1. திகம்

749. ஸியா குஸலா, ஸியா அப்³யாகதா. ஸியா ஸுகா²ய வேத³னாய ஸம்பயுத்தா, ஸியா அது³க்க²மஸுகா²ய வேத³னாய ஸம்பயுத்தா. திஸ்ஸோ படிஸம்பி⁴தா³ ஸியா விபாகத⁴ம்மத⁴ம்மா, ஸியா நேவவிபாகனவிபாகத⁴ம்மத⁴ம்மா; அத்த²படிஸம்பி⁴தா³ ஸியா விபாகா, ஸியா விபாகத⁴ம்மத⁴ம்மா, ஸியா நேவவிபாகனவிபாகத⁴ம்மத⁴ம்மா. திஸ்ஸோ படிஸம்பி⁴தா³ அனுபாதி³ன்னுபாதா³னியா; அத்த²படிஸம்பி⁴தா³ ஸியா அனுபாதி³ன்னுபாதா³னியா, ஸியா அனுபாதி³ன்னஅனுபாதா³னியா. திஸ்ஸோ படிஸம்பி⁴தா³ அஸம்கிலிட்ட²அஸம்கிலேஸிகா; அத்த²படிஸம்பி⁴தா³ ஸியா அஸம்கிலிட்ட²ஸம்கிலேஸிகா, ஸியா அஸம்கிலிட்ட²அஸம்கிலேஸிகா.

திஸ்ஸோ படிஸம்பி⁴தா³ ஸவிதக்கஸவிசாரா; அத்த²படிஸம்பி⁴தா³ ஸியா ஸவிதக்கஸவிசாரா, ஸியா அவிதக்கவிசாரமத்தா, ஸியா அவிதக்கஅவிசாரா. ஸியா பீதிஸஹக³தா, ஸியா ஸுக²ஸஹக³தா, ஸியா உபேக்கா²ஸஹக³தா. நேவ த³ஸ்ஸனேன ந பா⁴வனாய பஹாதப்³பா³. நேவ த³ஸ்ஸனேன ந பா⁴வனாய பஹாதப்³ப³ஹேதுகா.

திஸ்ஸோ படிஸம்பி⁴தா³ ஸியா ஆசயகா³மினோ, ஸியா நேவாசயகா³மினாபசயகா³மினோ; அத்த²படிஸம்பி⁴தா³ ஸியா ஆசயகா³மினீ, ஸியா அபசயகா³மினீ, ஸியா நேவாசயகா³மினாபசயகா³மினீ.

திஸ்ஸோ படிஸம்பி⁴தா³ நேவஸேக்க²னாஸேக்கா², அத்த²படிஸம்பி⁴தா³ ஸியா ஸேக்கா², ஸியா அஸேக்கா², ஸியா நேவஸேக்க²னாஸேக்கா². திஸ்ஸோ படிஸம்பி⁴தா³ பரித்தா; அத்த²படிஸம்பி⁴தா³ ஸியா பரித்தா, ஸியா அப்பமாணா. நிருத்திபடிஸம்பி⁴தா³ பரித்தாரம்மணா; திஸ்ஸோ படிஸம்பி⁴தா³ ஸியா பரித்தாரம்மணா, ஸியா மஹக்³க³தாரம்மணா, ஸியா அப்பமாணாரம்மணா.

திஸ்ஸோ படிஸம்பி⁴தா³ மஜ்ஜி²மா; அத்த²படிஸம்பி⁴தா³ ஸியா மஜ்ஜி²மா, ஸியா பணீதா. திஸ்ஸோ படிஸம்பி⁴தா³ அனியதா; அத்த²படிஸம்பி⁴தா³ ஸியா ஸம்மத்தனியதா, ஸியா அனியதா. நிருத்திபடிஸம்பி⁴தா³ ந வத்தப்³பா³ – மக்³கா³ரம்மணாதிபி, மக்³க³ஹேதுகாதிபி, மக்³கா³தி⁴பதினீதிபி; அத்த²படிஸம்பி⁴தா³ ந மக்³கா³ரம்மணா, ஸியா மக்³க³ஹேதுகா, ஸியா மக்³கா³தி⁴பதினீ, ஸியா ந வத்தப்³பா³ மக்³க³ஹேதுகாதிபி, மக்³கா³தி⁴பதினீதிபி; த்³வே படிஸம்பி⁴தா³ ஸியா மக்³கா³ரம்மணா, ந மக்³க³ஹேதுகா, ஸியா மக்³கா³தி⁴பதினோ, ஸியா ந வத்தப்³பா³ மக்³கா³ரம்மணாதிபி, மக்³கா³தி⁴பதினோதிபி.

திஸ்ஸோ படிஸம்பி⁴தா³ ஸியா உப்பன்னா, ஸியா அனுப்பன்னா, ந வத்தப்³பா³ உப்பாதி³னோதி; அத்த²படிஸம்பி⁴தா³ ஸியா உப்பன்னா, ஸியா அனுப்பன்னா, ஸியா உப்பாதி³னீ. ஸியா அதீதா, ஸியா அனாக³தா, ஸியா பச்சுப்பன்னா. நிருத்திபடிஸம்பி⁴தா³ பச்சுப்பன்னாரம்மணா; த்³வே படிஸம்பி⁴தா³ ஸியா அதீதாரம்மணா, ஸியா அனாக³தாரம்மணா, ஸியா பச்சுப்பன்னாரம்மணா; அத்த²படிஸம்பி⁴தா³ ஸியா அதீதாரம்மணா, ஸியா அனாக³தாரம்மணா, ஸியா பச்சுப்பன்னாரம்மணா, ஸியா ந வத்தப்³பா³ அதீதாரம்மணாதிபி, அனாக³தாரம்மணாதிபி, பச்சுப்பன்னாரம்மணாதிபி. ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴. நிருத்திபடிஸம்பி⁴தா³ ப³ஹித்³தா⁴ரம்மணா; திஸ்ஸோ படிஸம்பி⁴தா³ ஸியா அஜ்ஜ²த்தாரம்மணா, ஸியா ப³ஹித்³தா⁴ரம்மணா, ஸியா அஜ்ஜ²த்தப³ஹித்³தா⁴ரம்மணா. அனித³ஸ்ஸனஅபடிகா⁴.