5. பூ⁴மந்தரத³ஸ்ஸனவாரோ

1020. காமாவசரா த⁴ம்மா, ந காமாவசரா த⁴ம்மா, ரூபாவசரா த⁴ம்மா, ந ரூபாவசரா த⁴ம்மா, அரூபாவசரா த⁴ம்மா, ந அரூபாவசரா த⁴ம்மா, பரியாபன்னா த⁴ம்மா, அபரியாபன்னா த⁴ம்மா.

கதமே த⁴ம்மா காமாவசரா? ஹேட்ட²தோ அவீசினிரயம் பரியந்தம் கரித்வா, உபரிதோ பரனிம்மிதவஸவத்தீ தே³வே அந்தோகரித்வா, யம் ஏதஸ்மிம் அந்தரே ஏத்தா²வசரா ஏத்த² பரியாபன்னா க²ந்த⁴தா⁴துஆயதனா; ரூபம், வேத³னா, ஸஞ்ஞா, ஸங்கா²ரா, விஞ்ஞாணம் – இமே த⁴ம்மா காமாவசரா.

கதமே த⁴ம்மா ந காமாவசரா? ரூபாவசரா, அரூபாவசரா, அபரியாபன்னா – இமே த⁴ம்மா ந காமாவசரா.

கதமே த⁴ம்மா ரூபாவசரா? ஹேட்ட²தோ ப்³ரஹ்மலோகம் பரியந்தம் கரித்வா, உபரிதோ அகனிட்டே² தே³வே அந்தோகரித்வா, யம் ஏதஸ்மிம் அந்தரே ஏத்தா²வசரா ஏத்த² பரியாபன்னா ஸமாபன்னஸ்ஸ வா உபபன்னஸ்ஸ வா தி³ட்ட²த⁴ம்மஸுக²விஹாரிஸ்ஸ வா சித்தசேதஸிகா த⁴ம்மா – இமே த⁴ம்மா ரூபாவசரா.

கதமே த⁴ம்மா ந ரூபாவசரா? காமாவசரா, அரூபாவசரா, அபரியாபன்னா – இமே த⁴ம்மா ந ரூபாவசரா.

கதமே த⁴ம்மா அரூபாவசரா? ஹேட்ட²தோ ஆகாஸானஞ்சாயதனூபகே³ தே³வே பரியந்தம் கரித்வா, உபரிதோ நேவஸஞ்ஞானாஸஞ்ஞாயதனூபகே³ தே³வே அந்தோகரித்வா, யம் ஏதஸ்மிம் அந்தரே ஏத்தா²வசரா ஏத்த² பரியாபன்னா ஸமாபன்னஸ்ஸ வா உபபன்னஸ்ஸ வா தி³ட்ட²த⁴ம்மஸுக²விஹாரிஸ்ஸ வா சித்தசேதஸிகா த⁴ம்மா – இமே த⁴ம்மா அரூபாவசரா.

கதமே த⁴ம்மா ந அரூபாவசரா? காமாவசரா, ரூபாவசரா, அபரியாபன்னா – இமே த⁴ம்மா ந அரூபாவசரா.

கதமே த⁴ம்மா பரியாபன்னா? ஸாஸவா குஸலாகுஸலப்³யாகதா த⁴ம்மா காமாவசரா, ரூபாவசரா, அரூபாவசரா, ரூபக்க²ந்தோ⁴, வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – இமே த⁴ம்மா பரியாபன்னா.

கதமே த⁴ம்மா அபரியாபன்னா? மக்³கா³ ச, மக்³க³ப²லானி ச, அஸங்க²தா ச தா⁴து – இமே த⁴ம்மா அபரியாபன்னா.