4. அபரியாபன்னம்

997. அபரியாபன்னே கதி க²ந்தா⁴…பே… கதி சித்தானி?

அபரியாபன்னே சத்தாரோ க²ந்தா⁴, த்³வே ஆயதனானி, த்³வே தா⁴துயோ, த்³வே ஸச்சானி, த்³வாத³ஸிந்த்³ரியானி, ச² ஹேதூ, தயோ ஆஹாரா, ஏகோ ப²ஸ்ஸோ, ஏகா வேத³னா, ஏகா ஸஞ்ஞா, ஏகா சேதனா, ஏகம் சித்தம்.

998. தத்த² கதமே அபரியாபன்னே சத்தாரோ க²ந்தா⁴? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – இமே வுச்சந்தி ‘‘அபரியாபன்னே சத்தாரோ க²ந்தா⁴’’.

தத்த² கதமானி அபரியாபன்னே த்³வே ஆயதனானி? மனாயதனம், த⁴ம்மாயதனம் – இமானி வுச்சந்தி ‘‘அபரியாபன்னே த்³வே ஆயதனானி’’.

தத்த² கதமா அபரியாபன்னே த்³வே தா⁴துயோ? மனோவிஞ்ஞாணதா⁴து, த⁴ம்மதா⁴து – இமா வுச்சந்தி ‘‘அபரியாபன்னே த்³வே தா⁴துயோ’’.

தத்த² கதமானி அபரியாபன்னே த்³வே ஸச்சானி? மக்³க³ஸச்சம், நிரோத⁴ஸச்சம் – இமானி வுச்சந்தி ‘‘அபரியாபன்னே த்³வே ஸச்சானி’’.

தத்த² கதமானி அபரியாபன்னே த்³வாத³ஸிந்த்³ரியானி? மனிந்த்³ரியம், ஜீவிதிந்த்³ரியம், ஸோமனஸ்ஸிந்த்³ரியம், உபேக்கி²ந்த்³ரியம், ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம், அனஞ்ஞாதஞ்ஞஸ்ஸாமீதிந்த்³ரியம், அஞ்ஞிந்த்³ரியம், அஞ்ஞாதாவிந்த்³ரியம் – இமானி வுச்சந்தி ‘‘அபரியாபன்னே த்³வாத³ஸிந்த்³ரியானி’’.

தத்த² கதமே அபரியாபன்னே ச² ஹேதூ? தயோ குஸலஹேதூ, தயோ அப்³யாகதஹேதூ.

தத்த² கதமே தயோ குஸலஹேதூ? அலோபோ⁴ குஸலஹேது, அதோ³ஸோ குஸலஹேது, அமோஹோ குஸலஹேது – இமே தயோ குஸலஹேதூ.

தத்த² கதமே தயோ அப்³யாகதஹேதூ? குஸலானம் த⁴ம்மானம் விபாகதோ அலோபோ⁴, அதோ³ஸோ, அமோஹோ – இமே தயோ அப்³யாகதஹேதூ. இமே வுச்சந்தி ‘‘அபரியாபன்னே ச² ஹேதூ’’.

தத்த² கதமே அபரியாபன்னே தயோ ஆஹாரா? ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – இமே வுச்சந்தி ‘‘அபரியாபன்னே தயோ ஆஹாரா’’.

தத்த² கதமோ அபரியாபன்னே ஏகோ ப²ஸ்ஸோ? மனோவிஞ்ஞாணதா⁴துஸம்ப²ஸ்ஸோ – அயம் வுச்சதி ‘‘அபரியாபன்னே ஏகோ ப²ஸ்ஸோ’’.

தத்த² கதமா அபரியாபன்னே ஏகா வேத³னா…பே… ஏகா ஸஞ்ஞா…பே… ஏகா சேதனா…பே… ஏகம் சித்தம்? மனோவிஞ்ஞாணதா⁴து – இத³ம் வுச்சதி ‘‘அபரியாபன்னே ஏகம் சித்தம்’’.