6. உப்பாத³ககம்மஆயுப்பமாணவாரோ

1. உப்பாத³ககம்மம்

1021. தே³வாதி. தயோ தே³வா – ஸம்முதிதே³வா [ஸம்மதிதே³வா (ஸ்யா.)], உபபத்திதே³வா, விஸுத்³தி⁴தே³வா.

ஸம்முதிதே³வா நாம – ராஜானோ, தே³வியோ, குமாரா.

உபபத்திதே³வா நாம – சாதுமஹாராஜிகே [சாதும்மஹாராஜிகே (ஸீ. ஸ்யா.)] தே³வே உபாதா³ய தது³பரி தே³வா.

விஸுத்³தி⁴தே³வா நாம – அரஹந்தோ வுச்சந்தி.

தா³னம் த³த்வா, ஸீலம் ஸமாதி³யித்வா, உபோஸத²கம்மம் கத்வா கத்த² உபபஜ்ஜந்தி? தா³னம் த³த்வா, ஸீலம் ஸமாதி³யித்வா, உபோஸத²கம்மம் கத்வா அப்பேகச்சே க²த்தியமஹாஸாலானம் ஸஹப்³யதம் உபபஜ்ஜந்தி, அப்பேகச்சே ப்³ராஹ்மணமஹாஸாலானம் ஸஹப்³யதம் உபபஜ்ஜந்தி, அப்பேகச்சே க³ஹபதிமஹாஸாலானம் ஸஹப்³யதம் உபபஜ்ஜந்தி, அப்பேகச்சே சாதுமஹாராஜிகானம் தே³வானம் ஸஹப்³யதம் உபபஜ்ஜந்தி, அப்பேகச்சே தாவதிம்ஸானம் தே³வானம் ஸஹப்³யதம் உபபஜ்ஜந்தி, அப்பேகச்சே யாமானம் தே³வானம் ஸஹப்³யதம் உபபஜ்ஜந்தி, அப்பேகச்சே துஸிதானம் தே³வானம் ஸஹப்³யதம் உபபஜ்ஜந்தி, அப்பேகச்சே நிம்மானரதீனம் தே³வானம் ஸஹப்³யதம் உபபஜ்ஜந்தி, அப்பேகச்சே பரனிம்மிதவஸவத்தீனம் தே³வானம் ஸஹப்³யதம் உபபஜ்ஜந்தி.

2. ஆயுப்பமாணம்

1022. மனுஸ்ஸானம் கித்தகம் ஆயுப்பமாணம்? வஸ்ஸஸதம், அப்பம் வா பி⁴ய்யோ [அப்பம் வா பி⁴ய்யோ வா (ஸ்யா. க.) தீ³. நி. 2.7].

1023. சாதுமஹாராஜிகானம் தே³வானம் கித்தகம் ஆயுப்பமாணம்? யானி மானுஸகானி பஞ்ஞாஸ வஸ்ஸானி, சாதும்மஹாராஜிகானம் தே³வானம் ஏஸோ ஏகோ ரத்திந்தி³வோ [ரத்திதி³வோ (க.) அ. நி. 3.71]. தாய ரத்தியா திம்ஸ ரத்தியோ மாஸோ. தேன மாஸேன த்³வாத³ஸமாஸியோ ஸம்வச்ச²ரோ. தேன ஸம்வச்ச²ரேன தி³ப்³பா³னி பஞ்ச வஸ்ஸஸதானி சாதும்மஹாராஜிகானம் தே³வானம் ஆயுப்பமாணம். மனுஸ்ஸானம் க³ணனாய கித்தகம் ஹோதி? நவுதி வஸ்ஸஸதஸஹஸ்ஸானி.

தாவதிம்ஸானம் தே³வானம் கித்தகம் ஆயுப்பமாணம்? யம் மானுஸகம் வஸ்ஸஸதம், தாவதிம்ஸானம் தே³வானம் ஏஸோ ஏகோ ரத்திந்தி³வோ. தாய ரத்தியா திம்ஸ ரத்தியோ மாஸோ. தேன மாஸேன த்³வாத³ஸமாஸியோ ஸம்வச்ச²ரோ. தேன ஸம்வச்ச²ரேன தி³ப்³ப³ம் வஸ்ஸஸஹஸ்ஸம் தாவதிம்ஸானம் தே³வானம் ஆயுப்பமாணம். மனுஸ்ஸானம் க³ணனாய கித்தகம் ஹோதி? திஸ்ஸோ ச வஸ்ஸகோடியோ ஸட்டி² ச வஸ்ஸஸதஸஹஸ்ஸானி.

யாமானம் தே³வானம் கித்தகம் ஆயுப்பமாணம்? யானி மானுஸகானி த்³வே வஸ்ஸஸதானி, யாமானம் தே³வானம் ஏஸோ ஏகோ ரத்திந்தி³வோ. தாய ரத்தியா திம்ஸரத்தியோ மாஸோ. தேன மாஸேன த்³வாத³ஸமாஸியோ ஸம்வச்ச²ரோ. தேன ஸம்வச்ச²ரேன தி³ப்³பா³னி த்³வே வஸ்ஸஸஹஸ்ஸானி யாமானம் தே³வானம் ஆயுப்பமாணம். மனுஸ்ஸானம் க³ணனாய கித்தகம் ஹோதி? சுத்³த³ஸஞ்ச வஸ்ஸகோடியோ சத்தாரீஸஞ்ச வஸ்ஸஸதஸஹஸ்ஸானி.

துஸிதானம் தே³வானம் கித்தகம் ஆயுப்பமாணம்? யானி மானுஸகானி சத்தாரி வஸ்ஸஸதானி, துஸிதானம் தே³வானம் ஏஸோ ஏகோ ரத்திந்தி³வோ. தாய ரத்தியா திம்ஸரத்தியோ மாஸோ. தேன மாஸேன த்³வாத³ஸமாஸியோ ஸம்வச்ச²ரோ. தேன ஸம்வச்ச²ரேன தி³ப்³பா³னி சத்தாரி வஸ்ஸஸஹஸ்ஸானி துஸிதானம் தே³வானம் ஆயுப்பமாணம். மனுஸ்ஸானம் க³ணனாய கித்தகம் ஹோதி? ஸத்தபஞ்ஞாஸ வஸ்ஸகோடியோ ஸட்டி² ச வஸ்ஸஸதஸஹஸ்ஸானி.

நிம்மானரதீனம் தே³வானம் கித்தகம் ஆயுப்பமாணம்? யானி மானுஸகானி அட்ட² வஸ்ஸஸதானி, நிம்மானரதீனம் தே³வானம் ஏஸோ ஏகோ ரத்திந்தி³வோ. தாய ரத்தியா திம்ஸரத்தியோ மாஸோ. தேன மாஸேன த்³வாத³ஸமாஸியோ ஸம்வச்ச²ரோ. தேன ஸம்வச்ச²ரேன தி³ப்³பா³னி அட்ட² வஸ்ஸஸஹஸ்ஸானி நிம்மானரதீனம் தே³வானம் ஆயுப்பமாணம். மனுஸ்ஸானம் க³ணனாய கித்தகம் ஹோதி? த்³வே வஸ்ஸகோடிஸதானி திம்ஸஞ்ச வஸ்ஸகோடியோ சத்தாரீஸஞ்ச வஸ்ஸஸதஸஹஸ்ஸானி.

பரனிம்மிதவஸவத்தீனம் தே³வானம் கித்தகம் ஆயுப்பமாணம்? யானி மானுஸகானி ஸோளஸ வஸ்ஸஸதானி, பரனிம்மிதவஸவத்தீனம் தே³வானம் ஏஸோ ஏகோ ரத்திந்தி³வோ. தாய ரத்தியா திம்ஸரத்தியோ மாஸோ. தேன மாஸேன த்³வாத³ஸமாஸியோ ஸம்வச்ச²ரோ. தேன ஸம்வச்ச²ரேன தி³ப்³பா³னி ஸோளஸ வஸ்ஸஸஹஸ்ஸானி பரனிம்மிதவஸவத்தீனம் தே³வானம் ஆயுப்பமாணம். மனுஸ்ஸானம் க³ணனாய கித்தகம் ஹோதி? நவ ச வஸ்ஸகோடிஸதானி ஏகவீஸஞ்ச வஸ்ஸகோடியோ ஸட்டி² ச வஸ்ஸஸதஸஹஸ்ஸானீதி.

ச² ஏதே [ச²பி தே (ஸ்யா.)] காமாவசரா, ஸப்³ப³காமஸமித்³தி⁴னோ;

ஸப்³பே³ஸம் ஏகஸங்கா²தோ, ஆயு ப⁴வதி கித்தகோ.

த்³வாத³ஸ கோடிஸதம் தேஸம், அட்ட²வீஸஞ்ச கோடியோ;

பஞ்ஞாஸ ஸதஸஹஸ்ஸானி, வஸ்ஸக்³கே³ன பகாஸிதாதி.

1024. பட²மம் ஜா²னம் பரித்தம் பா⁴வேத்வா கத்த² உபபஜ்ஜந்தி? பட²மம் ஜா²னம் பரித்தம் பா⁴வேத்வா ப்³ரஹ்மபாரிஸஜ்ஜானம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? கப்பஸ்ஸ ததியோ பா⁴கோ³.

பட²மம் ஜா²னம் மஜ்ஜி²மம் பா⁴வேத்வா கத்த² உபபஜ்ஜந்தி? பட²மம் ஜா²னம் மஜ்ஜி²மம் பா⁴வேத்வா ப்³ரஹ்மபுரோஹிதானம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? உபட்³ட⁴கப்போ.

பட²மம் ஜா²னம் பணீதம் பா⁴வேத்வா கத்த² உபபஜ்ஜந்தி? பட²மம் ஜா²னம் பணீதம் பா⁴வேத்வா மஹாப்³ரஹ்மானம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? கப்போ [ஏகோ கப்போ (ஸ்யா.)].

1025. து³தியம் ஜா²னம் பரித்தம் பா⁴வேத்வா கத்த² உபபஜ்ஜந்தி? து³தியம் ஜா²னம் பரித்தம் பா⁴வேத்வா பரித்தாபா⁴னம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? த்³வே கப்பா.

து³தியம் ஜா²னம் மஜ்ஜி²மம் பா⁴வேத்வா கத்த² உபபஜ்ஜந்தி? து³தியம் ஜா²னம் மஜ்ஜி²மம் பா⁴வேத்வா அப்பமாணாபா⁴னம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? சத்தாரோ கப்பா.

து³தியம் ஜா²னம் பணீதம் பா⁴வேத்வா கத்த² உபபஜ்ஜந்தி? து³தியம் ஜா²னம் பணீதம் பா⁴வேத்வா ஆப⁴ஸ்ஸரானம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? அட்ட² கப்பா.

1026. ததியம் ஜா²னம் பரித்தம் பா⁴வேத்வா கத்த² உபபஜ்ஜந்தி? ததியம் ஜா²னம் பரித்தம் பா⁴வேத்வா பரித்தஸுபா⁴னம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? ஸோளஸ கப்பா.

ததியம் ஜா²னம் மஜ்ஜி²மம் பா⁴வேத்வா கத்த² உபபஜ்ஜந்தி? ததியம் ஜா²னம் மஜ்ஜி²மம் பா⁴வேத்வா அப்பமாணஸுபா⁴னம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? பா³த்திம்ஸ கப்பா.

ததியம் ஜா²னம் பணீதம் பா⁴வேத்வா கத்த² உபபஜ்ஜந்தி? ததியம் ஜா²னம் பணீதம் பா⁴வேத்வா ஸுப⁴கிண்ஹானம் தே³வானம் ஸஹப்³யதம் உபபஜ்ஜந்தி. தேஸம் கித்தகம் ஆயுப்பமாணம்? சதுஸட்டி² கப்பா.

1027. சதுத்த²ம் ஜா²னம் பா⁴வேத்வா ஆரம்மணனானத்ததா மனஸிகாரனானத்ததா ச²ந்த³னானத்ததா பணிதி⁴னானத்ததா அதி⁴மோக்க²னானத்ததா அபி⁴னீஹாரனானத்ததா பஞ்ஞானானத்ததா அப்பேகச்சே அஸஞ்ஞஸத்தானம் தே³வானம் ஸஹப்³யதம் உபபஜ்ஜந்தி, அப்பேகச்சே வேஹப்ப²லானம் தே³வானம் ஸஹப்³யதம் உபபஜ்ஜந்தி, அப்பேகச்சே அவிஹானம் தே³வானம் ஸஹப்³யதம் உபபஜ்ஜந்தி, அப்பேகச்சே அதப்பானம் தே³வானம் ஸஹப்³யதம் உபபஜ்ஜந்தி, அப்பேகச்சே ஸுத³ஸ்ஸானம் தே³வானம் ஸஹப்³யதம் உபபஜ்ஜந்தி, அப்பேகச்சே ஸுத³ஸ்ஸீனம் தே³வானம் ஸஹப்³யதம் உபபஜ்ஜந்தி, அப்பேகச்சே அகனிட்டா²னம் தே³வானம் ஸஹப்³யதம் உபபஜ்ஜந்தி, அப்பேகச்சே ஆகாஸானஞ்சாயதனூபகா³னம் தே³வானம் ஸஹப்³யதம் உபபஜ்ஜந்தி, அப்பேகச்சே விஞ்ஞாணஞ்சாயதனூபகா³னம் தே³வானம் ஸஹப்³யதம் உபபஜ்ஜந்தி, அப்பேகச்சே ஆகிஞ்சஞ்ஞாயதனூபகா³னம் தே³வானம் ஸஹப்³யதம் உபபஜ்ஜந்தி, அப்பேகச்சே நேவஸஞ்ஞானாஸஞ்ஞாயதனூபகா³னம் தே³வானம் ஸஹப்³யதம் உபபஜ்ஜந்தி.

அஸஞ்ஞஸத்தானஞ்ச வேஹப்ப²லானஞ்ச தே³வானம் கித்தகம் ஆயுப்பமாணம்? பஞ்சகப்பஸதானி.

அவிஹானம் தே³வானம் கித்தகம் ஆயுப்பமாணம்? கப்பஸஹஸ்ஸம்.

அதப்பானம் தே³வானம் கித்தகம் ஆயுப்பமாணம்? த்³வே கப்பஸஹஸ்ஸானி.

ஸுத³ஸ்ஸானம் தே³வானம் கித்தகம் ஆயுப்பமாணம்? சத்தாரி கப்பஸஹஸ்ஸானி.

ஸுத³ஸ்ஸீனம் தே³வானம் கித்தகம் ஆயுப்பமாணம்? அட்ட² கப்பஸஹஸ்ஸானி.

அகனிட்டா²னம் தே³வானம் கித்தகம் ஆயுப்பமாணம்? ஸோளஸ கப்பஸஹஸ்ஸானி.

1028. ஆகாஸானஞ்சாயதனூபகா³னம் தே³வானம் கித்தகம் ஆயுப்பமாணம்? வீஸதி கப்பஸஹஸ்ஸானி.

விஞ்ஞாணஞ்சாயதனூபகா³னம் தே³வானம் கித்தகம் ஆயுப்பமாணம்? சத்தாரீஸ கப்பஸஹஸ்ஸானி.

ஆகிஞ்சஞ்ஞாயதனூபகா³னம் தே³வானம் கித்தகம் ஆயுப்பமாணம்? ஸட்டி² கப்பஸஹஸ்ஸானி.

நேவஸஞ்ஞானாஸஞ்ஞாயதனூபகா³னம் தே³வானம் கித்தகம் ஆயுப்பமாணம்? சதுராஸீதி கப்பஸஹஸ்ஸானீதி.

1029. உக்கி²த்தா புஞ்ஞதேஜேன, காமரூபக³திம் க³தா.

ப⁴வக்³க³தம்பி [ப⁴வக்³க³ம் வாபி (ஸ்யா.)] ஸம்பத்தா, புனாக³ச்ச²ந்தி [புன க³ச்ச²ந்தி (ஸ்யா.)] து³க்³க³திம்.

தாவ தீ³கா⁴யுகா ஸத்தா, சவந்தி ஆயுஸங்க²யா;

நத்தி² கோசி ப⁴வோ நிச்சோ, இதி வுத்தம் மஹேஸினா.

தஸ்மா ஹி தீ⁴ரா நிபகா, நிபுணா அத்த²சிந்தகா;

ஜராமரணமோக்கா²ய, பா⁴வேந்தி மக்³க³முத்தமம்.

பா⁴வயித்வா ஸுசிம் மக்³க³ம், நிப்³பா³னோக³த⁴கா³மினம்;

ஸப்³பா³ஸவே பரிஞ்ஞாய, பரினிப்³ப³ந்தி அனாஸவாதி.