டி²தி…பே… ஸம்மாஸமாதி⁴ ஸமாதி⁴ஸம்போ³ஜ்ஜ²ங்கோ³ மக்³க³ங்க³ம் மக்³க³பரியாபன்னம் – அயம் வுச்சதி ‘‘ஸம்மாஸமாதி⁴’’. அயம் வுச்சதி ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

212. தத்த² கதமோ து³க்க²ஸமுத³யோ? தண்ஹா ச, அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? ஸாஸவா குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய ச, அவஸேஸானஞ்ச கிலேஸானம், அவஸேஸானஞ்ச அகுஸலானம் த⁴ம்மானம், திண்ணஞ்ச குஸலமூலானம் ஸாஸவானம், அவஸேஸானஞ்ச ஸாஸவானம் குஸலானம் த⁴ம்மானம் பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா, விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே பஞ்சங்கி³கோ மக்³கோ³ ஹோதி – ஸம்மாதி³ட்டி², ஸம்மாஸங்கப்போ, ஸம்மாவாயாமோ, ஸம்மாஸதி, ஸம்மாஸமாதி⁴. அயம் வுச்சதி ‘‘து³க்க²னிரோத⁴கா³மினீ படிபதா³’’. அவஸேஸா த⁴ம்மா து³க்க²னிரோத⁴கா³மினியா படிபதா³ய ஸம்பயுத்தா.

213. சத்தாரி ஸச்சானி – து³க்க²ம், து³க்க²ஸமுத³யோ, து³க்க²னிரோதோ⁴, து³க்க²னிரோத⁴கா³மினீ படிபதா³.

தத்த² கதமோ து³க்க²ஸமுத³யோ? தண்ஹா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா, ஸாஸவா ச குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. அயம் வுச்சதி ‘‘து³க்க²னிரோத⁴கா³மினீ படிபதா³’’.

214. தத்த² கதமோ து³க்க²ஸமுத³யோ? தண்ஹா ச, அவஸேஸா ச கிலேஸா, அவஸேஸா ச அகுஸலா த⁴ம்மா, தீணி ச குஸலமூலானி ஸாஸவானி, அவஸேஸா ச ஸாஸவா குஸலா த⁴ம்மா – அயம் வுச்சதி ‘‘து³க்க²ஸமுத³யோ’’.

தத்த² கதமம் து³க்க²ம்? ஸாஸவா குஸலாகுஸலானம் த⁴ம்மானம் விபாகா, யே ச த⁴ம்மா கிரியா நேவ குஸலா நாகுஸலா ந ச கம்மவிபாகா, ஸப்³ப³ஞ்ச ரூபம் – இத³ம் வுச்சதி ‘‘து³க்க²ம்’’.

தத்த² கதமோ து³க்க²னிரோதோ⁴? தண்ஹாய ச, அவஸேஸானஞ்ச கிலேஸானம், அவஸேஸானஞ்ச அகுஸலானம் த⁴ம்மானம், திண்ணஞ்ச குஸலமூலானம் ஸாஸவானம், அவஸேஸானஞ்ச ஸாஸவானம் குஸலானம் த⁴ம்மானம் பஹானம் – அயம் வுச்சதி ‘‘து³க்க²னிரோதோ⁴’’.

தத்த² கதமா து³க்க²னிரோத⁴கா³மினீ படிபதா³? இத⁴ பி⁴க்கு² யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம் அபசயகா³மிம் தி³ட்டி²க³தானம் பஹானாய பட²மாய பூ⁴மியா பத்தியா விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி து³க்க²படிபத³ம் த³ந்தா⁴பி⁴ஞ்ஞம், தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி. அயம் வுச்சதி ‘‘து³க்க²னிரோத⁴கா³மினீ படிபதா³’’.

அபி⁴த⁴ம்மபா⁴ஜனீயம்.

3. பஞ்ஹாபுச்ச²கம்

215. சத்தாரி அரியஸச்சானி – து³க்க²ம் அரியஸச்சம், து³க்க²ஸமுத³யம் அரியஸச்சம், து³க்க²னிரோத⁴ம் அரியஸச்சம், து³க்க²னிரோத⁴கா³மினீ படிபதா³ அரியஸச்சம்.

216. சதுன்னம் அரியஸச்சானம் கதி குஸலா, கதி அகுஸலா, கதி அப்³யாகதா…பே… கதி ஸரணா, கதி அரணா?

1. திகம்

217. ஸமுத³யஸச்சம் அகுஸலம். மக்³க³ஸச்சம் குஸலம். நிரோத⁴ஸச்சம் அப்³யாகதம். து³க்க²ஸச்சம் ஸியா குஸலம், ஸியா அகுஸலம், ஸியா அப்³யாகதம். த்³வே ஸச்சா ஸியா ஸுகா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா. நிரோத⁴ஸச்சம் ந வத்தப்³ப³ம் – ‘‘ஸுகா²ய வேத³னாய ஸம்பயுத்த’’ந்திபி, ‘‘து³க்கா²ய வேத³னாய ஸம்பயுத்த’’ந்திபி, ‘‘அது³க்க²மஸுகா²ய வேத³னாய ஸம்பயுத்த’’ந்திபி. து³க்க²ஸச்சம் ஸியா ஸுகா²ய வேத³னாய ஸம்பயுத்தம், ஸியா து³க்கா²ய வேத³னாய ஸம்பயுத்தம், ஸியா அது³க்க²மஸுகா²ய வேத³னாய ஸம்பயுத்தம், ஸியா ந வத்தப்³ப³ம் – ‘‘ஸுகா²ய வேத³னாய ஸம்பயுத்த’’ந்திபி, ‘‘து³க்கா²ய வேத³னாய ஸம்பயுத்த’’ந்திபி, ‘‘அது³க்க²மஸுகா²ய வேத³னாய ஸம்பயுத்த’’ந்திபி. த்³வே ஸச்சா விபாகத⁴ம்மத⁴ம்மா. நிரோத⁴ஸச்சம் நேவவிபாகனவிபாகத⁴ம்மத⁴ம்மம். து³க்க²ஸச்சம் ஸியா விபாகம், ஸியா விபாகத⁴ம்மத⁴ம்மம், ஸியா நேவவிபாகனவிபாகத⁴ம்மத⁴ம்மம். ஸமுத³யஸச்சம் அனுபாதி³ன்னுபாதா³னியம். த்³வே ஸச்சா அனுபாதி³ன்னஅனுபாதா³னியா. து³க்க²ஸச்சம் ஸியா உபாதி³ன்னுபாதா³னியம், ஸியா அனுபாதி³ன்னுபாதா³னியம்.

ஸமுத³யஸச்சம் ஸம்கிலிட்ட²ஸம்கிலேஸிகம். த்³வே ஸச்சா அஸம்கிலிட்ட²அஸம்கிலேஸிகா. து³க்க²ஸச்சம் ஸியா ஸம்கிலிட்ட²ஸம்கிலேஸிகம், ஸியா அஸம்கிலிட்ட²ஸம்கிலேஸிகம். ஸமுத³யஸச்சம் ஸவிதக்கஸவிசாரம். நிரோத⁴ஸச்சம் அவிதக்கஅவிசாரம். மக்³க³ஸச்சம் ஸியா ஸவிதக்கஸவிசாரம், ஸியா அவிதக்கவிசாரமத்தம், ஸியா அவிதக்கஅவிசாரம். து³க்க²ஸச்சம் ஸியா ஸவிதக்கஸவிசாரம், ஸியா அவிதக்கவிசாரமத்தம், ஸியா அவிதக்கஅவிசாரம், ஸியா ந வத்தப்³ப³ம் – ‘‘ஸவிதக்கஸவிசார’’ந்திபி, ‘‘அவிதக்கவிசாரமத்த’’ந்திபி, ‘‘அவிதக்கஅவிசார’’ந்திபி. த்³வே ஸச்சா ஸியா பீதிஸஹக³தா, ஸியா ஸுக²ஸஹக³தா, ஸியா உபேக்கா²ஸஹக³தா. நிரோத⁴ஸச்சம் ந வத்தப்³ப³ம் – ‘‘பீதிஸஹக³த’’ந்திபி, ‘‘ஸுக²ஸஹக³த’’ந்திபி, ‘‘உபேக்கா²ஸஹக³த’’ந்திபி. து³க்க²ஸச்சம் ஸியா பீதிஸஹக³தம், ஸியா ஸுக²ஸஹக³தம், ஸியா உபேக்கா²ஸஹக³தம், ஸியா ந வத்தப்³ப³ம் – ‘‘பீதிஸஹக³த’’ந்திபி, ‘‘ஸுக²ஸஹக³த’’ந்திபி, ‘‘உபேக்கா²ஸஹக³த’’ந்திபி.

த்³வே ஸச்சா நேவ த³ஸ்ஸனேன ந பா⁴வனாய பஹாதப்³பா³. ஸமுத³யஸச்சம் ஸியா த³ஸ்ஸனேன பஹாதப்³ப³ம், ஸியா பா⁴வனாய பஹாதப்³ப³ம். து³க்க²ஸச்சம் ஸியா த³ஸ்ஸனேன பஹாதப்³ப³ம், ஸியா பா⁴வனாய பஹாதப்³ப³ம், ஸியா நேவ த³ஸ்ஸனேன ந பா⁴வனாய பஹாதப்³ப³ம். த்³வே ஸச்சா நேவ த³ஸ்ஸனேன ந பா⁴வனாய பஹாதப்³ப³ஹேதுகா. ஸமுத³யஸச்சம் ஸியா த³ஸ்ஸனேன பஹாதப்³ப³ஹேதுகம், ஸியா பா⁴வனாய பஹாதப்³ப³ஹேதுகம். து³க்க²ஸச்சம் ஸியா த³ஸ்ஸனேன பஹாதப்³ப³ஹேதுகம், ஸியா பா⁴வனாய பஹாதப்³ப³ஹேதுகம், ஸியா நேவ த³ஸ்ஸனேன ந பா⁴வனாய பஹாதப்³ப³ஹேதுகம். ஸமுத³யஸச்சம் ஆசயகா³மி. மக்³க³ஸச்சம் அபசயகா³மி. நிரோத⁴ஸச்சம் நேவாசயகா³மினாபசயகா³மி. து³க்க²ஸச்சம் ஸியா ஆசயகா³மி, ஸியா நேவாசயகா³மினாபசயகா³மி. மக்³க³ஸச்சம் ஸேக்க²ம். தீணி ஸச்சானி நேவஸேக்க²னாஸேக்கா². ஸமுத³யஸச்சம் பரித்தம். த்³வே ஸச்சா அப்பமாணா. து³க்க²ஸச்சம் ஸியா பரித்தம், ஸியா மஹக்³க³தம். நிரோத⁴ஸச்சம் அனாரம்மணம். மக்³க³ஸச்சம் அப்பமாணாரம்மணம். ஸமுத³யஸச்சம் ஸியா பரித்தாரம்மணம், ஸியா மஹக்³க³தாரம்மணம் ந அப்பமாணாரம்மணம், ஸியா ந வத்தப்³ப³ம் – ‘‘பரித்தாரம்மண’’ந்திபி, ‘‘மஹக்³க³தாரம்மண’’ந்திபி. து³க்க²ஸச்சம் ஸியா பரித்தாரம்மணம், ஸியா மஹக்³க³தாரம்மணம், ஸியா அப்பமாணாரம்மணம், ஸியா ந வத்தப்³ப³ம் – ‘‘பரித்தாரம்மண’’ந்திபி, ‘‘மஹக்³க³தாரம்மண’’ந்திபி, ‘‘அப்பமாணாரம்மண’’ந்திபி.

ஸமுத³யஸச்சம் ஹீனம். த்³வே ஸச்சா பணீதா. து³க்க²ஸச்சம் ஸியா ஹீனம், ஸியா மஜ்ஜி²மம். நிரோத⁴ஸச்சம் அனியதம். மக்³க³ஸச்சம் ஸம்மத்தனியதம். த்³வே ஸச்சா ஸியா மிச்ச²த்தனியதா, ஸியா அனியதா. நிரோத⁴ஸச்சம் அனாரம்மணம். ஸமுத³யஸச்சம் ந வத்தப்³ப³ம் – ‘‘மக்³கா³ரம்மண’’ந்திபி, ‘‘மக்³க³ஹேதுக’’ந்திபி, ‘‘மக்³கா³தி⁴பதீ’’திபி. மக்³க³ஸச்சம் ந மக்³கா³ரம்மணம் மக்³க³ஹேதுகம், ஸியா மக்³கா³தி⁴பதி, ஸியா ந வத்தப்³ப³ம் – ‘‘மக்³கா³தி⁴பதீ’’தி. து³க்க²ஸச்சம் ஸியா மக்³கா³ரம்மணம் ந மக்³க³ஹேதுகம், ஸியா மக்³கா³தி⁴பதி, ஸியா ந வத்தப்³ப³ம் – ‘‘மக்³கா³ரம்மண’’ந்திபி, ‘‘மக்³கா³தி⁴பதீ’’திபி. த்³வே ஸச்சா ஸியா உப்பன்னா, ஸியா அனுப்பன்னா, ந வத்தப்³பா³ – ‘‘உப்பாதி³னோ’’தி. நிரோத⁴ஸச்சம் ந வத்தப்³ப³ம் – ‘‘உப்பன்ன’’ந்திபி, ‘‘அனுப்பன்ன’’ந்திபி, ‘‘உப்பாதீ³’’திபி. து³க்க²ஸச்சம் ஸியா உப்பன்னம், ஸியா அனுப்பன்னம், ஸியா உப்பாதி³. தீணி ஸச்சானி ஸியா அதீதா, ஸியா அனாக³தா, ஸியா பச்சுப்பன்னா. நிரோத⁴ஸச்சம் ந வத்தப்³ப³ம் – ‘‘அதீத’’ந்திபி, ‘‘அனாக³த’’ந்திபி, ‘‘பச்சுப்பன்ன’’ந்திபி. நிரோத⁴ஸச்சம் அனாரம்மணம். மக்³க³ஸச்சம் ந வத்தப்³ப³ம் – ‘‘அதீதாரம்மண’’ந்திபி, ‘‘அனாக³தாரம்மண’’ந்திபி, ‘‘பச்சுப்பன்னாரம்மண’’ந்திபி. த்³வே ஸச்சா ஸியா அதீதாரம்மணா, ஸியா அனாக³தாரம்மணா, ஸியா பச்சுப்பன்னாரம்மணா, ஸியா ந வத்தப்³பா³ – ‘‘அதீதாரம்மணா’’திபி, ‘‘அனாக³தாரம்மணா’’திபி, ‘‘பச்சுப்பன்னாரம்மணா’’திபி. நிரோத⁴ஸச்சம் ப³ஹித்³தா⁴. தீணி ஸச்சானி ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴. நிரோத⁴ஸச்சம் அனாரம்மணம். மக்³க³ஸச்சம் ப³ஹித்³தா⁴ரம்மணம். ஸமுத³யஸச்சம் ஸியா அஜ்ஜ²த்தாரம்மணம், ஸியா ப³ஹித்³தா⁴ரம்மணம், ஸியா அஜ்ஜ²த்தப³ஹித்³தா⁴ரம்மணம். து³க்க²ஸச்சம் ஸியா அஜ்ஜ²த்தாரம்மணம், ஸியா ப³ஹித்³தா⁴ரம்மணம், ஸியா அஜ்ஜ²த்தப³ஹித்³தா⁴ரம்மணம், ஸியா ந வத்தப்³ப³ம் – ‘‘அஜ்ஜ²த்தாரம்மண’’ந்திபி, ‘‘ப³ஹித்³தா⁴ரம்மண’’ந்திபி, ‘‘அஜ்ஜ²த்தப³ஹித்³தா⁴ரம்மண’’ந்திபி. தீணி ஸச்சானி அனித³ஸ்ஸனஅப்படிகா⁴. து³க்க²ஸச்சம் ஸியா ஸனித³ஸ்ஸனஸப்படிக⁴ம், ஸியா அனித³ஸ்ஸனஸப்படிக⁴ம், ஸியா அனித³ஸ்ஸனஅப்படிக⁴ம்.

2. து³கம்

218. ஸமுத³யஸச்சம் ஹேது. நிரோத⁴ஸச்சம் ந ஹேது. த்³வே ஸச்சா ஸியா ஹேதூ, ஸியா ந ஹேதூ. த்³வே ஸச்சா ஸஹேதுகா. நிரோத⁴ஸச்சம் அஹேதுகம். து³க்க²ஸச்சம் ஸியா ஸஹேதுகம், ஸியா அஹேதுகம். த்³வே ஸச்சா ஹேதுஸம்பயுத்தா. நிரோத⁴ஸச்சம் ஹேதுவிப்பயுத்தம். து³க்க²ஸச்சம் ஸியா ஹேதுஸம்பயுத்தம், ஸியா ஹேதுவிப்பயுத்தம். ஸமுத³யஸச்சம் ஹேது சேவ ஸஹேதுகஞ்ச. நிரோத⁴ஸச்சம் ந வத்தப்³ப³ம் – ‘‘ஹேது சேவ ஸஹேதுகஞ்சா’’திபி, ‘‘ஸஹேதுகஞ்சேவ ந ச ஹேதூ’’திபி. மக்³க³ஸச்சம் ஸியா ஹேது சேவ ஸஹேதுகஞ்ச, ஸியா ஸஹேதுகஞ்சேவ ந ச ஹேது. து³க்க²ஸச்சம் ஸியா ஹேது சேவ ஸஹேதுகஞ்ச, ஸியா ஸஹேதுகஞ்சேவ ந ச ஹேது, ஸியா ந வத்தப்³ப³ம் – ‘‘ஹேது சேவ ஸஹேதுகஞ்சா’’திபி, ‘‘ஸஹேதுகஞ்சேவ ந ச ஹேதூ’’திபி. ஸமுத³யஸச்சம் ஹேது சேவ ஹேதுஸம்பயுத்தஞ்ச. நிரோத⁴ஸச்சம் ந வத்தப்³ப³ம் – ‘‘ஹேது சேவ ஹேதுஸம்பயுத்தஞ்சா’’திபி, ‘‘ஹேதுஸம்பயுத்தஞ்சேவ ந ச ஹேதூ’’திபி. மக்³க³ஸச்சம் ஸியா ஹேது சேவ ஹேதுஸம்பயுத்தஞ்ச, ஸியா ஹேதுஸம்பயுத்தஞ்சேவ ந ச ஹேது. து³க்க²ஸச்சம் ஸியா ஹேது சேவ ஹேதுஸம்பயுத்தஞ்ச, ஸியா ஹேதுஸம்பயுத்தஞ்சேவ ந ச ஹேது, ஸியா ந வத்தப்³ப³ம் – ‘‘ஹேது சேவ ஹேதுஸம்பயுத்தஞ்சா’’திபி, ‘‘ஹேதுஸம்பயுத்தஞ்சேவ ந ச ஹேதூ’’திபி. நிரோத⁴ஸச்சம் ந ஹேதுஅஹேதுகம். ஸமுத³யஸச்சம் ந வத்தப்³ப³ம் – ‘‘ந ஹேதுஸஹேதுக’’ந்திபி, ‘‘ந ஹேதுஅஹேதுக’’ந்திபி. மக்³க³ஸச்சம் ஸியா ந ஹேதுஸஹேதுகம், ஸியா ந வத்தப்³ப³ம் – ‘‘ந ஹேதுஸஹேதுக’’ந்திபி, ‘‘ந ஹேதுஅஹேதுக’’ந்திபி. து³க்க²ஸச்சம் ஸியா ந ஹேதுஸஹேதுகம், ஸியா ந ஹேதுஅஹேதுகம், ஸியா ந வத்தப்³ப³ம் – ‘‘ந ஹேதுஸஹேதுக’’ந்திபி, ‘‘ந ஹேதுஅஹேதுக’’ந்திபி.

தீணி ஸச்சானி ஸப்பச்சயா. நிரோத⁴ஸச்சம் அப்பச்சயம். தீணி ஸச்சானி ஸங்க²தா. நிரோத⁴ஸச்சம் அஸங்க²தம். தீணி ஸச்சானி அனித³ஸ்ஸனா. து³க்க²ஸச்சம் ஸியா ஸனித³ஸ்ஸனம், ஸியா அனித³ஸ்ஸனம். தீணி ஸச்சானி அப்படிகா⁴. து³க்க²ஸச்சம் ஸியா ஸப்படிக⁴ம், ஸியா அப்படிக⁴ம். தீணி ஸச்சானி அரூபானி. து³க்க²ஸச்சம் ஸியா ரூபம், ஸியா அரூபம். த்³வே ஸச்சா லோகியா. த்³வே ஸச்சா லோகுத்தரா; கேனசி விஞ்ஞேய்யா, கேனசி ந விஞ்ஞேய்யா.

ஸமுத³யஸச்சம் ஆஸவோ. த்³வே ஸச்சா நோ ஆஸவா. து³க்க²ஸச்சம் ஸியா ஆஸவோ, ஸியா நோ ஆஸவோ. த்³வே ஸச்சா ஸாஸவா. த்³வே ஸச்சா அனாஸவா. ஸமுத³யஸச்சம் ஆஸவஸம்பயுத்தம். த்³வே ஸச்சா ஆஸவவிப்பயுத்தா. து³க்க²ஸச்சம் ஸியா ஆஸவஸம்பயுத்தம், ஸியா ஆஸவவிப்பயுத்தம். ஸமுத³யஸச்சம் ஆஸவோ சேவ ஸாஸவஞ்ச. த்³வே ஸச்சா ந வத்தப்³பா³ – ‘‘ஆஸவா சேவ ஸாஸவா சா’’திபி, ‘‘ஸாஸவா சேவ நோ ச ஆஸவா’’திபி. து³க்க²ஸச்சம் ஸியா ஆஸவோ சேவ ஸாஸவஞ்ச, ஸியா ஸாஸவஞ்சேவ நோ ச ஆஸவோ. ஸமுத³யஸச்சம் ஆஸவோ சேவ ஆஸவஸம்பயுத்தஞ்ச. த்³வே ஸச்சா ந வத்தப்³பா³ – ‘‘ஆஸவா சேவ ஆஸவஸம்பயுத்தா சா’’திபி, ‘‘ஆஸவஸம்பயுத்தா சேவ நோ ச ஆஸவா’’திபி. து³க்க²ஸச்சம் ஸியா ஆஸவோ சேவ ஆஸவஸம்பயுத்தஞ்ச, ஸியா ஆஸவஸம்பயுத்தஞ்சேவ நோ ச ஆஸவோ, ஸியா ந வத்தப்³ப³ம் – ‘‘ஆஸவோ சேவ ஆஸவஸம்பயுத்தஞ்சா’’திபி, ‘‘ஆஸவஸம்பயுத்தஞ்சேவ நோ ச ஆஸவோ’’திபி. த்³வே ஸச்சா ஆஸவவிப்பயுத்தஅனாஸவா. ஸமுத³யஸச்சம் ந வத்தப்³ப³ம் – ‘‘ஆஸவவிப்பயுத்தஸாஸவ’’ந்திபி, ‘‘ஆஸவவிப்பயுத்தஅனாஸவ’’ந்திபி. து³க்க²ஸச்சம் ஸியா ஆஸவவிப்பயுத்தஸாஸவம், ஸியா ந வத்தப்³ப³ம் – ‘‘ஆஸவவிப்பயுத்தஸாஸவ’’ந்திபி, ‘‘ஆஸவவிப்பயுத்தஅனாஸவ’’ந்திபி.

ஸமுத³யஸச்சம் ஸம்யோஜனம். த்³வே ஸச்சா நோ ஸம்யோஜனா. து³க்க²ஸச்சம் ஸியா ஸம்யோஜனம், ஸியா நோ ஸம்யோஜனம். த்³வே ஸச்சா ஸம்யோஜனியா. த்³வே ஸச்சா அஸம்யோஜனியா. ஸமுத³யஸச்சம் ஸம்யோஜனஸம்பயுத்தம். த்³வே ஸச்சா ஸம்யோஜனவிப்பயுத்தா. து³க்க²ஸச்சம் ஸியா ஸம்யோஜனஸம்பயுத்தம், ஸியா ஸம்யோஜனவிப்பயுத்தம். ஸமுத³யஸச்சம் ஸம்யோஜனஞ்சேவ ஸம்யோஜனியஞ்ச. த்³வே ஸச்சா ந வத்தப்³பா³ – ‘‘ஸம்யோஜனா சேவ ஸம்யோஜனியா சா’’திபி, ‘‘ஸம்யோஜனியா சேவ நோ ச ஸம்யோஜனா’’திபி. து³க்க²ஸச்சம் ஸியா ஸம்யோஜனஞ்சேவ ஸம்யோஜனியஞ்ச, ஸியா ஸம்யோஜனியஞ்சேவ நோ ச ஸம்யோஜனம். ஸமுத³யஸச்சம் ஸம்யோஜனஞ்சேவ ஸம்யோஜனஸம்பயுத்தஞ்ச. த்³வே ஸச்சா ந வத்தப்³பா³ – ‘‘ஸம்யோஜனா சேவ ஸம்யோஜனஸம்பயுத்தா சா’’திபி, ‘‘ஸம்யோஜனஸம்பயுத்தா சேவ நோ ச ஸம்யோஜனா’’திபி. து³க்க²ஸச்சம் ஸியா ஸம்யோஜனஞ்சேவ ஸம்யோஜனஸம்பயுத்தஞ்ச, ஸியா ஸம்யோஜனஸம்பயுத்தஞ்சேவ நோ ச ஸம்யோஜனம், ஸியா ந வத்தப்³ப³ம் – ‘‘ஸம்யோஜனஞ்சேவ ஸம்யோஜனஸம்பயுத்தஞ்சா’’திபி, ‘‘ஸம்யோஜனஸம்பயுத்தஞ்சேவ நோ ச ஸம்யோஜன’’ந்திபி. த்³வே ஸச்சா ஸம்யோஜனவிப்பயுத்தஅஸம்யோஜனியா. ஸமுத³யஸச்சம் ந வத்தப்³ப³ம் – ‘‘ஸம்யோஜனவிப்பயுத்தஸம்யோஜனிய’’ந்திபி, ‘‘ஸம்யோஜனவிப்பயுத்தஅஸம்யோஜனிய’’ந்திபி. து³க்க²ஸச்சம் ஸியா ஸம்யோஜனவிப்பயுத்தஸம்யோஜனியம், ஸியா ந வத்தப்³ப³ம் – ‘‘ஸம்யோஜனவிப்பயுத்தஸம்யோஜனிய’’ந்திபி, ‘‘ஸம்யோஜனவிப்பயுத்தஅஸம்யோஜனிய’’ந்திபி.

ஸமுத³யஸச்சம் க³ந்தோ². த்³வே ஸச்சா நோ க³ந்தா². து³க்க²ஸச்சம் ஸியா க³ந்தோ², ஸியா நோ க³ந்தோ². த்³வே ஸச்சா க³ந்த²னியா. த்³வே ஸச்சா அக³ந்த²னியா. த்³வே ஸச்சா க³ந்த²விப்பயுத்தா. த்³வே ஸச்சா ஸியா க³ந்த²ஸம்பயுத்தா, ஸியா க³ந்த²விப்பயுத்தா. ஸமுத³யஸச்சம் க³ந்தோ² சேவ க³ந்த²னியஞ்ச. த்³வே ஸச்சா ந வத்தப்³பா³ – ‘‘க³ந்தா² சேவ க³ந்த²னியா சா’’திபி, ‘‘க³ந்த²னியா சேவ நோ ச க³ந்தா²’’திபி. து³க்க²ஸச்சம் ஸியா க³ந்தோ² சேவ க³ந்த²னியஞ்ச, ஸியா க³ந்த²னியஞ்சேவ நோ ச க³ந்தோ². ஸமுத³யஸச்சம் க³ந்தோ² சேவ க³ந்த²ஸம்பயுத்தஞ்ச, ஸியா ந வத்தப்³ப³ம் – ‘‘க³ந்தோ² சேவ க³ந்த²ஸம்பயுத்தஞ்சா’’திபி, ‘‘க³ந்த²ஸம்பயுத்தஞ்சேவ நோ ச க³ந்தோ²’’திபி. த்³வே ஸச்சா ந வத்தப்³பா³ – ‘‘க³ந்தா² சேவ க³ந்த²ஸம்பயுத்தா சா’’திபி, ‘‘க³ந்த²ஸம்பயுத்தா சேவ நோ ச க³ந்தா²’’திபி. து³க்க²ஸச்சம் ஸியா க³ந்தோ² சேவ க³ந்த²ஸம்பயுத்தஞ்ச, ஸியா க³ந்த²ஸம்பயுத்தஞ்சேவ நோ ச க³ந்தோ², ஸியா ந வத்தப்³ப³ம் – ‘‘க³ந்தோ² சேவ க³ந்த²ஸம்பயுத்தஞ்சா’’திபி, ‘‘க³ந்த²ஸம்பயுத்தஞ்சேவ நோ ச க³ந்தோ²’’திபி. த்³வே ஸச்சா க³ந்த²விப்பயுத்தஅக³ந்த²னியா. த்³வே ஸச்சா ஸியா க³ந்த²விப்பயுத்தக³ந்த²னியா, ஸியா ந வத்தப்³பா³ – ‘‘க³ந்த²விப்பயுத்தக³ந்த²னியா’’திபி, ‘‘க³ந்த²விப்பயுத்தஅக³ந்த²னியா’’திபி.

ஸமுத³யஸச்சம் ஓகோ⁴…பே… யோகோ³…பே… நீவரணம். த்³வே ஸச்சா நோ நீவரணா. து³க்க²ஸச்சம் ஸியா நீவரணம், ஸியா நோ நீவரணம். த்³வே ஸச்சா நீவரணியா த்³வே ஸச்சா அனீவரணியா. ஸமுத³யஸச்சம் நீவரணஸம்பயுத்தம். த்³வே ஸச்சா நீவரணவிப்பயுத்தா. து³க்க²ஸச்சம் ஸியா நீவரணஸம்பயுத்தம், ஸியா நீவரணவிப்பயுத்தம். ஸமுத³யஸச்சம் நீவரணஞ்சேவ நீவரணியஞ்ச. த்³வே ஸச்சா ந வத்தப்³பா³ – ‘‘நீவரணா சேவ நீவரணியா சா’’திபி, ‘‘நீவரணியா சேவ நோ ச நீவரணா’’திபி. து³க்க²ஸச்சம் ஸியா நீவரணஞ்சேவ நீவரணியஞ்ச, ஸியா நீவரணியஞ்சேவ நோ ச நீவரணம். ஸமுத³யஸச்சம் நீவரணஞ்சேவ நீவரணஸம்பயுத்தஞ்ச. த்³வே ஸச்சா ந வத்தப்³பா³ – ‘‘நீவரணா சேவ நீவரணஸம்பயுத்தா சா’’திபி, ‘‘நீவரணஸம்பயுத்தா சேவ நோ ச நீவரணா’’திபி. து³க்க²ஸச்சம் ஸியா நீவரணஞ்சேவ நீவரணஸம்பயுத்தஞ்ச, ஸியா நீவரணஸம்பயுத்தஞ்சேவ நோ ச நீவரணம், ஸியா ந வத்தப்³ப³ம் – ‘‘நீவரணஞ்சேவ நீவரணஸம்பயுத்தஞ்சா’’திபி, ‘‘நீவரணஸம்பயுத்தஞ்சேவ நோ ச நீவரண’’ந்திபி. த்³வே ஸச்சா நீவரணவிப்பயுத்தஅனீவரணியா. ஸமுத³யஸச்சம் ந வத்தப்³ப³ம் – ‘‘நீவரணவிப்பயுத்தனீவரணிய’’ந்திபி, ‘‘நீவரணவிப்பயுத்தஅனீவரணிய’’ந்திபி. து³க்க²ஸச்சம் ஸியா நீவரணவிப்பயுத்தனீவரணியம், ஸியா ந வத்தப்³ப³ம் – ‘‘நீவரணவிப்பயுத்தனீவரணிய’’ந்திபி, ‘‘நீவரணவிப்பயுத்தஅனீவரணிய’’ந்திபி.

தீணி ஸச்சானி நோ பராமாஸா. து³க்க²ஸச்சம் ஸியா பராமாஸோ, ஸியா நோ பராமாஸோ. த்³வே ஸச்சா பராமட்டா². த்³வே ஸச்சா அபராமட்டா². த்³வே ஸச்சா பராமாஸவிப்பயுத்தா. ஸமுத³யஸச்சம் ஸியா பராமாஸஸம்பயுத்தம், ஸியா பராமாஸவிப்பயுத்தம். து³க்க²ஸச்சம் ஸியா பராமாஸஸம்பயுத்தம், ஸியா பராமாஸவிப்பயுத்தம், ஸியா ந வத்தப்³ப³ம் – ‘‘பராமாஸஸம்பயுத்த’’ந்திபி, ‘‘பராமாஸவிப்பயுத்த’’ந்திபி. ஸமுத³யஸச்சம் ந வத்தப்³ப³ம் – ‘‘பராமாஸோ சேவ பராமட்ட²ஞ்சா’’தி, பராமட்ட²ஞ்சேவ நோ ச பராமாஸோ. த்³வே ஸச்சா ந வத்தப்³பா³ – ‘‘பராமாஸா சேவ பராமட்டா² சா’’திபி, ‘‘பராமட்டா² சேவ நோ ச பராமாஸா’’திபி. து³க்க²ஸச்சம் ஸியா பராமாஸோ சேவ பராமட்ட²ஞ்ச, ஸியா பராமட்ட²ஞ்சேவ நோ ச பராமாஸோ. த்³வே ஸச்சா பராமாஸவிப்பயுத்தஅபராமட்டா². த்³வே ஸச்சா ஸியா பராமாஸவிப்பயுத்தபராமட்டா², ஸியா ந வத்தப்³பா³ – ‘‘பராமாஸவிப்பயுத்தபராமட்டா²’’திபி, ‘‘பராமாஸவிப்பயுத்தஅபராமட்டா²’’திபி.

த்³வே ஸச்சா ஸாரம்மணா. நிரோத⁴ஸச்சம் அனாரம்மணம். து³க்க²ஸச்சம் ஸியா ஸாரம்மணம், ஸியா அனாரம்மணம். தீணி ஸச்சானி நோ சித்தா. து³க்க²ஸச்சம் ஸியா சித்தம், ஸியா நோ சித்தம். த்³வே ஸச்சா சேதஸிகா. நிரோத⁴ஸச்சம் அசேதஸிகம். து³க்க²ஸச்சம் ஸியா சேதஸிகம், ஸியா அசேதஸிகம். த்³வே ஸச்சா சித்தஸம்பயுத்தா. நிரோத⁴ஸச்சம் சித்தவிப்பயுத்தம். து³க்க²ஸச்சம் ஸியா சித்தஸம்பயுத்தம், ஸியா சித்தவிப்பயுத்தம், ஸியா ந வத்தப்³ப³ம் – ‘‘சித்தேன ஸம்பயுத்த’’ந்திபி, ‘‘சித்தேன விப்பயுத்த’’ந்திபி. த்³வே ஸச்சா சித்தஸம்ஸட்டா². நிரோத⁴ஸச்சம் சித்தவிஸம்ஸட்ட²ம். து³க்க²ஸச்சம் ஸியா சித்தஸம்ஸட்ட²ம், ஸியா சித்தவிஸம்ஸட்ட²ம், ஸியா ந வத்தப்³ப³ம் – ‘‘சித்தேன ஸம்ஸட்ட²’’ந்திபி, ‘‘சித்தேன விஸம்ஸட்ட²’’ந்திபி. த்³வே ஸச்சா சித்தஸமுட்டா²னா. நிரோத⁴ஸச்சம் நோ சித்தஸமுட்டா²னம். து³க்க²ஸச்சம் ஸியா சித்தஸமுட்டா²னம், ஸியா நோ சித்தஸமுட்டா²னம். த்³வே ஸச்சா சித்தஸஹபு⁴னோ. நிரோத⁴ஸச்சம் நோ சித்தஸஹபூ⁴. து³க்க²ஸச்சம் ஸியா சித்தஸஹபூ⁴, ஸியா நோ சித்தஸஹபூ⁴. த்³வே ஸச்சா சித்தானுபரிவத்தினோ. நிரோத⁴ஸச்சம் நோ சித்தானுபரிவத்தி. து³க்க²ஸச்சம் ஸியா சித்தானுபரிவத்தி, ஸியா நோ சித்தானுபரிவத்தி. த்³வே ஸச்சா சித்தஸம்ஸட்ட²ஸமுட்டா²னா. நிரோத⁴ஸச்சம் நோ சித்தஸம்ஸட்ட²ஸமுட்டா²னம். து³க்க²ஸச்சம் ஸியா சித்தஸம்ஸட்ட²ஸமுட்டா²னம், ஸியா நோ சித்தஸம்ஸட்ட²ஸமுட்டா²னம். த்³வே ஸச்சா சித்தஸம்ஸட்ட²ஸமுட்டா²னஸஹபு⁴னோ. நிரோத⁴ஸச்சம் நோ சித்தஸம்ஸட்ட²ஸமுட்டா²னஸஹபூ⁴. து³க்க²ஸச்சம் ஸியா சித்தஸம்ஸட்ட²ஸமுட்டா²னஸஹபூ⁴, ஸியா நோ சித்தஸம்ஸட்ட²ஸமுட்டா²னஸஹபூ⁴. த்³வே ஸச்சா சித்தஸம்ஸட்ட²ஸமுட்டா²னானுபரிவத்தினோ. நிரோத⁴ஸச்சம் நோ சித்தஸம்ஸட்ட²ஸமுட்டா²னானுபரிவத்தி. து³க்க²ஸச்சம் ஸியா சித்தஸம்ஸட்ட²ஸமுட்டா²னானுபரிவத்தி, ஸியா நோ சித்தஸம்ஸட்ட²ஸமுட்டா²னானுபரிவத்தி. தீணி ஸச்சானி பா³ஹிரா. து³க்க²ஸச்சம் ஸியா அஜ்ஜ²த்தம், ஸியா பா³ஹிரம்.

தீணி ஸச்சானி நோ உபாதா³. து³க்க²ஸச்சம் ஸியா உபாதா³, ஸியா நோ உபாதா³. தீணி ஸச்சானி அனுபாதி³ன்னா. து³க்க²ஸச்சம் ஸியா உபாதி³ன்னம், ஸியா அனுபாதி³ன்னம். ஸமுத³யஸச்சம் உபாதா³னம். த்³வே ஸச்சா நோ உபாதா³னா. து³க்க²ஸச்சம் ஸியா உபாதா³னம், ஸியா நோ உபாதா³னம். த்³வே ஸச்சா உபாதா³னியா. த்³வே ஸச்சா அனுபாதா³னியா. த்³வே ஸச்சா உபாதா³னவிப்பயுத்தா. த்³வே ஸச்சா ஸியா உபாதா³னஸம்பயுத்தா, ஸியா உபாதா³னவிப்பயுத்தா. ஸமுத³யஸச்சம் உபாதா³னஞ்சேவ உபாதா³னியஞ்ச. த்³வே ஸச்சா ந வத்தப்³பா³ – ‘‘உபாதா³னா சேவ உபாதா³னியா சா’’திபி, ‘‘உபாதா³னியா சேவ நோ ச உபாதா³னா’’திபி. து³க்க²ஸச்சம் ஸியா உபாதா³னஞ்சேவ உபாதா³னியஞ்ச, ஸியா உபாதா³னியஞ்சேவ நோ ச உபாதா³னம். ஸமுத³யஸச்சம் ஸியா உபாதா³னஞ்சேவ உபாதா³னஸம்பயுத்தஞ்ச, ஸியா ந வத்தப்³ப³ம் – ‘‘உபாதா³னஞ்சேவ உபாதா³னஸம்பயுத்தஞ்சா’’திபி, ‘‘உபாதா³னஸம்பயுத்தஞ்சேவ நோ ச உபாதா³ன’’ந்திபி. த்³வே ஸச்சா ந வத்தப்³பா³ – ‘‘உபாதா³னா சேவ உபாதா³னஸம்பயுத்தா சா’’திபி, ‘‘உபாதா³னஸம்பயுத்தா சேவ நோ ச உபாதா³னா’’திபி. து³க்க²ஸச்சம் ஸியா உபாதா³னஞ்சேவ உபாதா³னஸம்பயுத்தஞ்ச, ஸியா உபாதா³னஸம்பயுத்தஞ்சேவ நோ ச உபாதா³னம், ஸியா ந வத்தப்³ப³ம் – ‘‘உபாதா³னஞ்சேவ உபாதா³னஸம்பயுத்தஞ்சா’’ திபி, ‘‘உபாதா³னஸம்பயுத்தஞ்சேவ நோ ச உபாதா³ன’’ந்திபி. த்³வே ஸச்சா உபாதா³னவிப்பயுத்தஅனுபாதா³னியா. த்³வே ஸச்சா ஸியா உபாதா³னவிப்பயுத்தஉபாதா³னியா, ஸியா ந வத்தப்³பா³ – ‘‘உபாதா³னவிப்பயுத்தஉபாதா³னியா’’திபி, ‘‘உபாதா³னவிப்பயுத்தஅனுபாதா³னியா’’திபி.

ஸமுத³யஸச்சம் கிலேஸோ. த்³வே ஸச்சா நோ கிலேஸா. து³க்க²ஸச்சம் ஸியா கிலேஸோ, ஸியா நோ கிலேஸோ. த்³வே ஸச்சா ஸம்கிலேஸிகா. த்³வே ஸச்சா அஸம்கிலேஸிகா. ஸமுத³யஸச்சம் ஸம்கிலிட்ட²ம். த்³வே ஸச்சா அஸம்கிலிட்டா². து³க்க²ஸச்சம் ஸியா ஸம்கிலிட்ட²ம், ஸியா அஸம்கிலிட்ட²ம். ஸமுத³யஸச்சம் கிலேஸஸம்பயுத்தம். த்³வே ஸச்சா கிலேஸவிப்பயுத்தா. து³க்க²ஸச்சம் ஸியா கிலேஸஸம்பயுத்தம், ஸியா கிலேஸவிப்பயுத்தம். ஸமுத³யஸச்சம் கிலேஸோ சேவ ஸம்கிலேஸிகஞ்ச. த்³வே ஸச்சா ந வத்தப்³பா³ – ‘‘கிலேஸா சேவ ஸம்கிலேஸிகா சா’’திபி, ‘‘ஸம்கிலேஸிகா சேவ நோ ச கிலேஸா’’திபி. து³க்க²ஸச்சம் ஸியா கிலேஸோ சேவ ஸம்கிலேஸிகஞ்ச, ஸியா ஸம்கிலேஸிகஞ்சேவ நோ ச கிலேஸோ. ஸமுத³யஸச்சம் கிலேஸோ சேவ ஸம்கிலிட்ட²ஞ்ச. த்³வே ஸச்சா ந வத்தப்³பா³ – ‘‘கிலேஸா சேவ ஸம்கிலிட்டா² சா’’திபி, ‘‘ஸம்கிலிட்டா² சேவ நோ ச கிலேஸா’’திபி. து³க்க²ஸச்சம் ஸியா கிலேஸோ சேவ ஸம்கிலிட்ட²ஞ்ச, ஸியா ஸம்கிலிட்ட²ஞ்சேவ நோ ச கிலேஸோ, ஸியா ந வத்தப்³ப³ம் – ‘‘கிலேஸோ சேவ ஸம்கிலிட்ட²ஞ்சா’’திபி, ‘‘ஸம்கிலிட்ட²ஞ்சேவ நோ ச கிலேஸோ’’திபி. ஸமுத³யஸச்சம் கிலேஸோ சேவ கிலேஸஸம்பயுத்தஞ்ச. த்³வே ஸச்சா ந வத்தப்³பா³ – ‘‘கிலேஸா சேவ கிலேஸஸம்பயுத்தா சா’’திபி, ‘‘கிலேஸஸம்பயுத்தா சேவ நோ ச கிலேஸா’’திபி. து³க்க²ஸச்சம் ஸியா கிலேஸோ சேவ கிலேஸஸம்பயுத்தஞ்ச, ஸியா கிலேஸஸம்பயுத்தஞ்சேவ நோ ச கிலேஸோ, ஸியா ந வத்தப்³ப³ம் – ‘‘கிலேஸோ சேவ கிலேஸஸம்பயுத்தஞ்சா’’ திபி, ‘‘கிலேஸஸம்பயுத்தஞ்சேவ நோ ச கிலேஸோ’’திபி. த்³வே ஸச்சா கிலேஸவிப்பயுத்தஅஸம்கிலேஸிகா. ஸமுத³யஸச்சம் ந வத்தப்³ப³ம் – ‘‘கிலேஸவிப்பயுத்தஸம்கிலேஸிக’’ந்திபி, ‘‘கிலேஸவிப்பயுத்தஅஸம்கிலேஸிக’’ந்திபி. து³க்க²ஸச்சம் ஸியா கிலேஸவிப்பயுத்தஸம்கிலேஸிகம், ஸியா ந வத்தப்³ப³ம் – ‘‘கிலேஸவிப்பயுத்தஸம்கிலேஸிக’’ந்திபி, ‘‘கிலேஸவிப்பயுத்தஅஸம்கிலேஸிக’’ந்திபி.

த்³வே ஸச்சா ந த³ஸ்ஸனேன பஹாதப்³பா³. த்³வே ஸச்சா ஸியா த³ஸ்ஸனேன பஹாதப்³பா³, ஸியா ந த³ஸ்ஸனேன பஹாதப்³பா³. த்³வே ஸச்சா ந பா⁴வனாய பஹாதப்³பா³. த்³வே ஸச்சா ஸியா பா⁴வனாய பஹாதப்³பா³, ஸியா ந பா⁴வனாய பஹாதப்³பா³. த்³வே ஸச்சா ந த³ஸ்ஸனேன பஹாதப்³ப³ஹேதுகா. த்³வே ஸச்சா ஸியா த³ஸ்ஸனேன பஹாதப்³ப³ஹேதுகா, ஸியா ந த³ஸ்ஸனேன பஹாதப்³ப³ஹேதுகா. த்³வே ஸச்சா ந பா⁴வனாய பஹாதப்³ப³ஹேதுகா. த்³வே ஸச்சா ஸியா பா⁴வனாய பஹாதப்³ப³ஹேதுகா, ஸியா ந பா⁴வனாய பஹாதப்³ப³ஹேதுகா. ஸமுத³யஸச்சம் ஸவிதக்கம். நிரோத⁴ஸச்சம் அவிதக்கம். த்³வே ஸச்சா ஸியா ஸவிதக்கா, ஸியா அவிதக்கா. ஸமுத³யஸச்சம் ஸவிசாரம். நிரோத⁴ஸச்சம் அவிசாரம். த்³வே ஸச்சா ஸியா ஸவிசாரா, ஸியா அவிசாரா. நிரோத⁴ஸச்சம் அப்பீதிகம். தீணி ஸச்சானி ஸியா ஸப்பீதிகா, ஸியா அப்பீதிகா. நிரோத⁴ஸச்சம் ந பீதிஸஹக³தம். தீணி ஸச்சானி ஸியா பீதிஸஹக³தா, ஸியா ந பீதிஸஹக³தா. நிரோத⁴ஸச்சம் ந ஸுக²ஸஹக³தம். தீணி ஸச்சானி ஸியா ஸுக²ஸஹக³தா, ஸியா ந ஸுக²ஸஹக³தா. நிரோத⁴ஸச்சம் ந உபேக்கா²ஸஹக³தம். தீணி ஸச்சானி ஸியா உபேக்கா²ஸஹக³தா, ஸியா ந உபேக்கா²ஸஹக³தா.

ஸமுத³யஸச்சம் காமாவசரம். த்³வே ஸச்சா ந காமாவசரா. து³க்க²ஸச்சம் ஸியா காமாவசரம், ஸியா ந காமாவசரம். தீணி ஸச்சானி ந ரூபாவசரா. து³க்க²ஸச்சம் ஸியா ரூபாவசரம், ஸியா ந ரூபாவசரம். தீணி ஸச்சானி ந அரூபாவசரா. து³க்க²ஸச்சம் ஸியா அரூபாவசரம், ஸியா ந அரூபாவசரம். த்³வே ஸச்சா பரியாபன்னா. த்³வே ஸச்சா அபரியாபன்னா. மக்³க³ஸச்சம் நிய்யானிகம். தீணி ஸச்சானி அனிய்யானிகா. மக்³க³ஸச்சம் நியதம். நிரோத⁴ஸச்சம் அனியதம். த்³வே ஸச்சா ஸியா நியதா, ஸியா அனியதா. த்³வே ஸச்சா ஸஉத்தரா. த்³வே ஸச்சா அனுத்தரா. ஸமுத³யஸச்சம் ஸரணம். த்³வே ஸச்சா அரணா. து³க்க²ஸச்சம் ஸியா ஸரணம், ஸியா அரணந்தி.

பஞ்ஹாபுச்ச²கம்.

ஸச்சவிப⁴ங்கோ³ நிட்டி²தோ.