2. ரூபதா⁴து

993. ரூபதா⁴துயா கதி க²ந்தா⁴, கதி ஆயதனா, கதி தா⁴துயோ, கதி ஸச்சானி, கதி இந்த்³ரியானி…பே… கதி சித்தானி?

ரூபதா⁴துயா பஞ்சக்க²ந்தா⁴, ச² ஆயதனானி, நவ தா⁴துயோ, தீணி ஸச்சானி, சுத்³த³ஸிந்த்³ரியானி, அட்ட² ஹேதூ, தயோ ஆஹாரா, சத்தாரோ ப²ஸ்ஸா, சதஸ்ஸோ வேத³னா, சதஸ்ஸோ ஸஞ்ஞா, சதஸ்ஸோ சேதனா, சத்தாரி சித்தானி.

994. தத்த² கதமே ரூபதா⁴துயா பஞ்சக்க²ந்தா⁴? ரூபக்க²ந்தோ⁴, வேத³னாக்க²ந்தோ⁴, ஸஞ்ஞாக்க²ந்தோ⁴, ஸங்கா²ரக்க²ந்தோ⁴, விஞ்ஞாணக்க²ந்தோ⁴ – இமே வுச்சந்தி ‘‘ரூபதா⁴துயா பஞ்சக்க²ந்தா⁴’’.

தத்த² கதமானி ரூபதா⁴துயா ச² ஆயதனானி? சக்கா²யதனம், ரூபாயதனம், ஸோதாயதனம், ஸத்³தா³யதனம், மனாயதனம், த⁴ம்மாயதனம் – இமானி வுச்சந்தி ‘‘ரூபதா⁴துயா ச² ஆயதனானி’’.

தத்த² கதமா ரூபதா⁴துயா நவ தா⁴துயோ? சக்கு²தா⁴து, ரூபதா⁴து, சக்கு²விஞ்ஞாணதா⁴து, ஸோததா⁴து, ஸத்³த³தா⁴து, ஸோதவிஞ்ஞாணதா⁴து, மனோதா⁴து, த⁴ம்மதா⁴து, மனோவிஞ்ஞாணதா⁴து – இமா வுச்சந்தி ‘‘ரூபதா⁴துயா நவ தா⁴துயோ’’.

தத்த² கதமானி ரூபதா⁴துயா தீணி ஸச்சானி? து³க்க²ஸச்சம், ஸமுத³யஸச்சம், மக்³க³ஸச்சம் – இமானி வுச்சந்தி ‘‘ரூபதா⁴துயா தீணி ஸச்சானி’’.

தத்த² கதமானி ரூபதா⁴துயா சுத்³த³ஸிந்த்³ரியானி? சக்கு²ந்த்³ரியம், ஸோதிந்த்³ரியம், மனிந்த்³ரியம், ஜீவிதிந்த்³ரியம், ஸோமனஸ்ஸிந்த்³ரியம், உபேக்கி²ந்த்³ரியம், ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம், அனஞ்ஞாதஞ்ஞஸ்ஸாமீதிந்த்³ரியம், அஞ்ஞிந்த்³ரியம், அஞ்ஞாதாவிந்த்³ரியம் – இமானி வுச்சந்தி ‘‘ரூபதா⁴துயா சுத்³த³ஸிந்த்³ரியானி’’.

தத்த² கதமே ரூபதா⁴துயா அட்ட² ஹேதூ? தயோ குஸலஹேதூ, த்³வே அகுஸலஹேதூ, தயோ அப்³யாகதஹேதூ.

தத்த² கதமே தயோ குஸலஹேதூ? அலோபோ⁴ குஸலஹேது, அதோ³ஸோ குஸலஹேது, அமோஹோ குஸலஹேது – இமே தயோ குஸலஹேதூ.

தத்த² கதமே த்³வே அகுஸலஹேதூ? லோபோ⁴ அகுஸலஹேது, மோஹோ அகுஸலஹேது – இமே த்³வே அகுஸலஹேதூ.

தத்த² கதமே தயோ அப்³யாகதஹேதூ? குஸலானம் வா த⁴ம்மானம் விபாகதோ கிரியாப்³யாகதேஸு வா த⁴ம்மேஸு அலோபோ⁴, அதோ³ஸோ, அமோஹோ – இமே தயோ அப்³யாகதஹேதூ. இமே வுச்சந்தி ரூபதா⁴துயா அட்ட² ஹேதூ.

தத்த² கதமே ரூபதா⁴துயா தயோ ஆஹாரா? ப²ஸ்ஸாஹாரோ, மனோஸஞ்சேதனாஹாரோ, விஞ்ஞாணாஹாரோ – இமே வுச்சந்தி ‘‘ரூபதா⁴துயா தயோ ஆஹாரா’’.

தத்த² கதமே ரூபதா⁴துயா சத்தாரோ ப²ஸ்ஸா? சக்கு²ஸம்ப²ஸ்ஸோ, ஸோதஸம்ப²ஸ்ஸோ, மனோதா⁴துஸம்ப²ஸ்ஸோ, மனோவிஞ்ஞாணதா⁴துஸம்ப²ஸ்ஸோ – இமே வுச்சந்தி ‘‘ரூபதா⁴துயா சத்தாரோ ப²ஸ்ஸா’’.

தத்த² கதமா ரூபதா⁴துயா சதஸ்ஸோ வேத³னா…பே… சதஸ்ஸோ ஸஞ்ஞா…பே… சதஸ்ஸோ சேதனா…பே… சத்தாரி சித்தானி? சக்கு²விஞ்ஞாணம், ஸோதவிஞ்ஞாணம், மனோதா⁴து, மனோவிஞ்ஞாணதா⁴து – இமானி வுச்சந்தி ‘‘ரூபதா⁴துயா சத்தாரி சித்தானி’’.