3. பிண்ட³பாதிகங்க³கதா²வண்ணனா

26. அதிரேகலாப⁴ந்தி ‘‘பிண்டி³யாலோபபோ⁴ஜனம் நிஸ்ஸாயா’’தி (மஹாவ. 73, 128) ஏவம் வுத்தபி⁴க்கா²ஹாரலாப⁴தோ அதிரேகலாப⁴ம், ஸங்க⁴ப⁴த்தாதி³ந்தி அத்தோ². ஸகலஸ்ஸ ஸங்க⁴ஸ்ஸ தா³தப்³ப³ப⁴த்தம் ஸங்க⁴ப⁴த்தம். கதிபயே பி⁴க்கூ² உத்³தி³ஸித்வா தா³தப்³ப³ப⁴த்தம் உத்³தே³ஸப⁴த்தம். ஏகஸ்மிம் பக்கே² ஏகதி³வஸம் தா³தப்³ப³ப⁴த்தம் பக்கி²கம். உபோஸதே² உபோஸதே² தா³தப்³ப³ப⁴த்தம் உபோஸதி²கம். படிபத³தி³வஸே தா³தப்³ப³ப⁴த்தம் பாடிபதி³கம். விஹாரம் உத்³தி³ஸ்ஸ தா³தப்³ப³ப⁴த்தம் விஹாரப⁴த்தம். து⁴ரகே³ஹே ஏவ ட²பேத்வா தா³தப்³ப³ப⁴த்தம் து⁴ரப⁴த்தம். கா³மவாஸீஆதீ³ஹி வாரேன தா³தப்³ப³ப⁴த்தம் வாரகப⁴த்தம். ‘‘ஸங்க⁴ப⁴த்தம் க³ண்ஹதா²திஆதி³னா’’தி ஆதி³-ஸத்³தே³ன உத்³தே³ஸப⁴த்தாதி³ம் ஸங்க³ண்ஹாதி. ஸாதி³தும் வட்டந்தீதி பி⁴க்கா²பரியாயேன வுத்தத்தா. பே⁴ஸஜ்ஜாதி³படிஸம்யுத்தா நிராமிஸஸலாகா. யாவகாலிகவஜ்ஜாதி ச வத³ந்தி. விஹாரே பக்கப⁴த்தம்பீதி உபாஸகா இதே⁴வ ப⁴த்தம் பசித்வா ‘‘ஸப்³பே³ஸம் அய்யானம் த³ஸ்ஸாமா’’தி விஹாரேயேவ ப⁴த்தம் ஸம்பாதே³ந்தி, தம் பிண்ட³பாதிகானம்பி வட்டதி. ஆஹரித்வாதி பத்தம் க³ஹேத்வா கே³ஹதோ ஆனேத்வா. தம் தி³வஸம் நிஸீதி³த்வாதி ‘‘மா, ப⁴ந்தே, பிண்டா³ய சரித்த², விஹாரேயேவ பி⁴க்கா² ஆனீயதீ’’தி வத³ந்தானம் ஸம்படிச்ச²னேன தம் தி³வஸம் நிஸீதி³த்வா. ஸேரிவிஹாரஸுக²ந்தி அபராயத்தவிஹாரிதாஸுக²ம். அரியவம்ஸோதி அரியவம்ஸஸுத்தபடிஸம்யுத்தா (தீ³. நி. 3.309; அ. நி. 4.28) த⁴ம்மகதா². த⁴ம்மரஸந்தி த⁴ம்மூபஸஞ்ஹிதம் பாமோஜ்ஜாதி³ரஸம்.

ஜங்க⁴ப³லம் நிஸ்ஸாய பிண்ட³பரியேஸனதோ கோஸஜ்ஜனிம்மத்³த³னதா. ‘‘யதா²பி ப⁴மரோ புப்ப²’’ந்திஆதி³னா (த⁴. ப. 49; நேத்தி. 123) வுத்தவிதி⁴னா ஆஹாரபரியேஸனதோ பரிஸுத்³தா⁴ஜீவதா. நிச்சம் அந்தரக⁴ரம் பவிஸந்தஸ்ஸேவ ஸுப்படிச்ச²ன்னக³மனாத³யோ ஸேகி²யத⁴ம்மா ஸம்பஜ்ஜந்தீதி ஸேகி²யபடிபத்திபூரணம். படிக்³க³ஹணே மத்தஞ்ஞுதாய, ஸம்ஸட்ட²விஹாராபா⁴வதோ ச அபரபோஸிதா. குலே குலே அப்பகஅப்பகபிண்ட³க³ஹணேன பரானுக்³க³ஹகிரியா. அந்திமாய ஜீவிகாய அவட்டா²னேன மானப்பஹானம். வுத்தஞ்ஹேதம் ‘‘அந்தமித³ம், பி⁴க்க²வே, ஜீவிகானம், யதி³த³ம் பிண்டோ³ல்ய’’ந்திஆதி³ (இதிவு. 91; ஸம். நி. 3.80). மிஸ்ஸகப⁴த்தேன யாபனதோ ரஸதண்ஹானிவாரணம். நிமந்தனாஸம்படிச்ச²னதோ க³ணபோ⁴ஜனாதி³ஸிக்கா²பதே³ஹி அனாபத்திதா.

அப்படிஹதவுத்திதாய சதூஸுபி தி³ஸாஸு வத்தனட்டே²ன சாதுத்³தி³ஸோ. ஆஜீவஸ்ஸ விஸுஜ்ஜ²தீதி ஆஜீவோ அஸ்ஸ விஸுஜ்ஜ²தி. அத்தப⁴ரஸ்ஸாதி அப்பானவஜ்ஜஸுலப⁴ரூபேஹி பச்சயேஹி அத்தனோ ப⁴ரணதோ அத்தப⁴ரஸ்ஸ. ததோ ஏவ ஏகவிஹாரிதாய ஸத்³தி⁴விஹாரிகாதீ³னம்பி அஞ்ஞேஸம் அபோஸனதோ அனஞ்ஞபோஸினோ. பத³த்³வயேனாபி காயபரிஹாரிகேன சீவரேன குச்சி²பரிஹாரிகேன பிண்ட³பாதேன விசரணதோ ஸல்லஹுகவுத்திதம், ஸுப⁴ரதம், பரமஅப்பிச்ச²தம், ஸந்துட்டி²ஞ்ச த³ஸ்ஸேதி. தே³வாபி பிஹயந்தி தாதி³னோதி தாதி³ஸஸ்ஸ பு⁴ஸம் அதிவிய ஸந்தகாயவசீமனோகம்மதாய உபஸந்தஸ்ஸ பரமேன ஸதினேபக்கேன ஸமன்னாக³மதோ ஸப்³ப³காலம் ஸதிமதோ பிண்ட³பாதிகஸ்ஸ பி⁴க்கு²ஸ்ஸ ஸக்காத³யோ தே³வாபி பிஹயந்தி பத்தே²ந்தி. தஸ்ஸ ஸீலாதி³கு³ணேஸு ப³ஹுமானம் உப்பாதே³ந்தா ஆத³ரம் ஜனேந்தி, பகே³வ மனுஸ்ஸா. ஸசே ஸோ லாப⁴ஸக்காரஸிலோகஸன்னிஸ்ஸிதோ ந ஹோதி, தத³பி⁴கங்கீ² ந ஹோதீதி அத்தோ².

இதி பிண்ட³பாதிகங்க³கதா²வண்ணனா.