3. தா⁴துவிப⁴ங்கோ³

1. ஸுத்தந்தபா⁴ஜனீயம்

172. ச² தா⁴துயோ – பத²வீதா⁴து [பட²வீதா⁴து (ஸீ. ஸ்யா.) ஏவமுபரிபி], ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து.

173. தத்த² கதமா பத²வீதா⁴து? பத²வீதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா பத²வீதா⁴து? யம் அஜ்ஜ²த்தம் பச்சத்தம் கக்க²ளம் க²ரிக³தம் கக்க²ளத்தம் கக்க²ளபா⁴வோ அஜ்ஜ²த்தம் உபாதி³ன்னம், ஸேய்யதி²த³ம் – கேஸா லோமா நகா² த³ந்தா தசோ மம்ஸம் ந்ஹாரு [நஹாரு (ஸீ.)] அட்டி² அட்டி²மிஞ்ஜம் [அட்டி²மிஞ்ஜா (ஸீ.)] வக்கம் ஹத³யம் யகனம் கிலோமகம் பிஹகம் பப்பா²ஸம் அந்தம் அந்தகு³ணம் உத³ரியம் கரீஸம், யம் வா பனஞ்ஞம்பி அத்தி² அஜ்ஜ²த்தம் பச்சத்தம் கக்க²ளம் க²ரிக³தம் கக்க²ளத்தம் கக்க²ளபா⁴வோ அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா பத²வீதா⁴து’.

தத்த² கதமா பா³ஹிரா பத²வீதா⁴து? யம் பா³ஹிரம் கக்க²ளம் க²ரிக³தம் கக்க²ளத்தம் கக்க²ளபா⁴வோ ப³ஹித்³தா⁴ அனுபாதி³ன்னம், ஸேய்யதி²த³ம் – அயோ லோஹம் திபு ஸீஸம் ஸஜ்ஜ²ம் [ஸஜ்ஜு² (ஸ்யா.)] முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதங்கோ [லோஹிதங்கோ³ (ஸ்யா. க.), லோஹிதகோ (?)] மஸாரக³ல்லம் திணம் கட்ட²ம் ஸக்க²ரா கட²லம் [கத²லம் (க.)] பூ⁴மி பாஸாணோ பப்³ப³தோ, யம் வா பனஞ்ஞம்பி அத்தி² பா³ஹிரம் கக்க²ளம் க²ரிக³தம் கக்க²ளத்தம் கக்க²ளபா⁴வோ ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா பத²வீதா⁴து’. யா ச அஜ்ஜ²த்திகா பத²வீதா⁴து யா ச பா³ஹிரா பத²வீதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘பத²வீதா⁴து’’.

174. தத்த² கதமா ஆபோதா⁴து? ஆபோதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா ஆபோதா⁴து? யம் அஜ்ஜ²த்தம் பச்சத்தம் ஆபோ ஆபோக³தம் ஸினேஹோ ஸினேஹக³தம் [ஸ்னேஹோ ஸ்னேஹக³தம் (ஸ்யா.)] ப³ந்த⁴னத்தம் ரூபஸ்ஸ அஜ்ஜ²த்தம் உபாதி³ன்னம், ஸேய்யதி²த³ம் – பித்தம் ஸேம்ஹம் புப்³போ³ லோஹிதம் ஸேதோ³ மேதோ³ அஸ்ஸு வஸா கே²ளோ ஸிங்கா⁴ணிகா லஸிகா முத்தம், யம் வா பனஞ்ஞம்பி அத்தி² அஜ்ஜ²த்தம் பச்சத்தம் ஆபோ ஆபோக³தம் ஸினேஹோ ஸினேஹக³தம் ப³ந்த⁴னத்தம் ரூபஸ்ஸ அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா ஆபோதா⁴து’.

தத்த² கதமா பா³ஹிரா ஆபோதா⁴து? யம் பா³ஹிரம் ஆபோ ஆபோக³தம் ஸினேஹோ ஸினேஹக³தம் ப³ந்த⁴னத்தம் ரூபஸ்ஸ ப³ஹித்³தா⁴ அனுபாதி³ன்னம், ஸேய்யதி²த³ம் – மூலரஸோ க²ந்த⁴ரஸோ தசரஸோ பத்தரஸோ புப்ப²ரஸோ ப²லரஸோ கீ²ரம் த³தி⁴ ஸப்பி நவனீதம் தேலம் மது⁴ பா²ணிதம் பு⁴ம்மானி வா உத³கானி அந்தலிக்கா²னி வா, யம் வா பனஞ்ஞம்பி அத்தி² பா³ஹிரம் ஆபோ ஆபோக³தம் ஸினேஹோ ஸினேஹக³தம் ப³ந்த⁴னத்தம் ரூபஸ்ஸ ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா ஆபோதா⁴து’. யா ச அஜ்ஜ²த்திகா ஆபோதா⁴து யா ச பா³ஹிரா ஆபோதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘ஆபோதா⁴து’’.

175. தத்த² கதமா தேஜோதா⁴து? தேஜோதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா தேஜோதா⁴து? யம் அஜ்ஜ²த்தம் பச்சத்தம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் அஜ்ஜ²த்தம் உபாதி³ன்னம், ஸேய்யதி²த³ம் – யேன ச ஸந்தப்பதி யேன ச ஜீரீயதி யேன ச பரிட³ய்ஹதி யேன ச அஸிதபீதகா²யிதஸாயிதம் ஸம்மா பரிணாமம் க³ச்ச²தி, யம் வா பனஞ்ஞம்பி அத்தி² அஜ்ஜ²த்தம் பச்சத்தம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா தேஜோதா⁴து’.

தத்த² கதமா பா³ஹிரா தேஜோதா⁴து? யம் பா³ஹிரம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் ப³ஹித்³தா⁴ அனுபாதி³ன்னம், ஸேய்யதி²த³ம் – கட்ட²க்³கி³ பலாலக்³கி³ [ஸகலிகக்³கி³ (ஸப்³ப³த்த²)] திணக்³கி³ கோ³மயக்³கி³ து²ஸக்³கி³ ஸங்காரக்³கி³ இந்த³க்³கி³ அக்³கி³ஸந்தாபோ ஸூரியஸந்தாபோ கட்ட²ஸன்னிசயஸந்தாபோ திணஸன்னிசயஸந்தாபோ த⁴ஞ்ஞஸன்னிசயஸந்தாபோ ப⁴ண்ட³ஸன்னிசயஸந்தாபோ, யம் வா பனஞ்ஞம்பி அத்தி² பா³ஹிரம் தேஜோ தேஜோக³தம் உஸ்மா உஸ்மாக³தம் உஸுமம் உஸுமக³தம் ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா தேஜோதா⁴து’. யா ச அஜ்ஜ²த்திகா தேஜோதா⁴து யா ச பா³ஹிரா தேஜோதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘தேஜோதா⁴து’’.

176. தத்த² கதமா வாயோதா⁴து? வாயோதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா வாயோதா⁴து? யம் அஜ்ஜ²த்தம் பச்சத்தம் வாயோ வாயோக³தம் த²ம்பி⁴தத்தம் ரூபஸ்ஸ அஜ்ஜ²த்தம் உபாதி³ன்னம், ஸேய்யதி²த³ம் – உத்³த⁴ங்க³மா வாதா அதோ⁴க³மா வாதா குச்சி²ஸயா வாதா கோட்டா²ஸயா [கோட்ட²ஸயா (ஸீ. ஸ்யா.)] வாதா அங்க³மங்கா³னுஸாரினோ வாதா ஸத்த²கவாதா கு²ரகவாதா உப்பலகவாதா அஸ்ஸாஸோ பஸ்ஸாஸோ இதி வா, யம் வா பனஞ்ஞம்பி அத்தி² அஜ்ஜ²த்தம் பச்சத்தம் வாயோ வாயோக³தம் த²ம்பி⁴தத்தம் ரூபஸ்ஸ அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா வாயோதா⁴து’.

தத்த² கதமா பா³ஹிரா வாயோதா⁴து? யம் பா³ஹிரம் வாயோ வாயோக³தம் த²ம்பி⁴தத்தம் ரூபஸ்ஸ ப³ஹித்³தா⁴ அனுபாதி³ன்னம், ஸேய்யதி²த³ம் – புரத்தி²மா வாதா பச்சி²மா வாதா உத்தரா வாதா த³க்கி²ணா வாதா ஸரஜா வாதா அரஜா வாதா ஸீதா வாதா உண்ஹா வாதா பரித்தா வாதா அதி⁴மத்தா வாதா காளவாதா வேரம்ப⁴வாதா பக்க²வாதா ஸுபண்ணவாதா தாலவண்டவாதா விதூ⁴பனவாதா, யம் வா பனஞ்ஞம்பி அத்தி² பா³ஹிரம் வாயோ வாயோக³தம் த²ம்பி⁴தத்தம் ரூபஸ்ஸ ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா வாயோதா⁴து’. யா ச அஜ்ஜ²த்திகா வாயோதா⁴து யா ச பா³ஹிரா வாயோதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘வாயோதா⁴து’’.

177. தத்த² கதமா ஆகாஸதா⁴து? ஆகாஸதா⁴துத்³வயம் – அத்தி² அஜ்ஜ²த்திகா, அத்தி² பா³ஹிரா. தத்த² கதமா அஜ்ஜ²த்திகா ஆகாஸதா⁴து? யம் அஜ்ஜ²த்தம் பச்சத்தம் ஆகாஸோ ஆகாஸக³தம் அக⁴ம் அக⁴க³தம் விவரோ விவரக³தம் அஸம்பு²ட்ட²ம் மம்ஸலோஹிதேஹி அஜ்ஜ²த்தம் உபாதி³ன்னம், ஸேய்யதி²த³ம் – கண்ணச்சி²த்³த³ம் நாஸச்சி²த்³த³ம் முக²த்³வாரம், யேன ச அஸிதபீதகா²யிதஸாயிதம் அஜ்ஜோ²ஹரதி, யத்த² ச அஸிதபீதகா²யிதஸாயிதம் ஸந்திட்ட²தி, யேன ச அஸிதபீதகா²யிதஸாயிதம் அதோ⁴பா⁴க³ம் நிக்க²மதி, யம் வா பனஞ்ஞம்பி அத்தி² அஜ்ஜ²த்தம் பச்சத்தம் ஆகாஸோ ஆகாஸக³தம் அக⁴ம் அக⁴க³தம் விவரோ விவரக³தம் அஸம்பு²ட்ட²ம் மம்ஸலோஹிதேஹி அஜ்ஜ²த்தம் உபாதி³ன்னம் – அயம் வுச்சதி ‘அஜ்ஜ²த்திகா ஆகாஸதா⁴து’.

தத்த² கதமா பா³ஹிரா ஆகாஸதா⁴து? யம் பா³ஹிரம் ஆகாஸோ ஆகாஸக³தம் அக⁴ம் அக⁴க³தம் விவரோ விவரக³தம் அஸம்பு²ட்ட²ம் சதூஹி மஹாபூ⁴தேஹி ப³ஹித்³தா⁴ அனுபாதி³ன்னம் – அயம் வுச்சதி ‘பா³ஹிரா ஆகாஸதா⁴து’. யா ச அஜ்ஜ²த்திகா ஆகாஸதா⁴து யா ச பா³ஹிரா ஆகாஸதா⁴து, ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா – அயம் வுச்சதி ‘‘ஆகாஸதா⁴து’’.

178. தத்த² கதமா விஞ்ஞாணதா⁴து? சக்கு²விஞ்ஞாணதா⁴து, ஸோதவிஞ்ஞாணதா⁴து, கா⁴னவிஞ்ஞாணதா⁴து, ஜிவ்ஹாவிஞ்ஞாணதா⁴து, காயவிஞ்ஞாணதா⁴து, மனோவிஞ்ஞாணதா⁴து – அயம் வுச்சதி ‘‘விஞ்ஞாணதா⁴து’’.

இமா ச² தா⁴துயோ.

179. அபராபி ச² தா⁴துயோ – ஸுக²தா⁴து, து³க்க²தா⁴து, ஸோமனஸ்ஸதா⁴து, தோ³மனஸ்ஸதா⁴து, உபேக்கா²தா⁴து, அவிஜ்ஜாதா⁴து.

180. தத்த² கதமா ஸுக²தா⁴து? யம் காயிகம் ஸாதம் காயிகம் ஸுக²ம் காயஸம்ப²ஸ்ஸஜம் ஸாதம் ஸுக²ம் வேத³யிதம் காயஸம்ப²ஸ்ஸஜா ஸாதா ஸுகா² வேத³னா – அயம் வுச்சதி ‘‘ஸுக²தா⁴து’’.

தத்த² கதமா து³க்க²தா⁴து? யம் காயிகம் அஸாதம் காயிகம் து³க்க²ம் காயஸம்ப²ஸ்ஸஜம் அஸாதம் து³க்க²ம் வேத³யிதம் காயஸம்ப²ஸ்ஸஜா அஸாதா து³க்கா² வேத³னா – அயம் வுச்சதி ‘‘து³க்க²தா⁴து’’.

தத்த² கதமா ஸோமனஸ்ஸதா⁴து? யம் சேதஸிகம் ஸாதம் சேதஸிகம் ஸுக²ம் சேதோஸம்ப²ஸ்ஸஜம் ஸாதம் ஸுக²ம் வேத³யிதம் சேதோஸம்ப²ஸ்ஸஜா ஸாதா ஸுகா² வேத³னா – அயம் வுச்சதி ‘‘ஸோமனஸ்ஸதா⁴து’’.

தத்த² கதமா தோ³மனஸ்ஸதா⁴து? யம் சேதஸிகம் அஸாதம் சேதஸிகம் து³க்க²ம் சேதோஸம்ப²ஸ்ஸஜம் அஸாதம் து³க்க²ம் வேத³யிதம் சேதோஸம்ப²ஸ்ஸஜா அஸாதா து³க்கா² வேத³னா – அயம் வுச்சதி ‘‘தோ³மனஸ்ஸதா⁴து’’.

தத்த² கதமா உபேக்கா²தா⁴து? யம் சேதஸிகம் நேவ ஸாதம் நாஸாதம் சேதோஸம்ப²ஸ்ஸஜம் அது³க்க²மஸுக²ம் வேத³யிதம் சேதோஸம்ப²ஸ்ஸஜா அது³க்க²மஸுகா² வேத³னா – அயம் வுச்சதி ‘‘உபேக்கா²தா⁴து’’.

தத்த² கதமா அவிஜ்ஜாதா⁴து? யம் அஞ்ஞாணம் அத³ஸ்ஸனம் அனபி⁴ஸமயோ அனனுபோ³தோ⁴ அஸம்போ³தோ⁴ அப்படிவேதோ⁴ அஸங்கா³ஹணா அபரியோகா³ஹணா அஸமபேக்க²னா அபச்சவேக்க²ணா அபச்சக்க²கம்மம் து³ம்மேஜ்ஜ²ம் பா³ல்யம் அஸம்பஜஞ்ஞம் மோஹோ பமோஹோ ஸம்மோஹோ அவிஜ்ஜா அவிஜ்ஜோகோ⁴ அவிஜ்ஜாயோகோ³ அவிஜ்ஜானுஸயோ அவிஜ்ஜாபரியுட்டா²னம் அவிஜ்ஜாலங்கீ³ மோஹோ அகுஸலமூலம் – அயம் வுச்சதி ‘‘அவிஜ்ஜாதா⁴து’’.

இமா ச² தா⁴துயோ.

181. அபராபி ச² தா⁴துயோ – காமதா⁴து, ப்³யாபாத³தா⁴து, விஹிம்ஸாதா⁴து, நேக்க²ம்மதா⁴து, அப்³யாபாத³தா⁴து, அவிஹிம்ஸாதா⁴து.

182. தத்த² கதமா காமதா⁴து? காமபடிஸம்யுத்தோ தக்கோ விதக்கோ ஸங்கப்போ அப்பனா ப்³யப்பனா சேதஸோ அபி⁴னிரோபனா மிச்சா²ஸங்கப்போ – அயம் வுச்சதி காமதா⁴து. ஹேட்ட²தோ அவீசினிரயம் பரியந்தம் கரித்வா உபரிதோ பரனிம்மிதவஸவத்தீ தே³வே அந்தோ கரித்வா யம் ஏதஸ்மிம் அந்தரே ஏத்தா²வசரா ஏத்த² பரியாபன்னா க²ந்த⁴தா⁴துஆயதனா ரூபா [ரூபம் (ஸ்யா.)] வேத³னா ஸஞ்ஞா ஸங்கா²ரா விஞ்ஞாணம் – அயம் வுச்சதி ‘‘காமதா⁴து’’.

தத்த² கதமா ப்³யாபாத³தா⁴து? ப்³யாபாத³படிஸம்யுத்தோ தக்கோ விதக்கோ…பே… மிச்சா²ஸங்கப்போ – அயம் வுச்சதி ‘‘ப்³யாபாத³தா⁴து’’. த³ஸஸு வா ஆகா⁴தவத்தூ²ஸு சித்தஸ்ஸ ஆகா⁴தோ படிகா⁴தோ படிக⁴ம் படிவிரோதோ⁴ கோபோ பகோபோ ஸம்பகோபோ தோ³ஸோ பதோ³ஸோ ஸம்பதோ³ஸோ சித்தஸ்ஸ ப்³யாபத்தி மனோபதோ³ஸோ கோதோ⁴ குஜ்ஜ²னா குஜ்ஜி²தத்தம் தோ³ஸோ து³ஸ்ஸனா து³ஸ்ஸிதத்தம் ப்³யாபத்தி ப்³யாபஜ்ஜனா விரோதோ⁴ படிவிரோதோ⁴ சண்டி³க்கம் அஸுரோபோ அனத்தமனதா சித்தஸ்ஸ – அயம் வுச்சதி ‘‘ப்³யாபாத³தா⁴து’’.

தத்த² கதமா விஹிம்ஸாதா⁴து? விஹிம்ஸாபடிஸம்யுத்தோ தக்கோ விதக்கோ…பே… மிச்சா²ஸங்கப்போ – அயம் வுச்சதி ‘‘விஹிம்ஸாதா⁴து’’. இதே⁴கச்சோ பாணினா வா லேட்³டு³னா வா த³ண்டே³ன வா ஸத்தே²ன வா ரஜ்ஜுயா வா அஞ்ஞதரஞ்ஞதரேன ஸத்தே விஹேடே²தி, யா ஏவரூபா ஹேட²னா விஹேட²னா ஹிம்ஸனா விஹிம்ஸனா ரோஸனா விரோஸனா பரூபகா⁴தோ – அயம் வுச்சதி ‘‘விஹிம்ஸாதா⁴து’’.

தத்த² கதமா நேக்க²ம்மதா⁴து? நேக்க²ம்மபடிஸம்யுத்தோ தக்கோ விதக்கோ…பே… ஸம்மாஸங்கப்போ – அயம் வுச்சதி ‘‘நேக்க²ம்மதா⁴து’’. ஸப்³பே³பி குஸலா த⁴ம்மா ‘‘நேக்க²ம்மதா⁴து’’.

தத்த² கதமா அப்³யாபாத³தா⁴து? அப்³யாபாத³படிஸம்யுத்தோ தக்கோ விதக்கோ…பே… ஸம்மாஸங்கப்போ – அயம் வுச்சதி ‘‘அப்³யாபாத³தா⁴து’’. யா ஸத்தேஸு மேத்தி மேத்தாயனா மேத்தாயிதத்தம் மேத்தாசேதோவிமுத்தி – அயம் வுச்சதி ‘‘அப்³யாபாத³தா⁴து’’.

தத்த² கதமா அவிஹிம்ஸாதா⁴து? அவிஹிம்ஸாபடிஸம்யுத்தோ தக்கோ விதக்கோ ஸங்கப்போ அப்பனா ப்³யப்பனா சேதஸோ அபி⁴னிரோபனா ஸம்மாஸங்கப்போ – அயம் வுச்சதி ‘‘அவிஹிம்ஸாதா⁴து’’. யா ஸத்தேஸு கருணா கருணாயனா கருணாயிதத்தம் கருணாசேதோவிமுத்தி – அயம் வுச்சதி ‘‘அவிஹிம்ஸாதா⁴து’’.

இமா ச² தா⁴துயோ.

இதி இமானி தீணி ச²க்கானி ததே³கஜ்ஜ²ம் அபி⁴ஸஞ்ஞூஹித்வா அபி⁴ஸங்கி²பித்வா அட்டா²ரஸ தா⁴துயோ ஹோந்தி.

ஸுத்தந்தபா⁴ஜனீயம்.

2. அபி⁴த⁴ம்மபா⁴ஜனீயம்

183. அட்டா²ரஸ தா⁴துயோ – சக்கு²தா⁴து, ரூபதா⁴து, சக்கு²விஞ்ஞாணதா⁴து, ஸோததா⁴து, ஸத்³த³தா⁴து, ஸோதவிஞ்ஞாணதா⁴து, கா⁴னதா⁴து, க³ந்த⁴தா⁴து, கா⁴னவிஞ்ஞாணதா⁴து, ஜிவ்ஹாதா⁴து, ரஸதா⁴து, ஜிவ்ஹாவிஞ்ஞாணதா⁴து, காயதா⁴து, போ²ட்ட²ப்³ப³தா⁴து, காயவிஞ்ஞாணதா⁴து, மனோதா⁴து, த⁴ம்மதா⁴து, மனோவிஞ்ஞாணதா⁴து.

184. தத்த² கதமா சக்கு²தா⁴து? யம் சக்கு² சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – அயம் வுச்சதி ‘‘சக்கு²தா⁴து’’.

தத்த² கதமா ரூபதா⁴து? யம் ரூபம் சதுன்னம் மஹாபூ⁴தானம் உபாதா³ய வண்ணனிபா⁴…பே… ரூபதா⁴துபேஸா – அயம் வுச்சதி ‘‘ரூபதா⁴து’’.

தத்த² கதமா சக்கு²விஞ்ஞாணதா⁴து? சக்கு²ஞ்ச படிச்ச ரூபே ச உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாசக்கு²விஞ்ஞாணதா⁴து – அயம் வுச்சதி ‘‘சக்கு²விஞ்ஞாணதா⁴து’’.

தத்த² கதமா ஸோததா⁴து? யம் ஸோதம் சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – அயம் வுச்சதி ‘‘ஸோததா⁴து’’.

தத்த² கதமா ஸத்³த³தா⁴து? யோ ஸத்³தோ³ சதுன்னம் மஹாபூ⁴தானம் உபாதா³ய அனித³ஸ்ஸனோ ஸப்படிகோ⁴…பே… ஸத்³த³தா⁴துபேஸா – அயம் வுச்சதி ‘‘ஸத்³த³தா⁴து’’.

தத்த² கதமா ஸோதவிஞ்ஞாணதா⁴து? ஸோதஞ்ச படிச்ச ஸத்³தே³ ச உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாஸோதவிஞ்ஞாணதா⁴து – அயம் வுச்சதி ‘‘ஸோதவிஞ்ஞாணதா⁴து’’.

தத்த² கதமா கா⁴னதா⁴து? யம் கா⁴னம் சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – அயம் வுச்சதி ‘‘கா⁴னதா⁴து’’.

தத்த² கதமா க³ந்த⁴தா⁴து? யோ க³ந்தோ⁴ சதுன்னம் மஹாபூ⁴தானம் உபாதா³ய அனித³ஸ்ஸனோ ஸப்படிகோ⁴…பே… க³ந்த⁴தா⁴துபேஸா – அயம் வுச்சதி ‘‘க³ந்த⁴தா⁴து’’.

தத்த² கதமா கா⁴னவிஞ்ஞாணதா⁴து? கா⁴னஞ்ச படிச்ச க³ந்தே⁴ ச உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாகா⁴னவிஞ்ஞாணதா⁴து – அயம் வுச்சதி ‘‘கா⁴னவிஞ்ஞாணதா⁴து’’.

தத்த² கதமா ஜிவ்ஹாதா⁴து? யா ஜிவ்ஹா சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – அயம் வுச்சதி ‘‘ஜிவ்ஹாதா⁴து’’.

தத்த² கதமா ரஸதா⁴து? யோ ரஸோ சதுன்னம் மஹாபூ⁴தானம் உபாதா³ய அனித³ஸ்ஸனோ ஸப்படிகோ⁴…பே… ரஸதா⁴துபேஸா – அயம் வுச்சதி ‘‘ரஸதா⁴து’’.

தத்த² கதமா ஜிவ்ஹாவிஞ்ஞாணதா⁴து? ஜிவ்ஹஞ்ச படிச்ச ரஸே ச உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாஜிவ்ஹாவிஞ்ஞாணதா⁴து – அயம் வுச்சதி ‘‘ஜிவ்ஹாவிஞ்ஞாணதா⁴து’’.

தத்த² கதமா காயதா⁴து? யோ காயோ சதுன்னம் மஹாபூ⁴தானம் உபாதா³ய பஸாதோ³…பே… ஸுஞ்ஞோ கா³மோபேஸோ – அயம் வுச்சதி ‘‘காயதா⁴து’’.

தத்த² கதமா போ²ட்ட²ப்³ப³தா⁴து? பத²வீதா⁴து…பே… போ²ட்ட²ப்³ப³தா⁴துபேஸா – அயம் வுச்சதி ‘‘போ²ட்ட²ப்³ப³தா⁴து’’.

தத்த² கதமா காயவிஞ்ஞாணதா⁴து? காயஞ்ச படிச்ச போ²ட்ட²ப்³பே³ ச உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாகாயவிஞ்ஞாணதா⁴து – அயம் வுச்சதி ‘‘காயவிஞ்ஞாணதா⁴து’’.

தத்த² கதமா மனோதா⁴து? சக்கு²விஞ்ஞாணதா⁴துயா உப்பஜ்ஜித்வா நிருத்³த⁴ஸமனந்தரா உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாமனோதா⁴து; ஸோதவிஞ்ஞாணதா⁴துயா…பே… கா⁴னவிஞ்ஞாணதா⁴துயா…பே… ஜிவ்ஹாவிஞ்ஞாணதா⁴துயா…பே… காயவிஞ்ஞாணதா⁴துயா உப்பஜ்ஜித்வா நிருத்³த⁴ஸமனந்தரா உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாமனோதா⁴து ஸப்³ப³த⁴ம்மேஸு வா பன பட²மஸமன்னாஹாரோ உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாமனோதா⁴து – அயம் வுச்சதி ‘‘மனோதா⁴து’’.

தத்த² கதமா த⁴ம்மதா⁴து? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, யஞ்ச ரூபம் அனித³ஸ்ஸனஅப்படிக⁴ம் த⁴ம்மாயதனபரியாபன்னம், அஸங்க²தா ச தா⁴து.

தத்த² கதமோ வேத³னாக்க²ந்தோ⁴? ஏகவிதே⁴ன வேத³னாக்க²ந்தோ⁴ – ப²ஸ்ஸஸம்பயுத்தோ. து³விதே⁴ன வேத³னாக்க²ந்தோ⁴ – அத்தி² ஸஹேதுகோ, அத்தி² அஹேதுகோ. திவிதே⁴ன வேத³னாக்க²ந்தோ⁴ – அத்தி² குஸலோ, அத்தி² அகுஸலோ, அத்தி² அப்³யாகதோ…பே… ஏவம் த³ஸவிதே⁴ன வேத³னாக்க²ந்தோ⁴…பே… ஏவம் ப³ஹுவிதே⁴ன வேத³னாக்க²ந்தோ⁴. அயம் வுச்சதி ‘‘வேத³னாக்க²ந்தோ⁴’’.

தத்த² கதமோ ஸஞ்ஞாக்க²ந்தோ⁴? ஏகவிதே⁴ன ஸஞ்ஞாக்க²ந்தோ⁴ – ப²ஸ்ஸஸம்பயுத்தோ. து³விதே⁴ன ஸஞ்ஞாக்க²ந்தோ⁴ – அத்தி² ஸஹேதுகோ, அத்தி² அஹேதுகோ. திவிதே⁴ன ஸஞ்ஞாக்க²ந்தோ⁴ – அத்தி² குஸலோ, அத்தி² அகுஸலோ, அத்தி² அப்³யாகதோ…பே… ஏவம் த³ஸவிதே⁴ன ஸஞ்ஞாக்க²ந்தோ⁴…பே… ஏவம் ப³ஹுவிதே⁴ன ஸஞ்ஞாக்க²ந்தோ⁴. அயம் வுச்சதி ‘‘ஸஞ்ஞாக்க²ந்தோ⁴’’.

தத்த² கதமோ ஸங்கா²ரக்க²ந்தோ⁴? ஏகவிதே⁴ன ஸங்கா²ரக்க²ந்தோ⁴ – சித்தஸம்பயுத்தோ. து³விதே⁴ன ஸங்கா²ரக்க²ந்தோ⁴ – அத்தி² ஹேது, அத்தி² அஹேது. திவிதே⁴ன ஸங்கா²ரக்க²ந்தோ⁴ – அத்தி² குஸலோ, அத்தி² அகுஸலோ, அத்தி² அப்³யாகதோ…பே… ஏவம் த³ஸவிதே⁴ன ஸங்கா²ரக்க²ந்தோ⁴…பே… ஏவம் ப³ஹுவிதே⁴ன ஸங்கா²ரக்க²ந்தோ⁴ – அயம் வுச்சதி ‘‘ஸங்கா²ரக்க²ந்தோ⁴’’.

தத்த² கதமம் ரூபம் அனித³ஸ்ஸனஅப்படிக⁴ம் த⁴ம்மாயதனபரியாபன்னம்? இத்தி²ந்த்³ரியம்…பே… கப³ளீகாரோ ஆஹாரோ – இத³ம் வுச்சதி ரூபம் ‘‘அனித³ஸ்ஸனஅப்படிக⁴ம் த⁴ம்மாயதனபரியாபன்னம்’’.

தத்த² கதமா அஸங்க²தா தா⁴து? ராக³க்க²யோ, தோ³ஸக்க²யோ, மோஹக்க²யோ – அயம் வுச்சதி ‘‘அஸங்க²தா தா⁴து’’. அயம் வுச்சதி ‘‘த⁴ம்மதா⁴து’’.

தத்த² கதமா மனோவிஞ்ஞாணதா⁴து? சக்கு²விஞ்ஞாணதா⁴துயா உப்பஜ்ஜித்வா நிருத்³த⁴ஸமனந்தரா உப்பஜ்ஜதி மனோதா⁴து, மனோதா⁴துயா உப்பஜ்ஜித்வா நிருத்³த⁴ஸமனந்தரா உப்பஜ்ஜதி சித்தம் மனோ மானஸம்…பே… தஜ்ஜாமனோவிஞ்ஞாணதா⁴து; ஸோதவிஞ்ஞாணதா⁴துயா…பே… கா⁴னவிஞ்ஞாணதா⁴துயா …பே… ஜிவ்ஹாவிஞ்ஞாணதா⁴துயா…பே… காயவிஞ்ஞாணதா⁴துயா உப்பஜ்ஜித்வா நிருத்³த⁴ஸமனந்தரா உப்பஜ்ஜதி மனோதா⁴து, மனோதா⁴துயாபி உப்பஜ்ஜித்வா நிருத்³த⁴ஸமனந்தரா உப்பஜ்ஜதி சித்தம் மனோ மானஸம்…பே… தஜ்ஜாமனோவிஞ்ஞாணதா⁴து மனஞ்ச படிச்ச த⁴ம்மே ச உப்பஜ்ஜதி சித்தம் மனோ மானஸம் ஹத³யம் பண்ட³ரம் மனோ மனாயதனம் மனிந்த்³ரியம் விஞ்ஞாணம் விஞ்ஞாணக்க²ந்தோ⁴ தஜ்ஜாமனோவிஞ்ஞாணதா⁴து – அயம் வுச்சதி ‘‘மனோவிஞ்ஞாணதா⁴து’’.

அபி⁴த⁴ம்மபா⁴ஜனீயம்.

3. பஞ்ஹாபுச்ச²கம்

அட்டா²ரஸ தா⁴துயோ – சக்கு²தா⁴து, ரூபதா⁴து, சக்கு²விஞ்ஞாணதா⁴து, ஸோததா⁴து, ஸத்³த³தா⁴து, ஸோதவிஞ்ஞாணதா⁴து, கா⁴னதா⁴து, க³ந்த⁴தா⁴து, கா⁴னவிஞ்ஞாணதா⁴து, ஜிவ்ஹாதா⁴து, ரஸதா⁴து, ஜிவ்ஹாவிஞ்ஞாணதா⁴து, காயதா⁴து, போ²ட்ட²ப்³ப³தா⁴து, காயவிஞ்ஞாணதா⁴து, மனோதா⁴து, த⁴ம்மதா⁴து, மனோவிஞ்ஞாணதா⁴து.

186. அட்டா²ரஸன்னம் தா⁴தூனம் கதி குஸலா, கதி அகுஸலா, கதி அப்³யாகதா…பே… கதி ஸரணா, கதி அரணா?

1. திகம்

187. ஸோளஸ தா⁴துயோ அப்³யாகதா. த்³வே தா⁴துயோ ஸியா குஸலா, ஸியா அகுஸலா, ஸியா அப்³யாகதா. த³ஸ தா⁴துயோ ந வத்தப்³பா³ – ‘‘ஸுகா²ய வேத³னாய ஸம்பயுத்தா’’திபி, ‘‘து³க்கா²ய வேத³னாய ஸம்பயுத்தா’’திபி, ‘‘அது³க்க²மஸுகா²ய வேத³னாய ஸம்பயுத்தா’’திபி. பஞ்ச தா⁴துயோ அது³க்க²மஸுகா²ய வேத³னாய ஸம்பயுத்தா. காயவிஞ்ஞாணதா⁴து ஸியா ஸுகா²ய வேத³னாய ஸம்பயுத்தா, ஸியா து³க்கா²ய வேத³னாய ஸம்பயுத்தா. மனோவிஞ்ஞாணதா⁴து ஸியா ஸுகா²ய வேத³னாய ஸம்பயுத்தா, ஸியா து³க்கா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா. த⁴ம்மதா⁴து ஸியா ஸுகா²ய வேத³னாய ஸம்பயுத்தா, ஸியா து³க்கா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா, ஸியா ந வத்தப்³பா³ – ‘‘ஸுகா²ய வேத³னாய ஸம்பயுத்தா’’திபி, ‘‘து³க்கா²ய வேத³னாய ஸம்பயுத்தா’’திபி, ‘‘அது³க்க²மஸுகா²ய வேத³னாய ஸம்பயுத்தா’’திபி.

த³ஸ தா⁴துயோ நேவவிபாகனவிபாகத⁴ம்மத⁴ம்மா. பஞ்ச தா⁴துயோ விபாகா. மனோதா⁴து ஸியா விபாகா, ஸியா நேவவிபாகனவிபாகத⁴ம்மத⁴ம்மா. த்³வே தா⁴துயோ ஸியா விபாகா, ஸியா விபாகத⁴ம்மத⁴ம்மா, ஸியா நேவவிபாகனவிபாகத⁴ம்மத⁴ம்மா.

த³ஸ தா⁴துயோ உபாதி³ன்னுபாதா³னியா. ஸத்³த³தா⁴து அனுபாதி³ன்னுபாதா³னியா. பஞ்ச தா⁴துயோ ஸியா உபாதி³ன்னுபாதா³னியா, ஸியா அனுபாதி³ன்னுபாதா³னியா. த்³வே தா⁴துயோ ஸியா உபாதி³ன்னுபாதா³னியா, ஸியா அனுபாதி³ன்னுபாதா³னியா, ஸியா அனுபாதி³ன்னஅனுபாதா³னியா.

ஸோளஸ தா⁴துயோ அஸம்கிலிட்ட²ஸம்கிலேஸிகா. த்³வே தா⁴துயோ ஸியா ஸம்கிலிட்ட²ஸம்கிலேஸிகா, ஸியா அஸம்கிலிட்ட²ஸம்கிலேஸிகா, ஸியா அஸம்கிலிட்ட²அஸம்கிலேஸிகா. பன்னரஸ தா⁴துயோ அவிதக்கஅவிசாரா. மனோதா⁴து ஸவிதக்கஸவிசாரா. மனோவிஞ்ஞாணதா⁴து ஸியா ஸவிதக்கஸவிசாரா, ஸியா அவிதக்கவிசாரமத்தா, ஸியா அவிதக்கஅவிசாரா. த⁴ம்மதா⁴து ஸியா ஸவிதக்கஸவிசாரா, ஸியா அவிதக்கவிசாரமத்தா, ஸியா அவிதக்கஅவிசாரா, ஸியா ந வத்தப்³பா³ – ‘‘ஸவிதக்கஸவிசாரா’’திபி, ‘‘அவிதக்கவிசாரமத்தா’’திபி, ‘‘அவிதக்கஅவிசாரா’’திபி. த³ஸ தா⁴துயோ ந வத்தப்³பா³ – ‘‘பீதிஸஹக³தா’’திபி, ‘‘ஸுக²ஸஹக³தா’’திபி, ‘‘உபேக்கா²ஸஹக³தா’’திபி. பஞ்ச தா⁴துயோ உபேக்கா²ஸஹக³தா. காயவிஞ்ஞாணதா⁴து ந பீதிஸஹக³தா, ஸியா ஸுக²ஸஹக³தா, ந உபேக்கா²ஸஹக³தா, ஸியா ந வத்தப்³பா³ – ‘‘ஸுக²ஸஹக³தா’’தி. த்³வே தா⁴துயோ ஸியா பீதிஸஹக³தா, ஸியா ஸுக²ஸஹக³தா, ஸியா உபேக்கா²ஸஹக³தா, ஸியா ந வத்தப்³பா³ – ‘‘பீதிஸஹக³தா’’திபி, ‘‘ஸுக²ஸஹக³தா’’திபி, ‘‘உபேக்கா²ஸஹக³தா’’திபி.

ஸோளஸ தா⁴துயோ நேவ த³ஸ்ஸனேன ந பா⁴வனாய பஹாதப்³பா³. த்³வே தா⁴துயோ ஸியா த³ஸ்ஸனேன பஹாதப்³பா³, ஸியா பா⁴வனாய பஹாதப்³பா³, ஸியா நேவ த³ஸ்ஸனேன ந பா⁴வனாய பஹாதப்³பா³. ஸோளஸ தா⁴துயோ நேவ த³ஸ்ஸனேன ந பா⁴வனாய பஹாதப்³ப³ஹேதுகா. த்³வே தா⁴துயோ ஸியா த³ஸ்ஸனேன பஹாதப்³ப³ஹேதுகா, ஸியா பா⁴வனாய பஹாதப்³ப³ஹேதுகா, ஸியா நேவ த³ஸ்ஸனேன ந பா⁴வனாய பஹாதப்³ப³ஹேதுகா. ஸோளஸ தா⁴துயோ நேவாசயகா³மினாபசயகா³மினோ. த்³வே தா⁴துயோ ஸியா ஆசயகா³மினோ, ஸியா அபசயகா³மினோ, ஸியா நேவாசயகா³மினாபசயகா³மினோ. ஸோளஸ தா⁴துயோ நேவஸேக்க²னாஸேக்கா². த்³வே தா⁴துயோ ஸியா ஸேக்கா², ஸியா அஸேக்கா², ஸியா நேவஸேக்க²னாஸேக்கா².

ஸோளஸ தா⁴துயோ பரித்தா. த்³வே தா⁴துயோ ஸியா பரித்தா, ஸியா மஹக்³க³தா, ஸியா அப்பமாணா. த³ஸ தா⁴துயோ அனாரம்மணா. ச² தா⁴துயோ பரித்தாரம்மணா. த்³வே தா⁴துயோ ஸியா பரித்தாரம்மணா, ஸியா மஹக்³க³தாரம்மணா, ஸியா அப்பமாணாரம்மணா, ஸியா ந வத்தப்³பா³ – ‘‘பரித்தாரம்மணா’’திபி, ‘‘மஹக்³க³தாரம்மணா’’திபி, ‘‘அப்பமாணாரம்மணா’’திபி. ஸோளஸ தா⁴துயோ மஜ்ஜி²மா. த்³வே தா⁴துயோ ஸியா ஹீனா, ஸியா மஜ்ஜி²மா, ஸியா பணீதா. ஸோளஸ தா⁴துயோ அனியதா. த்³வே தா⁴துயோ ஸியா மிச்ச²த்தனியதா, ஸியா ஸம்மத்தனியதா, ஸியா அனியதா.

த³ஸ தா⁴துயோ அனாரம்மணா. ச² தா⁴துயோ ந வத்தப்³பா³ – ‘‘மக்³கா³ரம்மணா’’திபி, ‘‘மக்³க³ஹேதுகா’’திபி, ‘‘மக்³கா³தி⁴பதினோ’’திபி. த்³வே தா⁴துயோ ஸியா மக்³கா³ரம்மணா, ஸியா மக்³க³ஹேதுகா, ஸியா மக்³கா³தி⁴பதினோ, ஸியா ந வத்தப்³பா³ – ‘‘மக்³கா³ரம்மணா’’திபி, ‘‘மக்³க³ஹேதுகா’’திபி, ‘‘மக்³கா³தி⁴பதினோ’’திபி. த³ஸ தா⁴துயோ ஸியா உப்பன்னா, ஸியா உப்பாதி³னோ, ஸியா ந வத்தப்³பா³ – ‘‘அனுப்பன்னா’’தி. ஸத்³த³தா⁴து ஸியா உப்பன்னா, ஸியா அனுப்பன்னா, ஸியா ந வத்தப்³பா³ – ‘‘உப்பாதி³னீ’’தி. ச² தா⁴துயோ ஸியா உப்பன்னா, ஸியா அனுப்பன்னா, ஸியா உப்பாதி³னோ. த⁴ம்மதா⁴து ஸியா உப்பன்னா, ஸியா அனுப்பன்னா, ஸியா உப்பாதி³னீ, ஸியா ந வத்தப்³பா³ – ‘‘உப்பன்னா’’திபி, ‘‘அனுப்பன்னா’’திபி, ‘‘உப்பாதி³னீ’’திபி.

ஸத்தரஸ தா⁴துயோ ஸியா அதீதா, ஸியா அனாக³தா, ஸியா பச்சுப்பன்னா. த⁴ம்மதா⁴து ஸியா அதீதா, ஸியா அனாக³தா, ஸியா பச்சுப்பன்னா, ஸியா ந வத்தப்³பா³ – ‘‘அதீதா’’திபி, ‘‘அனாக³தா’’திபி, ‘‘பச்சுப்பன்னா’’திபி. த³ஸ தா⁴துயோ அனாரம்மணா. ச² தா⁴துயோ பச்சுப்பன்னாரம்மணா. த்³வே தா⁴துயோ ஸியா அதீதாரம்மணா, ஸியா அனாக³தாரம்மணா, ஸியா பச்சுப்பன்னாரம்மணா, ஸியா ந வத்தப்³பா³ – ‘‘அதீதாரம்மணா’’திபி, ‘‘அனாக³தாரம்மணா’’திபி, ‘‘பச்சுப்பன்னாரம்மணா’’திபி; ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴.

த³ஸ தா⁴துயோ அனாரம்மணா. ச² தா⁴துயோ ஸியா அஜ்ஜ²த்தாரம்மணா, ஸியா ப³ஹித்³தா⁴ரம்மணா, ஸியா அஜ்ஜ²த்தப³ஹித்³தா⁴ரம்மணா. த்³வே தா⁴துயோ ஸியா அஜ்ஜ²த்தாரம்மணா, ஸியா ப³ஹித்³தா⁴ரம்மணா, ஸியா அஜ்ஜ²த்தப³ஹித்³தா⁴ரம்மணா, ஸியா ந வத்தப்³பா³ – ‘‘அஜ்ஜ²த்தாரம்மணா’’திபி, ‘‘ப³ஹித்³தா⁴ரம்மணா’’திபி, ‘‘அஜ்ஜ²த்தப³ஹித்³தா⁴ரம்மணா’’திபி. ரூபதா⁴து ஸனித³ஸ்ஸனஸப்படிகா⁴. நவ தா⁴துயோ அனித³ஸ்ஸனஅப்படிகா⁴. அட்ட² தா⁴துயோ அனித³ஸ்ஸனஅப்படிகா⁴.

2. து³கம்

188. ஸத்தரஸ தா⁴துயோ ந ஹேதூ. த⁴ம்மதா⁴து ஸியா ஹேது, ஸியா ந ஹேது. ஸோளஸ தா⁴துயோ அஹேதுகா. த்³வே தா⁴துயோ ஸியா ஸஹேதுகா, ஸியா அஹேதுகா. ஸோளஸ தா⁴துயோ அஹேதுகா. த்³வே தா⁴துயோ ஸியா ஸஹேதுகா, ஸியா அஹேதுகா. ஸோளஸ தா⁴துயோ ஹேதுவிப்பயுத்தா. த்³வே தா⁴துயோ ஸியா ஹேதுஸம்பயுத்தா, ஸியா ஹேதுவிப்பயுத்தா. ஸோளஸ தா⁴துயோ ந வத்தப்³பா³ – ‘‘ஹேது சேவ ஸஹேதுகா சா’’திபி, ‘‘ஸஹேதுகா சேவ ந ச ஹேதூ’’திபி. மனோவிஞ்ஞாணதா⁴து ந வத்தப்³பா³ – ‘‘ஹேது சேவ ஸஹேதுகா சா’’தி, ஸியா ஸஹேதுகா சேவ ந ச ஹேது, ஸியா ந வத்தப்³பா³ – ‘‘ஸஹேதுகா சேவ ந ச ஹேதூ’’தி. த⁴ம்மதா⁴து ஸியா ஹேது சேவ ஸஹேதுகா ச, ஸியா ஸஹேதுகா சேவ ந ச ஹேது, ஸியா ந வத்தப்³பா³ – ‘‘ஹேது சேவ ஸஹேதுகா சா’’திபி, ‘‘ஸஹேதுகா சேவ ந ச ஹேதூ’’திபி. ஸோளஸ தா⁴துயோ ந வத்தப்³பா³ – ‘‘ஹேதூ சேவ ஹேதுஸம்பயுத்தா சா’’திபி, ‘‘ஹேதுஸம்பயுத்தா சேவ ந ச ஹேதூ’’திபி. மனோவிஞ்ஞாணதா⁴து ந வத்தப்³பா³ – ‘‘ஹேது சேவ ஹேதுஸம்பயுத்தா சா’’தி, ஸியா ஹேதுஸம்பயுத்தா சேவ ந ச ஹேது, ஸியா ந வத்தப்³பா³ – ‘‘ஹேதுஸம்பயுத்தா சேவ ந ச ஹேதூ’’தி. த⁴ம்மதா⁴து ஸியா ஹேது சேவ ஹேதுஸம்பயுத்தா ச, ஸியா ஹேதுஸம்பயுத்தா சேவ ந ச ஹேது, ஸியா ந வத்தப்³பா³ – ‘‘ஹேது சேவ ஹேதுஸம்பயுத்தா சா’’திபி, ‘‘ஹேதுஸம்பயுத்தா சேவ ந ச ஹேதூ’’திபி. ஸோளஸ தா⁴துயோ ந ஹேதுஅஹேதுகா. மனோவிஞ்ஞாணதா⁴து ஸியா ந ஹேதுஸஹேதுகா, ஸியா ந ஹேதுஅஹேதுகா. த⁴ம்மதா⁴து ஸியா ந ஹேதுஸஹேதுகா, ஸியா ந ஹேதுஅஹேதுகா, ஸியா ந வத்தப்³பா³ – ‘‘ந ஹேதுஸஹேதுகா’’திபி, ‘‘ந ஹேதுஅஹேதுகா’’திபி.

ஸத்தரஸ தா⁴துயோ ஸப்பச்சயா. த⁴ம்மதா⁴து ஸியா ஸப்பச்சயா, ஸியா அப்பச்சயா. ஸத்தரஸ தா⁴துயோ ஸங்க²தா. த⁴ம்மதா⁴து ஸியா ஸங்க²தா, ஸியா அஸங்க²தா. ரூபதா⁴து ஸனித³ஸ்ஸனா. ஸத்தரஸ தா⁴துயோ அனித³ஸ்ஸனா. த³ஸ தா⁴துயோ ஸப்படிகா⁴. அட்ட² தா⁴துயோ அப்படிகா⁴. த³ஸ தா⁴துயோ ரூபா. ஸத்த தா⁴துயோ அரூபா. த⁴ம்மதா⁴து ஸியா ரூபா, ஸியா அரூபா. ஸோளஸ தா⁴துயோ லோகியா. த்³வே தா⁴துயோ ஸியா லோகியா, ஸியா லோகுத்தரா; கேனசி விஞ்ஞேய்யா, கேனசி ந விஞ்ஞேய்யா.

ஸத்தரஸ தா⁴துயோ நோ ஆஸவா. த⁴ம்மதா⁴து ஸியா ஆஸவா, ஸியா நோ ஆஸவா. ஸோளஸ தா⁴துயோ ஸாஸவா. த்³வே தா⁴துயோ ஸியா ஸாஸவா, ஸியா அனாஸவா. ஸோளஸ தா⁴துயோ ஆஸவவிப்பயுத்தா. த்³வே தா⁴துயோ ஸியா ஆஸவஸம்பயுத்தா, ஸியா ஆஸவவிப்பயுத்தா. ஸோளஸ தா⁴துயோ ந வத்தப்³பா³ – ‘‘ஆஸவா சேவ ஸாஸவா சா’’தி, ‘‘ஸாஸவா சேவ நோ ச ஆஸவா’’. மனோவிஞ்ஞாணதா⁴து ந வத்தப்³பா³ – ‘‘ஆஸவோ சேவ ஸாஸவா சா’’தி, ஸியா ஸாஸவா சேவ நோ ச ஆஸவோ, ஸியா ந வத்தப்³பா³ – ‘‘ஸாஸவா சேவ நோ ச ஆஸவோ’’தி. த⁴ம்மதா⁴து ஸியா ஆஸவோ சேவ ஸாஸவா ச, ஸியா ஸாஸவா சேவ நோ ச ஆஸவோ, ஸியா ந வத்தப்³பா³ – ‘‘ஆஸவோ சேவ ஸாஸவா சா’’திபி, ‘‘ஸாஸவா சேவ நோ ச ஆஸவோ’’திபி.

ஸோளஸ தா⁴துயோ ந வத்தப்³பா³ – ‘‘ஆஸவா சேவ ஆஸவஸம்பயுத்தா சா’’திபி, ‘‘ஆஸவஸம்பயுத்தா சேவ நோ ச ஆஸவா’’திபி. மனோவிஞ்ஞாணதா⁴து ந வத்தப்³பா³ – ‘‘ஆஸவோ சேவ ஆஸவஸம்பயுத்தா சா’’தி, ஸியா ஆஸவஸம்பயுத்தா சேவ நோ ச ஆஸவோ, ஸியா ந வத்தப்³பா³ – ‘‘ஆஸவஸம்பயுத்தா சேவ நோ ச ஆஸவோ’’தி. த⁴ம்மதா⁴து ஸியா ஆஸவோ சேவ ஆஸவஸம்பயுத்தா ச, ஸியா ஆஸவஸம்பயுத்தா சேவ நோ ச ஆஸவோ, ஸியா ந வத்தப்³பா³ – ‘‘ஆஸவோ சேவ ஆஸவஸம்பயுத்தா சா’’திபி, ‘‘ஆஸவஸம்பயுத்தா சேவ நோ ச ஆஸவோ’’திபி. ஸோளஸ தா⁴துயோ ஆஸவவிப்பயுத்தஸாஸவா. த்³வே தா⁴துயோ ஸியா ஆஸவவிப்பயுத்தஸாஸவா, ஸியா ஆஸவவிப்பயுத்தஅனாஸவா, ஸியா ந வத்தப்³பா³ – ‘‘ஆஸவவிப்பயுத்தஸாஸவா’’திபி, ‘‘ஆஸவவிப்பயுத்தஅனாஸவா’’திபி.

ஸத்தரஸ தா⁴துயோ நோ ஸம்யோஜனா. த⁴ம்மதா⁴து ஸியா ஸம்யோஜனம், ஸியா நோ ஸம்யோஜனம். ஸோளஸ தா⁴துயோ ஸம்யோஜனியா. த்³வே தா⁴துயோ ஸியா ஸம்யோஜனியா, ஸியா அஸம்யோஜனியா. ஸோளஸ தா⁴துயோ ஸம்யோஜனவிப்பயுத்தா. த்³வே தா⁴துயோ ஸியா ஸம்யோஜனஸம்பயுத்தா, ஸியா ஸம்யோஜனவிப்பயுத்தா. ஸோளஸ தா⁴துயோ ந வத்தப்³பா³ – ‘‘ஸம்யோஜனா சேவ ஸம்யோஜனியா சா’’தி, ஸம்யோஜனியா சேவ நோ ச ஸம்யோஜனா. மனோவிஞ்ஞாணதா⁴து ந வத்தப்³பா³ – ‘‘ஸம்யோஜனஞ்சேவ ஸம்யோஜனியா சா’’தி, ஸியா ஸம்யோஜனியா சேவ நோ ச ஸம்யோஜனம், ஸியா ந வத்தப்³பா³ – ‘‘ஸம்யோஜனியா சேவ நோ ச ஸம்யோஜன’’ந்தி. த⁴ம்மதா⁴து ஸியா ஸம்யோஜனஞ்சேவ ஸம்யோஜனியா ச, ஸியா ஸம்யோஜனியா சேவ நோ ச ஸம்யோஜனம், ஸியா ந வத்தப்³பா³ – ‘‘ஸம்யோஜனஞ்சேவ ஸம்யோஜனியா சா’’திபி, ‘‘ஸம்யோஜனியா சேவ நோ ச ஸம்யோஜன’’ந்திபி. ஸோளஸ தா⁴துயோ ந வத்தப்³பா³ – ‘‘ஸம்யோஜனா சேவ ஸம்யோஜனஸம்பயுத்தா சா’’திபி, ‘‘ஸம்யோஜனஸம்பயுத்தா சேவ நோ ச ஸம்யோஜனா’’திபி. மனோவிஞ்ஞாணதா⁴து ந வத்தப்³பா³ – ‘‘ஸம்யோஜனஞ்சேவ ஸம்யோஜனஸம்பயுத்தா சா’’தி, ஸியா ஸம்யோஜனஸம்பயுத்தா சேவ நோ ச ஸம்யோஜனம், ஸியா ந வத்தப்³பா³ – ‘‘ஸம்யோஜனஸம்பயுத்தா சேவ நோ ச ஸம்யோஜன’’ந்தி. த⁴ம்மதா⁴து ஸியா ஸம்யோஜனஞ்சேவ ஸம்யோஜனஸம்பயுத்தா ச, ஸியா ஸம்யோஜனஸம்பயுத்தா சேவ நோ ச ஸம்யோஜனம், ஸியா ந வத்தப்³பா³ – ‘‘ஸம்யோஜனஞ்சேவ ஸம்யோஜனஸம்பயுத்தா சா’’திபி, ‘‘ஸம்யோஜனஸம்பயுத்தா சேவ நோ ச ஸம்யோஜன’’ந்திபி. ஸோளஸ தா⁴துயோ ஸம்யோஜனவிப்பயுத்தஸம்யோஜனியா. த்³வே தா⁴துயோ ஸியா ஸம்யோஜனவிப்பயுத்தஸம்யோஜனியா, ஸியா ஸம்யோஜனவிப்பயுத்தஅஸம்யோஜனியா, ஸியா ந வத்தப்³பா³ – ‘‘ஸம்யோஜனவிப்பயுத்தஸம்யோஜனியா’’திபி, ‘‘ஸம்யோஜனவிப்பயுத்தஅஸம்யோஜனியா’’திபி.

ஸத்தரஸ தா⁴துயோ நோ க³ந்தா². த⁴ம்மதா⁴து ஸியா க³ந்தோ², ஸியா நோ க³ந்தோ². ஸோளஸ தா⁴துயோ க³ந்த²னியா. த்³வே தா⁴துயோ ஸியா க³ந்த²னியா, ஸியா அக³ந்த²னியா. ஸோளஸ தா⁴துயோ க³ந்த²விப்பயுத்தா. த்³வே தா⁴துயோ ஸியா க³ந்த²ஸம்பயுத்தா, ஸியா க³ந்த²விப்பயுத்தா. ஸோளஸ தா⁴துயோ ந வத்தப்³பா³ – ‘‘க³ந்தா² சேவ க³ந்த²னியா சா’’தி, க³ந்த²னியா சேவ நோ ச க³ந்தா². மனோவிஞ்ஞாணதா⁴து ந வத்தப்³பா³ – ‘‘க³ந்தோ² சேவ க³ந்த²னியா சா’’தி, ஸியா க³ந்த²னியா சேவ நோ ச க³ந்தோ², ஸியா ந வத்தப்³பா³ – ‘‘க³ந்த²னியா சேவ நோ ச க³ந்தோ²’’தி. த⁴ம்மதா⁴து ஸியா க³ந்தோ² சேவ க³ந்த²னியா ச, ஸியா க³ந்த²னியா சேவ நோ ச க³ந்தோ², ஸியா ந வத்தப்³பா³ – ‘‘க³ந்தோ² சேவ க³ந்த²னியா சா’’திபி, ‘‘க³ந்த²னியா சேவ நோ ச க³ந்தோ²’’திபி. ஸோளஸ தா⁴துயோ ந வத்தப்³பா³ – ‘‘க³ந்தா² சேவ க³ந்த²ஸம்பயுத்தா சா’’திபி, ‘‘க³ந்த²ஸம்பயுத்தா சேவ நோ ச க³ந்தா²’’திபி. மனோவிஞ்ஞாணதா⁴து ந வத்தப்³பா³ – ‘‘க³ந்தோ² சேவ க³ந்த²ஸம்பயுத்தா சா’’தி, ஸியா க³ந்த²ஸம்பயுத்தா சேவ நோ ச க³ந்தோ², ஸியா ந வத்தப்³பா³ – ‘‘க³ந்த²ஸம்பயுத்தா சேவ நோ ச க³ந்தோ²’’தி. த⁴ம்மதா⁴து ஸியா க³ந்தோ² சேவ க³ந்த²ஸம்பயுத்தா ச, ஸியா க³ந்த²ஸம்பயுத்தா சேவ நோ ச க³ந்தோ², ஸியா ந வத்தப்³பா³ – ‘‘க³ந்தோ² சேவ க³ந்த²ஸம்பயுத்தா சா’’திபி, ‘‘க³ந்த²ஸம்பயுத்தா சேவ நோ ச க³ந்தோ²’’திபி. ஸோளஸ தா⁴துயோ க³ந்த²விப்பயுத்தக³ந்த²னியா. த்³வே தா⁴துயோ ஸியா க³ந்த²விப்பயுத்தக³ந்த²னியா, ஸியா க³ந்த²விப்பயுத்தஅக³ந்த²னியா, ஸியா ந வத்தப்³பா³ – ‘‘க³ந்த²விப்பயுத்தக³ந்த²னியா’’திபி, ‘‘க³ந்த²விப்பயுத்தஅக³ந்த²னியா’’திபி.

ஸத்தரஸ தா⁴துயோ நோ ஓகா⁴…பே… நோ யோகா³…பே… நோ நீவரணா. த⁴ம்மதா⁴து ஸியா நீவரணம், ஸியா நோ நீவரணம். ஸோளஸ தா⁴துயோ நீவரணியா. த்³வே தா⁴துயோ ஸியா நீவரணியா, ஸியா அனீவரணியா. ஸோளஸ தா⁴துயோ நீவரணவிப்பயுத்தா. த்³வே தா⁴துயோ ஸியா நீவரணஸம்பயுத்தா, ஸியா நீவரணவிப்பயுத்தா. ஸோளஸ தா⁴துயோ ந வத்தப்³பா³ – ‘‘நீவரணா சேவ நீவரணியா சா’’தி, நீவரணியா சேவ நோ ச நீவரணா. மனோவிஞ்ஞாணதா⁴து ந வத்தப்³பா³ – ‘‘நீவரணஞ்சேவ நீவரணியா சா’’தி, ஸியா நீவரணியா சேவ நோ ச நீவரணம், ஸியா ந வத்தப்³பா³ – ‘‘நீவரணியா சேவ நோ ச நீவரண’’ந்தி. த⁴ம்மதா⁴து ஸியா நீவரணஞ்சேவ நீவரணியா ச, ஸியா நீவரணியா சேவ நோ ச நீவரணம், ஸியா ந வத்தப்³பா³ – ‘‘நீவரணஞ்சேவ நீவரணியா சா’’திபி, ‘‘நீவரணியா சேவ நோ ச நீவரண’’ந்திபி. ஸோளஸ தா⁴துயோ ந வத்தப்³பா³ – ‘‘நீவரணா சேவ நீவரணஸம்பயுத்தா சா’’திபி, ‘‘நீவரணஸம்பயுத்தா சேவ நோ ச நீவரணா’’திபி. மனோவிஞ்ஞாணதா⁴து ந வத்தப்³பா³ – ‘‘நீவரணஞ்சேவ நீவரணஸம்பயுத்தா சா’’தி, ஸியா நீவரணஸம்பயுத்தா சேவ நோ ச நீவரணம், ஸியா ந வத்தப்³பா³ – ‘‘நீவரணஸம்பயுத்தா சேவ நோ ச நீவரண’’ந்தி. த⁴ம்மதா⁴து ஸியா நீவரணஞ்சேவ நீவரணஸம்பயுத்தா ச, ஸியா நீவரணஸம்பயுத்தா சேவ நோ ச நீவரணம், ஸியா ந வத்தப்³பா³ – ‘‘நீவரணஞ்சேவ நீவரணஸம்பயுத்தா சா’’திபி, ‘‘நீவரணஸம்பயுத்தா சேவ நோ ச நீவரண’’ந்திபி. ஸோளஸ தா⁴துயோ நீவரணவிப்பயுத்தனீவரணியா. த்³வே தா⁴துயோ ஸியா நீவரணவிப்பயுத்தனீவரணியா, ஸியா நீவரணவிப்பயுத்தஅனீவரணியா, ஸியா ந வத்தப்³பா³ – ‘‘நீவரணவிப்பயுத்தனீவரணியா’’திபி, ‘‘நீவரணவிப்பயுத்தஅனீவரணியா’’திபி.

ஸத்தரஸ தா⁴துயோ நோ பராமாஸா. த⁴ம்மதா⁴து ஸியா பராமாஸோ, ஸியா நோ பராமாஸோ. ஸோளஸ தா⁴துயோ பராமட்டா². த்³வே தா⁴துயோ ஸியா பராமட்டா², ஸியா அபராமட்டா². ஸோளஸ தா⁴துயோ பராமாஸவிப்பயுத்தா. மனோவிஞ்ஞாணதா⁴து ஸியா பராமாஸஸம்பயுத்தா, ஸியா பராமாஸவிப்பயுத்தா. த⁴ம்மதா⁴து ஸியா பராமாஸஸம்பயுத்தா, ஸியா பராமாஸவிப்பயுத்தா, ஸியா ந வத்தப்³பா³ – ‘‘பராமாஸஸம்பயுத்தா’’திபி, ‘‘பராமாஸவிப்பயுத்தா’’திபி. ஸோளஸ தா⁴துயோ ந வத்தப்³பா³ – ‘‘பராமாஸா சேவ பராமட்டா² சாதி பராமட்டா² சேவ நோ ச பராமாஸா’’. மனோவிஞ்ஞாணதா⁴து ந வத்தப்³பா³ – ‘‘பராமாஸோ சேவ பராமட்டா² சா’’தி, ஸியா பராமட்டா² சேவ நோ ச பராமாஸோ, ஸியா ந வத்தப்³பா³ – ‘‘பராமட்டா² சேவ நோ ச பராமாஸோ’’தி. த⁴ம்மதா⁴து ஸியா பராமாஸோ சேவ பராமட்டா² ச, ஸியா பராமட்டா² சேவ நோ ச பராமாஸோ, ஸியா ந வத்தப்³பா³ – ‘‘பராமாஸோ சேவ பராமட்டா² சா’’திபி, ‘‘பராமட்டா² சேவ நோ ச பராமாஸோ’’திபி. ஸோளஸ தா⁴துயோ பராமாஸவிப்பயுத்தபராமட்டா². த்³வே தா⁴துயோ ஸியா பராமாஸவிப்பயுத்தபராமட்டா², ஸியா பராமாஸவிப்பயுத்தஅபராமட்டா², ஸியா ந வத்தப்³பா³ – ‘‘பராமாஸவிப்பயுத்தபராமட்டா²’’திபி, ‘‘பராமாஸவிப்பயுத்தஅபராமட்டா²’’திபி.

த³ஸ தா⁴துயோ அனாரம்மணா. ஸத்த தா⁴துயோ ஸாரம்மணா. த⁴ம்மதா⁴து ஸியா ஸாரம்மணா, ஸியா அனாரம்மணா. ஸத்த தா⁴துயோ சித்தா. ஏகாத³ஸ தா⁴துயோ நோ சித்தா. ஸத்தரஸ தா⁴துயோ அசேதஸிகா. த⁴ம்மதா⁴து ஸியா சேதஸிகா, ஸியா அசேதஸிகா. த³ஸ தா⁴துயோ சித்தவிப்பயுத்தா. த⁴ம்மதா⁴து ஸியா சித்தஸம்பயுத்தா, ஸியா சித்தவிப்பயுத்தா. ஸத்த தா⁴துயோ ந வத்தப்³பா³ – ‘‘சித்தேன ஸம்பயுத்தா’’திபி, ‘‘சித்தேன விப்பயுத்தா’’திபி. த³ஸ தா⁴துயோ சித்தவிஸம்ஸட்டா². த⁴ம்மதா⁴து ஸியா சித்தஸம்ஸட்டா², ஸியா சித்தவிஸம்ஸட்டா². ஸத்த தா⁴துயோ ந வத்தப்³பா³ – ‘‘சித்தேன ஸம்ஸட்டா²’’திபி, ‘‘சித்தேன விஸம்ஸட்டா²’’திபி.

த்³வாத³ஸ தா⁴துயோ நோ சித்தஸமுட்டா²னா. ச² தா⁴துயோ ஸியா சித்தஸமுட்டா²னா, ஸியா நோ சித்தஸமுட்டா²னா. ஸத்தரஸ தா⁴துயோ நோ சித்தஸஹபு⁴னோ. த⁴ம்மதா⁴து ஸியா சித்தஸஹபூ⁴, ஸியா நோ சித்தஸஹபூ⁴. ஸத்தரஸ தா⁴துயோ நோ சித்தானுபரிவத்தினோ. த⁴ம்மதா⁴து ஸியா சித்தானுபரிவத்தீ, ஸியா நோ சித்தானுபரிவத்தீ. ஸத்தரஸ தா⁴துயோ நோ சித்தஸம்ஸட்ட²ஸமுட்டா²னா. த⁴ம்மதா⁴து ஸியா சித்தஸம்ஸட்ட²ஸமுட்டா²னா, ஸியா நோ சித்தஸம்ஸட்ட²ஸமுட்டா²னா. ஸத்தரஸ தா⁴துயோ நோ சித்தஸம்ஸட்ட²ஸமுட்டா²னஸஹபு⁴னோ. த⁴ம்மதா⁴து ஸியா சித்தஸம்ஸட்ட²ஸமுட்டா²னஸஹபூ⁴, ஸியா நோ சித்தஸம்ஸட்ட²ஸமுட்டா²னஸஹபூ⁴. ஸத்தரஸ தா⁴துயோ நோ சித்தஸம்ஸட்ட²ஸமுட்டா²னானுபரிவத்தினோ. த⁴ம்மதா⁴து ஸியா சித்தஸம்ஸட்ட²ஸமுட்டா²னானுபரிவத்தீ, ஸியா நோ சித்தஸம்ஸட்ட²ஸமுட்டா²னானுபரிவத்தீ. த்³வாத³ஸ தா⁴துயோ அஜ்ஜ²த்திகா. ச² தா⁴துயோ பா³ஹிரா.

நவ தா⁴துயோ உபாதா³. அட்ட² தா⁴துயோ நோ உபாதா³. த⁴ம்மதா⁴து ஸியா உபாதா³, ஸியா நோ உபாதா³. த³ஸ தா⁴துயோ உபாதி³ன்னா. ஸத்³த³தா⁴து அனுபாதி³ன்னா. ஸத்ததா⁴துயோ ஸியா உபாதி³ன்னா, ஸியா அனுபாதி³ன்னா. ஸத்தரஸ தா⁴துயோ நோ உபாதா³னா. த⁴ம்மதா⁴து ஸியா உபாதா³னம், ஸியா நோ உபாதா³னம். ஸோளஸ தா⁴துயோ உபாதா³னியா. த்³வே தா⁴துயோ ஸியா உபாதா³னியா, ஸியா அனுபாதா³னியா. ஸோளஸ தா⁴துயோ உபாதா³னவிப்பயுத்தா. த்³வே தா⁴துயோ ஸியா உபாதா³னஸம்பயுத்தா, ஸியா உபாதா³னவிப்பயுத்தா. ஸோளஸ தா⁴துயோ ந வத்தப்³பா³ – ‘‘உபாதா³னா சேவ உபாதா³னியா சா’’தி, ‘‘உபாதா³னியா சேவ நோ ச உபாதா³னா’’. மனோவிஞ்ஞாணதா⁴து ந வத்தப்³பா³ – ‘‘உபாதா³னஞ்சேவ உபாதா³னியா சா’’தி, ஸியா உபாதா³னியா சேவ நோ ச உபாதா³னம், ஸியா ந வத்தப்³பா³ – ‘‘உபாதா³னியா சேவ நோ ச உபாதா³ன’’ந்தி. த⁴ம்மதா⁴து ஸியா உபாதா³னஞ்சேவ உபாதா³னியா ச, ஸியா உபாதா³னியா சேவ நோ ச உபாதா³னம், ஸியா ந வத்தப்³பா³ – ‘‘உபாதா³னஞ்சேவ உபாதா³னியா சா’’திபி, ‘‘உபாதா³னியா சேவ நோ ச உபாதா³ன’’ந்திபி.

ஸோளஸ தா⁴துயோ ந வத்தப்³பா³ – ‘‘உபாதா³னா சேவ உபாதா³னஸம்பயுத்தா சா’’திபி, ‘‘உபாதா³னஸம்பயுத்தா சேவ நோ ச உபாதா³னா’’திபி. மனோவிஞ்ஞாணதா⁴து ந வத்தப்³பா³ – ‘‘உபாதா³னஞ்சேவ உபாதா³னஸம்பயுத்தா சா’’தி, ஸியா உபாதா³னஸம்பயுத்தா சேவ நோ ச உபாதா³னம், ஸியா ந வத்தப்³பா³ – ‘‘உபாதா³னஸம்பயுத்தா சேவ நோ ச உபாதா³ன’’ந்தி. த⁴ம்மதா⁴து ஸியா உபாதா³னஞ்சேவ உபாதா³னஸம்பயுத்தா ச, ஸியா உபாதா³னஸம்பயுத்தா சேவ நோ ச உபாதா³னம், ஸியா ந வத்தப்³பா³ – ‘‘உபாதா³னஞ்சேவ உபாதா³னஸம்பயுத்தா சா’’திபி, ‘‘உபாதா³னஸம்பயுத்தா சேவ நோ ச உபாதா³ன’’ந்திபி. ஸோளஸ தா⁴துயோ உபாதா³னவிப்பயுத்தஉபாதா³னியா. த்³வே தா⁴துயோ ஸியா உபாதா³னவிப்பயுத்தஉபாதா³னியா, ஸியா உபாதா³னவிப்பயுத்தஅனுபாதா³னியா, ஸியா ந வத்தப்³பா³ – ‘‘உபாதா³னவிப்பயுத்தஉபாதா³னியா’’திபி, ‘‘உபாதா³னவிப்பயுத்தஅனுபாதா³னியா’’திபி.

ஸத்தரஸ தா⁴துயோ நோ கிலேஸா. த⁴ம்மதா⁴து ஸியா கிலேஸா, ஸியா நோ கிலேஸா. ஸோளஸ தா⁴துயோ ஸம்கிலேஸிகா. த்³வே தா⁴துயோ ஸியா ஸம்கிலேஸிகா, ஸியா அஸம்கிலேஸிகா. ஸோளஸ தா⁴துயோ அஸம்கிலிட்டா². த்³வே தா⁴துயோ ஸியா ஸம்கிலிட்டா², ஸியா அஸம்கிலிட்டா². ஸோளஸ தா⁴துயோ கிலேஸவிப்பயுத்தா. த்³வே தா⁴துயோ ஸியா கிலேஸஸம்பயுத்தா, ஸியா கிலேஸவிப்பயுத்தா. ஸோளஸ தா⁴துயோ ந வத்தப்³பா³ – ‘‘கிலேஸா சேவ ஸம்கிலேஸிகா சா’’தி, ஸம்கிலேஸிகா சேவ நோ ச கிலேஸா. மனோவிஞ்ஞாணதா⁴து ந வத்தப்³பா³ – ‘‘கிலேஸோ சேவ ஸம்கிலேஸிகா சா’’தி, ஸியா ஸம்கிலேஸிகா சேவ நோ ச கிலேஸோ, ஸியா ந வத்தப்³பா³ – ‘‘ஸம்கிலேஸிகா சேவ நோ ச கிலேஸோ’’தி. த⁴ம்மதா⁴து ஸியா கிலேஸோ சேவ ஸம்கிலேஸிகா ச, ஸியா ஸம்கிலேஸிகா சேவ நோ ச கிலேஸோ, ஸியா ந வத்தப்³பா³ – ‘‘கிலேஸோ சேவ ஸம்கிலேஸிகா சா’’திபி, ‘‘ஸம்கிலேஸிகா சேவ நோ ச கிலேஸோ’’திபி.

ஸோளஸ தா⁴துயோ ந வத்தப்³பா³ – ‘‘கிலேஸா சேவ ஸம்கிலிட்டா² சா’’திபி, ‘‘ஸம்கிலிட்டா² சேவ நோ ச கிலேஸா’’திபி. மனோவிஞ்ஞாணதா⁴து ந வத்தப்³பா³ – ‘‘கிலேஸோ சேவ ஸம்கிலிட்டா² சா’’தி, ஸியா ஸம்கிலிட்டா² சேவ நோ ச கிலேஸோ, ஸியா ந வத்தப்³பா³ – ‘‘ஸம்கிலிட்டா² சேவ நோ ச கிலேஸோ’’தி. த⁴ம்மதா⁴து ஸியா கிலேஸோ சேவ ஸம்கிலிட்டா² ச, ஸியா ஸம்கிலிட்டா² சேவ நோ ச கிலேஸோ, ஸியா ந வத்தப்³பா³ – ‘‘கிலேஸோ சேவ ஸம்கிலிட்டா² சா’’திபி, ‘‘ஸம்கிலிட்டா² சேவ நோ ச கிலேஸோ’’திபி. ஸோளஸ தா⁴துயோ ந வத்தப்³பா³ – ‘‘கிலேஸா சேவ கிலேஸஸம்பயுத்தா சா’’திபி, ‘‘கிலேஸஸம்பயுத்தா சேவ நோ ச கிலேஸா’’திபி. மனோவிஞ்ஞாணதா⁴து ந வத்தப்³பா³ – ‘‘கிலேஸோ சேவ கிலேஸஸம்பயுத்தா சா’’தி, ஸியா கிலேஸஸம்பயுத்தா சேவ நோ ச கிலேஸோ, ஸியா ந வத்தப்³பா³ – ‘‘கிலேஸஸம்பயுத்தா சேவ நோ ச கிலேஸோ’’தி. த⁴ம்மதா⁴து ஸியா கிலேஸோ சேவ கிலேஸஸம்பயுத்தா ச, ஸியா கிலேஸஸம்பயுத்தா சேவ நோ ச கிலேஸோ, ஸியா ந வத்தப்³பா³ – ‘‘கிலேஸோ சேவ கிலேஸஸம்பயுத்தா சா’’திபி, ‘‘கிலேஸஸம்பயுத்தா சேவ நோ ச கிலேஸோ’’திபி. ஸோளஸ தா⁴துயோ கிலேஸவிப்பயுத்தஸம்கிலேஸிகா. த்³வே தா⁴துயோ ஸியா கிலேஸவிப்பயுத்தஸம்கிலேஸிகா, ஸியா கிலேஸவிப்பயுத்தஅஸம்கிலேஸிகா, ஸியா ந வத்தப்³பா³ – ‘‘கிலேஸவிப்பயுத்தஸம்கிலேஸிகா’’திபி, ‘‘கிலேஸவிப்பயுத்தஅஸம்கிலேஸிகா’’திபி.

ஸோளஸ தா⁴துயோ ந த³ஸ்ஸனேன பஹாதப்³பா³. த்³வே தா⁴துயோ ஸியா த³ஸ்ஸனேன பஹாதப்³பா³, ஸியா ந த³ஸ்ஸனேன பஹாதப்³பா³. ஸோளஸ தா⁴துயோ ந பா⁴வனாய பஹாதப்³பா³. த்³வே தா⁴துயோ ஸியா பா⁴வனாய பஹாதப்³பா³, ஸியா ந பா⁴வனாய பஹாதப்³பா³. ஸோளஸ தா⁴துயோ ந த³ஸ்ஸனேன பஹாதப்³ப³ஹேதுகா. த்³வே தா⁴துயோ ஸியா த³ஸ்ஸனேன பஹாதப்³ப³ஹேதுகா, ஸியா ந த³ஸ்ஸனேன பஹாதப்³ப³ஹேதுகா. ஸோளஸ தா⁴துயோ ந பா⁴வனாய பஹாதப்³ப³ஹேதுகா. த்³வே தா⁴துயோ ஸியா பா⁴வனாய பஹாதப்³ப³ஹேதுகா, ஸியா ந பா⁴வனாய பஹாதப்³ப³ஹேதுகா.

பன்னரஸ தா⁴துயோ அவிதக்கா. மனோதா⁴து ஸவிதக்கா. த்³வே தா⁴துயோ ஸியா ஸவிதக்கா, ஸியா அவிதக்கா. பன்னரஸ தா⁴துயோ அவிசாரா. மனோதா⁴து ஸவிசாரா. த்³வே தா⁴துயோ ஸியா ஸவிசாரா, ஸியா அவிசாரா. ஸோளஸ தா⁴துயோ அப்பீதிகா. த்³வே தா⁴துயோ ஸியா ஸப்பீதிகா, ஸியா அப்பீதிகா. ஸோளஸ தா⁴துயோ ந பீதிஸஹக³தா. த்³வே தா⁴துயோ ஸியா பீதிஸஹக³தா, ஸியா ந பீதிஸஹக³தா. பன்னரஸ தா⁴துயோ ந ஸுக²ஸஹக³தா. திஸ்ஸோ தா⁴துயோ ஸியா ஸுக²ஸஹக³தா, ஸியா ந ஸுக²ஸஹக³தா. ஏகாத³ஸ தா⁴துயோ ந உபேக்கா²ஸஹக³தா. பஞ்ச தா⁴துயோ உபேக்கா²ஸஹக³தா. த்³வே தா⁴துயோ ஸியா உபேக்கா²ஸஹக³தா, ஸியா ந உபேக்கா²ஸஹக³தா.

ஸோளஸ தா⁴துயோ காமாவசரா. த்³வே தா⁴துயோ ஸியா காமாவசரா, ஸியா ந காமாவசரா. ஸோளஸ தா⁴துயோ ந ரூபாவசரா. த்³வே தா⁴துயோ ஸியா ரூபாவசரா, ஸியா ந ரூபாவசரா. ஸோளஸ தா⁴துயோ ந அரூபாவசரா. த்³வே தா⁴துயோ ஸியா அரூபாவசரா, ஸியா ந அரூபாவசரா. ஸோளஸ தா⁴துயோ பரியாபன்னா. த்³வே தா⁴துயோ ஸியா பரியாபன்னா, ஸியா அபரியாபன்னா. ஸோளஸ தா⁴துயோ அனிய்யானிகா. த்³வே தா⁴துயோ ஸியா நிய்யானிகா, ஸியா அனிய்யானிகா. ஸோளஸ தா⁴துயோ அனியதா. த்³வே தா⁴துயோ ஸியா நியதா, ஸியா அனியதா. ஸோளஸ தா⁴துயோ ஸஉத்தரா. த்³வே தா⁴துயோ ஸியா ஸஉத்தரா, ஸியா அனுத்தரா. ஸோளஸ தா⁴துயோ அரணா. த்³வே தா⁴துயோ ஸியா ஸரணா, ஸியா அரணாதி.

பஞ்ஹாபுச்ச²கம்.

தா⁴துவிப⁴ங்கோ³ நிட்டி²தோ.