3. பஞ்ஹாபுச்ச²கம்

638. சத்தாரி ஜா²னானி – இத⁴ பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி…பே… விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி…பே… பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘‘உபேக்க²கோ ஸதிமா ஸுக²விஹாரீ’’தி ததியம் ஜா²னம் உபஸம்பஜ்ஜ விஹரதி…பே… ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி.

639. சதுன்னம் ஜா²னானம் கதி குஸலா, கதி அகுஸலா, கதி அப்³யாகதா…பே… கதி ஸரணா, கதி அரணா?

1. திகம்

640. ஸியா குஸலா, ஸியா அப்³யாகதா. தீணி ஜா²னானி – ஏத்து²ப்பன்னம் ஸுக²ம் வேத³னம் ட²பேத்வா ஸுகா²ய வேத³னாய ஸம்பயுத்தா, சதுத்த²ம் ஜா²னம் – ஏத்து²ப்பன்னம் அது³க்க²மஸுக²ம் வேத³னம் ட²பேத்வா அது³க்க²மஸுகா²ய வேத³னாய ஸம்பயுத்தம். ஸியா விபாகா, ஸியா விபாகத⁴ம்மத⁴ம்மா, ஸியா நேவவிபாகனவிபாகத⁴ம்மத⁴ம்மா. ஸியா உபாதி³ன்னுபாதா³னியா, ஸியா அனுபாதி³ன்னுபாதா³னியா, ஸியா அனுபாதி³ன்னஅனுபாதா³னியா. ஸியா அஸம்கிலிட்ட²ஸம்கிலேஸிகா, ஸியா அஸம்கிலிட்ட²அஸம்கிலேஸிகா. பட²மம் ஜா²னம் – ஏத்து²ப்பன்னே விதக்கவிசாரே ட²பேத்வா ஸவிதக்கம் ஸவிசாரம், தீணி ஜா²னானி அவிதக்கஅவிசாரா. த்³வே ஜா²னானி – ஏத்து²ப்பன்னம் பீதிம் ட²பேத்வா பீதிஸஹக³தா, தீணி ஜா²னானி – ஏத்து²ப்பன்னம் ஸுக²ம் ட²பேத்வா ஸுக²ஸஹக³தா, சதுத்த²ம் ஜா²னம் – ஏத்து²ப்பன்னம் உபேக்க²ம் ட²பேத்வா உபேக்கா²ஸஹக³தம். நேவ த³ஸ்ஸனேன ந பா⁴வனாய பஹாதப்³பா³. நேவ த³ஸ்ஸனேன ந பா⁴வனாய பஹாதப்³ப³ஹேதுகா. ஸியா ஆசயகா³மினோ, ஸியா அபசயகா³மினோ, ஸியா நேவாசயகா³மினாபசயகா³மினோ. ஸியா ஸேக்கா², ஸியா அஸேக்கா², ஸியா நேவஸேக்க²னாஸேக்கா². ஸியா மஹக்³க³தா, ஸியா அப்பமாணா. தீணி ஜா²னானி ந வத்தப்³பா³ பரித்தாரம்மணாதிபி, மஹக்³க³தாரம்மணாதிபி, ஸியா அப்பமாணாரம்மணா, ஸியா ந வத்தப்³பா³ அப்பமாணாரம்மணாதி; சதுத்த²ம் ஜா²னம் ஸியா பரித்தாரம்மணம், ஸியா மஹக்³க³தாரம்மணம், ஸியா அப்பமாணாரம்மணம்; ஸியா ந வத்தப்³ப³ம் பரித்தாரம்மணந்திபி, மஹக்³க³தாரம்மணந்திபி, அப்பமாணாரம்மணந்திபி. ஸியா மஜ்ஜி²மா, ஸியா பணீதா. ஸியா ஸம்மத்தனியதா, ஸியா அனியதா. தீணி ஜா²னானி ந மக்³கா³ரம்மணா, ஸியா மக்³க³ஹேதுகா, ஸியா மக்³கா³தி⁴பதினோ, ஸியா ந வத்தப்³பா³ மக்³க³ஹேதுகாதிபி, மக்³கா³தி⁴பதினோதிபி; சதுத்த²ம் ஜா²னம் ஸியா மக்³கா³ரம்மணம், ஸியா மக்³க³ஹேதுகம், ஸியா மக்³கா³தி⁴பதி, ஸியா ந வத்தப்³ப³ம் மக்³கா³ரம்மணந்திபி, மக்³க³ஹேதுகந்திபி மக்³கா³தி⁴பதீதிபி. ஸியா உப்பன்னா, ஸியா அனுப்பன்னா, ஸியா உப்பாதி³னோ. ஸியா அதீதா, ஸியா அனாக³தா, ஸியா பச்சுப்பன்னா. தீணி ஜா²னானி ந வத்தப்³பா³ அதீதாரம்மணாதிபி, அனாக³தாரம்மணாதிபி, பச்சுப்பன்னாரம்மணாதிபி; சதுத்த²ம் ஜா²னம் ஸியா அதீதாரம்மணம், ஸியா அனாக³தாரம்மணம், ஸியா பச்சுப்பன்னாரம்மணம், ஸியா ந வத்தப்³ப³ம் அதீதாரம்மணந்திபி, அனாக³தாரம்மணந்திபி, பச்சுப்பன்னாரமணந்திபி. ஸியா அஜ்ஜ²த்தா, ஸியா ப³ஹித்³தா⁴, ஸியா அஜ்ஜ²த்தப³ஹித்³தா⁴. தீணி ஜா²னானி ப³ஹித்³தா⁴ரம்மணா, சதுத்த²ம் ஜா²னம் ஸியா அஜ்ஜ²த்தாரம்மணம், ஸியா ப³ஹித்³தா⁴ரம்மணம், ஸியா அஜ்ஜ²த்தப³ஹித்³தா⁴ரம்மணம், ஸியா ந வத்தப்³ப³ம் அஜ்ஜ²த்தாரம்மணந்திபி, ப³ஹித்³தா⁴ரம்மணந்திபி, அஜ்ஜ²த்தப³ஹித்³தா⁴ரம்மணந்திபி. அனித³ஸ்ஸனஅப்படிகா⁴.

2. து³கம்

641. ந ஹேதூ, ஸஹேதுகா, ஹேதுஸம்பயுத்தா, ந வத்தப்³பா³ ‘‘ஹேதூ சேவ ஸஹேதுகா சா’’தி, ஸஹேதுகா சேவ ந ச ஹேதூ, ந வத்தப்³பா³ ‘‘ஹேதூ சேவ ஹேதுஸம்பயுத்தா சா’’தி, ஹேதுஸம்பயுத்தா சேவ ந ச ஹேதூ, ந ஹேதூ ஸஹேதுகா.

ஸப்பச்சயா, ஸங்க²தா, அனித³ஸ்ஸனா, அப்படிகா⁴, அரூபா, ஸியா லோகியா, ஸியா லோகுத்தரா, கேனசி விஞ்ஞேய்யா, கேனசி ந விஞ்ஞேய்யா.

நோ ஆஸவா, ஸியா ஸாஸவா, ஸியா அனாஸவா, ஆஸவவிப்பயுத்தா, ந வத்தப்³பா³ ‘‘ஆஸவா சேவ ஸாஸவா சா’’தி, ஸியா ஸாஸவா சேவ நோ ச ஆஸவா, ஸியா ந வத்தப்³பா³ ‘‘ஸாஸவா சேவ நோ ச ஆஸவா’’தி. ந வத்தப்³பா³ ‘‘ஆஸவா சேவ ஆஸவஸம்பயுத்தா சாதி’’பி, ஆஸவஸம்பயுத்தா சேவ நோ ச ஆஸவாதிபி. ஸியா ஆஸவவிப்பயுத்தா ஸாஸவா, ஸியா ஆஸவவிப்பயுத்தா அனாஸவா.

நோ ஸம்யோஜனா…பே… நோ க³ந்தா²…பே… நோ ஓகா⁴…பே… நோ யோகா³…பே… நோ நீவரணா…பே… நோ பராமாஸா…பே… ஸாரம்மணா, நோ சித்தா, சேதஸிகா, சித்தஸம்பயுத்தா, சித்தஸம்ஸட்டா², சித்தஸமுட்டா²னா, சித்தஸஹபு⁴னோ, சித்தானுபரிவத்தினோ, சித்தஸம்ஸட்ட²ஸமுட்டா²னா, சித்தஸம்ஸட்ட²ஸமுட்டா²னஸஹபு⁴னோ, சித்தஸம்ஸட்ட²ஸமுட்டா²னானுபரிவத்தினோ, பா³ஹிரா, நோ உபாதா³, ஸியா உபாதி³ன்னா, ஸியா அனுபாதி³ன்னா.

நோ உபாதா³னா…பே… நோ கிலேஸா…பே… ந த³ஸ்ஸனேன பஹாதப்³பா³, ந பா⁴வனாய பஹாதப்³பா³, ந த³ஸ்ஸனேன பஹாதப்³ப³ஹேதுகா, ந பா⁴வனாய பஹாதப்³ப³ஹேதுகா. பட²மம் ஜா²னம் – ஏத்து²ப்பன்னம் விதக்கம் ட²பேத்வா ஸவிதக்கம், தீணி ஜா²னானி அவிதக்கா. பட²மம் ஜா²னம் – ஏத்து²ப்பன்னம் விசாரம் ட²பேத்வா ஸவிசாரம், தீணி ஜா²னானி அவிசாரா. த்³வே ஜா²னானி – ஏத்து²ப்பன்னம் பீதிம் ட²பேத்வா ஸப்பீதிகா, த்³வே ஜா²னானி அப்பீதிகா. த்³வே ஜா²னானி – ஏத்து²ப்பன்னம் பீதிம் ட²பேத்வா பீதிஸஹக³தா, த்³வே ஜா²னானி ந பீதிஸஹக³தா. தீணி ஜா²னானி – ஏத்து²ப்பன்னம் ஸுக²ம் ட²பேத்வா ஸுக²ஸஹக³தா, சதுத்த²ம் ஜா²னம் ந ஸுக²ஸஹக³தம். சதுத்த²ம் ஜா²னம் – ஏத்து²ப்பன்னம் உபேக்க²ம் ட²பேத்வா உபேக்கா²ஸஹக³தம், தீணி ஜா²னானி உபேக்கா²ஸஹக³தா, ந காமாவசரா, ஸியா ரூபாவசரா, ஸியா ந ரூபாவசரா, தீணி ஜா²னானி ந அரூபாவசரா, சதுத்த²ம் ஜா²னம் ஸியா அரூபாவசரம், ஸியா ந அரூபாவசரம், ஸியா பரியாபன்னா, ஸியா அபரியாபன்னா, ஸியா நிய்யானிகா, ஸியா அனிய்யானிகா, ஸியா நியதா, ஸியா அனியதா, ஸியா ஸஉத்தரா, ஸியா அனுத்தரா, அரணாதி.

பஞ்ஹாபுச்ச²கம்.

ஜா²னவிப⁴ங்கோ³ நிட்டி²தோ.