10. அப்³போ⁴காஸிகங்க³கதா²வண்ணனா

33. ‘‘ருக்க²மூலம் படிக்கி²பாமீ’’தி ஏத்தகே வுத்தே ச²ன்னம் அப்படிக்கி²த்தமேவ ஹோதீதி ‘‘ச²ன்னஞ்ச ருக்க²மூலஞ்ச படிக்கி²பாமீ’’தி வுத்தம். து⁴தங்க³ஸ்ஸ ஸப்³ப³ஸோ படியோகி³படிக்கே²பேன ஹி ஸமாதா³னம் இஜ்ஜ²தி, நோ அஞ்ஞதா²தி. ‘‘த⁴ம்மஸ்ஸவனாயா’’தி இமினாவ த⁴ம்மம் கதே²ந்தேனாபி உபோஸத²தி³வஸாதீ³ஸு ஸுணந்தானம் சித்தானுரக்க²ணத்த²ம் தேஹி யாசிதேன ச²ன்னம் பவிஸிதும் வட்டதி, த⁴ம்மம் பன கதே²த்வா அப்³போ⁴காஸோவ க³ந்தப்³போ³. ருக்க²மூலிகஸ்ஸாபி ஏஸேவ நயோ. உபோஸத²த்தா²யாதி உபோஸத²கம்மாய. உத்³தி³ஸந்தேனாதி பரேஸம் உத்³தே³ஸம் தே³ந்தேன. உத்³தி³ஸாபேந்தேனாதி ஸயம் உத்³தே³ஸம் க³ண்ஹந்தேன. மக்³க³மஜ்ஜே² டி²தம் ஸாலந்தி ஸீஹளதீ³பே விய மக்³கா³ அனோக்கம்ம உஜுகமேவ பவிஸிதப்³ப³ஸாலம். வேகே³ன க³ந்தும் ந வட்டதி அஸாருப்பத்தா. யாவ வஸ்ஸூபரமா ட²த்வா க³ந்தப்³ப³ம், ந தாவ து⁴தங்க³பே⁴தோ³ ஹோதீதி அதி⁴ப்பாயோ.

ருக்க²ஸ்ஸ அந்தோ நாம ருக்க²மூலம். பப்³ப³தஸ்ஸ பன பப்³பா⁴ரஸதி³ஸோ பப்³ப³தபதே³ஸோ. அச்ச²ன்னமரியாத³ந்தி யதா² வஸ்ஸோத³கம் அந்தோ ந பவிஸதி, ஏவம் ச²த³னஸங்கே²பேன உபரி அகதமரியாத³ம். அந்தோ பன பப்³பா⁴ரஸ்ஸ வஸ்ஸோத³கம் பவிஸதி சே, அப்³போ⁴காஸஸங்கே²பமேவாதி தத்த² பவிஸிதும் வட்டதி. ஸாகா²மண்ட³போதி ருக்க²ஸாகா²ஹி விரளச்ச²ன்னமண்ட³போ. பீட²படோ க²லித்த²த்³த⁴ஸாடகோ.

பவிட்ட²க்க²ணே து⁴தங்க³ம் பி⁴ஜ்ஜதி யதா²வுத்தபப்³பா⁴ராதி³கே ட²பேத்வாதி அதி⁴ப்பாயோ. ஜானித்வாதி த⁴ம்மஸ்ஸவனாதி³அத்த²ம் ச²ன்னம் ருக்க²மூலம் பவிஸித்வா நிஸின்னோ ‘‘இதா³னி அருணோ உட்ட²ஹதீ’’தி ஜானித்வா. ருக்க²மூலேபி கத்த²சி அத்தே²வ நிவாஸபா²ஸுகதாதி ஸியா தத்த² ஆஸங்க³புப்³ப³கோ ஆவாஸபலிபோ³தோ⁴, ந பன அப்³போ⁴காஸேதி இதே⁴வ ஆவாஸபலிபோ³து⁴பச்சே²தோ³ ஆனிஸம்ஸோ வுத்தோ. பஸம்ஸாயானுரூபதாதி அனிகேதாதி வுத்தபஸம்ஸாய அனாலயபா⁴வேன அனுச்ச²விகதா. நிஸ்ஸங்க³தாதி ஆவாஸபரிக்³க³ஹாபா⁴வேனேவ தத்த² நிஸ்ஸங்க³தா. அஸுகதி³ஸாய வஸனட்டா²னம் நத்தி², தஸ்மா தத்த² க³ந்தும் நேவ ஸக்காதி ஏதி³ஸஸ்ஸ பரிவிதக்கஸ்ஸ அபா⁴வதோ சாதுத்³தி³ஸோ. மிக³பூ⁴தேனாதி பரிக்³க³ஹாபா⁴வேன மிக³ஸ்ஸ விய பூ⁴தேன. ஸிதோதி நிஸ்ஸிதோ. விந்த³தீதி லப⁴தி.

இதி அப்³போ⁴காஸிகங்க³கதா²வண்ணனா.