7. ஸத்தகனித்³தே³ஸோ

806. தத்த² கதமானி ஸத்தஸத்ததி ஞாணவத்தூ²னி? ஜாதிபச்சயா ஜராமரணந்தி ஞாணம், அஸதி ஜாதியா நத்தி² ஜராமரணந்தி ஞாணம், அதீதம்பி அத்³தா⁴னம் ஜாதிபச்சயா ஜராமரணந்தி ஞாணம், அஸதி ஜாதியா நத்தி² ஜராமரணந்தி ஞாணம், அனாக³தம்பி அத்³தா⁴னம் ஜாதிபச்சயா ஜராமரணந்தி ஞாணம், அஸதி ஜாதியா நத்தி² ஜராமரணந்தி ஞாணம். யம்பிஸ்ஸ தம் த⁴ம்மட்டி²திஞாணம் தம்பி க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி ஞாணம்; ப⁴வபச்சயா ஜாதீதி ஞாணம்…பே… உபாதா³னபச்சயா ப⁴வோதி ஞாணம்…பே… தண்ஹாபச்சயா உபாதா³னந்தி ஞாணம்…பே… வேத³னாபச்சயா தண்ஹாதி ஞாணம்…பே… ப²ஸ்ஸபச்சயா வேத³னாதி ஞாணம்…பே… ஸளாயதனபச்சயா ப²ஸ்ஸோதி ஞாணம்…பே… நாமரூபபச்சயா ஸளாயதனந்தி ஞாணம்…பே… விஞ்ஞாணபச்சயா நாமரூபந்தி ஞாணம்…பே… ஸங்கா²ரபச்சயா விஞ்ஞாணந்தி ஞாணம்…பே… அவிஜ்ஜாபச்சயா ஸங்கா²ராதி ஞாணம், அஸதி அவிஜ்ஜாய நத்தி² ஸங்கா²ராதி ஞாணம், அதீதம்பி அத்³தா⁴னம் அவிஜ்ஜாபச்சயா ஸங்கா²ராதி ஞாணம், அஸதி அவிஜ்ஜாய நத்தி² ஸங்கா²ராதி ஞாணம், அனாக³தம்பி அத்³தா⁴னம் அவிஜ்ஜாபச்சயா ஸங்கா²ராதி ஞாணம், அஸதி அவிஜ்ஜாய நத்தி² ஸங்கா²ராதி ஞாணம். யம்பிஸ்ஸ தம் த⁴ம்மட்டி²திஞாணம் தம்பி க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மந்தி ஞாணம். இமானி ஸத்தஸத்ததி ஞாணவத்தூ²னி. ஏவம் ஸத்தவிதே⁴ன ஞாணவத்து².

ஸத்தகம்.