3. அரூபதா⁴து

995. அரூபதா⁴துயா கதி க²ந்தா⁴…பே… கதி சித்தானி?

அரூபதா⁴துயா சத்தாரோ க²ந்தா⁴, த்³வே ஆயதனானி, த்³வே தா⁴துயோ, தீணி ஸச்சானி, ஏகாத³ஸிந்த்³ரியானி, அட்ட² ஹேதூ, தயோ ஆஹாரா, ஏகோ ப²ஸ்ஸோ, ஏகா வேத³னா, ஏகா ஸஞ்ஞா, ஏகா சேதனா, ஏகம் சித்தம்.

996. தத்த² கதமே அரூபதா⁴துயா சத்தாரோ க²ந்தா⁴? வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – இமே வுச்சந்தி ‘‘அரூபதா⁴துயா சத்தாரோ க²ந்தா⁴’’.

தத்த² கதமானி அரூபதா⁴துயா த்³வே ஆயதனானி? மனாயதனம், த⁴ம்மாயதனம் – இமானி வுச்சந்தி ‘‘அரூபதா⁴துயா த்³வே ஆயதனானி’’.

தத்த² கதமா அரூபதா⁴துயா த்³வே தா⁴துயோ? மனோவிஞ்ஞாணதா⁴து, த⁴ம்மதா⁴து – இமா வுச்சந்தி ‘‘அரூபதா⁴துயா த்³வே தா⁴துயோ’’.

தத்த² கதமானி அரூபதா⁴துயா தீணி ஸச்சானி? து³க்க²ஸச்சம், ஸமுத³யஸச்சம், மக்³க³ஸச்சம் – இமானி வுச்சந்தி ‘‘அரூபதா⁴துயா தீணி ஸச்சானி’’.

தத்த² கதமானி அரூபதா⁴துயா ஏகாத³ஸிந்த்³ரியானி? மனிந்த்³ரியம், ஜீவிதிந்த்³ரியம், ஸோமனஸ்ஸிந்த்³ரியம், உபேக்கி²ந்த்³ரியம், ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம், அஞ்ஞிந்த்³ரியம், அஞ்ஞாதாவிந்த்³ரியம் – இமானி வுச்சந்தி ‘‘அரூபதா⁴துயா ஏகாத³ஸிந்த்³ரியானி’’.

தத்த² கதமே அரூபதா⁴துயா அட்ட² ஹேதூ? தயோ குஸலஹேதூ, த்³வே அகுஸலஹேதூ, தயோ அப்³யாகதஹேதூ…பே… இமே வுச்சந்தி ‘‘அரூபதா⁴துயா அட்ட² ஹேதூ’’.

தத்த² கதமே அரூபதா⁴துயா தயோ ஆஹாரா? ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – இமே வுச்சந்தி ‘‘அரூபதா⁴துயா தயோ ஆஹாரா’’.

தத்த² கதமோ அரூபதா⁴துயா ஏகோ ப²ஸ்ஸோ? மனோவிஞ்ஞாணதா⁴துஸம்ப²ஸ்ஸோ – அயம் வுச்சதி ‘‘அரூபதா⁴துயா ஏகோ ப²ஸ்ஸோ’’.

தத்த² கதமா அரூபதா⁴துயா ஏகா வேத³னா…பே… ஏகா ஸஞ்ஞா…பே… ஏகா சேதனா…பே… ஏகம் சித்தம்? மனோவிஞ்ஞாணதா⁴து – இத³ம் வுச்சதி ‘‘அரூபதா⁴துயா ஏகம் சித்தம்’’.