1. ஸுத்தந்தபா⁴ஜனீயம்

172. ச² தா⁴துயோ – பத²வீதா⁴து [பட²வீதா⁴து (ஸீ. ஸ்யா.) ஏவமுபரிபி], ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து.

173. தத்த² கதமா பத²வீதா⁴து? பத²வீதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா பத²வீதா⁴து? யம் அஜ்ஜ²த்தம் பச்சத்தம் கக்க²ளம் க²ரிக³தம் கக்க²ளத்தம் கக்க²ளபா⁴வோ அஜ்ஜ²த்தம் உபாதி³ன்னம், ஸேய்யதி²த³ம் – கேஸா லோமா நகா² த³ந்தா தசோ மம்ஸம் ந்ஹாரு [நஹாரு (ஸீ.)] அட்டி² அட்டி²மிஞ்ஜம் [அட்டி²மிஞ்ஜா (ஸீ.)] வக்கம் ஹத³யம் யகனம் கிலோமகம் பிஹகம் பப்பா²ஸம் அந்தம் அந்தகு³ணம் உத³ரியம் கரீஸம், யம் வா பனஞ்ஞம்பி அத்தி² அஜ்ஜ²த்தம் பச்சத்தம் கக்க²ளம் க²ரிக³தம் கக்க²ளத்தம் கக்க²ளபா⁴வோ அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா பத²வீதா⁴து’.

தத்த² கதமா பா³ஹிரா பத²வீதா⁴து? யம் பா³ஹிரம் கக்க²ளம் க²ரிக³தம் கக்க²ளத்தம் கக்க²ளபா⁴வோ ப³ஹித்³தா⁴ அனுபாதி³ன்னம், ஸேய்யதி²த³ம் – அயோ லோஹம் திபு ஸீஸம் ஸஜ்ஜ²ம் [ஸஜ்ஜு² (ஸ்யா.)] முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதங்கோ [லோஹிதங்கோ³ (ஸ்யா. க.), லோஹிதகோ (?)] மஸாரக³ல்லம் திணம் கட்ட²ம் ஸக்க²ரா கட²லம் [கத²லம் (க.)] பூ⁴மி பாஸாணோ பப்³ப³தோ, யம் வா பனஞ்ஞம்பி அத்தி² பா³ஹிரம் கக்க²ளம் க²ரிக³தம் கக்க²ளத்தம் கக்க²ளபா⁴வோ ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா பத²வீதா⁴து’. யா ச அஜ்ஜ²த்திகா பத²வீதா⁴து யா ச பா³ஹிரா பத²வீதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘பத²வீதா⁴து’’.

174. தத்த² கதமா ஆபோதா⁴து? ஆபோதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா ஆபோதா⁴து? யம் அஜ்ஜ²த்தம் பச்சத்தம் ஆபோ ஆபோக³தம் ஸினேஹோ ஸினேஹக³தம் [ஸ்னேஹோ ஸ்னேஹக³தம் (ஸ்யா.)] ப³ந்த⁴னத்தம் ரூபஸ்ஸ அஜ்ஜ²த்தம் உபாதி³ன்னம், ஸேய்யதி²த³ம் – பித்தம் ஸேம்ஹம் புப்³போ³ லோஹிதம் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தம், யம் வா பனஞ்ஞம்பி அத்தி² அஜ்ஜ²த்தம் பச்சத்தம் ஆபோ ஆபோக³தம் ஸினேஹோ ஸினேஹக³தம் ப³ந்த⁴னத்தம் ரூபஸ்ஸ அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா ஆபோதா⁴து’.

தத்த² கதமா பா³ஹிரா ஆபோதா⁴து? யம் பா³ஹிரம் ஆபோ ஆபோக³தம் ஸினேஹோ ஸினேஹக³தம் ப³ந்த⁴னத்தம் ரூபஸ்ஸ ப³ஹித்³தா⁴ அனுபாதி³ன்னம், ஸேய்யதி²த³ம் – மூலரஸோ க²ந்த⁴ரஸோ தசரஸோ பத்தரஸோ புப்ப²ரஸோ ப²லரஸோ கீ²ரம் த³தி⁴ ஸப்பி நவனீதம் தேலம் மது⁴ பா²ணிதம் பு⁴ம்மானி வா உத³கானி அந்தலிக்கா²னி வா, யம் வா பனஞ்ஞம்பி அத்தி² பா³ஹிரம் ஆபோ ஆபோக³தம் ஸினேஹோ ஸினேஹக³தம் ப³ந்த⁴னத்தம் ரூபஸ்ஸ ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா ஆபோதா⁴து’. யா ச அஜ்ஜ²த்திகா ஆபோதா⁴து யா ச பா³ஹிரா ஆபோதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘ஆபோதா⁴து’’.

175. தத்த² கதமா தேஜோதா⁴து? தேஜோதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா தேஜோதா⁴து? யம் அஜ்ஜ²த்தம் பச்சத்தம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் அஜ்ஜ²த்தம் உபாதி³ன்னம், ஸேய்யதி²த³ம் – யேன ச ஸந்தப்பதி யேன ச ஜீரீயதி யேன ச பரிட³ய்ஹதி யேன ச அஸிதபீதகா²யிதஸாயிதம் ஸம்மா பரிணாமம் க³ச்ச²தி, யம் வா பனஞ்ஞம்பி அத்தி² அஜ்ஜ²த்தம் பச்சத்தம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா தேஜோதா⁴து’.

தத்த² கதமா பா³ஹிரா தேஜோதா⁴து? யம் பா³ஹிரம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் ப³ஹித்³தா⁴ அனுபாதி³ன்னம், ஸேய்யதி²த³ம் – கட்ட²க்³கி³ பலாலக்³கி³ [ஸகலிகக்³கி³ (ஸப்³ப³த்த²)] திணக்³கி³ கோ³மயக்³கி³ து²ஸக்³கி³ ஸங்காரக்³கி³ இந்த³க்³கி³ அக்³கி³ஸந்தாபோ ஸூரியஸந்தாபோ கட்ட²ஸன்னிசயஸந்தாபோ திணஸன்னிசயஸந்தாபோ த⁴ஞ்ஞஸன்னிசயஸந்தாபோ ப⁴ண்ட³ஸன்னிசயஸந்தாபோ, யம் வா பனஞ்ஞம்பி அத்தி² பா³ஹிரம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா தேஜோதா⁴து’. யா ச அஜ்ஜ²த்திகா தேஜோதா⁴து யா ச பா³ஹிரா தேஜோதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘தேஜோதா⁴து’’.

176. தத்த² கதமா வாயோதா⁴து? வாயோதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா வாயோதா⁴து? யம் அஜ்ஜ²த்தம் பச்சத்தம் வாயோ வாயோக³தம் த²ம்பி⁴தத்தம் ரூபஸ்ஸ அஜ்ஜ²த்தம் உபாதி³ன்னம், ஸேய்யதி²த³ம் – உத்³த⁴ங்க³மா வாதா அதோ⁴க³மா வாதா குச்சி²ஸயா வாதா கோட்டா²ஸயா [கோட்ட²ஸயா (ஸீ. ஸ்யா.)] வாதா அங்க³மங்கா³னுஸாரினோ வாதா ஸத்த²கவாதா கு²ரகவாதா உப்பலகவாதா அஸ்ஸாஸோ பஸ்ஸாஸோ இதி வா, யம் வா பனஞ்ஞம்பி அத்தி² அஜ்ஜ²த்தம் பச்சத்தம் வாயோ வாயோக³தம் த²ம்பி⁴தத்தம் ரூபஸ்ஸ அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா வாயோதா⁴து’.

தத்த² கதமா பா³ஹிரா வாயோதா⁴து? யம் பா³ஹிரம் வாயோ வாயோக³தம் த²ம்பி⁴தத்தம் ரூபஸ்ஸ ப³ஹித்³தா⁴ அனுபாதி³ன்னம், ஸேய்யதி²த³ம் – புரத்தி²மா வாதா பச்சி²மா வாதா உத்தரா வாதா த³க்கி²ணா வாதா ஸரஜா வாதா அரஜா வாதா ஸீதா வாதா உண்ஹா வாதா பரித்தா வாதா அதி⁴மத்தா வாதா காளவாதா வேரம்ப⁴வாதா பக்க²வாதா ஸுபண்ணவாதா தாலவண்டவாதா விதூ⁴பனவாதா, யம் வா பனஞ்ஞம்பி அத்தி² பா³ஹிரம் வாயோ வாயோக³தம் த²ம்பி⁴தத்தம் ரூபஸ்ஸ ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா வாயோதா⁴து’. யா ச அஜ்ஜ²த்திகா வாயோதா⁴து யா ச பா³ஹிரா வாயோதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘வாயோதா⁴து’’.

177. தத்த² கதமா ஆகாஸதா⁴து? ஆகாஸதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா ஆகாஸதா⁴து? யம் அஜ்ஜ²த்தம் பச்சத்தம் ஆகாஸோ ஆகாஸக³தம் அக⁴ம் அக⁴க³தம் விவரோ விவரக³தம் அஸம்பு²ட்ட²ம் மம்ஸலோஹிதேஹி அஜ்ஜ²த்தம் உபாதி³ன்னம், ஸேய்யதி²த³ம் – கண்ணச்சி²த்³த³ம் நாஸச்சி²த்³த³ம் முக²த்³வாரம், யேன ச அஸிதபீதகா²யிதஸாயிதம் அஜ்ஜோ²ஹரதி, யத்த² ச அஸிதபீதகா²யிதஸாயிதம் ஸந்திட்ட²தி, யேன ச அஸிதபீதகா²யிதஸாயிதம் அதோ⁴பா⁴க³ம் நிக்க²மதி, யம் வா பனஞ்ஞம்பி அத்தி² அஜ்ஜ²த்தம் பச்சத்தம் ஆகாஸோ ஆகாஸக³தம் அக⁴ம் அக⁴க³தம் விவரோ விவரக³தம் அஸம்பு²ட்ட²ம் மம்ஸலோஹிதேஹி அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா ஆகாஸதா⁴து’.

தத்த² கதமா பா³ஹிரா ஆகாஸதா⁴து? யம் பா³ஹிரம் ஆகாஸோ ஆகாஸக³தம் அக⁴ம் அக⁴க³தம் விவரோ விவரக³தம் அஸம்பு²ட்ட²ம் சதூஹி மஹாபூ⁴தேஹி ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா ஆகாஸதா⁴து’. யா ச அஜ்ஜ²த்திகா ஆகாஸதா⁴து யா ச பா³ஹிரா ஆகாஸதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘ஆகாஸதா⁴து’’.

178. தத்த² கதமா விஞ்ஞாணதா⁴து? சக்கு²விஞ்ஞாணதா⁴து, ஸோதவிஞ்ஞாணதா⁴து, கா⁴னவிஞ்ஞாணதா⁴து, ஜிவ்ஹாவிஞ்ஞாணதா⁴து, காயவிஞ்ஞாணதா⁴து, மனோவிஞ்ஞாணதா⁴து – அயம் வுச்சதி ‘‘விஞ்ஞாணதா⁴து’’.

இமா ச² தா⁴துயோ.

179. அபராபி ச² தா⁴துயோ – ஸுக²தா⁴து, து³க்க²தா⁴து, ஸோமனஸ்ஸதா⁴து, தோ³மனஸ்ஸதா⁴து, உபேக்கா²தா⁴து, அவிஜ்ஜாதா⁴து.

180. தத்த² கதமா ஸுக²தா⁴து? யம் காயிகம் ஸாதம் காயிகம் ஸுக²ம் காயஸம்ப²ஸ்ஸஜம் ஸாதம் ஸுக²ம் வேத³யிதம் காயஸம்ப²ஸ்ஸஜா ஸாதா ஸுகா² வேத³னா – அயம் வுச்சதி ‘‘ஸுக²தா⁴து’’.

தத்த² கதமா து³க்க²தா⁴து? யம் காயிகம் அஸாதம் காயிகம் து³க்க²ம் காயஸம்ப²ஸ்ஸஜம் அஸாதம் து³க்க²ம் வேத³யிதம் காயஸம்ப²ஸ்ஸஜா அஸாதா து³க்கா² வேத³னா – அயம் வுச்சதி ‘‘து³க்க²தா⁴து’’.

தத்த² கதமா ஸோமனஸ்ஸதா⁴து? யம் சேதஸிகம் ஸாதம் சேதஸிகம் ஸுக²ம் சேதோஸம்ப²ஸ்ஸஜம் ஸாதம் ஸுக²ம் வேத³யிதம் சேதோஸம்ப²ஸ்ஸஜா ஸாதா ஸுகா² வேத³னா – அயம் வுச்சதி ‘‘ஸோமனஸ்ஸதா⁴து’’.

தத்த² கதமா தோ³மனஸ்ஸதா⁴து? யம் சேதஸிகம் அஸாதம் சேதஸிகம் து³க்க²ம் சேதோஸம்ப²ஸ்ஸஜம் அஸாதம் து³க்க²ம் வேத³யிதம் சேதோஸம்ப²ஸ்ஸஜா அஸாதா து³க்கா² வேத³னா – அயம் வுச்சதி ‘‘தோ³மனஸ்ஸதா⁴து’’.

தத்த² கதமா உபேக்கா²தா⁴து? யம் சேதஸிகம் நேவ ஸாதம் நாஸாதம் சேதோஸம்ப²ஸ்ஸஜம் அது³க்க²மஸுக²ம் வேத³யிதம் சேதோஸம்ப²ஸ்ஸஜா அது³க்க²மஸுகா² வேத³னா – அயம் வுச்சதி ‘‘உபேக்கா²தா⁴து’’.

தத்த² கதமா அவிஜ்ஜாதா⁴து? யம் அஞ்ஞாணம் அத³ஸ்ஸனம் அனபி⁴ஸமயோ அனனுபோ³தோ⁴ அஸம்போ³தோ⁴ அப்படிவேதோ⁴ அஸங்கா³ஹணா அபரியோகா³ஹணா அஸமபேக்க²னா அபச்சவேக்க²ணா அபச்சக்க²கம்மம் து³ம்மேஜ்ஜ²ம் பா³ல்யம் அஸம்பஜஞ்ஞம் மோஹோ பமோஹோ ஸம்மோஹோ அவிஜ்ஜா அவிஜ்ஜோகோ⁴ அவிஜ்ஜாயோகோ³ அவிஜ்ஜானுஸயோ அவிஜ்ஜாபரியுட்டா²னம் அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜாதா⁴து’’.

இமா ச² தா⁴துயோ.

181. அபராபி ச² தா⁴துயோ – காமதா⁴து, ப்³யாபாத³தா⁴து, விஹிம்ஸாதா⁴து, நேக்க²ம்மதா⁴து, அப்³யாபாத³தா⁴து, அவிஹிம்ஸாதா⁴து.

182. தத்த² கதமா காமதா⁴து? காமபடிஸம்யுத்தோ தக்கோ விதக்கோ ஸங்கப்போ அப்பனா ப்³யப்பனா சேதஸோ அபி⁴னிரோபனா மிச்சா²ஸங்கப்போ – அயம் வுச்சதி காமதா⁴து. ஹேட்ட²தோ அவீசினிரயம் பரியந்தம் கரித்வா உபரிதோ பரனிம்மிதவஸவத்தீ தே³வே அந்தோ கரித்வா யம் ஏதஸ்மிம் அந்தரே ஏத்தா²வசரா ஏத்த² பரியாபன்னா க²ந்த⁴தா⁴துஆயதனா ரூபா [ரூபம் (ஸ்யா.)] வேத³னா ஸஞ்ஞா ஸங்கா²ரா விஞ்ஞாணம் – அயம் வுச்சதி ‘‘காமதா⁴து’’.

தத்த² கதமா ப்³யாபாத³தா⁴து? ப்³யாபாத³படிஸம்யுத்தோ தக்கோ விதக்கோ…பே… மிச்சா²ஸங்கப்போ – அயம் வுச்சதி ‘‘ப்³யாபாத³தா⁴து’’. த³ஸஸு வா ஆகா⁴தவத்தூ²ஸு சித்தஸ்ஸ ஆகா⁴தோ படிகா⁴தோ படிக⁴ம் படிவிரோதோ⁴ கோபோ பகோபோ ஸம்பகோபோ தோ³ஸோ பதோ³ஸோ ஸம்பதோ³ஸோ சித்தஸ்ஸ ப்³யாபத்தி மனோபதோ³ஸோ கோதோ⁴ குஜ்ஜ²னா குஜ்ஜி²தத்தம் தோ³ஸோ து³ஸ்ஸனா து³ஸ்ஸிதத்தம் ப்³யாபத்தி ப்³யாபஜ்ஜனா விரோதோ⁴ படிவிரோதோ⁴ சண்டி³க்கம் அஸுரோபோ அனத்தமனதா சித்தஸ்ஸ – அயம் வுச்சதி ‘‘ப்³யாபாத³தா⁴து’’.

தத்த² கதமா விஹிம்ஸாதா⁴து? விஹிம்ஸாபடிஸம்யுத்தோ தக்கோ விதக்கோ…பே… மிச்சா²ஸங்கப்போ – அயம் வுச்சதி ‘‘விஹிம்ஸாதா⁴து’’. இதே⁴கச்சோ பாணினா வா லேட்³டு³னா வா த³ண்டே³ன வா ஸத்தே²ன வா ரஜ்ஜுயா வா அஞ்ஞதரஞ்ஞதரேன ஸத்தே விஹேடே²தி, யா ஏவரூபா ஹேட²னா விஹேட²னா ஹிம்ஸனா விஹிம்ஸனா ரோஸனா விரோஸனா பரூபகா⁴தோ – அயம் வுச்சதி ‘‘விஹிம்ஸாதா⁴து’’.

தத்த² கதமா நேக்க²ம்மதா⁴து? நேக்க²ம்மபடிஸம்யுத்தோ தக்கோ விதக்கோ…பே… ஸம்மாஸங்கப்போ – அயம் வுச்சதி ‘‘நேக்க²ம்மதா⁴து’’. ஸப்³பே³பி குஸலா த⁴ம்மா ‘‘நேக்க²ம்மதா⁴து’’.

தத்த² கதமா அப்³யாபாத³தா⁴து? அப்³யாபாத³படிஸம்யுத்தோ தக்கோ விதக்கோ…பே… ஸம்மாஸங்கப்போ – அயம் வுச்சதி ‘‘அப்³யாபாத³தா⁴து’’. யா ஸத்தேஸு மேத்தி மேத்தாயனா மேத்தாயிதத்தம் மேத்தாசேதோவிமுத்தி – அயம் வுச்சதி ‘‘அப்³யாபாத³தா⁴து’’.

தத்த² கதமா அவிஹிம்ஸாதா⁴து? அவிஹிம்ஸாபடிஸம்யுத்தோ தக்கோ விதக்கோ ஸங்கப்போ அப்பனா ப்³யப்பனா சேதஸோ அபி⁴னிரோபனா ஸம்மாஸங்கப்போ – அயம் வுச்சதி ‘‘அவிஹிம்ஸாதா⁴து’’. யா ஸத்தேஸு கருணா கருணாயனா கருணாயிதத்தம் கருணாசேதோவிமுத்தி – அயம் வுச்சதி ‘‘அவிஹிம்ஸாதா⁴து’’.

இமா ச² தா⁴துயோ.

இதி இமானி தீணி ச²க்கானி ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா அட்டா²ரஸ தா⁴துயோ ஹோந்தி.

ஸுத்தந்தபா⁴ஜனீயம்.