6. பத்தபிண்டி³கங்க³கதா²வண்ணனா

29. அப்படிகூலம் கத்வா பு⁴ஞ்ஜிதும் வட்டதி படிகூலஸ்ஸ பு⁴த்தஸ்ஸ அக³ண்ஹனம்பி ஸியாதி அதி⁴ப்பாயோ. பமாணயுத்தமேவ க³ண்ஹிதப்³ப³ந்தி ‘‘ஏகபா⁴ஜனமேவ க³ண்ஹாமீ’’தி ப³ஹும் க³ஹேத்வா ந ச²ட்³டே³தப்³ப³ம். நானாரஸதண்ஹாவினோத³னந்தி நானாரஸபோ⁴ஜனே தண்ஹாய வினோத³னம். அத்ர அத்ர நானாபா⁴ஜனே டி²தே நானாரஸே இச்சா² ஏதஸ்ஸாதி அத்ரிச்சோ², தஸ்ஸ பா⁴வோ அத்ரிச்ச²தா, தஸ்ஸா அத்ரிச்ச²தாய பஹானம். ஆஹாரே பயோஜனமத்தத³ஸ்ஸிதாதி அஸம்பி⁴ன்னனானாரஸே கே³த⁴ம் அகத்வா ஆஹாரே ஸத்தா²ரா அனுஞ்ஞாதபயோஜனமத்தத³ஸ்ஸிதா. விஸும் விஸும் பா⁴ஜனேஸு டி²தானி ப்³யஞ்ஜனானி க³ண்ஹதோ தத்த² தத்த² ஸாபோ⁴க³தாய ஸியா விக்கி²த்தபோ⁴ஜிதா, ந ததா² இமஸ்ஸ ஏகபத்தக³தஸஞ்ஞினோதி வுத்தம் ‘‘அவிக்கி²த்தபோ⁴ஜிதா’’தி. ஓக்கி²த்தலோசனோதி பத்தஸஞ்ஞிதாய ஹேட்டா²கி²த்தசக்கு². பரிபு⁴ஞ்ஜேய்யாதி பரிபு⁴ஞ்ஜிதும் ஸக்குணேய்ய.

இதி பத்தபிண்டி³கங்க³கதா²வண்ணனா.