3. அரூபதா⁴து

1003. பஞ்சன்னம் க²ந்தா⁴னம் கதி அரூபதா⁴துபரியாபன்னா, கதி ந அரூபதா⁴துபரியாபன்னா…பே… ஸத்தன்னம் சித்தானம் கதி அரூபதா⁴துபரியாபன்னா, கதி ந அரூபதா⁴துபரியாபன்னா?

1004. ரூபக்க²ந்தோ⁴ ந அரூபதா⁴துபரியாபன்னோ; சத்தாரோ க²ந்தா⁴ ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.

த³ஸாயதனா ந அரூபதா⁴துபரியாபன்னா; த்³வே ஆயதனா ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.

ஸோளஸ தா⁴துயோ ந அரூபதா⁴துபரியாபன்னா; த்³வே தா⁴துயோ ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.

தீணி ஸச்சானி ந அரூபதா⁴துபரியாபன்னானி.

து³க்க²ஸச்சம் ஸியா அரூபதா⁴துபரியாபன்னம், ஸியா ந அரூபதா⁴துபரியாபன்னம்.

சுத்³த³ஸிந்த்³ரியா ந அரூபதா⁴துபரியாபன்னா; அட்டி²ந்த்³ரியா ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.

தயோ அகுஸலஹேதூ ந அரூபதா⁴துபரியாபன்னா; ச² ஹேதூ ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.

கப³ளீகாரோ ஆஹாரோ ந அரூபதா⁴துபரியாபன்னோ; தயோ ஆஹாரா ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.

ச² ப²ஸ்ஸா ந அரூபதா⁴துபரியாபன்னா; மனோவிஞ்ஞாணதா⁴துஸம்ப²ஸ்ஸோ ஸியா அரூபதா⁴துபரியாபன்னோ, ஸியா ந அரூபதா⁴துபரியாபன்னோ.

ச² வேத³னா…பே… ச² ஸஞ்ஞா … ச² சேதனா… ச² சித்தா ந அரூபதா⁴துபரியாபன்னா; மனோவிஞ்ஞாணதா⁴து ஸியா அரூபதா⁴துபரியாபன்னா, ஸியா ந அரூபதா⁴துபரியாபன்னா.