4. த⁴ம்மத³ஸ்ஸனவாரோ

1. காமதா⁴து

1007. காமதா⁴துயா உபபத்திக்க²ணே கதி க²ந்தா⁴ பாதுப⁴வந்தி…பே… கதி சித்தானி பாதுப⁴வந்தி?

காமதா⁴துயா உபபத்திக்க²ணே ஸப்³பே³ஸம் பஞ்சக்க²ந்தா⁴ பாதுப⁴வந்தி; கஸ்ஸசி ஏகாத³ஸாயதனானி பாதுப⁴வந்தி; கஸ்ஸசி த³ஸாயதனானி பாதுப⁴வந்தி; கஸ்ஸசி அபரானி த³ஸாயதனானி பாதுப⁴வந்தி; கஸ்ஸசி நவாயதனானி பாதுப⁴வந்தி; கஸ்ஸசி ஸத்தாயதனானி பாதுப⁴வந்தி; கஸ்ஸசி ஏகாத³ஸ தா⁴துயோ பாதுப⁴வந்தி; கஸ்ஸசி த³ஸ தா⁴துயோ பாதுப⁴வந்தி; கஸ்ஸசி அபரா த³ஸ தா⁴துயோ பாதுப⁴வந்தி; கஸ்ஸசி நவ தா⁴துயோ பாதுப⁴வந்தி; கஸ்ஸசி ஸத்த தா⁴துயோ பாதுப⁴வந்தி; ஸப்³பே³ஸம் ஏகம் ஸச்சம் பாதுப⁴வதி; கஸ்ஸசி சுத்³த³ஸிந்த்³ரியானி பாதுப⁴வந்தி; கஸ்ஸசி தேரஸிந்த்³ரியானி பாதுப⁴வந்தி; கஸ்ஸசி அபரானி தேரஸிந்த்³ரியானி பாதுப⁴வந்தி; கஸ்ஸசி த்³வாத³ஸிந்த்³ரியானி பாதுப⁴வந்தி; கஸ்ஸசி த³ஸிந்த்³ரியானி பாதுப⁴வந்தி; கஸ்ஸசி நவிந்த்³ரியானி பாதுப⁴வந்தி; கஸ்ஸசி அபரானி நவிந்த்³ரியானி பாதுப⁴வந்தி; கஸ்ஸசி அட்டி²ந்த்³ரியானி பாதுப⁴வந்தி; கஸ்ஸசி அபரானி அட்டி²ந்த்³ரியானி பாதுப⁴வந்தி; கஸ்ஸசி ஸத்திந்த்³ரியானி பாதுப⁴வந்தி; கஸ்ஸசி பஞ்சிந்த்³ரியானி பாதுப⁴வந்தி; கஸ்ஸசி சத்தாரிந்த்³ரியானி பாதுப⁴வந்தி; கஸ்ஸசி தயோ ஹேதூ பாதுப⁴வந்தி; கஸ்ஸசி த்³வே ஹேதூ பாதுப⁴வந்தி; கஸ்ஸசி [கேசி (ஸ்யா.)] அஹேதுகா பாதுப⁴வந்தி; ஸப்³பே³ஸம் சத்தாரோ ஆஹாரா பாதுப⁴வந்தி; ஸப்³பே³ஸம் ஏகோ ப²ஸ்ஸோ பாதுப⁴வதி; ஸப்³பே³ஸம் ஏகா வேத³னா… ஏகா ஸஞ்ஞா… ஏகா சேதனா… ஏகம் சித்தம் பாதுப⁴வதி.

1008. காமதா⁴துயா உபபத்திக்க²ணே ஸப்³பே³ஸம் கதமே பஞ்சக்க²ந்தா⁴ பாதுப⁴வந்தி? ரூபக்க²ந்தோ⁴…பே… விஞ்ஞாணக்க²ந்தோ⁴ – காமதா⁴துயா உபபத்திக்க²ணே ஸப்³பே³ஸம் இமே பஞ்சக்க²ந்தா⁴ பாதுப⁴வந்தி.

1009. காமதா⁴துயா உபபத்திக்க²ணே கஸ்ஸ ஏகாத³ஸாயதனானி பாதுப⁴வந்தி? காமாவசரானம் தே³வானம், பட²மகப்பிகானம் மனுஸ்ஸானம், ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம், நேரயிகானம் பரிபுண்ணாயதனானம் உபபத்திக்க²ணே ஏகாத³ஸாயதனானி பாதுப⁴வந்தி – சக்கா²யதனம், ரூபாயதனம், ஸோதாயதனம், கா⁴னாயதனம், க³ந்தா⁴யதனம், ஜிவ்ஹாயதனம், ரஸாயதனம், காயாயதனம், போ²ட்ட²ப்³பா³யதனம், மனாயதனம், த⁴ம்மாயதனம். காமதா⁴துயா உபபத்திக்க²ணே ஏதேஸம் இமானி ஏகாத³ஸாயதனானி பாதுப⁴வந்தி.

காமதா⁴துயா உபபத்திக்க²ணே கஸ்ஸ த³ஸாயதனானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சந்தா⁴னம் உபபத்திக்க²ணே த³ஸாயதனானி பாதுப⁴வந்தி – ரூபாயதனம், ஸோதாயதனம், கா⁴னாயதனம், க³ந்தா⁴யதனம், ஜிவ்ஹாயதனம், ரஸாயதனம், காயாயதனம், போ²ட்ட²ப்³பா³யதனம், மனாயதனம், த⁴ம்மாயதனம். காமதா⁴துயா உபபத்திக்க²ணே ஏதேஸம் இமானி த³ஸாயதனானி பாதுப⁴வந்தி.

காமதா⁴துயா உபபத்திக்க²ணே கஸ்ஸ அபரானி த³ஸாயதனானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சப³தி⁴ரானம் உபபத்திக்க²ணே த³ஸாயதனானி பாதுப⁴வந்தி – சக்கா²யதனம், ரூபாயதனம், கா⁴னாயதனம், க³ந்தா⁴யதனம், ஜிவ்ஹாயதனம், ரஸாயதனம், காயாயதனம், போ²ட்ட²ப்³பா³யதனம், மனாயதனம், த⁴ம்மாயதனம். காமதா⁴துயா உபபத்திக்க²ணே ஏதேஸம் இமானி த³ஸாயதனானி பாதுப⁴வந்தி.

காமதா⁴துயா உபபத்திக்க²ணே கஸ்ஸ நவாயதனானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சந்த⁴ப³தி⁴ரானம் உபபத்திக்க²ணே நவாயதனானி பாதுப⁴வந்தி – ரூபாயதனம், கா⁴னாயதனம், க³ந்தா⁴யதனம், ஜிவ்ஹாயதனம், ரஸாயதனம், காயாயதனம், போ²ட்ட²ப்³பா³யதனம், மனாயதனம், த⁴ம்மாயதனம். காமதா⁴துயா உபபத்திக்க²ணே ஏதேஸம் இமானி நவாயதனானி பாதுப⁴வந்தி.

காமதா⁴துயா உபபத்திக்க²ணே கஸ்ஸ ஸத்தாயதனானி பாதுப⁴வந்தி? க³ப்³ப⁴ஸேய்யகானம் ஸத்தானம் உபபத்திக்க²ணே ஸத்தாயதனானி பாதுப⁴வந்தி – ரூபாயதனம், க³ந்தா⁴யதனம், ரஸாயதனம், காயாயதனம், போ²ட்ட²ப்³பா³யதனம், மனாயதனம், த⁴ம்மாயதனம். காமதா⁴துயா உபபத்திக்க²ணே ஏதேஸம் இமானி ஸத்தாயதனானி பாதுப⁴வந்தி.

1010. காமதா⁴துயா உபபத்திக்க²ணே கஸ்ஸ ஏகாத³ஸ தா⁴துயோ பாதுப⁴வந்தி? காமாவசரானம் தே³வானம், பட²மகப்பிகானம் மனுஸ்ஸானம், ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம் பரிபுண்ணாயதனானம் உபபத்திக்க²ணே ஏகாத³ஸ தா⁴துயோ பாதுப⁴வந்தி – சக்கு²தா⁴து, ரூபதா⁴து, ஸோததா⁴து, கா⁴னதா⁴து, க³ந்த⁴தா⁴து, ஜிவ்ஹாதா⁴து, ரஸதா⁴து, காயதா⁴து, போ²ட்ட²ப்³ப³தா⁴து, மனோவிஞ்ஞாணதா⁴து, த⁴ம்மதா⁴து. காமதா⁴துயா உபபத்திக்க²ணே ஏதேஸம் இமா ஏகாத³ஸ தா⁴துயோ பாதுப⁴வந்தி.

காமதா⁴துயா உபபத்திக்க²ணே கஸ்ஸ த³ஸ தா⁴துயோ பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சந்தா⁴னம் உபபத்திக்க²ணே த³ஸ தா⁴துயோ பாதுப⁴வந்தி – ரூபதா⁴து, ஸோததா⁴து, கா⁴னதா⁴து, க³ந்த⁴தா⁴து, ஜிவ்ஹாதா⁴து, ரஸதா⁴து, காயதா⁴து, போ²ட்ட²ப்³ப³தா⁴து, மனோவிஞ்ஞாணதா⁴து, த⁴ம்மதா⁴து. காமதா⁴துயா உபபத்திக்க²ணே ஏதேஸம் இமா த³ஸ தா⁴துயோ பாதுப⁴வந்தி.

காமதா⁴துயா உபபத்திக்க²ணே கஸ்ஸ அபரா த³ஸ தா⁴துயோ பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சப³தி⁴ரானம் உபபத்திக்க²ணே த³ஸ தா⁴துயோ பாதுப⁴வந்தி – சக்கு²தா⁴து, ரூபதா⁴து, கா⁴னதா⁴து, க³ந்த⁴தா⁴து, ஜிவ்ஹாதா⁴து, ரஸதா⁴து, காயதா⁴து, போ²ட்ட²ப்³ப³தா⁴து, மனோவிஞ்ஞாணதா⁴து, த⁴ம்மதா⁴து. காமதா⁴துயா உபபத்திக்க²ணே ஏதேஸம் இமா த³ஸ தா⁴துயோ பாதுப⁴வந்தி.

காமதா⁴துயா உபபத்திக்க²ணே கஸ்ஸ நவ தா⁴துயோ பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சந்த⁴ப³தி⁴ரானம் உபபத்திக்க²ணே நவ தா⁴துயோ பாதுப⁴வந்தி – ரூபதா⁴து, கா⁴னதா⁴து, க³ந்த⁴தா⁴து, ஜிவ்ஹாதா⁴து, ரஸதா⁴து, காயதா⁴து, போ²ட்ட²ப்³ப³தா⁴து, மனோவிஞ்ஞாணதா⁴து, த⁴ம்மதா⁴து. காமதா⁴துயா உபபத்திக்க²ணே ஏதேஸம் இமா நவ தா⁴துயோ பாதுப⁴வந்தி.

காமதா⁴துயா உபபத்திக்க²ணே கஸ்ஸ ஸத்த தா⁴துயோ பாதுப⁴வந்தி? க³ப்³ப⁴ஸேய்யகானம் ஸத்தானம் உபபத்திக்க²ணே ஸத்த தா⁴துயோ பாதுப⁴வந்தி – ரூபதா⁴து, க³ந்த⁴தா⁴து, ரஸதா⁴து, காயதா⁴து, போ²ட்ட²ப்³ப³தா⁴து, மனோவிஞ்ஞாணதா⁴து, த⁴ம்மதா⁴து. காமதா⁴துயா உபபத்திக்க²ணே ஏதேஸம் இமா ஸத்த தா⁴துயோ பாதுப⁴வந்தி.

1011. காமதா⁴துயா உபபத்திக்க²ணே ஸப்³பே³ஸம் கதமம் ஏகம் ஸச்சம் பாதுப⁴வதி? து³க்க²ஸச்சம் – காமதா⁴துயா உபபத்திக்க²ணே ஸப்³பே³ஸம் இத³ம் ஏகம் ஸச்சம் பாதுப⁴வதி.

1012. காமதா⁴துயா உபபத்திக்க²ணே கஸ்ஸ சுத்³த³ஸிந்த்³ரியானி பாதுப⁴வந்தி? காமாவசரானம் தே³வானம், ஸஹேதுகானம் ஞாணஸம்பயுத்தானம் உபபத்திக்க²ணே சுத்³த³ஸிந்த்³ரியானி பாதுப⁴வந்தி – சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். காமதா⁴துயா உபபத்திக்க²ணே ஏதேஸம் இமானி சுத்³த³ஸிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ தேரஸிந்த்³ரியானி பாதுப⁴வந்தி? காமாவசரானம் தே³வானம் ஸஹேதுகானம் ஞாணவிப்பயுத்தானம் உபபத்திக்க²ணே தேரஸிந்த்³ரியானி பாதுப⁴வந்தி – சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம். காமதா⁴துயா உபபத்திக்க²ணே ஏதேஸம் இமானி தேரஸிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ அபரானி தேரஸிந்த்³ரியானி பாதுப⁴வந்தி? பட²மகப்பிகானம் மனுஸ்ஸானம் ஸஹேதுகானம் ஞாணஸம்பயுத்தானம் உபபத்திக்க²ணே தேரஸிந்த்³ரியானி பாதுப⁴வந்தி – சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். காமதா⁴துயா உபபத்திக்க²ணே ஏதேஸம் இமானி தேரஸிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ த்³வாத³ஸிந்த்³ரியானி பாதுப⁴வந்தி? பட²மகப்பிகானம் மனுஸ்ஸானம் ஸஹேதுகானம் ஞாணவிப்பயுத்தானம் உபபத்திக்க²ணே த்³வாத³ஸிந்த்³ரியானி பாதுப⁴வந்தி – சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம். காமதா⁴துயா உபபத்திக்க²ணே ஏதேஸம் இமானி த்³வாத³ஸிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ த³ஸிந்த்³ரியானி பாதுப⁴வந்தி? க³ப்³ப⁴ஸேய்யகானம் ஸத்தானம் ஸஹேதுகானம் ஞாணஸம்பயுத்தானம் உபபத்திக்க²ணே த³ஸிந்த்³ரியானி பாதுப⁴வந்தி – காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். காமதா⁴துயா உபபத்திக்க²ணே ஏதேஸம் இமானி த³ஸிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ நவிந்த்³ரியானி பாதுப⁴வந்தி? க³ப்³ப⁴ஸேய்யகானம் ஸத்தானம் ஸஹேதுகானம் ஞாணவிப்பயுத்தானம் உபபத்திக்க²ணே நவிந்த்³ரியானி பாதுப⁴வந்தி – காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம். காமதா⁴துயா உபபத்திக்க²ணே ஏதேஸம் இமானி நவிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ அபரானி நவிந்த்³ரியானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம் பரிபுண்ணாயதனானம் உபபத்திக்க²ணே நவிந்த்³ரியானி பாதுப⁴வந்தி – சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், உபேக்கி²ந்த்³ரியம். காமதா⁴துயா உபபத்திக்க²ணே ஏதேஸம் இமானி நவிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ அட்டி²ந்த்³ரியானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சந்தா⁴னம் உபபத்திக்க²ணே அட்டி²ந்த்³ரியானி பாதுப⁴வந்தி – ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், உபேக்கி²ந்த்³ரியம். காமதா⁴துயா உபபத்திக்க²ணே ஏதேஸம் இமானி அட்டி²ந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ அபரானி அட்டி²ந்த்³ரியானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சப³தி⁴ரானம் உபபத்திக்க²ணே அட்டி²ந்த்³ரியானி பாதுப⁴வந்தி – சக்கு²ந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம் மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், உபேக்கி²ந்த்³ரியம். காமதா⁴துயா உபபத்திக்க²ணே ஏதேஸம் இமானி அட்டி²ந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ ஸத்திந்த்³ரியானி பாதுப⁴வந்தி? ஓபபாதிகானம் பேதானம், ஓபபாதிகானம் அஸுரானம், ஓபபாதிகானம் திரச்சா²னக³தானம் நேரயிகானம், ஜச்சந்த⁴ப³தி⁴ரானம் உபபத்திக்க²ணே ஸத்திந்த்³ரியானி பாதுப⁴வந்தி – கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், உபேக்கி²ந்த்³ரியம். காமதா⁴துயா உபபத்திக்க²ணே ஏதேஸம் இமானி ஸத்திந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ பஞ்சிந்த்³ரியானி பாதுப⁴வந்தி? க³ப்³ப⁴ஸேய்யகானம் ஸத்தானம் அஹேதுகானம், ட²பேத்வா நபும்ஸகானம், உபபத்திக்க²ணே பஞ்சிந்த்³ரியானி பாதுப⁴வந்தி – காயிந்த்³ரியம், மனிந்த்³ரியம், இத்தி²ந்த்³ரியம் வா புரிஸிந்த்³ரியம் வா, ஜீவிதிந்த்³ரியம், உபேக்கி²ந்த்³ரியம். காமதா⁴துயா உபபத்திக்க²ணே ஏதேஸம் இமானி பஞ்சிந்த்³ரியானி பாதுப⁴வந்தி.

காமதா⁴துயா உபபத்திக்க²ணே கஸ்ஸ சத்தாரிந்த்³ரியானி பாதுப⁴வந்தி? க³ப்³ப⁴ஸேய்யகானம் ஸத்தானம் அஹேதுகானம், நபும்ஸகானம் உபபத்திக்க²ணே சத்தாரிந்த்³ரியானி பாதுப⁴வந்தி – காயிந்த்³ரியம், மனிந்த்³ரியம், ஜீவிதிந்த்³ரியம், உபேக்கி²ந்த்³ரியம். காமதா⁴துயா உபபத்திக்க²ணே ஏதேஸம் இமானி சத்தாரிந்த்³ரியானி பாதுப⁴வந்தி.

1013. காமதா⁴துயா உபபத்திக்க²ணே கஸ்ஸ தயோ ஹேதூ பாதுப⁴வந்தி? காமாவசரானம் தே³வானம், பட²மகப்பிகானம் மனுஸ்ஸானம், க³ப்³ப⁴ஸேய்யகானம் ஸத்தானம் ஸஹேதுகானம் ஞாணஸம்பயுத்தானம் உபபத்திக்க²ணே தயோ ஹேதூ பாதுப⁴வந்தி – அலோபோ⁴ விபாகஹேது, அதோ³ஸோ விபாகஹேது, அமோஹோ விபாகஹேது. காமதா⁴துயா உபபத்திக்க²ணே ஏதேஸம் இமே தயோ ஹேதூ பாதுப⁴வந்தி.

காமதா⁴துயா உபபத்திக்க²ணே கஸ்ஸ த்³வே ஹேதூ பாதுப⁴வந்தி? காமாவசரானம் தே³வானம், பட²மகப்பிகானம் மனுஸ்ஸானம், க³ப்³ப⁴ஸேய்யகானம் ஸத்தானம் ஸஹேதுகானம் ஞாணவிப்பயுத்தானம் உபபத்திக்க²ணே த்³வே ஹேதூ பாதுப⁴வந்தி – அலோபோ⁴ விபாகஹேது, அதோ³ஸோ விபாகஹேது. காமதா⁴துயா உபபத்திக்க²ணே ஏதேஸம் இமே த்³வே ஹேதூ பாதுப⁴வந்தி. அவஸேஸானம் ஸத்தானம் [அவஸேஸா ஸத்தா (?)] அஹேதுகா பாதுப⁴வந்தி.

1014. காமதா⁴துயா உபபத்திக்க²ணே ஸப்³பே³ஸம் கதமே சத்தாரோ ஆஹாரா பாதுப⁴வந்தி. கப³ளீகாரோ ஆஹாரோ, ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – காமதா⁴துயா உபபத்திக்க²ணே ஸப்³பே³ஸம் இமே சத்தாரோ ஆஹாரா பாதுப⁴வந்தி.

காமதா⁴துயா உபபத்திக்க²ணே ஸப்³பே³ஸம் கதமோ ஏகோ ப²ஸ்ஸோ பாதுப⁴வதி? மனோவிஞ்ஞாணதா⁴துஸம்ப²ஸ்ஸோ – காமதா⁴துயா உபபத்திக்க²ணே ஸப்³பே³ஸம் அயம் ஏகோ ப²ஸ்ஸோ பாதுப⁴வதி.

காமதா⁴துயா உபபத்திக்க²ணே ஸப்³பே³ஸம் கதமா ஏகா வேத³னா … ஏகா ஸஞ்ஞா… ஏகா சேதனா… ஏகம் சித்தம் பாதுப⁴வதி? மனோவிஞ்ஞாணதா⁴து – காமதா⁴துயா உபபத்திக்க²ணே ஸப்³பே³ஸம் இத³ம் ஏகம் சித்தம் பாதுப⁴வதி.

2. ரூபதா⁴து

1015. ரூபதா⁴துயா உபபத்திக்க²ணே கதி க²ந்தா⁴ பாதுப⁴வந்தி…பே… கதி சித்தானி பாதுப⁴வந்தி?

ரூபதா⁴துயா உபபத்திக்க²ணே, ட²பேத்வா அஸஞ்ஞஸத்தானம் தே³வானம், பஞ்சக்க²ந்தா⁴ பாதுப⁴வந்தி, பஞ்சாயதனானி பாதுப⁴வந்தி, பஞ்ச தா⁴துயோ பாதுப⁴வந்தி, ஏகம் ஸச்சம் பாதுப⁴வதி, த³ஸிந்த்³ரியானி பாதுப⁴வந்தி, தயோ ஹேதூ பாதுப⁴வந்தி, தயோ ஆஹாரா பாதுப⁴வந்தி, ஏகோ ப²ஸ்ஸோ பாதுப⁴வதி, ஏகா வேத³னா… ஏகா ஸஞ்ஞா… ஏகா சேதனா… ஏகம் சித்தம் பாதுப⁴வதி.

1016. ரூபதா⁴துயா உபபத்திக்க²ணே கதமே பஞ்சக்க²ந்தா⁴ பாதுப⁴வந்தி? ரூபக்க²ந்தோ⁴, வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – ரூபதா⁴துயா உபபத்திக்க²ணே இமே பஞ்சக்க²ந்தா⁴ பாதுப⁴வந்தி.

ரூபதா⁴துயா உபபத்திக்க²ணே கதமானி பஞ்சாயதனானி பாதுப⁴வந்தி? சக்கா²யதனம், ரூபாயதனம், ஸோதாயதனம், மனாயதனம், த⁴ம்மாயதனம் – ரூபதா⁴துயா உபபத்திக்க²ணே இமானி பஞ்சாயதனானி பாதுப⁴வந்தி.

ரூபதா⁴துயா உபபத்திக்க²ணே கதமா பஞ்ச தா⁴துயோ பாதுப⁴வந்தி? சக்கு²தா⁴து, ரூபதா⁴து, ஸோததா⁴து, மனோவிஞ்ஞாணதா⁴து, த⁴ம்மதா⁴து – ரூபதா⁴துயா உபபத்திக்க²ணே இமா பஞ்ச தா⁴துயோ பாதுப⁴வந்தி.

ரூபதா⁴துயா உபபத்திக்க²ணே கதமம் ஏகம் ஸச்சம் பாதுப⁴வதி? து³க்க²ஸச்சம் – ரூபதா⁴துயா உபபத்திக்க²ணே இத³ம் ஏகம் ஸச்சம் பாதுப⁴வதி.

ரூபதா⁴துயா உபபத்திக்க²ணே கதமானி த³ஸிந்த்³ரியானி பாதுப⁴வந்தி? சக்கு²ந்த்³ரியம், ஸோதிந்த்³ரியம், மனிந்த்³ரியம், ஜீவிதிந்த்³ரியம், ஸோமனஸ்ஸிந்த்³ரியம் வா உபேக்கி²ந்த்³ரியம் வா, ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம் – ரூபதா⁴துயா உபபத்திக்க²ணே இமானி த³ஸிந்த்³ரியானி பாதுப⁴வந்தி.

ரூபதா⁴துயா உபபத்திக்க²ணே கதமே தயோ ஹேதூ பாதுப⁴வந்தி? அலோபோ⁴ விபாகஹேது, அதோ³ஸோ விபாகஹேது, அமோஹோ விபாகஹேது – ரூபதா⁴துயா உபபத்திக்க²ணே இமே தயோ ஹேதூ பாதுப⁴வந்தி.

ரூபதா⁴துயா உபபத்திக்க²ணே கதமே தயோ ஆஹாரா பாதுப⁴வந்தி? ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – ரூபதா⁴துயா உபபத்திக்க²ணே இமே தயோ ஆஹாரா பாதுப⁴வந்தி.

ரூபதா⁴துயா உபபத்திக்க²ணே கதமோ ஏகோ ப²ஸ்ஸோ பாதுப⁴வதி? மனோவிஞ்ஞாணதா⁴துஸம்ப²ஸ்ஸோ – ரூபதா⁴துயா உபபத்திக்க²ணே அயம் ஏகோ ப²ஸ்ஸோ பாதுப⁴வதி.

ரூபதா⁴துயா உபபத்திக்க²ணே கதமா ஏகா வேத³னா… ஏகா ஸஞ்ஞா… ஏகா சேதனா… ஏகம் சித்தம் பாதுப⁴வதி? மனோவிஞ்ஞாணதா⁴து – ரூபதா⁴துயா உபபத்திக்க²ணே இத³ம் ஏகம் சித்தம் பாதுப⁴வதி.

3. அஸஞ்ஞஸத்தா

1017. அஸஞ்ஞஸத்தானம் தே³வானம் உபபத்திக்க²ணே கதி க²ந்தா⁴ பாதுப⁴வந்தி…பே… கதி சித்தானி பாதுப⁴வந்தி?

அஸஞ்ஞஸத்தானம் தே³வானம் உபபத்திக்க²ணே ஏகோ க²ந்தோ⁴ பாதுப⁴வதி – ரூபக்க²ந்தோ⁴; த்³வே ஆயதனானி பாதுப⁴வந்தி – ரூபாயதனம், த⁴ம்மாயதனம்; த்³வே தா⁴துயோ பாதுப⁴வந்தி – ரூபதா⁴து, த⁴ம்மதா⁴து; ஏகம் ஸச்சம் பாதுப⁴வதி – து³க்க²ஸச்சம்; ஏகிந்த்³ரியம் பாதுப⁴வதி – ரூபஜீவிதிந்த்³ரியம். அஸஞ்ஞஸத்தா தே³வா அஹேதுகா அனாஹாரா அப²ஸ்ஸகா அவேத³னகா அஸஞ்ஞகா அசேதனகா அசித்தகா பாதுப⁴வந்தி.

4. அரூபதா⁴து

1018. அரூபதா⁴துயா உபபத்திக்க²ணே கதி க²ந்தா⁴ பாதுப⁴வந்தி…பே… கதி சித்தானி பாதுப⁴வந்தி?

அரூபதா⁴துயா உபபத்திக்க²ணே சத்தாரோ க²ந்தா⁴ பாதுப⁴வந்தி, த்³வே ஆயதனானி பாதுப⁴வந்தி, த்³வே தா⁴துயோ பாதுப⁴வந்தி, ஏகம் ஸச்சம் பாதுப⁴வதி, அட்டி²ந்த்³ரியானி பாதுப⁴வந்தி, தயோ ஹேதூ பாதுப⁴வந்தி, தயோ ஆஹாரா பாதுப⁴வந்தி, ஏகோ ப²ஸ்ஸோ பாதுப⁴வதி, ஏகா வேத³னா… ஏகா ஸஞ்ஞா… ஏகா சேதனா… ஏகம் சித்தம் பாதுப⁴வதி.

1019. அரூபதா⁴துயா உபபத்திக்க²ணே கதமே சத்தாரோ க²ந்தா⁴ பாதுப⁴வந்தி? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – அரூபதா⁴துயா உபபத்திக்க²ணே இமே சத்தாரோ க²ந்தா⁴ பாதுப⁴வந்தி.

அரூபதா⁴துயா உபபத்திக்க²ணே கதமானி த்³வே ஆயதனானி பாதுப⁴வந்தி? மனாயதனம், த⁴ம்மாயதனம் – அரூபதா⁴துயா உபபத்திக்க²ணே இமானி த்³வே ஆயதனானி பாதுப⁴வந்தி.

அரூபதா⁴துயா உபபத்திக்க²ணே கதமா த்³வே தா⁴துயோ பாதுப⁴வந்தி? மனோவிஞ்ஞாணதா⁴து, த⁴ம்மதா⁴து – அரூபதா⁴துயா உபபத்திக்க²ணே இமா த்³வே தா⁴துயோ பாதுப⁴வந்தி.

அரூபதா⁴துயா உபபத்திக்க²ணே கதமம் ஏகம் ஸச்சம் பாதுப⁴வதி? து³க்க²ஸச்சம் – அரூபதா⁴துயா உபபத்திக்க²ணே இத³ம் ஏகம் ஸச்சம் பாதுப⁴வதி.

அரூபதா⁴துயா உபபத்திக்க²ணே கதமானி அட்டி²ந்த்³ரியானி பாதுப⁴வந்தி? மனிந்த்³ரியம், ஜீவிதிந்த்³ரியம், உபேக்கி²ந்த்³ரியம், ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம் – அரூபதா⁴துயா உபபத்திக்க²ணே இமானி அட்டி²ந்த்³ரியானி பாதுப⁴வந்தி.

அரூபதா⁴துயா உபபத்திக்க²ணே கதமே தயோ ஹேதூ பாதுப⁴வந்தி? அலோபோ⁴ விபாகஹேது, அதோ³ஸோ விபாகஹேது, அமோஹோ விபாகஹேது – அரூபதா⁴துயா உபபத்திக்க²ணே இமே தயோ ஹேதூ பாதுப⁴வந்தி.

அரூபதா⁴துயா உபபத்திக்க²ணே கதமே தயோ ஆஹாரா பாதுப⁴வந்தி? ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – அரூபதா⁴துயா உபபத்திக்க²ணே இமே தயோ ஆஹாரா பாதுப⁴வந்தி.

அரூபதா⁴துயா உபபத்திக்க²ணே கதமோ ஏகோ ப²ஸ்ஸோ பாதுப⁴வதி? மனோவிஞ்ஞாணதா⁴துஸம்ப²ஸ்ஸோ – அரூபதா⁴துயா உபபத்திக்க²ணே அயம் ஏகோ ப²ஸ்ஸோ பாதுப⁴வதி.

அரூபதா⁴துயா உபபத்திக்க²ணே கதமா ஏகா வேத³னா…பே… ஏகா ஸஞ்ஞா… ஏகா சேதனா… ஏகம் சித்தம் பாதுப⁴வதி? மனோவிஞ்ஞாணதா⁴து – அரூபதா⁴துயா உபபத்திக்க²ணே இத³ம் ஏகம் சித்தம் பாதுப⁴வதி.