9. ருக்க²மூலிகங்க³கதா²வண்ணனா

32. ச²ன்னந்தி இட்ட²காச²த³னாதீ³ஹி சா²தி³தம், ஆவஸத²ந்தி அத்தோ². ஸீமந்தரிகருக்கோ²தி த்³வின்னம் ராஜூனம் ரஜ்ஜஸீமாய டி²தருக்கோ². தத்த² ஹி தேஸம் ராஜூனம் ப³லகாயோ உபக³ந்த்வா அந்தரந்தரா யுத்³த⁴ம் கரேய்ய, சோராபி பாரிபந்தி²கா ஸமோஸரந்தா பி⁴க்கு²ஸ்ஸ ஸுகே²ன நிஸீதி³தும் ந தே³ந்தி. சேதியருக்கோ² ‘‘தே³வதாதி⁴ட்டி²தோ’’தி மனுஸ்ஸேஹி ஸம்மதருக்கோ² பூஜேதும் உபக³தேஹி மனுஸ்ஸேஹி அவிவித்தோ ஹோதி. நிய்யாஸருக்கோ² ஸஜ்ஜருக்கா²தி³. வக்³கு³லிருக்கோ² வக்³கு³லினிஸேவிதோ. ஸீமந்தரிகருக்கா²த³யோ ஸபரிஸ்ஸயா, து³ல்லப⁴விவேகா சாதி ஆஹ ‘‘இமே ருக்கே² விவஜ்ஜேத்வா’’தி. பண்ணஸடந்தி ருக்க²தோ பதிதபண்ணம். படிச்ச²ன்னே டா²னே நிஸீதி³தப்³ப³ம் ருக்க²மூலிகபா⁴வஸ்ஸ படிச்சா²த³னத்த²ம். ச²ன்னே வாஸகப்பனா த⁴ம்மஸ்ஸவனாதீ³னமத்தா²யபி ஹோதி. தஸ்மா ‘‘ஜானித்வா அருணம் உட்டா²பிதமத்தே’’தி வுத்தம்.

அபி⁴ண்ஹம் தருபண்ணவிகாரத³ஸ்ஸனேனாதி அபி⁴க்க²ணம் தரூஸு, தரூனம் வா பண்ணேஸு விகாரஸ்ஸ க²ணப⁴ங்க³ஸ்ஸ த³ஸ்ஸனேன. ஸேனாஸனமச்சே²ரகம்மாராமதானந்தி ஆவாஸமச்ச²ரியனவகம்மரதபா⁴வானம். தே³வதாஹீதி ருக்க²தே³வதாஹி. தாபி ஹி ருக்க²ட்ட²விமானேஸு வஸந்தியோ ருக்கே²ஸு வஸந்தி. அயம்பி ருக்கே²தி ஸஹவாஸிதா. வண்ணிதோதி ‘‘அப்பானி சேவா’’திஆதி³னா பஸம்ஸிதோ. ‘‘ருக்க²மூலஸேனாஸனம் நிஸ்ஸாய பப்³ப³ஜ்ஜா’’தி (மஹாவ. 73, 128) ஏவம் நிஸ்ஸயோதி ச பா⁴ஸிதோ. அபி⁴ரத்தானி தருணகாலே, நீலானி மஜ்ஜி²மகாலே, பண்டூ³னி ஜிண்ணகாலே. பதிதானி மிலாயனவஸேன. ஏவம் பஸ்ஸந்தோ தருபண்ணானி பச்சக்க²தோ ஏவ நிச்சஸஞ்ஞம் பனூத³தி பஜஹதி, அனிச்சஸஞ்ஞா ஏவஸ்ஸ ஸண்டா²தி. யஸ்மா ப⁴க³வதோ ஜாதிபோ³தி⁴த⁴ம்மசக்கபவத்தனபரினிப்³பா³னானி ருக்க²மூலேயேவ ஜாதானி, தஸ்மா வுத்தம் ‘‘பு³த்³த⁴தா³யஜ்ஜம் ருக்க²மூல’’ந்தி.

இதி ருக்க²மூலிகங்க³கதா²வண்ணனா.