7. ஸத்தமவக்³கோ³

(72) 10. விபாகோ விபாகத⁴ம்மத⁴ம்மோதிகதா²

501. விபாகோ விபாகத⁴ம்மத⁴ம்மோதி? ஆமந்தா. தஸ்ஸ விபாகோ விபாகத⁴ம்மத⁴ம்மோதி? ந ஹேவம் வத்தப்³பே³…பே… தஸ்ஸ விபாகோ விபாகத⁴ம்மத⁴ம்மோதி? ஆமந்தா. தஸ்ஸ தஸ்ஸேவ நத்தி² து³க்க²ஸ்ஸ அந்தகிரியா நத்தி² வட்டுபச்சே²தோ³ நத்தி² அனுபாதா³பரினிப்³பா³னந்தி? ந ஹேவம் வத்தப்³பே³…பே….

விபாகோ விபாகத⁴ம்மத⁴ம்மோதி? ஆமந்தா. விபாகோதி வா விபாகத⁴ம்மத⁴ம்மோதி வா விபாகத⁴ம்மத⁴ம்மோதி வா விபாகோதி வா ஏஸேஸே ஏகட்டே² ஸமே ஸமபா⁴கே³ தஜ்ஜாதேதி? ந ஹேவம் வத்தப்³பே³…பே….

விபாகோ விபாகத⁴ம்மத⁴ம்மோதி? ஆமந்தா. விபாகோ ச விபாகத⁴ம்மத⁴ம்மோ ச விபாகத⁴ம்மத⁴ம்மோ ச விபாகோ ச ஸஹக³தா ஸஹஜாதா ஸம்ஸட்டா² ஸம்பயுத்தா ஏகுப்பாதா³ ஏகனிரோதா⁴ ஏகவத்து²கா ஏகாரம்மணாதி? ந ஹேவம் வத்தப்³பே³…பே….

விபாகோ விபாகத⁴ம்மத⁴ம்மோதி? ஆமந்தா. தஞ்ஞேவ அகுஸலம் ஸோ அகுஸலஸ்ஸ விபாகோ, தஞ்ஞேவ குஸலம் ஸோ குஸலஸ்ஸ விபாகோதி? ந ஹேவம் வத்தப்³பே³…பே….

விபாகோ விபாகத⁴ம்மத⁴ம்மோதி? ஆமந்தா. யேனேவ சித்தேன பாணம் ஹனதி தேனேவ சித்தேன நிரயே பச்சதி, யேனேவ சித்தேன தா³னம் தே³தி தேனேவ சித்தேன ஸக்³கே³ மோத³தீதி? ந ஹேவம் வத்தப்³பே³…பே….

502. ந வத்தப்³ப³ம் – ‘‘விபாகோ விபாகத⁴ம்மத⁴ம்மோ’’தி? ஆமந்தா. நனு விபாகா சத்தாரோ க²ந்தா⁴ அரூபினோ அஞ்ஞமஞ்ஞபச்சயாதி? ஆமந்தா. ஹஞ்சி விபாகா சத்தாரோ க²ந்தா⁴ அரூபினோ அஞ்ஞமஞ்ஞபச்சயா, தேன வத ரே வத்தப்³பே³ – ‘‘விபாகோ விபாகத⁴ம்மத⁴ம்மோ’’தி.

விபாகோ விபாகத⁴ம்மத⁴ம்மோதிகதா² நிட்டி²தா.

ஸத்தமவக்³கோ³.

தஸ்ஸுத்³தா³னம் –

ஸங்க³ஹோ, ஸம்பயுத்தோ, சேதஸிகோ த⁴ம்மோ, சேதஸிகம் தா³னம், பரிபோ⁴க³மயம் புஞ்ஞம் வட்³ட⁴தி, இதோ தி³ன்னேன தத்த² யாபேந்தி, பத²வீ கம்மவிபாகோ, ஜராமரணம் விபாகோ, நத்தி² அரியத⁴ம்மவிபாகோ, விபாகோ விபாகத⁴ம்மத⁴ம்மோதி.